Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) AOÛT 2015

Leke tere ti mo laso ti duti na yâ ti fini dunia

Leke tere ti mo laso ti duti na yâ ti fini dunia

“Mû yanga na ala ti sara ye ti nzoni, . . . tongaso si ala gbu fini so ayeke tâ fini ni biani.”1 TIM. 6:18, 19.

ABIA: 125, 40

1, 2. (a) Nyen la mo yeke ku kungo ti wara na yâ ti Paradis? (Bâ foto so ayeke na tongo nda ti article ni.) (b) Nyen la ayeke sara ande si e yeke duti na ngia mingi na yâ ti fini dunia?

TI MINGI ti e, tongana a sara tënë ti “fini so ayeke tâ fini ni biani”, e yeke pensé na beku ti e ti fini ti lakue lakue na yâ ti Paradis na ndo ti sese. Bazengele Paul ahaka “fini ti lakue lakue” na “fini so ayeke tâ fini ni biani”. (Diko 1 Timothée 6:12, 19.) E yeke ku ti wara mbeni fini so ayeke ngbâ lakue lakue nga e yeke duti na ngia lakue lakue. Tere ti e ayeke nzere ande mingi na ngoi so e yeke zingo na ndapre na ngia, na nzoni seni nga e yeke gi bê ti e ape (És. 35:5, 6). Gbu nga li ti mo ti bâ tongana nyen la tere ti e ayeke nzere ande ti duti place oko na asewa ti e, akamarade ti e nga na azo so a yeke zingo ala na kuâ (Jean 5:28, 29; Kus. 24:15). E yeke wara nga ande pasa ti manda ye mingi na ndo ti aye ti ndara, mozoko, sarango plan ti ada, wala ambeni ye nde.

2 Atâa so e yeke ku ti wara anzoni ye so kue, ye so ayeke sara ande si e yeke duti na ngia mingi ayeke vorongo Jéhovah. A yeke nzere ande na e mingi ti bâ tongana nyen la iri ti Jéhovah ayeke  ga nzoni-kue nga azo kue ayeke yeda so Jéhovah ayeke Gbia ti ala (Mat. 6:9, 10). E yeke duti ande na ngia ti bâ tongana nyen ye so Jéhovah aleke lani na bê ti lo ti sara teti azo nga na sese aga tâ tënë. Gbu nga li ti mo ti bâ tongana nyen a yeke duti ande ngangu na e ape ti ga nduru na Jéhovah na ngoi so e yeke ga nzoni-kue yeke yeke.Ps. 73:28; Jacq. 4:8.

3. Nyen la a lingbi e leke tere ti e ndali ni laso?

3 E lingbi ti wara aye ti nzoni so kue ndali ti so Jésus adë bê ti e so “Nzapa alingbi ti sara ye kue.” (Mat. 19:25, 26). Me, tongana e ye ti duti na yâ ti fini dunia —nga ti ngbâ na fini na peko ti Komandema ti Ngu Saki Oko ti Christ,—a yeke ngoi ti tene e “gbu” fini ti lakue lakue la. Teti so e hinga so a ga nduru mingi awe ti futi dunia so, a lingbi sarango ye ti e laso afa so e leke tere ti e awe na e yeke ku fini dunia kungo. So e ngbâ na yâ ti sioni dunia so, tongana nyen la e lingbi ti sara ni?

AYE SO MO LINGBI TI SARA TI LEKE TERE TI MO

4. Mû mbeni tapande so afa tongana nyen e lingbi ti leke tere ti e laso ti duti ande na yâ ti fini dunia.

4 Tongana nyen la e lingbi ti leke tere ti e laso ti duti na yâ ti fini dunia? Tara ti bâ so e yeke leke tere ti e ti gue na mbeni kodoro. Nyen la e lingbi ti sara? E lingbi ti manda yanga ti kodoro so azo ni ayeke tene. A yeke nga nzoni ti tene e hinga ye na ndo ti sarango ye ti azo ni. E lingbi ti tara ti te kobe so azo ni ayeke te. E lingbi ti komanse ti sara ye mo bâ mo tene e yeke na yâ ti kodoro ni awe. A yeke na lege ni ti tene e sara tongaso, ndali ti so ayeke fason so e ye ti vivre ande na ni kâ la. Legeoko nga, e lingbi ti leke tere ti e laso ti ku fini dunia tongana e sara kue ti sara ye mo bâ mo tene e yeke na yâ ti fini dunia awe. Zia e bâ ambeni ye so e lingbi ti sara.

