Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) SEPTEMBRE 2015

Mo yeke gi ti kpengba tongana Christ?

Mo yeke gi ti kpengba tongana Christ?

“Yo ti lingbi na yongo so Christ ayo na ni kue.”—AÉPH. 4:13.

ABIA: 69, 70

1, 2. Nyen la aChrétien kue azia na gbele ala? Mû mbeni tapande.

TONGANA mbeni wali ague na gara ti vo aye tongana mango wala papaye, lo yeke gi ti vo pëpe gi so akono wala so ngere ni ayeke kete. Me, lo yeke gi ti vo so afun pendere, so tere ni ayeke nzoni nga so zo alingbi ti te ni. Lo ye mbeni mango wala papaye so akpengba awe.

2 Legeoko nga, Nzapa aye ti tene awakua ti lo akpengba na lege ti yingo. Ye so e aChrétien kue e zia na gbele e a yeke ti ga awakua ti Jéhovah so akpengba na lege ti yingo. Même tongana mbeni zo amanda ye na ndo ti Jéhovah nga lo mû desizion ti wara batême, lo yeke ngbâ lakue ti kpengba songo ti lo na Jéhovah. Bazengele Paul asara lettre na aChrétien ti Éphèse ti fa na ala so ala yeke na bezoin ti ga aChrétien so akpengba na lege ti yingo. Lo wa ala ti gi ti “ga oko na yâ ti mabe nga na yâ ti tâ hingango ye na ndo ti Molenge ti Nzapa, ti ga tongana mbeni koli so akpengba kue awe, ti yo ti lingbi na yongo so Christ ayo na ni kue”.—aÉph. 4:13.

3. Nyen la ayeke lani na yâ ti congrégation ti Éphèse so a lingbi ti bâ nga ni laso na popo ti wakua ti Jéhovah?

3 Na ngoi so Paul asara lettre so, congrégation ti Éphèse abâ gigi  aninga kete awe. Adisciple mingi so ayeke lani na yâ ti congrégation ni akpengba na lege ti yingo. Ye oko, ambeni ayeke lani na bezoin ti ga aChrétien so akpengba na lege ti yingo. A yeke tongaso nga laso na popo ti aTémoin ti Jéhovah. Aita mingi asara na Jéhovah teti angu mingi na ala ga aChrétien so akpengba na lege ti yingo. Me ti tâ tënë ni, a yeke ala kue pëpe si asara tongaso. Na tapande, afini zo saki na saki so ayeke wara batême ngu oko oko ayeke na bezoin ti sara ngangu ti ga aChrétien so akpengba na lege ti yingo. Ka mo?—aCol. 2:6, 7.

TONGANA NYEN LA MBENI CHRÉTIEN ALINGBI TI MAÏ?

4, 5. Aye wa la alingbi ti sara si aChrétien so akpengba na lege ti yingo ayeke nde nde? Nyen la ala kue ayeke na ni? (Bâ foto so ayeke na tongo nda ti article ni.)

4 Abengo mango wala papaye so a yeke kä na gara ayeke nde nde. Ye oko, ambeni ye ayeke dä so ayeke na tere ni so afa so akpengba awe. A-Chrétien so akpengba na lege ti yingo ayeke nga tongaso. Ala kue ayeke gi legeoko ape. Ala londo na akodoro nde nde nga ndo so ala londo dä ayeke nde nde. Ngu ti ala ayeke nde nde nga aye so ala ye wala ala ke ayeke nde nde. Me, ambeni sarango ye ayeke dä so ala kue ayeke na ni so afa so ala yeke aChrétien so akpengba na lege ti yingo. Ambeni sarango ye ni ayeke so wa?

