Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) JUILLET 2015

Voro Jéhovah na “lâ ti sioni”

Voro Jéhovah na “lâ ti sioni”

ERNEST * so ayeke na ngu 70 na ndo ni adema, lo tene: “Akpale ti seni ti mbi akanga lege na mbi mingi ti sara ye so bê ti mbi aye.” Mo kue asi na mo tongaso? Tongana mo ga mbakoro nga mo bâ so seni ti mo nga ngangu ti mo ayeke tongana ti kozo ape, tënë so ayeke na Zo-ti-fa-tënë chapitre 12 abâ mo. Na versê oko ni, a iri lâ ti mbakoro a tene “lâ ti sioni” wala angoi ti vundu. Me so aye pëpe ti tene so mo yeke wara gi vundu na yâ ti fini ti mo. Mo lingbi ti wara ngia lakue na yâ ti fini ti mo, nga ti voro Jéhovah na ngia.

NGBÂ TI DUTI NA KPENGBA MABE

Aita ti e ambakoro so e ye ala mingi, gi ala oko la ayeke na yâ ti akpale ape. Awakua ti Jéhovah ti ândö so ayeke ambakoro nga kue awara mara ti akpale ti ala so. Na tapande, Isaac, Jacob nga na Ahijah awara lani kpale ti bango ndo (Gen. 27:1; 48:10; 1 aGbia 14:4). “Tere ti [Gbia David] amu wâ pepe.” (1 aGbia 1:1). A si na mbeni ngoi, Barzillaï so ayeke zo ti mosoro ahinga nzerengo ti kobe encore ape nga lo mä go ti mozoko encore nzoni ape (2 Sam. 19:32-35). Abraham asara vundu ti kuâ ti wali ti lo, Naomi nga kue asara vundu na ngoi so koli ti lo akui.—Gen. 23:1, 2; Ruth 1:3, 12.

Nyen la amû maboko na ala lani ti ngbâ ti duti be-ta-zo na Jéhovah nga ti ngbâ ti duti na ngia? Abraham azia bê ti lo na ndo ti azendo ti Jéhovah na ngoi so lo yeke mbakoro, na ye so asara si “lo wara ngangu na lege ti mabe ti lo”. (aRom. 4:19, 20). A lingbi e nga kue e duti na kpengba mabe. Mara ti mabe tongaso abâ pëpe ngu ti e, akode ti e wala aye so asi na e. Na tapande, même na ngoi so lani Jacob awoko, lo bâ ndo ape nga lo yeke gi na ndo ti gbogbo, lo duti na kpengba mabe na azendo ti Nzapa (Gen. 48:1-4, 10; aHéb. 11:21). Ines so laso ayeke na ngu 93 ayeke na mbeni ngangu kobela, me atâa so kue, lo tene: “Mbi bâ so lâ na lâ Jéhovah asara si mbi wara ngia mingi. Mbi yeke pensé na ndo ti Paradis lâ na lâ. Ye so amû na mbi beku.” So tâ nzoni bango ndo la!

Tongana e yeke sambela, e manda Bible nga e gue na abungbi, mabe ti e ayeke kpengba. Prophète Daniel so aga mbakoro ayeke sambela lani lakue fani ota na yâ ti lango oko nga lo ngbâ ti manda tënë ti Nzapa (Dan. 6:10; 9:2). Anne so ayeke lani womoa nga mbakoro “[a]manke ti gue na temple lâ oko pëpe”. (Luc 2:36, 37). Tongana mo wara lege ti gue na abungbi nga mo kiri tënë na angoi ti bungbi ni, gi mo oko la mo yeke wara ngangu ape me azo kue so ague nga kue ayeke wara ngangu. Jéhovah ayeke na ngia ti mä asambela ti mo même tongana mo yeke na ngangu ti sara ye kue ape.—aProv. 15:8.