5, 6. Tongana nyen la tongana e sara ye alingbi na fango lege ti bungbi ti Jéhovah ayeke mû maboko na e ti leke tere ti e ti ku fini dunia?

5 Na yâ ti fini dunia, azo kue ayeke yeda so Jéhovah la ayeke Gbia ti ala. Ye so adë bê ti e ndali ti so na yâ ti dunia ti Satan so, azo aye gi ti komande tere ti ala wani. Ambeni zo aye gi ti sara ye so bê ti ala aye nga ala yeke luti nganganga na ndo ti abango ndo ti ala. Ye ti pekoni ayeke nyen? Pasi, yere nga na kuâ ahon ndo ni ndali ti so azo ake ti yeda na fango lege ti Nzapa (Jér. 10:23). E yeke ku kungo ngoi so azo kue ayeke woko tere na gbe ti komandema ti Jéhovah.

6 Na yâ ti fini dunia, a yeke nzere ande na e mingi ti sara ye alingbi na fango lege ti bungbi ti Jéhovah ti sara si sese aga mbeni pendere paradis nga ti fa ye na azo so a yeke zingo ala na kuâ. Jéhovah ayeke mû na e ande akua mingi ti sara. Ka tongana azo so ayeke mû li ni ande na yâ ti akua ni ahunda na e ti sara mbeni kua so anzere na e ape, e yeke sara kua ni? E yeke sara kua ni na bê ti e kue nga na ngia? Mingi ti e alingbi ti kiri tene, a tene En. Me, eskê e yeke woko tere ti e laso na gbe ti afango ye so bungbi ti Jéhovah ayeke fa na e? Tongana e sara ni, e yeke leke tere ti e ti ku ti wara fini ti lakue lakue na gbe ti komandema ti Jéhovah.

7, 8. (a) Ngbanga ti nyen a lingbi e sara kua maboko na maboko na aita so amû li ni? (b) Achangement wa la asi na ambeni ita? (c) Nyen la e hinga na ndo ti fini dunia?

7 Mbeni ye so e lingbi nga ti sara ti leke tere ti e ti duti ande na yâ ti fini dunia, a yeke ti tene e wara ngia na yâ ti ye so e yeke na ni nga e sara kua maboko na maboko na amba ti e. Tongana e sara kua maboko na maboko na aita so amû li ni laso, na tapande, e sara akua so a mû na e na ngia na bê ti e, e yeke duti ande na oko sarango ye so na yâ ti fini dunia. (Diko aHébreu 13:17.)  Na Sese ti Zendo, a mû lani na azo ti Israël oko oko ndo so ala lingbi ti duti dä (Nom. 26:52-56; Jos. 14:1, 2). E hinga pëpe ndo so a yeke mû ande na e oko oko na yâ ti fini dunia. Ye oko, tongana e sara kua maboko na maboko na amba ti e, e yeke duti ande na ngia mingi ti sara ye so bê ti Jéhovah aye atâa ndo wa la a mû na e ti duti dä.