5 Mbeni Chrétien so akpengba na lege ti yingo ayeke sara ye tongana ti Jésus nga lo yeke “mû tâ gi peko ti gere ti lo mbilimbili.” (1 Pi. 2:21). Jésus afa so a yeke kota ye mingi ti tene e ndoye Jéhovah na bê ti e kue, na âme ti e kue, na bibe ti e kue, nga e ndoye mba ti e tongana e wani (Mat. 22:37-39). Mbeni Chrétien so akpengba na lege ti yingo ayeke sara kue ti sara ye alingbi na wango so. Na yâ ti fini ti lo, lo yeke fa so ye so agbu bê ti lo mingi ayeke songo ti lo na Jéhovah nga na yengo so lo ye na amba ti lo.

A-Chrétien so akpengba na lege ti yingo alingbi ti sara tere ti ala kete tongana ti Jésus na lege so ala yeke mû maboko na amaseka so ayeke mû li ni (Bâ paragraphe 6)

6, 7. (a) Ambeni sarango ye wa la ayeke hinga na mbeni Chrétien so akpengba na lege ti yingo? (b) A yeke nzoni e hunda tere ti e na tënë wa?

6 Ndoye ayeke gi mbeni oko ti asarango ye so mbeni Chrétien so akpengba na lege ti yingo ayeke na ni (aGal. 5:22, 23). A lingbi nga lo sara ye na ngangu pëpe, lo kanga nzara ti bê nga lo duti na kangango bê ti ku. Asarango ye so alingbi ti mû maboko na lo ti hon ndo ti akpale sân ti sara ngonzo nga ti duti lakue na beku même tongana ambeni ye asara si bê ti lo anze. Na ngoi so lo yeke manda ye lo wani, lo yeke gi lakue afango ye ti Bible so alingbi ti mû maboko na lo ti hinga popo ti nzoni na sioni. Na pekoni, na ngoi so lo yeke mû adesizion, adesizion ti lo ni ayeke fa polele so lo yeke mbeni Chrétien so akpengba na lege ti yingo. Na tapande, lo yeke mä yingo-ti-hinga ti lo so Bible afa lege na ni. Mbeni Chrétien so akpengba na lege ti yingo ayeke fa so lo sara tere ti lo kete na lege so lo hinga so andia ti Jéhovah nga na afango ye ti lo ayeke lakue nzoni ahon ti lo. * Lo yapu na fango nzoni tënë nga lo yeke sara kue ti tene aita aduti beoko na yâ ti congrégation.

7 Atâa e sara na Jéhovah aninga wala pëpe, e oko oko kue e lingbi ti hunda tere ti e na tënë so: ‘Ambeni ye ayeke dä so a lingbi mbi sara ti sara ye tâ gi tongana ti Jésus tongaso si mbi ngbâ ti maï ti ga mbeni Chrétien so akpengba na lege ti yingo?’

“KPENGBANGO KOBE AYEKE TI ABIAZO”

8. Nyen la afa so Jésus ahinga lani Mbeti Nzapa nga lo mä yâ ni nzoni?

8 Jésus Christ ahinga lani Mbeti ti Nzapa nzoni mingi. Même na ngoi so lo yeke lani gi na ngu 12, lo sara kua na Mbeti ti Nzapa na ngoi so lo sara lisoro na awafango ye na  yâ ti temple. “Ala kue so ayeke mä lo, bê ti ala ayeke pika lakue ndali ti aye so lo hinga nga ndali ti atënë so lo yeke kiri na ni.” (Luc 2:46, 47). Mbeni lâ, na ngoi so Jésus ayeke fa tënë, lo sara kua nzoni na Mbeti ti Nzapa ti kanga yanga ti awato ti lo.—Mat. 22:41-46.

9. (a) Aprogramme ti mandango ye wa la mbeni Chrétien so akpengba na lege ti yingo ayeke na ni? (b) E yeke manda Bible ngbanga ti nyen?

