Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

TOUR TI BA NDO (TI MANDANGO NI) JUIN 2015

Sara ye ague oko na sambela ti Babâ ti e so mo yeke na yayu: Use mbage ni

Sara ye ague oko na sambela ti Babâ ti e so mo yeke na yayu: Use mbage ni

“Babâ ti ala, ahinga aye so ala yeke na bezoin ni.”MAT. 6:8.

1-3. Nyen la asara si mbeni ita-wali abâ biani so Jéhovah ahinga ye so lo yeke na bezoin ni lani?

LANA ayeke girisa ande lâ oko ape ye so asi na lo lani na Allemagne na ngu 2012. Lo bâ so Jéhovah akiri tënë na asambela ti lo use. Lo tene lani kozo sambela ni na ngoi so lo yeke na yâ ti train ti gue na aéroport. Lo sambela Jéhovah ti mû lege na lo ti fa tënë na mbeni zo. Lo tene use sambela ni na peko ti so lo si na aéroport na lo mä so a pusu lango ti voyage ni na ndade ni. Lana asambela Jéhovah ti mû maboko na lo ndali ti so nginza so angbâ na lo ayeke mingi ape nga lo yeke na bezoin ti wara mbeni ndo ti lango dä na bï ni so.

2 Gi so Lana ahunzi ti tene use sambela ti lo ni, mbeni maseka-koli atene na lo, a tene: “Bara mo Lana, nyen la mo yeke sara ge?” Maseka-koli ni ayeke ngbene kamarade ti Lana ti ekole. Mama ti lo nga na âta ti lo ti wali aga ti zia lo na aéroport ti tene lo voyagé na Afrika ti Mbongo. Na ngoi so Lana afa na ala ye so asi na lo, Elke, mama ti maseka-koli ni, atene na lo ti gue ti lango na ndo ti ala. Elke na mama ti lo ayamba Lana nzoni mingi nga ala hunda  lo gbâ ti atënë na ndo ti aye so lo mä na bê na ni nga na ndo ti kua ti lo ti ngoi kue.

3 Na ndade ni na ndapre, tongana Lana ahunzi ti nyon café awe, lo kiri tënë na gbâ ti atënë so ala hunda na lo na ndo ti Bible. Lana ahunda ala ti mû na lo adresse ti ala tongaso si lo lingbi ti mû ni na mbeni ita nde ti ga ti sara lisoro na ala. Lo si na ndo ti lo nzoni nga lo ngbâ ti sara kua ti ngoi kue. Lo bâ so Jéhovah amä asambela ti lo, Jéhovah ahinga ye so lo yeke na bezoin ni nga lo mû maboko na lo.—Ps. 65:3.

4. Ambeni kota ye wa so a lingbi e sambela ndali ni e yeke bâ ni ande na yâ ti article so?

4 Tongana mbeni kpale asi na e gi hio tongaso, a yeke ngangu pëpe na e ti sambela Jéhovah ti mû maboko na e. Jéhovah ayeke na ngia mingi ti mä awakua ti lo so ayeke be-ta-zo na ngoi so ala yeke tene mara ti asambela tongaso (Ps. 34:16; aProv. 15:8). Ye oko, tongana e gbu li ti e na ndo ti sambela ti Babâ ti e so mo yeke na yayu, e lingbi ti bâ so ambeni kota ye ayeke dä so peut-être e yeke girisa ka ti sambela ndali ni. Na yâ ti article so, e yeke bâ tongana nyen la tanga ti aye osio so ayeke na yâ ti sambela ti Babâ ti e so mo yeke na yayu alingbi ti mû maboko na e ti duti be-ta-zo na Jéhovah.—Diko Matthieu 6:11-13.

“LASO MÛ NA E KOBE TI E TI LANGO NI”

5, 6. Ngbanga ti nyen Jésus afa na e ti sambela ndali ti “kobe ti e” même tongana e yeke na kobe mingi?