8 A yeke mbeni kota pasa ti voro Jéhovah na yâ ti fini dunia na gbe ti komandema ti Royaume ti lo. Ni la, e yeke na ngia ti sara kua maboko na maboko na bungbi ti Jéhovah laso nga ti sara akua kue so a mû na e. Ye oko, na ambeni ngoi, a lingbi ti si so a changé akua so a mû na e. Na tapande, a tokua ambeni ita ti Béthel ti Amerika na yâ ti territoire. Ambeni ita so kozo ayeke asurveillant so ayeke gue na ando nde nde, a kiri na ala apionnier spécial ndali ti so ngu ti ala ague na li ni mingi wala ambeni ye nde asi na yâ ti fini ti ala. Ala yeke na ngia na yâ ti fini kua ti ala nga Jéhovah airi tënë nzoni na ndo ti ala. Tongana e gi ti wara ngia na yâ ti akua so a mû na e, e sambela Jéhovah ti mû maboko na e, nga e sara kua ti lo na bê ti e kue, e yeke duti na ngia nga lo yeke iri tënë nzoni na ndo ti e même na yâ ti alango ti nda ni so ayeke ngangu so. (Diko aProverbe 10:22.) Ka ti fini dunia ande? E lingbi peut-être ti pensé na ndo so e yeke duti ande dä na yâ ti fini dunia, me peut-être a lingbi ti hunda na e ti gue na mbeni ndo nde. Atâa ndo wa la a yeke tokua e ande dä wala atâa kua wa la e yeke sara, e hinga so e yeke duti na ngia nga e yeke wara ngia mingi na yâ ti kua so e yeke sara.Néh. 8:10.

9, 10. (a) Ngbanga ti nyen e yeke duti ande peut-être na bezoin ti kanga bê ti e ti ku na yâ ti fini dunia? (b) Tongana nyen la e lingbi ti fa so e kanga bê ti e ti ku?

9 Na yâ ti fini dunia, peut-être na ambeni ngoi, e yeke duti ande na bezoin ti kanga bê ti e ti ku. Na tapande, peut-être e lingbi ti mä so tere ti ambeni zo anzere ndali ti so a zingo afami ti ala wala akamarade ti ala na kuâ. Me, peut-être ti e a lingbi e ku kete na pekoni si a zingo afami ti e. Tongana a yeke tongaso, e yeke duti na ngia legeoko na amba ti e nga e kanga bê ti e e ku? (aRom. 12:15). Tongana e manda laso ti kanga bê ti e ti ku ti tene azendo ti Jéhovah aga tâ tënë, ye so ayeke mû maboko na e ande ti kanga bê ti e ti ku.Zo-ti. 7:8.

10 Mbeni ye so e lingbi nga ti sara ti leke tere ti e ti duti ande na yâ ti fini dunia ayeke ti tene e kanga bê ti e e ku na ngoi so a sara ambeni changement na ndo ti fason so e mä na yâ ti atâ tënë ti Bible. E yeke manda afini ye so a yeke fa na e so nzoni? Tongana ade e mä yâ ni nzoni ape, e yeke kanga bê ti e e ku? Tongana e sara tongaso, a yeke duti ngangu na e ande ape ti kanga bê ti e ti ku na yâ ti fini dunia na ngoi so Jéhovah ayeke fa na e aye so lo ye ti tene e sara.aProv. 4:18; Jean 16:12.

11. Ngbanga ti nyen a lingbi e pardone amba ti e laso? Tongana nyen la ye so a yeke mû maboko na e na yâ ti fini dunia?

11 Mbeni ye so e lingbi nga ti sara ti leke tere ti e ti ku fini dunia ayeke ti tene e pardone amba ti e. Na ngoi ti Komandema ti Ngu Saki Oko ti Christ, a yeke hunda ande peut-être ambeni ngoi ti tene e kue e ga nzoni-kue (Kus. 24:15). E yeke sara ande ye na nzoni bê na mba nga e yeke pardone mba na ngoi ni so? Tongana laso e yeke pardone amba ti e na bê ti e kue nga e yeke na nzoni songo na popo ti e, a yeke duti ngangu na e pëpe ti sara nga tongaso ande.Diko aColossien 3:12-14.

