Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) JUIN 2015

“A lingbi ala kanga bê”

“A lingbi ala kanga bê”

KOLI ti Anita * asara ngonzo ngangu na ngoi so Anita awara batême. Anita atene: “Lo kanga lege na mbi ti gue na bungbi nga lo ke ti tene mbi di même iri ti Nzapa. Tongana mbi di gi iri ti Nzapa, lo ga ngbä na tere ti mbi.”

Na ndo ni, koli ti Anita aye lani pëpe ti tene lo fa ye na amolenge ti lo na ndo ti Jéhovah. Anita atene: “Mbi yeke lani na liberté ape ti voro Jéhovah na yanga-da ti mbi wani. A yeke lani ngangu na mbi ti fa ye na amolenge ti mbi na lê ti lo wala ti gue na ala na bungbi.”

Ye so asi na Anita so afa so tongana afami ti e akanga lege na e ti voro Jéhovah, a lingbi ti sara si a yeke ngangu na e ti ngbâ be-ta-zo na Jéhovah. Tongana e yeke na mbeni kobela so a kaï ni gbâ, wala molenge ti e, wala koli ti e wala wali ti e akui, wala mbeni fami ti e azia Jéhovah, a lingbi nga ti sara si a yeke ngangu na e ti ngbâ be-ta-zo na Jéhovah. Tongaso, nyen la alingbi ti mû maboko na e ti ngbâ be-ta-zo na Jéhovah?

Tongana mara ti akpale tongaso asi na mo, mo yeke sara tongana nyen? Bazengele Paul atene: “A lingbi [mo] kanga bê.” (aHéb. 10:36). Me nyen la alingbi ti mû maboko na mo ti kanga bê?

SAMBELA JÉHOVAH TI MÛ MABOKO NA MO

Mbeni ye so e lingbi ti sara ti wara ngangu so e yeke na bezoin ni ti kanga bê na yâ ti atara ayeke ti sambela Jéhovah. A yeke ye so Ana asara na ngoi so koli ti lo akui gi hio tongaso na mbeni lundi na lakui. Ala sara mariage asara ngu 30. Ana atene: “Lo ngbâ lani na place ti kua, na lo yeke gi na ngu 52.”

Ana ahon ndo ti kpale so tongana nyen? Kua ti nginza so lo sara amû maboko na lo ndali ti so asara si lo zia li ti lo gi na ndo ti kua ni, me azi vundu ti lo pëpe. Lo tene: “Mbi zi bê ti mbi na Jéhovah nga mbi voro yanga na lo ti mû maboko na mbi ti hon ndo ti ngangu kpale so asi lani na mbi so.” Jéhovah akiri tënë na asambela ti lo? Lo hinga biani so Jéhovah akiri tënë na ni. Lo tene: “Siriri so alondo na Nzapa la adë bê ti mbi nga asara si mbi duti na siriri. Mbi hinga biani so Jéhovah ayeke zingo ande koli ti mbi na kuâ.”—aPhil. 4:6, 7.

Jéhovah ‘lo so lo yeke mä sambela’ atene so lo yeke mû na awakua ti lo aye kue so ala yeke na bezoin ni ti ngbâ be-ta-zo na lo (Ps. 65:3). Tënë so akpengba mabe ti e biani nga amû maboko na e ti bâ so e nga kue e lingbi ti kanga bê na yâ ti angangu kpale.

NGBÂ NDURU NA TERE TI AITA TI MO

Jéhovah amû maboko na awakua ti lo na lege ti amba ti ala aChrétien na yâ ti congrégation. Na tapande, na ngoi so a sara ngangu mingi na aita ti congrégation ti Thessalonique, Paul awa aChrétien ni ti “ngbâ ti dë bê ti mba nga ti kpengba mba gi tongana ti so ala yeke sara [lani] so.” (1 aThes. 2:14; 5:11). A-Chrétien ti Thessalonique agbu ngangu na yâ ti kpale so ndali ti so ala ye tere nga ala mû maboko na mba. Mbaï ti aita so ayeke mbeni nzoni tapande ndali ti e nga afa na e mbeni ye so alingbi ti mû maboko na e ti gbu ngangu.

