Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Juin 2015

Sara ye ague oko na sambela ti Babâ ti e so mo yeke na yayu: Kozo mbage ni

Sara ye ague oko na sambela ti Babâ ti e so mo yeke na yayu: Kozo mbage ni

“Zia a sara si iri ti mo aga nzoni-kue.”MAT. 6:9.

1. Tongana nyen la e lingbi ti sara kua na sambela so ayeke na Matthieu 6:9-13 na fango tënë?

AZO mingi ahinga na li atënë ti sambela so ayeke na Matthieu 6:9-13. Fani mingi, na ngoi so e yeke fa tënë da na da, e yeke sara tënë ti sambela so na azo ti mû maboko na ala ti hinga so Royaume ti Nzapa ayeke mbeni tâ gouvernement so ayeke sara ande si sese aga paradis. E yeke sara nga kua na tënë “zia a sara si iri ti mo aga nzoni-kue” so ayeke na yâ ti sambela so ti fa na azo so Nzapa ayeke na iri nga a lingbi e sara si aga nzoni-kue.—Mat. 6:9.

2. E hinga tongana nyen so Jésus aye lani pëpe ti tene e tene gi peko ti atënë ti sambela so na ngoi kue so e yeke sambela?

2 Jésus aye lani ti tene e tene gi peko ti atënë ti sambela so na ngoi kue so e yeke sambela, tongana ti so azo mingi ayeke sara so? Ên-ën. Kete kozo ti tene Jésus afa tapande ti sambela so, lo tene: “Tongana mo yeke sambela, mo kiri gi na ndo ti tënë oko  fani mingi pëpe.” (Mat. 6:7). Mbeni ngoi na pekoni, lo kiri lo tene sambela so me lo sara kua na a-oko tënë ti yâ ni ape (Luc 11:1-4). Tongaso, Jésus amû maboko na e ti hinga aye so a lingbi e sambela ndali ni nga aye wa la a lingbi e hunda kozo. A yeke na lege ni ti tene so sambela ti lo so ayeke mbeni tapande.

3. Ahundango ndo wa la e lingbi ti hunda na tere ti e na ngoi so e yeke sara tënë na ndo ti sambela ti Babâ ti e so mo yeke na yayu?

3 Na yâ ti article so nga na ti peko, e yeke sara tënë na ndo ti atënë ti yâ ti sambela ti Babâ ti e so mo yeke na yayu. Na ngoi so e yeke sara tënë na ndo ni, hunda tere ti mo: ‘Tongana nyen la sambela so alingbi ti mû maboko na e ti tene anzoni sambela? Mbi yeke sara ye alingbi na atënë ti sambela so?’

“BABÂ TI E SO MO YEKE NA YAYU”

4. Tënë “Babâ ti e” adabe ti e na nyen? Na lege wa Jéhovah ayeke “Babâ” ti aChrétien so ayeke wara ande fini na ndo ti sese?

4 Jésus ato nda ti sambela ti lo na tënë “Babâ ti e”. Ye so adabe ti e so Jéhovah ayeke Babâ ti “sewa ti e ti aita” so aye biani tere (1 Pi. 2:17). So tâ kota pasa la e yeke na ni so! A-Chrétien so a soro ala ti gue na yayu, so Nzapa amû ala tongana amolenge ti lo, ayeke iri Jéhovah droit “Babâ”. (aRom. 8:15-17). A-Chrétien so ayeke wara ande fini ti lakue lakue na ndo ti sese alingbi nga ti iri Jéhovah “Babâ”. Lo la lo mû na ala fini, nga na ndoye lo mû na ala aye so ala yeke na bezoin ni. Ala yeke ga ande atâ molenge ti Nzapa na peko ti so ala ga nzoni-kue nga tongana ala fa so ala duti be-ta-zo na yâ ti ndangba tara so ayeke ga.—aRom. 8:21; Apoc. 20:7, 8.

5, 6. Kota matabisi so ahon atanga ni kue so ababâ na amama alingbi ti mû na amolenge ti ala ayeke so wa? Nyen la a lingbi molenge oko oko asara na matabisi so? (Bâ foto so ayeke na tongo nda ti article ni.)