9 Mbeni ita so aye ti ga mbeni Chrétien so akpengba na lege ti yingo ayeke sara ye tongana ti Jésus nga lo yeke sara kue ti mä yâ ti Bible nzoni mingi. Lo yeke gi lakue ti mä yâ ti atâ tënë ti Bible so ndani alï mingi ndali ti so lo hinga so “kpengbango kobe ayeke ti abiazo”. (aHéb. 5:14). A yeke polele so mbeni Chrétien so akpengba na lege ti yingo aye ti wara “tâ hingango ye na ndo ti Molenge ti Nzapa”. (aÉph. 4:13). Hunda tere ti mo: ‘Mbi yeke diko Bible lango oko oko? Mbi yeke na mbeni programme ti mandango ye mbi wani? Mbi yeke na mbeni programme ti vorongo Nzapa na yâ ti sewa yenga oko oko?’ Na ngoi so mo yeke manda Bible, gi ambeni fango ye ti Bible so alingbi ti mû maboko na mo ti hinga apensé ti Jéhovah nga na atënë ti bê ti lo. Na pekoni, sara kua na afango ye so na ngoi so mo yeke mû adesizion. Ye so ayeke mû maboko na mo ti ga nduru mingi na Jéhovah ahon ti kozo.

10. Mbeni Chrétien so akpengba na lege ti yingo abâ andia ti Nzapa nga na afango ye ti lo tongana nyen?

10 Mbeni Chrétien so akpengba na lege ti yingo ahinga so a lingbi lo hinga gi ye na ndo ti Bible ape, me a lingbi lo sara nga ambeni ye nde. Lo hinga nga so a lingbi lo ye andia ti Nzapa nga na afango ye ti lo. Lo yeke fa ni na lege so lo yeke gi ti sara gi ye so bê ti Jéhovah aye ahon ti sara ye so bê ti lo aye. Nga, lo yeke changé sarango ye ti lo nga na bango ndo ti lo. Na ngoi so lo yeke sara achangement so, lo yeke sara ye tongana ti Jésus nga  lo yeke yü fini zo so “a sara lo alingbi na ye so bê ti Nzapa aye na so ague oko na tâ lege ti mbilimbili nga na tâ lege ti dutingo be-ta-zo.” (Diko aÉphésien 4:22-24.) A sû Bible na gbe ti yingo vulu ti Nzapa. Tongaso, na ngoi so mbeni Chrétien ayeke gi ti hinga ye mingi na ndo ti afango ye ti Bible nga lo yeke gi ti ye ni, lo yeke zia si yingo vulu afa lege na bê ti lo nga na apensé ti lo. Ye so ayeke sara si lo yeke ga mbeni Chrétien so akpengba na lege ti yingo.

SARA SI AITA ADUTI BEOKO

11. Nyen la Jésus ahinga lani na ngoi so lo yeke na popo ti asewa ti lo nga na adisciple ti lo?

11 Jésus ayeke lani nzoni-kue. Ye oko, na ngoi so Jésus ayeke lani na sese, lo yeke na popo ti azo so siokpari ayeke na tere ti ala. Babâ na mama ti lo so abata lo nga na aita ti lo ayeke lani na siokpari na tere ti ala. Même adisciple ti lo so ayeke lani nduru mingi na lo asara ye tongana ti azo ti ngoi ni kâ so asara ye na baba nga apensé gi na ala wani. Na tapande, na bï so a fâ lani Jésus, “mbeni ngangu papa alondo nga na popo ti ala ti hinga zo wa na popo ti ala a bâ lo tongana zo so ayeke kota ahon atanga ni kue.” (Luc 22:24). Me Jésus ahinga lani so atâa so siokpari ayeke na tere ti adisciple ti lo, ala lingbi ti ga aChrétien so akpengba na lege ti yingo nga ala lingbi ti sara si beoko aduti na yâ ti congrégation. Na bï ni so, Jésus asambela Babâ ti lo ti yayu ti sara si ala duti beoko, lo tene: “Si ala kue alingbi ti duti oko, legeoko tongana ti so mo, Babâ, mo yeke beoko na mbi na mbi yeke beoko na mo, si ala nga alingbi ti duti beoko na e . . . si ala duti oko tongana ti so e yeke oko.”—Jean 17:21, 22.