12. Ngbanga ti nyen a lingbi e leke tere ti e laso ti duti na yâ ti fini dunia?

12 Na yâ ti fini dunia, peut-être e yeke wara ande lakue pëpe aye so e ye na ngoi so bê ti e aye. Ye oko, e yeke kiri ande singila na Jéhovah nga e yeke duti na ngia atâa  dutingo ti e ayeke tongana nyen. E yeke duti ande na bezoin ti duti na asarango ye so Jéhovah ayeke fa na e laso. Tongana e gi ti sara ye laso tongana ti so e yeke sara ni ande na yâ ti fini dunia, e yeke fa so fini dunia ayeke tâ ye na lê ti e nga e yeke leke tere ti e ti ku ni (aHéb. 2:5; 11:1). Na ndo ni, e yeke fa so e ye ti duti na yâ ti fini dunia so na yâ ni azo kue ayeke mä yanga ti Jéhovah.

NGBÂ TI SARA NA JÉHOVAH

Yapu na fango tënë

13. Nyen la e yeke mû ande ngoi mingi ti sara na yâ ti fini dunia?

13 Na yâ ti fini dunia, e yeke wara ande aye kue so e yeke na bezoin ni ti duti na ngia. Me ye so ayeke sara ande si e duti na ngia mingi ayeke kpengba songo ti e na Jéhovah (Mat. 5:3). E yeke mû ande ngoi mingi ti voro Jéhovah nga a yeke nzere na e ti sara ni (Ps. 37:4). Tongana e zia aye ti yingo laso na kozo ndo, e yeke fa so e yeke leke tere ti e ti ku tâ fini so ayeke ga.Diko Matthieu 6:19-21.

14. Aye wa la amaseka alingbi ti leke na bê ti ala ti sara na yâ ti kua ti Jéhovah?

14 Nyen la e lingbi ti sara ti ye kua ti Jéhovah mingi? Mbeni ye so e lingbi ti sara ayeke ti leke na bê ti e ti sara ambeni kua na yâ ti bungbi ti Jéhovah. Tongana mo yeke maseka nga mo bâ so ayeke biani kota ye ti sara na Jéhovah na yâ ti fini ti mo kue, kiri mo diko ambeti ti e so a sigigi na ni so na yâ ni a sara tënë na ndo ti akua ti ngoi kue nga leke na bê ti mo ti sara mbeni oko na popo ni. * Mo lingbi ti sara lisoro na ambeni ita so asara angu mingi awe na yâ ti kua ti ngoi kue. Tongana mo mû fini ti mo kue ti sara na Jéhovah, mo yeke leke tere ti mo ti ngbâ ti sara kua na Nzapa na yâ ti fini dunia. Aye so mo yeke sara laso na yâ ti kua ti Jéhovah ayeke mû maboko na mo ande mingi na yâ ti fini dunia.

Leke na bê ti mo ti sara ambeni kua na yâ ti bungbi ti Jéhovah

15. Ambeni ye wa e lingbi ti leke na bê ti e ti sara na yâ ti kua ti Jéhovah?

15 E so e yeke awafango tënë ti Royaume, ambeni ye wa la e lingbi ti leke na bê ti e ti sara na yâ ti kua ti Jéhovah? E lingbi ti leke na bê ti e ti maï mbeni kode ti fango tënë ti e. Wala e lingbi ti sara ngangu ti mä yâ ti afango ye ti Bible nzoni mingi nga ti hinga tongana nyen la e lingbi ti sara ye alingbi na ni. E lingbi nga ti gi ti diko ye nzoni na devant ti azo, ti sara diskur nzoni nga ti kiri tënë nzoni na ngoi ti abungbi. Kite ayeke ape so mo pensé na ambeni ye so mo lingbi ti leke na bê ti mo ti sara. Kota tënë ni ayeke so: Tongana mo leke na bê ti mo ti sara ambeni ye na yâ ti kua ti Jéhovah, a yeke sara si mo yapu mingi na yâ ti kua ti lo nga a yeke mû lege na mo ti leke tere ti duti ande na yâ ti fini dunia.