5 Ababâ na amama ayeke mû na amolenge ti ala mbeni pendere matabisi na ngoi so ala yeke fa na amolenge ti ala ti sambela nga ala yeke mû maboko na ala ti bâ Jéhovah tongana Babâ ti ala so ayeke na yayu so ayeke bi bê ti lo na ala. Mbeni ita-koli, so ayeke fadeso surveillant ti circonscription na Afrika ti Mbongo, atene: “A to nda ni na ngoi so e dü amolenge ti e ti wali, mbi yeke sambela lakue na ala na bï tongana mbi yeke na yanga-da. Ala yeke tene ka so ala dabe ti ala pëpe na atënë ti yâ ti asambela ni. Me, ala dabe ti ala na apendere ngoi so e na ala e yeke mû lani ti sara lisoro na Jéhovah, Babâ ti e, ala bâ angoi ni so na nene ni mingi nga ala bâ so ala yeke na ngia nga na siriri. Hio na peko ti so ala wani ato nda ti sambela, mbi wa ala ti sambela na kota go tongaso si mbi lingbi ti mä ala na ngoi so ala yeke fa na Jéhovah atënë ti bê ti ala. A yeke lani mbeni nzoni ngoi ti tene mbi hinga atënë so ayeke na bê ti ala. Na pekoni, mbi yeke fa na ala na nzoni bê ti yoro ambeni kota tënë so ayeke na yâ ti sambela ti Babâ ti e so mo yeke na yayu na yâ ti asambela ti ala ti tene atënë ti asambela ti ala ni ane.”

6 Amolenge ti lo ti wali so angbâ lani ti ga nduru mingi na Jéhovah même na ngoi so ala kono. Ala sara fadeso mariage awe, ala yeke na ngia, nga ala na akoli ti ala ayeke sara kua ti ngoi kue. Kota matabisi so ahon atanga ni kue so ababâ na amama alingbi ti mû na amolenge ti ala ayeke ti tene ala mû maboko na amolenge ti ala ti duti na nzoni songo na Jéhovah. Biani, a yeke na molenge oko oko ti soro ti bata nzoni songo ti lo na Jéhovah. Ye so ahunda ti tene amolenge aye iri ti Nzapa nga ala bâ ni na nene ni mingi.—Ps. 5:12, 13; 91:14.

“ZIA A SARA SI IRI TI MO AGA NZONI-KUE”

7. Pasa wa la e awakua ti Nzapa e yeke na ni? A lingbi e sara nyen?

7 E yeke biani na kota pasa ti hinga iri ti  Nzapa nga ti duti “mbeni bungbi ti azo ndali ti iri ti lo.” (Kus. 15:14; És. 43:10). E yeke sambela Babâ ti e so ayeke na yayu, e tene: “Zia a sara si iri ti mo aga nzoni-kue.” Tongana e sambela tongaso alingbi ti pusu e ti hunda na Jéhovah ti mû maboko na e ti tene e sara pëpe mbeni tënë wala mbeni ye so alingbi ti ga na zonga na ndo ti iri ti lo so ayeke nzoni-kue. E ye ti sara ye pëpe tongana ti ambeni ita ti ngoi ti akozo Chrétien so asara ye lani pëpe alingbi na ye so ala fa. Bazengele Paul atene tënë so na ndo ti ala, lo tene: “Ndali ti ala, zonga ayeke ga na ndo ti iri ti Nzapa na popo ti azo ti amara.”—aRom. 2:21-24.

8, 9. Mû mbeni tapande so afa tongana nyen Jéhovah amû maboko na azo so aye ti sara si iri ti lo aga nzoni-kue.

8 E kue e ye ti sara si iri ti Nzapa aga nzoni-kue. Na peko ti so koli ti mbeni ita-wali na Norvège akui gi hio tongaso, ita-wali ni na molenge ti lo ti koli so ayeke na ngu use la angbâ. Ita-wali ni atene: “Ye ni ayeke lani ngangu mingi na mbi. Mbi sambela Jéhovah lango oko oko, même ngbonga oko oko, ti wara ngangu ti hon ndo ti vundu ti mbi tongaso si mbi mû gi anzoni desizion nga mbi duti be-ta-zo na lo si Satan awara lege pëpe ti gi yanga ti lo. Mbi ye lani ti sara si iri ti Jéhovah aga nzoni-kue nga mbi ye ti tene molenge ti mbi ti koli akiri awara tere na babâ ti lo na yâ ti Paradis.”—aProv. 27:11.

9 Jéhovah akiri tënë lani na asambela ti ita-wali ni? En. Aita amû maboko na lo ndali ti so lo yeke lakue na tere ti ala. Ngu oku na pekoni mbeni ancien asara mariage na lo. Molenge ti lo ti koli ni ayeke fadeso na ngu 20 na lo wara batême awe. Ita-wali ni atene: “Anzere na mbi mingi so koli ti mbi amû maboko na mbi ti bata lo.”