Kpengba amba ti mo

Ala ambakoro so ayeke be-ta-zo, mingi ti ala aye ti bâ ndo, ti diko mbeti nga ti wara ngangu ti gue na abungbi, me a yeke ngangu mingi na ala, peut-être ala lingbi ti sara ni ape. Nyen la ala lingbi ti sara? Ala sara kua nzoni na aye kue so ala yeke na ni. Mingi ti ambakoro so alingbi ti gue na abungbi ape ayeke mä ni na lege ti téléphone. Atâa so Inge so ayeke na ngu 79 ayeke na kpale ti bango ndo, lo yeke leke abungbi na lege ti ambeti so mbeni ita-koli ti congrégation ti lo a-imprimé ni na kota gere ni amû na lo.

Peut-être mo yeke na ngoi ti sara ambeni ye. Ngbanga ti nyen mo mû ni pëpe ti mä na a-enregistrement ti Bible, ambeti, adiskur nga na ascenète? Peut-être mo lingbi nga ti mû li ni ti iri aita na téléphone ti kangbi na ala mbeni matabisi ti yingo nga ti tene mo na ala “[a]kpengba tere”.—aRom. 1:11, 12.

NGBÂ LAKUE TI SARA NA NZAPA

Fa tënë

Christa so ayeke na ngu 85 tongaso adema tere ti lo, a tene: “A yeke sioni mingi tongana zo ayeke sara kua pëpe tongana ti so lo sara kozo. Me tongana nyen la ambakoro alingbi ti ngbâ ti duti na ngia? Peter so ayeke na ngu 75 atene: “ Na dutingo na nzoni bango ndo, me pëpe ti pensé gi lakue na ndo ti aye  so mo lingbi encore ti sara ape. Me wara ngia na yâ ti aye so mo lingbi ti sara.”

Mo pensé na alege so angbâ ti zi na mo ti fa tënë? Heidi alingbi pëpe ti fa tënë da na da tongana ti so lo yeke sara kozo. Lo yeke na ngu 80 na ndo ni, lo manda ti sara alettre na ordinateur. Ambeni wafango tënë so ayeke ambakoro akomanse ti sara lisoro na azo na ngoi so ala duti na ndo ti banc na yâ ti parc wala na ndo so azo ayeke ku bus dä. Wala tongana mo yeke lango na ndo so a yeke bata ambakoro dä, ndo ni so alingbi ti ga territoire ti mo. Mo lingbi ti fa tënë na azo so ayeke bâ lege ti ambakoro wala na ambakoro so alango na ndo ni so.

Duti zo ti yambango agene

Na ngoi so Gbia David aga mbakoro, lo mû maboko mingi na tâ vorongo. Lo mû nginza ndali ti kua ti lekengo temple nga lo leke ambeni ye ndali ti kua ni (1 Chron. 28:11–29:5). Legeoko nga, mo lingbi ti sara ambeni ye ti mû maboko na kua ti Royaume so a yeke sara ni na yâ ti dunia kue. Mo lingbi ti mû maboko na apionnier wala ambeni wafango tënë so afa tënë mingi na yâ ti congrégation ti mo na tenengo na ala atënë so akpengba ala, na mungo na ala mbeni kete ye wala na tisango ala ti te mbeni kete ye. Mo lingbi ti sambela ndali ti amaseka, asewa, awakua ti ngoi kue, aita so ayeke na kobela nga na ala so ayeke na akua mingi na yâ ti bungbi.

Jéhovah abâ mo na nene ni mingi nga lo bâ kua so mo yeke sara na lo na nene ni mingi. Baba ti e ti yayu ayeke ke ala ape ala ambakoro so e ye ala mingi (Ps. 71:9). Jéhovah aye ala mingi nga lo bâ ala na nene ni. Na yâ ti ngoi kete, na yâ ti fini dunia, ngu ti e kue ayeke gue na li ni mingi me e yeke wara aye ti vundu ape. E yeke ngbâ na ngangu nga na nzoni seni na e yeke ngbâ lakue ti voro Jéhovah, Nzapa ti e so aye e mingi, teti lakue lakue.

^ par. 2 A changé ambeni iri ni.