Tongana e yeke na kpengba songo na aita ti e na yâ ti congrégation, a yeke mû maboko na e ti kangbi “aye so ayeke kpengba mba na popo ti e.” (aRom. 14:19). A yeke kota ye ti sara tongaso mbilimbili na ngoi ti akota kpale. Aye ti vundu asi na Paul lani mingi, me Jéhovah amû na lo ngangu ti kanga bê na yâ ni. Na ambeni ngoi, Jéhovah asara kua na amba ti Paul so ayeke aChrétien ti kpengba lo. Na tapande, na ngoi so Paul atokua bara na aita ti congrégation ti Colosses, lo tene tënë so na ndo ti ala, lo tene: “A yeke ala si aga awamungo maboko so akpengba mbi.” (aCol. 4:10, 11). Biani, yengo so aita ni aye lani na Paul apusu ala ti kpengba lo na ngoi so lo yeke na bezoin ni. Peut-être  aita ti congrégation ti mo nga kue akpengba mo tongaso awe.

HUNDA NA A-ANCIEN TI MÛ MABOKO NA MO

Ambeni zo so Nzapa ayeke sara nga kua na ala ti mû maboko na e na yâ ti congrégation ayeke a-ancien. Aita so, so akpengba na lege ti yingo, ayeke “tongana ndo ti honde tere ngbanga ti kota pupu, ala yeke ndo ti bata tere ngbanga ti pupu ti ngangu. Ala yeke tongana angu so asua na ndo kuru sese, ala yeke tongana gbede ti kota tênë na yâ sese so zo anze dä.” (És. 32:2). Atënë so adë bê ti e mingi. Mo hunda na ala awe ti mû maboko na mo na ngoi ti akpale? Awango so a-ancien ayeke mû alingbi ti mû maboko na mo ti kanga bê na yâ ti akpale.

Biani, a-ancien ayeke sara miracle pëpe. Ala yeke na siokpari na tere ti ala nga ‘ala yeke na a-oko wokongo tongana e’. (Kus. 14:15). Me, asambela so ala yeke tene ndali ti e alingbi ti mû maboko na e mingi (Jacq. 5:14, 15). Mbeni ita-koli na Italie, so abâ pasi teti angu mingi na mbeni ngangu kobela, atene: “Ye so amû maboko na mbi lani ti kanga bê ayeke so aita aye mbi nga ala ga lakue abâ mbi.” Tongana mo yeke bâ pasi, Jéhovah aye ti tene mo hunda na a-ancien ti mû maboko na mo.

NGBÂ LAKUE TI SARA NA JÉHOVAH

Ambeni ye ayeke nga dä so e lingbi ti sara ti kanga bê na yâ ti akpale. Kozo ye ni ayeke ti ngbâ lakue ti sara na Jéhovah. Zia e bâ tapande ti John so ayeke na ngu 39 na so a wara mbeni cancer so ayeke gbu ka azo hio hio ape na tere ti lo. Lo tene: “Mbi bâ mbi tene a handa mbi handango ndali ti so mbi ngbâ lani maseka.” Na ngoi ni so, molenge ti John ti koli ayeke lani gi na ngu ota. John atene: “A lingbi lani wali ti mbi abâ lege ti mbi nga na molenge ti e nga lo gue na mbi na hôpital.” Ayorö so John anyon asara si lo fatigué mingi nga bê ti lo alondo. Aye ni kue la ape. Tere ti babâ ti John nga ason ngangu na babâ ni ayeke na bezoin ti tene mbeni zo amû maboko na lo.

Nyen la amû maboko na John nga na sewa ti lo na ngoi ti kpale so? Lo tene: “Atâa so lani mbi fatigué, mbi sara kue ti tene sewa ti e angbâ lakue ti sara na Jéhovah. E manke bungbi oko ape, e yeke fa tënë yenga oko oko nga e yeke voro Nzapa lakue na sewa même tongana a yeke ngangu na e ti sara ni.” Biani, John abâ so mbeni kota ye so ayeke mû maboko na e ti kanga bê na yâ ti akpale ayeke ti ngbâ ti sara na Jéhovah. Atâa so na tongo nda ni li ti lo aga kirikiri nga vundu asara lo, kete na pekoni lo wara siriri. Lo hinga so Jéhovah aye lo nga lo mû na lo ngangu so lo yeke lani na bezoin ni. John amû wango na azo so ayeke na yâ ti angangu kpale, lo tene: “Jéhovah alingbi ti kpengba ala tongana ti so lo kpengba mbi lani.”

Kite ayeke pëpe so na ngangu ti Nzapa, e lingbi ti kanga bê na yâ ti angangu kpale so e yeke tingbi na ni laso wala ande. Tongaso, zia e sambela Jéhovah ti mû maboko e, e ngbâ nduru na tere ti aita ti e na yâ ti congrégation, e hunda a-ancien ti mû maboko na e nga e ngbâ lakue ti sara na Jéhovah. Tongana e sara tongaso, e yeke sara ye ague oko na tënë ti Paul so, lo tene: “A lingbi ala kanga bê.”

^ par. 2 A changé ambeni iri ni.