Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Août 2015

Ye so tapande ti Jeanne afa na e

Ye so tapande ti Jeanne afa na e

AZO mingi ahinga so Jésus ayeke lani na abazengele 12. Me peut-être ala hinga pëpe so na popo ti adisciple ti lo a yeke wara awali so ayeke lani nduru mingi na tere ti lo. Na popo ti awali ni a yeke wara Jeanne.Mat. 27:55; Luc 8:3.

Nyen la Jeanne asara lani ti mû maboko na Jésus na yâ ti kua ti lo? Nyen la tapande ti lo afa na e?

JEANNE AYEKE LANI ZO WA?

Jeanne ayeke lani “wali ti Chuza, koli so abâ ndo na ndo ti aye ti Hérode”. Chuza ayeke peut-être lani zo ti kua so abâ ndo na ndo ti aye ti Hérode Antipas. Jeanne ayeke lani na popo ti gbâ ti awali so Jésus asava ambage ti tere ti ala so abuba. Jeanne na ambeni wali atambela lani legeoko na Jésus nga na abazengele ti lo.Luc 8:1-3.

Akota zo ti nzapa ti aJuif afa na azo so a lingbi awali aduti place oko ape na akoli so ayeke akoli ti ala pëpe nga ti tambela legeoko na ala ayeke sioni mingi. A lingbi lani akoli so ayeke aJuif asara tënë mingi na awali ape. Jésus asara sanka ti atënë ti akotara so, lo yeda ti tene Jeanne nga na ambeni wali so amä na bê aduti na popo ti azo so amû peko ti lo.

Jeanne amû peko ti Jésus na abazengele ti lo atâa so lo hinga so akota zo ti nzapa, akamarade ti lo, nga na afami ti lo ayeke kasa lo. A lingbi lani azo kue so amû peko ti Jésus aleke na bê ti ala ti changé aye na yâ ti fini ti ala ti lango oko oko. Na ndo ti azo tongaso, Jésus atene: “Mama ti mbi na aita ti mbi ayeke ala so amä tënë ti Nzapa na asara ye alingbi na ni.” (Luc 8:19-21; 18:28-30). So Jésus ayeke lani nduru mingi na azo so asara asacrifice ti mû peko ti lo so, a nzere na mo ape?

LO MÛ AYE TI LO TI MÛ MABOKO

Jeanne nga na ambeni wali mingi amû “aye ti ala” ti mû maboko na Jésus na abazengele ti lo (Luc 8:3). Mbeni zo ti sungo mbeti atene: “Luc aye ti tene pëpe so awali ni ayeke tö lani kobe, ayeke sukula asembe, nga ayeke fü abongo. Peut-être ayeke ye so ala sara . . . , me Luc asara tënë na ndo ni ape.” Na bango ni, awali ni amû lani nginza ti ala, aye ti ala nga na ada ti ala ti mû maboko na amba ti ala.

Jésus na adisciple ti lo asara lani kua ti nginza pëpe na ando so ala tambela dä ti fa tënë. Tongaso, ala yeke lani na moyen ape ti vo akobe nga na aye so azo 20 tongaso ayeke na bezoin ni. Atâa so ambeni zo atisa ala na ndo ti ala, so Christ na  abazengele ayeke tambela lani na mbeni “sanduku ti nginza”, a ye ti tene so ala zia bê ti ala lakue pëpe na ndo ti azo ti tisa ala (Jean 12:6; 13:28, 29). Peut-être Jeanne na tanga ti awali ni amû a-offrande lani ti kanga ndo ti nginza so a vo na aye.

Ambeni zo atene so mbeni wali so ayeke Juif ayeke na aye ti nginza ape. Ye oko, na yâ ti ambeti so azo asû na ngoi ni kâ, a tene so na popo ti aJuif lani, mbeni wali alingbi ti wara aye ti mosoro na alege nde nde: (1) lo lingbi ti ga héritier tongana babâ ti lo akui sân ti dü molenge-koli, (2) mbeni zo a lingbi ti mû na lo ambeni ye, (3) tongana lo na koli ti lo asara divorce, a lingbi ti mû na lo mbeni nginza, (4) a lingbi ti mû na lo nginza wala da ti koli ti lo tongana koli ni asara tënë ni na yâ ti Testament kozo ti tene lo kui, wala (5) a lingbi ti duti aye ti lo wani.