5 Na yâ ti sambela so, Jésus afa na e ti tene e hunda Nzapa e tene mû na e kobe ti “e” ti lango ni, me e tene gi pëpe mû na mbi kobe ti “mbi” ti lango ni. Victor so ayeke mbeni surveillant ti circonscription na Afrika atene: “Mbi yeke kiri singila lakue na Jéhovah ndali ti so mbi na wali ti mbi e yeke gi bê ti e pëpe na ndo ti ndo so kekereke e yeke wara kobe ti tengo ni dä nga e yeke gi bê ti e pëpe na ndo ti zo so ayeke futa da so e yeke lango dä. Aita ti e ayeke bâ lege ti e nzoni lâ na lâ. Me mbi yeke sambela ti tene aita so ayeke mû maboko na e ahon ndo ti akpale ti nginza so ala wara.”

6 Tongana e yeke na kobe so e lingbi ti te ndali ti alango mingi, e lingbi ti pensé na aita ti e so ayeke na yâ ti yere wala ala so aye ti ngangu asi na ala. A lingbi e sambela gi pëpe ndali ti ala me nga e sara ye alingbi na asambela ti e ni. Na tapande, e lingbi ti kangbi na ala ye so e yeke na ni. E lingbi nga ti mû offrande lakue lakue ndali ti kua so awakua ti Jéhovah ayeke sara na yâ ti dunia kue. E hinga so a yeke sara kua na anginza so na lege ni.—1 Jean 3:17.

7. Tongana nyen la Jésus afa so a lingbi e “gi bê ti [e] lâ oko pëpe ngbanga ti kekereke”?

7 Tongana Jésus asara tënë ti kobe ti e ti lâ na lâ, lo yeke sara lani tënë ti aye so e yeke na bezoin ni hio. Lo fa tongana nyen la Nzapa ayeke yü bongo na afleur ti ngonda, na pekoni, lo tene: “A yeke nzere mingi na lo ti yü bongo na ala pëpe? Ala, azo ti kete mabe. Ni la, ala gi bê ti ala lâ oko pëpe, ti tene, . . . ’E yeke yü ande nyen?’” Na pekoni, lo kiri lo tene: “Ala gi bê ti ala lâ oko pëpe ngbanga ti kekereke.” (Mat. 6:30-34). Ye so afa so a lingbi e gi bê ti e pëpe na ndo ti abezoin ti e ti kekereke me a lingbi e wara ngia na aye so e yeke na bezoin ni lâ na lâ. Na tapande, e lingbi ti sambela ndali ti da ti lango, kua ti nginza ti bâ na lege ti sewa ti e nga na ndara ti mû lege na e ti mû anzoni desizion na ndo ti aye so andu seni ti e. Me mbeni ye ayeke dä so ayeke kota mingi so a lingbi e sambela ndali ni.

8. Tënë so Jésus atene na ndo ti kobe ti e ti lâ na lâ adabe ti e na nyen? (Bâ foto so ayeke na tongo nda ti article ni.)

8 Tënë so Jésus atene na ndo ti kobe ti e ti lâ na lâ adabe ti e so e yeke na bezoin ti kobe ti yingo. Maître ti e atene: “Zo ayeke ngbâ na fini gi na lege ti mapa pëpe, me na lege ti  tënë kue so asigigi na yanga ti Jéhovah.” (Mat. 4:4). Tongaso, a lingbi e ngbâ ti sambela ti tene Jéhovah angbâ ti mû na e kobe ti yingo na ngoi so alingbi.