10. A lingbi Jéhovah asara nyen ti tene iri ti lo aga nzoni-kue biani biani?

10 A lingbi Jéhovah asara nyen ti zi azonga kue so a bi na ndo ti iri ti lo tongaso si iri ti lo aga nzoni-kue biani biani? Ti sara ni, a lingbi Jéhovah afuti azo kue so ake droit so lo yeke na ni ti komande dunia kue. (Diko Ézéchiel 38:22, 23.) Na ngoi ni ande, yeke yeke a yeke sara si azo aga nzoni-kue. E yeke ku kungo ngoi so azo kue nga na a-ange kue ayeke sara si iri ti Jéhovah aga nzoni-kue. Na nda ni, Babâ ti e ti yayu so aye e mingi ayeke ‘ga aye kue teti zo oko oko kue.’—1 aCor. 15:28.

“ZIA ROYAUME TI MO AGA”

11, 12. Na ngu 1876, nyen la Jéhovah amû maboko na awakua ti lo ti hinga?

11 Kozo ti tene Jésus ague na yayu, adisciple ti lo ahunda lo, ala tene: “Seigneur, a yeke na ngoi so si mo yeke kiri na royaume ni na Israël?” Kiringo tënë ti Jésus afa so a yeke lani pëpe ngoi ti tene ala hinga ngoi so Royaume ti Nzapa ayeke to nda ti komande na ni. Lo tene na adisciple ti lo ti zia li ti ala gi na ndo ti kota kua ti fango tënë so a hunda na ala ti sara ni. (Diko Kusala 1:6-8.) Ye oko, Jésus afa na adisciple ti lo ti ku ngoi so Royaume ti Nzapa ayeke ga. Tongaso, ngbene ye na ngoi ti abazengele ti ga na ni, aChrétien ayeke sambela ti tene Royaume ni aga.

12 Na ngoi so ngoi ti tene Jésus ato nda ti komande na yayu aga nduru, Jéhovah amû maboko na awakua ti lo ti hinga ngoi so ye ni ayeke si. Na ngu 1876, Charles Taze Russell asû article so atene: “Angoi ti Amara Ayeke Hunzi Lawa?” Lo fa so “ngoi mbasambala” so a sara tënë ni na yâ ti prophétie ti Daniel ayeke “ngoi so a diko teti amara” so Jésus asara tënë ni na yâ ti prophétie ti lo. Article ni afa so ngoi ni so ayeke  hunzi na ngu 1914. *Dan. 4:16; Luc 21:24.

13. Nyen la asi lani na ngu 1914 nyen? Nyen la aye so asi ngbene ye na ngu ni so afa na e?

13 Na ngu 1914, bira akomanse na Europe nga kete na pekoni, bira ni amû yâ ti dunia kue. Bira so asara si kota nzara atï na yâ ti dunia. Na ngoi so bira ni ahunzi na ngu 1918, mbeni sioni grippe afâ azo mingi na yâ ti dunia. Wungo ti azo so grippe ni afâ ala ahon wungo ti azo so akui na ngoi ti bira ni. Aye so kue ayeke lani mbage ti “fä” so Jésus asara tënë ni. Aye ni afa so Jésus aga Gbia na yayu na ngu 1914 (Mat. 24:3-8; Luc 21:10, 11). Na ngu ni so, lo “sigigi ti sö benda ti gue na ni nga ti hunzi songo benda ni.” (Apoc. 6:2). Jésus abi Satan na asioni yingo ti lo na sese. Ngbene ye na ngoi ni so ti ga na ni, azo abâ so tënë ti Bible so aga tâ tënë, tënë so a tene: “Mawa na sese nga na ngu-ingo, ngbanga ti so Zabolo azu na mbage ti ala, lo yeke na kota ngonzo, teti lo hinga so lo yeke na ngoi mingi pëpe.”—Apoc. 12:7-12.

14. (a) Ngbanga ti nyen a lingbi e ngbâ ti sambela ti tene Royaume ti Nzapa aga? (b) Kota kua wa la a lingbi e sara ni laso?

14 Prophétie so ayeke na Apocalypse 12:7-12 amû maboko na e ti hinga ndani so aye ti ngangu ato nda ti si na yâ ti dunia na ngoi so Jésus aga Gbia ti Royaume ti Nzapa. Lo to nda ti komande na ngoi so Satan angbâ ti komande dunia so. Juska ti si na ngoi so Jésus ayeke hunzi songo benda ti lo nga lo yeke futi sioni dunia so, e yeke ngbâ lakue ti sambela ti tene Royaume ti Nzapa aga.  Na oko ngoi ni, a lingbi e sara ye ague oko na sambela so na lege so e yeke fa tënë lakue na ndo ti Royaume ni. Jésus atene lani, a tene: “A yeke fa ande nzoni tënë ti royaume so na ndo ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.”—Mat. 24:14.

“ZIA A SARA YE SO BÊ TI MO AYE . . . NA NDO TI SESE”

15, 16. Tongana nyen la e lingbi ti sara ye alingbi na sambela so e tene na Nzapa ti tene lo sara ye so bê ti lo aye na ndo ti sese?