12, 13. (a) E so e yeke aChrétien, a yeke ti e ti sara nyen? (b) Nyen la amû maboko na mbeni ita-koli ti duti beoko na aita?

12 Mbeni Chrétien so akpengba na lege ti yingo ayeke sara si aita aduti beoko na yâ ti congrégation. (Diko aÉphésien 4:1-6, 15, 16.) E so e yeke aChrétien, a yeke ti e ti sara si awakua ti Jéhovah ‘abungbi oko amä tere’ nga ti sara si aita kue asara kua maboko na maboko. Bible afa so ti tene aita aduti beoko tongaso, a lingbi ala sara tere ti ala kete. Mbeni Chrétien so akpengba na lege ti yingo ayeke sara tere ti lo kete ti sara kue si aita aduti beoko na yâ ti congrégation même tongana mbeni ita ason bê ti lo. Tongana mbeni ita na yâ ti congrégation asara mbeni ye so ayeke na lege ni ape, mo yeke sara ye tongana nyen? Ka tongana a yeke mo la mbeni ita na yâ ti congrégation ason bê ti mo, mo yeke sara ye tongana nyen? Mo yeke ke ti sara tënë na ita ni? Wala mo yeke gi ti leke songo na popo ti mo na lo? Mbeni Chrétien so akpengba na lege ti yingo ayeke gi ti hon ndo ti akpale ahon ti duti mbeni kpale ndali ti amba ti lo.

13 Gbu li ti mo na ndo ti tapande ti ita-koli so iri ti lo ayeke Uwe. Ândö, lo zia si awokongo ti aita asara si lo yeke na vundu. Na pekoni, lo sara kua na Bible nga na buku Étude perspicace des Écritures ti manda ye na ndo ti David. Ngbanga ti nyen la lo soro ti manda ye na ndo ti David? Uwe atene: “David abâ ambeni wakua ti Jéhovah so asara ye ague nde na ye so Bible afa. Na tapande, Gbia Saül agi lani ti fâ lo, ambeni zo aye lani ti bo lo na tênë nga même wali ti lo ahe lo (1 Sam. 19:9-11; 30:1-6; 2 Sam. 6:14-22). Me atâa aye kue so azo agi lani ti sara na David, lo ngbâ lakue ti ye Jéhovah. Nga, David asara ye na nzoni bê, mbi kue mbi yeke na bezoin ti sara ye tongana lo. Aye so mbi manda na ngoi ti mandango ye ti mbi achangé bango ndo ti mbi na ndo ti awokongo ti amba ti mbi aChrétien. Mbi ngbâ ti bata afaute ti aita na bê ti mbi encore ape. Me, mbi yeke sara kue ti sara si aita aduti beoko na yâ ti congrégation.” Mo kue mo leke na bê ti mo ti sara si aita aduti beoko na yâ ti congrégation?

 SORO AKAMARADE NA POPO TI AZO SO ASARA YE SO BÊ TI NZAPA AYE

14. Mara ti azo wa la Jésus asoro ti ga akamarade ti lo?

14 Jésus asara lani kamarade na azo kue. A nzere lani na akoli, awali, amaseka, ambakoro nga na amolenge ti ga nduru na lo. Me lo yeke soro nzoni azo so ayeke atâ kamarade ti lo. Lo tene na abazengele ti lo so ayeke be-ta-zo, lo tene: “Ala yeke akamarade ti mbi tongana ala sara ye so mbi yeke mû yanga na ala ti sara.” (Jean 15:14). Jésus asoro lani akamarade ti lo na popo ti azo so amû peko ti lo, azo so ayeke be-ta-zo nga so ala sara na Jéhovah na bê ti ala kue. Mo kue mo yeke soro atâ kamarade ti mo na popo ti azo so aye Jéhovah na bê ti ala kue? Ngbanga ti nyen a yeke kota ye?