 E KOMANSE TI WARA AYE TI NZONI AWE

Kiri singila ndali ti aye kue so Jéhovah amû na mo

16. Ngbanga ti nyen mbeni ye so alingbi ti ga na zo ngia mingi ahon sarango na Jéhovah ayeke dä ape?

16 Na ngoi so e yeke leke tere ti e ti duti na yâ ti fini dunia ti Nzapa, eskê mbeni nzoni ye ahon e na yâ ti gigi ti laso? Ên-ën. Mbeni ye so alingbi ti ga na zo ngia mingi ahon sarango na Jéhovah ayeke dä ape. Mbeni zo la aforcé e ti tene e sara na Jéhovah pëpe wala e yeke sara na lo pëpe gi ti sö kuâ na ngoi ti kota ye ti vundu. Tongana e yeke na nzoni songo na Jéhovah, gigi ti e ayeke ga nzoni nga e yeke duti na ngia. Lo leke e ti tene e duti tongaso. Tongana Nzapa aye e nga lo fa lege na e, mbeni ye ti nzoni ahon ni ayeke dä ape. (Diko Psaume 63:2-4.) Biani, e yeke na bezoin pëpe ti ku ti tene fini dunia aga awe si e wara aye ti nzoni so zo ayeke wara tongana lo sara na Jéhovah na bê ti lo kue. E lingbi ti wara aye ti nzoni so même laso. Ambeni ita awara aye ti nzoni so teti angu mingi awe, nga aye so asi na e wani afa so ti sara na Jéhovah ayeke mbeni ye so aga na zo ngia mingi.Ps. 1:1-3; És. 58:13, 14.

Zia si Bible afa lege na mo

17. Atâa so e yeke sara ande ye so bê ti e aye nga e yeke sara ngia na yâ ti fini dunia, nyen la e yeke zia na kozo ndo?

17 Na yâ ti fini dunia, e yeke sara ye so bê ti e aye nga e yeke sara ngia. Jéhovah acréé e lo zia na yâ ti e nzara ti sara aye so bê ti e wani aye nga ti duti na ngia. Tongana ayeke tongaso ape, ka lo yeke zia nzara ni na yâ ti e ape (Zo-ti. 2:24). Ye so afa so Jéhovah ayeke ‘mû ye ande lakue alingbi na nzara ti ye kue so ayeke na fini’. (Ps. 145:16). Laso, e yeke na bezoin ti sara ngia nga ti wu tere, me aye so alingbi ti ga na e ngia mingi tongana e zia songo ti e na Jéhovah na kozo ndo. Na yâ ti Paradis nga kue ayeke duti ande tongaso. Tongaso, na ngoi so e yeke zia Royaume na kozo ndo nga e yeke zia li ti e na ndo ti anzoni ye so Jéhovah ayeke mû laso na awakua ti lo, a yeke nzoni e hinga ti zia aye so agbu bê ti e na place ni.—Mat.6:33.

18. Tongana nyen la e lingbi ti fa so e yeke leke tere ti e ti ku fini dunia?

18 Na yâ ti Paradis, e yeke wara ande ngia so ade e wara mara ni lâ oko ape. Zia e leke tere ti e laso ti fa so e ye mingi ti wara tâ fini. Zia e gi ti duti na amara sarango ye ti Jéhovah nga e sara kua ti fango tënë so a mû na e na bê ti kue nga na ngia. Zia si e sara akua so asara si songo ti e na Jéhovah akpengba na ngia na bê ti e. E hinga na bê ti e kue so na yâ ti fini dunia, Jéhovah ayeke sara ande ye kue so lo mû zendo ni. Tongaso, zia e leke tere ti e laso ti duti ande na yâ ti fini dunia.

^ par. 14 Bâ buku Les jeunes s’interrogent Réponses pratiques, Volume 2, lembeti 311-318.