“MO PARDONE AKUDA SO AYEKE NA LI TI E”

9. Ngbanga ti nyen asiokpari ti e ayeke tongana “akuda”?

9 Ngbanga ti nyen Jésus asara tënë ti “akuda” me na mbeni ngoi nde, lo sara tënë ti “asiokpari”? (Mat. 6:12; Luc 11:4). Lo tene tongaso ndali ti so asiokpari ti e ayeke tongana akuda. Na ngu 1951, a fa na yâ ti Tour ti Ba Ndo na Anglais a tene so na ngoi so e sara siokpari, a yeke mo bâ mo tene kuda ti Jéhovah ayeke na li ti e. E doit ti ndoye Jéhovah nga ti mä yanga ti lo. Tongaso, tongana e sara siokpari na tere ti Nzapa, e yeke mû na lo pëpe ye so e doit ti mû na lo. Tongana Jéhovah aye, lo lingbi ti fâ yâ ti songo so ayeke na popo ti e na lo. A tene nga na yâ ti Tour ti Ba Ndo ni, a tene: “Tongana e sara siokpari afa so e ndoye Nzapa pëpe.”—1 Jean 5:3.

10. Na lege ti nyen la Jéhovah ayeke pardone asiokpari ti e? A lingbi e sara nyen ndali ti ye so lo sara so?

10 So e yeke na bezoin ti tene Nzapa apardone asiokpari ti e lâ na lâ amû lege na e ti bâ na nene ni ngere so Jésus afuta ti zi na e ndali ti so a yeke grâce na ni la Nzapa alingbi ti zi asiokpari ti e. Atâa so lo futa ngere so asara nduru na ngu 2000 awe, a lingbi e bâ ni na nene ni mo bâ mo tene lo futa ni gi laso laso. Ye so a futa ti zi na e ayeke ye so ngere ni ayeke “ngangu mingi” zo so siokpari ayeke na tere ti lo alingbi pëpe ti futa ni. (Diko Psaume 49:8-10; 1 Pierre 1:18, 19.) Biani, a lingbi e ngbâ lakue ti kiri merci na Jéhovah ndali ti ngere so a futa ti zi na e. Na ndo ni, a lingbi tënë “asiokpari ti e” adabe ti e so e na aita ti e kue so e yeke voro Jéhovah, e yeke na bezoin ti ngere so. A yeke polele so, Jéhovah aye ti tene e pensé gi na songo ti e na lo pëpe, me lo ye ti tene e pensé nga na songo so aita ti e ayeke na ni na lo, même ala so peut-être asara siokpari na tere ti e. Mingi ni, asiokpari ni ayeke nga akota ye ape, me tongana e pardone aita ti e, e yeke fa so e ndoye ala biani nga so e kiri singila ndali ti so Jéhovah apardone e.—aCol. 3:13.

Tongana e ye ti tene Nzapa apardone e, a lingbi e nga kue e pardone amba ti e (Bâ paragraphe 11)

11. Ngbanga ti nyen a lingbi e pardone amba ti e?

11 Mawa ni ayeke so, teti so siokpari ayeke na tere ti e, na ambeni ngoi, e lingbi ti bata aita ti e na bê (Lév. 19:18). Tongana e  sara tënë na ndo ti ye so ita ti e asara na e na ambeni zo, ambeni ita alingbi ti yoro yanga ti ala dä na ye so alingbi ti ga na kangbi na yâ ti congrégation. Tongana e ngbâ ti sara tongaso, e fa so e bâ na nene ni pëpe nzoni bê so Nzapa asara na e nga na ngere so Jésus afuta ti zi na e. Tongana e pardone amba ti e ape, Jéhovah nga kue ayeke pardone e ape (Mat. 18:35). Gi so Jésus ahunzi ti fa sambela ti Babâ ti e so mo yeke na yayu, lo ngbâ lo fa anzene nzene tënë na ndo ti pardon. (Diko Matthieu 6:14, 15.) Ti hunzi na ni, tongana e ye ti tene Nzapa apardone e, a lingbi e ngbâ na yâ ti siokpari ape.—1 Jean 3:4, 6.

“MO GUE NA E NA YÂ TI TARA PËPE”

12, 13. (a) Nyen la asi na Jésus ngoi kete na peko ti batême ti lo? (b) Tongana e tï na yâ ti handa, ngbanga ti nyen a lingbi e bi tënë ni na li ti mbeni zo ape? (c) So Jésus angbâ be-ta-zo na Jéhovah juska na kuâ, a fa nyen?