15. Aye ti nzoni wa la amaseka alingbi ti wara tongana ala sara kamarade na aChrétien so akpengba na lege ti yingo?

15 Chauffengo ti lâ ayeke sara si aye tongana mango wala papaye ayeke be pendere. Legeoko nga, tâ ndoye ti aita alingbi ti mû maboko na e ti kpengba na lege ti yingo. Peut-être mo yeke mbeni maseka so ayeke gi ti hinga ye so mo ye ti sara na yâ ti fini ti mo. Tongana a yeke tongaso, a yeke nzoni mo sara kamarade na aita so aduti be-ta-zo na Jéhovah teti angu mingi nga so asara si aita aduti beoko na yâ ti congrégation. Tongana angu ayeke hon, ala wara peut-être akpale na yâ ti fini ti ala nga peut-être ala wara atara na ngoi so ala yeke voro Jéhovah. Azo tongaso alingbi ti mû maboko na mo ti soro nzoni ye so mo lingbi ti sara na yâ ti fini ti mo. Tongana mo mû ngoi ti sara lisoro na ala, ala lingbi ti mû maboko na mo ti mû anzoni desizion mo wani nga ti ga mbeni Chrétien so akpengba na lege ti yingo.—Diko aHébreu 5:14.

16. Tongana nyen la aita so akpengba na lege ti yingo amû maboko lani na mbeni ita-wali so ayeke maseka?

16 Na tapande, mbeni ita-wali so iri ti lo ayeke Helga adabe ti lo na ye so asi na ngoi so lo yeke na klase ti terminale. Akamarade ti lo ti klase ayeke sara lisoro na ndo ti aye so ala ye ti sara ande. Mingi ti ala aye ti gue na dasendagi tongaso si ala wara mbeni nzoni kua na yâ ti gigi ti ala. Helga asara lisoro na ndo ni na akamarade ti lo ti congrégation. Helga atene: “Mingi ti akamarade ti mbi ayeke lani akota zo ti mbi nga ala mû maboko na mbi mingi. Ala mû maboko na mbi ti mû kua ti ngoi kue. Na pekoni, mbi sara ngu oku na yâ ti kua ti pionnier. Fadeso, angu mingi na pekoni, mbi yeke na ngia mingi so mbi mû lani lâ ti maseka ti mbi ti sara na kua ti Jéhovah. Mbi yeke na mbeni raison oko ti regretté desizion so ape.”

17, 18. Tongana nyen la e lingbi ti voro Jéhovah nzoni mingi?

17 Tongana e gi ti sara ye tongana ti Jésus na yâ ti fini ti e ayeke mû maboko na e ti ga aChrétien so akpengba na lege ti yingo. E yeke ga nduru mingi na Jéhovah nga e yeke duti na nzara ti sara na lo mingi ahon ti kozo. Mbeni wakua ti Jéhovah alingbi ti voro lo nzoni tongana lo kpengba na lege ti yingo. Jésus awa adisciple ti lo, lo tene: “Zia lumière ti ala aza na gbele azo, si azo ni abâ anzoni kusala ti ala na ala mû gloire na Babâ ti ala so ayeke na yayu.”—Mat. 5:16.

18 Tongana ti so e londo ti bâ, mbeni ita so akpengba na lege ti yingo alingbi ti mû maboko mingi na congrégation. A yeke hinga ita tongaso na lege ti fason so lo yeke sara kua na yingo-ti-hinga so Nzapa amû na lo. Tongana nyen la yingo-ti-hinga ti e alingbi ti mû maboko na e ti mû anzoni desizion? Tongana nyen la e lingbi ti bâ yingo-ti-hinga ti amba ti e aChrétien na nene ni? E yeke sara tënë na ndo ni na yâ ti article ti peko.

^ par. 6 Na tapande, a lingbi ti hunda na aita-koli so ayeke ambakoro na so ayeke na akode mingi ti mû na aita-koli so angbâ maseka ambeni kua so lo yeke sara na yâ ti bungbi nga ti mû maboko na ala na yâ ti akua ni so.