Kite ayeke pëpe so adisciple ti Jésus amû ye lani alingbi na ngangu ti ala. Na popo ti adisciple ti lo a yeke wara peut-être lani awali ti mosoro. Teti so Jeanne ayeke lani wali ti zo ti kua ti Hérode, ambeni zo atene so lo yeke zo ti mosoro. Peut-être mbeni mba ti lo so ayeke zo ti mosoro la avo lani na Jésus bongo so a kpo ni kpongo so ngere ni ayeke ngangu mingi so Jésus ayeke yü lani so. Mbeni zo ti sungo mbeti atene so “awali ti azo ti gingo susu alingbi lani ti vo ni ape.”Jean 19:23, 24.

Bible afa polele tongaso pëpe so Jeanne amû a-offrande. Ye oko, lo sara ye alingbi na ngangu ti lo. E lingbi ti manda ye na lege ti ye so lo sara so. E oko oko kue e hinga ye so e peut ti mû ni ti mû maboko na kua ti Royaume alingbi na ngangu ti e. Ye so Nzapa aye a yeke ti tene e sara ye so e lingbi ti sara na ngia na bê.Mat. 6:33; Marc 14:8; 2 aCor. 9:7.

JEANNE AYEKE LANI BE-TA-ZO NA JÉSUS

Na bango ni, Jeanne nga na ambeni wali “so atambela lani na peko ti [Jésus] ti sara kua na lo ngbene ye so lo yeke na Galilée” ayeke lani dä na ngoi so a fâ Jésus. ‘Ambeni wali mingi so aga legeoko na Jésus na Jérusalem’ ayeke nga lani dä na ngoi so a fâ lo (Marc 15:41). Na ngoi so a zi kuâ ti Jésus na ndo ti keke ti gue ti lu ni, “awali so alondo legeoko na lo na Galilée si aga, ague abâ sende ti kuâ ni nga ala bâ tongana nyen a zia kuâ ni na yâ ni. Ala kiri na kodoro ti leke a- épice nga na amafuta so afun tongana yombo.” Awali tongana “Marie ti Magdala, Jeanne nga na Marie mama ti Jacques”, so Luc asara tënë ti ala, ague na ndo so a lu Jésus dä na peko ti Sabbat nga ala bâ a-ange so atene na ala so a zingo Jésus na kuâ awe.Luc 23:55–24:10.

Jeanne na ambeni wali so amä na bê asara ye kue so ala lingbi ti sara ti mû maboko na Seigneur ti ala

E lingbi ti tene so Jeanne ayeke lani na popo ti adisciple, mama ti Jésus nga na aita ti Jésus so abungbi na Jérusalem na Pentecôte ti ngu 33 (Kus. 1:12-14). Ndali ti so peut-être koli ti Jeanne asara kua lani na Hérode Antipas, Jeanne alingbi peut-être ti fa na Luc anzene nzene tënë so lo hinga na ndo ti Hérode Antipas. Na popo ti azo so asû a-évangile, Luc oko la ade iri ti Jeanne.Luc 8:3; 9:7-9; 23:8-12; 24:10.

Mbaï ti Jeanne afa na e ambeni kpengba ye so e lingbi ti manda. Lo sara kua na Jésus na bê ti lo kue. Tere ti lo adoit ti nzere mingi ndali ti so a-offrande so lo mû amû maboko na Jésus, abazengele ti lo, nga na ambeni disciple so atambela lani ti fa tënë legeoko. Jeanne amû maboko na Jésus nga lo yeke lani na tere ti lo na ngoi ti atara. A yeke nzoni aita-wali amû tapande ti lo.