12 Tongana e gbu li ti e na ndo ti ye so asi na Jésus ngoi kete na peko ti batême ti lo, e yeke hinga ndani so a lingbi e sambela, e tene: “Mo gue na e na yâ ti tara pëpe.” Yingo ti Nzapa ague na Jésus na yando “si Zabolo atara lo.” (Mat. 4:1; 6:13). A lingbi ye so adö bê ti e? Bê ti e a lingbi ti dö pëpe tongana e hinga raison so ndali ni Nzapa atokua Molenge ti lo na sese. Molenge ti lo aga lani na sese ti leke kpale so abâ gigi na ngoi so Adam na Ève ake droit so Nzapa ayeke na ni ti komande dunia kue. Ambeni hundango ndo ayeke lani dä so a hunda ngoi ti tene a kiri tënë na ni. Na tapande, mbeni ye asava lani ape na ndo ti fason so Nzapa acréé na zo? Mbeni zo so ayeke nzoni-kue alingbi ti mû mbage ti droit ti Nzapa ti komande dunia kue même tongana “zo ti sioni” asara ngangu na ndo ti lo? Nga, azo alingbi ti duti nzoni tongana ala duti yamba na komandema ti Nzapa, tongana ti so Satan atene? (Gen. 3:4, 5). A hunda ngoi mingi ti kiri tënë na mara ti ahunda tongaso, me a yeke mû lege na a-ange nga na azo ti hinga so Jéhovah ayeke komande na lege ni.

13 Jéhovah ayeke nzoni-kue, tongaso, lo yeke handa zo pëpe ti sara sioni. Me, Satan la ayeke “Wahanda”. (Mat. 4:3). Satan alingbi ti sara ambeni ye ti handa na e. Me, a yeke na zo oko oko ti bâ wala lo yeke zia si Satan ahanda lo wala pëpe. (Diko Jacques 1:13-15.) Ti Jésus, lo ke ahanda kue na lê ni lê na lege so lo sara kua na aversê ti Bible. Na sarango tongaso, Jésus afa so Nzapa la ayeke na droit ti komande dunia kue. Me Satan azia lege ti Jésus pëpe. Lo zia Jésus “juska ti ku na mbeni ngoi so alingbi.” (Luc 4:13) Jésus angbâ lani ti luti ngangu na gbele atara kue so Satan aga na ni ti handa lo ti ke yanga ti Jéhovah. Christ afa so komandema ti Jéhovah la ayeke mbilimbili nga lo fa so mbeni zo so ayeke nzoni-kue alingbi ti duti be-ta-zo na yâ ti angangu tara. Ye oko, Satan ayeke gi nga ti handa adisciple ti Jésus, même mo kue.

14. Nyen la a lingbi e sara si e tï na yâ ti tara pëpe?

14 Jéhovah azia lege na Wahanda ti sara kua na dunia so ti handa e ndali ti so a de a leke pëpe tënë so andu droit ti lo ti komande dunia kue. Nzapa ayeke “gue na e na yâ ti tara pëpe”. Me, lo yeke na confiance so e lingbi ti ngbâ be-ta-zo na lo nga lo ye ti mû maboko na e. Jéhovah abâ liberté ti e na nene ni, lo yeke gbu e na ngangu pëpe ti sara ye so ayeke nzoni. Tongaso, lo zia si e wani la e soro ti ngbâ be-ta-zo na lo wala pëpe. A lingbi e sara aye use ti tene e tï na yâ ti tara pëpe: e ngbâ nduru na Jéhovah nga e ngbâ ti sambela lo ti mû maboko na e. Tongana nyen la Jéhovah ayeke kiri tënë na asambela so e tene na lo ti tï pëpe na yâ ti tara?

Ngbâ lakue ti kpengba songo ti mo na Nzapa nga ti yapu na fango tënë (Bâ paragraphe 15)

15, 16. (a) Atara wa la a lingbi e tï na yâ ni pëpe? (b) Tongana e tï na yâ ti tara, faute ni ayeke ti zo wa?