15 A sara ngu 6000 tongaso awe, a sara lani na sese ye so bê ti Nzapa aye. A yeke ndali ni la Jéhovah atene lani so aye kue ‘ayeke nzoni mingi’. (Gen. 1:31). Na pekoni, Satan asara kpengba-li, ngbene ye na ngoi ni so ti ga na ni, gi kete wungo ti azo la ayeke sara ye so bê ti Nzapa aye na sese. Me, e yeke laso na pasa ti duti na mbeni ngoi so azo million miombe so ayeke aTémoin ti Jéhovah ayeke sambela ti tene a sara na sese ye so bê ti Nzapa aye nga ala yeke sara ngangu ti sara ye alingbi na tënë ti sambela so. Ala yeke sara ni na lege so ala yeke sara ye so anzere na Jéhovah nga ala yeke fa na azo ye na ndo ti Royaume ti lo na bê ti ala kue.

Mo yeke fa na amolenge ti mo ti sara ye alingbi na sambela so e tene na Jéhovah ti sara ye so bê ti lo aye na ndo ti sese? (Bâ paragraphe 16)

16 Na tapande, mbeni ita-wali so awara batême na ngu 1948, na so ayeke lani missionnaire na Afrika, atene: “Ti gue oko na tënë ti sambela so e tene na Nzapa ti tene lo sara ye so bê ti lo aye na ndo ti sese, mbi yeke sambela fani mingi ti tene a fa tënë na azo kue so ayeke tongana angasangbaga nga a mû maboko na ala ti hinga Jéhovah kozo ti tene lo futi sioni dunia so. Nga, na ngoi so mbi ye ti fa tënë na mbeni zo, mbi yeke sambela Jéhovah ti mû na mbi ndara ti ndu bê ti zo ni. Ti azo so ayeke tongana angasangbaga so a fa tënë na ala awe, mbi yeke sambela Jéhovah ti tuku tufa ti lo na ndo ti angangu so e yeke sara ti bâ lege ti ala.” Ita-wali so ayeke na ngu 80, lo mû maboko na azo mingi ti hinga Jéhovah. Kite ayeke pëpe so mo hinga ambeni ita so asara na Jéhovah na ngangu ti ala kue atâa so ala yeke mbakoro.—Diko aPhilippien 2:17.

17. Mo bâ ti mo aye so Jéhovah ayeke sara ande ti kiri tënë na sambela so e tene na lo ti sara ye so bê ti lo aye na ndo ti sese so tongana nyen?

17 Juska na ngoi so Jéhovah ayeke futi awato ti lo, e yeke ngbâ lakue ti sambela ti tene a sara ye so bê ti Nzapa aye na ndo ti sese. Na pekoni, sese ayeke ga paradis, nga a yeke zingo azo milliard mingi na kuâ. Jésus atene: “Zia bê ti ala adö pëpe ndali ti tënë so, teti ngbonga ni ayeke ga so ala kue so ayeke na yâ ti asende ti kuâ ayeke mä ande go ti [mbi] na ala yeke sigigi.” (Jean 5:28, 29). E yeke duti ande na ngia mingi ti yamba azo ti e so e ye ala mingi. Nzapa “[a]yeke mbô ngu ti lê kue na lê ti [e]”. (Apoc. 21:4). Mingi ti azo so a yeke zingo ala na kuâ ayeke “azo ti mbilimbili pëpe”. Ala yeke azo so akui sân ti tene a fa na ala tâ tënë na ndo ti Jéhovah Nzapa nga na Molenge ti lo. A yeke nzere ande na e mingi ti fa na ala ye so bê ti Nzapa aye tongaso si ala lingbi ti wara “fini ti lakue lakue”.—Kus. 24:15; Jean 17:3.

18. Nyen la azo ayeke na bezoin ni mingi?

18 A yeke gi na ngoi so Royaume ti Nzapa ayeke ga ti sara si iri ti lo aga nzoni-kue la siriri ayeke duti na yâ ti dunia kue nga azo kue ayeke voro Jéhovah beoko. Biani, Nzapa ayeke mû ande na azo aye so ala yeke na bezoin ni mingi na ngoi so lo yeke sara ye alingbi na akozo ye ota so ayeke na yâ ti sambela ti Babâ ti e so mo yeke na yayu. Na yâ ti article ti peko, e yeke bâ ambeni ye so ayeke kota mingi so Jésus afa na e ti sambela ndali ni.

^ par. 12 Ti hinga ye so afa na e so prophétie so aga tâ tënë na ngu 1914, bâ buku Bible afa nyen biani? lembeti 216-218.