15 Jéhovah ayeke mû na e yingo vulu ti lo so ayeke kpengba e nga ayeke mû maboko na e ti tï pëpe na yâ ti tara. Jéhovah ayeke mû  nga wango na e na lege ti Bible nga na congrégation na ndo ti aye so a lingbi e kpe ni. Na tapande, lo wa e ti mû ngoi ti e, nginza ti e nga na ngangu ti e mingi pëpe ndali ti aye so e yeke nga na bezoin ni ape. Espen na wali ti lo Janne ayeke na mbeni kodoro ti Europe so mosoro ayeke dä mingi. Ala sara lani kua ti pionnier permanent teti angu mingi na mbeni ndo so bezoin ti awafango tënë ayeke dä mingi na kodoro ti ala. Na ngoi so ala dü kozo molenge ti ala, ala zia kua ti pionnier ni, fadeso ala yeke na amolenge use. Espen atene: “So fadeso e lingbi ti mû ngoi mingi ti fa tënë tongana ti kozo ape so, e yeke sambela Jéhovah fani mingi ti tene e tï na yâ ti tara pëpe. E yeke hunda na Jéhovah ti mû maboko na e ti ngbâ lakue ti kpengba songo ti e na lo nga ti yapu na fango tënë.”

16 Mbeni tara so azo atï na yâ ni mingi laso ayeke bango porno. Tongana e tï na yâ ti mara ti tara tongaso, a lingbi e bi tënë ni na li ti Satan pëpe. Ngbanga ti nyen? Ngbanga ti so Satan nga na dunia ti lo alingbi ti forcé e pëpe ti sara ye ti sioni. Ambeni zo atï na yâ ti tara ti bango porno ndali ti so ala yeke pensé gi na ndo ti aye ti sioni. Me, aita ti e saki mingi atï na yâ ti tara so pëpe. E nga kue e lingbi ti sara tongana ala.—1 aCor. 10:12, 13.

“MO ZI E NA MABOKO TI ZO TI SIONI”

17. (a) Tongana nyen la e lingbi ti sara ye alingbi na sambela so e tene na Nzapa ti “zi e na maboko ti zo ti sioni”? (b) Nyen la Jéhovah aga nduru ti sara awe?

17 Tongana e ye ti sara ye alingbi na sambela so e tene na Nzapa ti “zi e na maboko ti zo ti sioni”, a lingbi e sara ngangu ti duti ti “dunia [ti Satan] pëpe”. A lingbi e “ndoye dunia [ti Satan] pëpe wala aye so ayeke na yâ ti dunia so.” (Jean 15:19; 1 Jean 2:15-17). A yeke aye so alingbi e ngbâ lakue ti sara ngangu ti sara ni. E yeke wu pupu na ngoi so Jéhovah ayeke kiri tënë ande na sambela so na lege so lo yeke zi Satan nga lo yeke futi sioni dunia ti lo. A lingbi e girisa ape so, atâa so a bi Satan na sese, lo hinga so ngoi so angbâ na lo ayeke mingi ape. Lo yeke na kota ngonzo, na lo yeke sara kue ti buba songo ti e na Jéhovah. Tongaso, a lingbi e ngbâ lakue ti sambela ti tene Jéhovah azi e na tïtî Satan.—Apoc. 12:12, 17.

18. Tongana e ye ti sö kuâ na ngoi so ayeke futi dunia ti Satan, a lingbi e sara nyen?

18 Mo ye ti duti na yâ ti mbeni dunia so Satan ayeke na yâ ni pëpe? Tongaso, ngbâ lakue ti sambela ti tene Royaume ti Nzapa asara si iri ti Nzapa aga nzoni-kue nga ti tene asara ye so bê ti lo aye na sese. Zia bê ti mo na Jéhovah ti bâ lege ti mo nga ti mû na mo aye kue so mo yeke na bezoin ni ti ngbâ be-ta-zo na lo. Tongaso, sara kue ti sara ye alingbi na sambela ti Babâ ti e so mo yeke na yayu.