Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) JUIN 2015

“Tongana Kingsley asara ni, mbi kue mbi lingbi ti sara ni!”

“Tongana Kingsley asara ni, mbi kue mbi lingbi ti sara ni!”

A YEKE kozo devoir ti Kingsley na Ekole ti Kusala ti aChrétien na congrégation la. Mbeni ita apika ndo ti peko ti lo, na Kingsley akomanse dikongo ye ni. Lo diko lê ti atënë ni nzoni nga lo huru ndo ti tënë oko ape. Me, ku si! Ngbanga ti nyen la lo diko ni na yâ ti Bible ape?

Kingsley ayeke na Sri Lanka, lo bâ ndo ape. Lo mä ndo nzoni ape nga lo bezoin puse ti azo ti bubango gere ti tambela na ni. Koli so asara tongana nyen ti hinga ye na ndo ti Jéhovah nga ti zia iri ti lo na Ekole ti Kusala ti aChrétien? Zia mbi fa ni na ala.

Na ngoi so mbi tingbi na Kingsley pan, bê ti mbi adö ti bâ so lo ye lani mingi ti hinga tâ tënë so ayeke na yâ ti Bible. Gbâ ti aTémoin ti Jéhovah amanda Bible na lo kozo awe na yâ ti mbeti ti lo Hingango Ye So Ague na Fini ti Lakue Lakue so awoko kue awe, so a sû ni na Braille, kode ti sungo mbeti ti awaziba. * Lo yeda ti tene mbi kiri mbi sara étude ti lo, me e wara akpale use.

Kozo kpale ni, Kingsley alango ndo oko na ambeni mba ti lo na yâ ti mbeni da so na yâ ni a yeke bata ambakoro nga na azo so mbage ti tere ti  ala abuba dä. A lingbi mbi sara tënë na kota go na ngoi so e yeke sara étude ni ndali ti so bruit ayeke na ndo ni so mingi nga Kingsley amä ndo nzoni ape. Azo kue so ayeke na yâ ti da ni ayeke mä e lani na ngoi so e yeke sara étude yenga na yenga.

Use kpale ni, na ngoi ti étude ni, Kingsley alingbi ti diko mbeti mingi ape nga lo lingbi ti bata na li ti lo afini ye mingi ape. Kingsley ayeke leke étude ni nzoni ti tene mandango ye ni atambela nzoni. Kozo ti tene e sara étude ni, lo yeke diko fani mingi mbage so e yeke manda ni, lo yeke diko aversê ni na yâ ti Bible ti lo ti Braille, nga na pekoni lo yeke leke akiringo tënë na ahunda ni na yâ ti li ti lo. Kode ti lo so ayeke pendere mingi. Na ngoi ti étude ni, lo yeke duti na ndo ti konza lo plié gere ti lo, na ngia lo yeke fa na kota go aye so lo manda. Kete na pekoni, e sara étude ni fani use na yâ ti yenga oko, étude ni ayeke mû lani l’heure use.

LO GUE NA BUNGBI NGA LO KIRI TËNË

Kingsley na Paul

Kingsley aye lani mingi ti gue na abungbi na Da ti Royaume, me a yeke lani kete ye na lo ape. Lo bezoin mbeni zo ti zia lo na yâ ti puse ti lo ni nga ti descend lo na yâ ni, wala ti zia lo na yâ ti oto wala ti zia lo na yâ ti Da ti Royaume. Me mingi ti aita ti congrégation amû maboko na lo, ala bâ so a yeke mbeni pasa ti sara ni. Na angoi ti bungbi ni, Kingsley ayeke zia mbeni baffle nduru na tere ti mê ti lo, lo yeke dengi mê nzoni na aye so a yeke fa nga lo yeke mû même acommentaire.

Na peko ti so e manda ye ni asara ambeni ngoi, Kingsley azia iri ti lo na Ekole ti Kusala ti aChrétien. Yenga use kozo ti tene lo sara kozo devoir ti lo, mbi hunda lo ti hinga wala lo leke ni. Lo tene na mbi sân mbeto, lo tene: “En, mbi diko ni fani 30, ita.” Mbi gonda lo ndali ti a-effort so lo sara ni nga mbi hunda lo ti diko ni na mbi mbi mä. Lo zi Bible ti lo, lo zia maboko ti lo na ndo ti atënë ni na braille, na lo komanse ti diko ni. Maboko ti lo adoit fade ti gue oko na atënë ni, me mbi bâ so maboko ti lo ague na atënë ni ape. Andâ lo bata atënë ti aversê ni kue na li.

Ngu ti lê ti mbi ayuru, li ti mbi akpe. Mbi hunda Kingsley ti hinga tongana nyen la lo bata aversê ni pendere tongaso na li, so lo sara ni gi fani 30 so. Lo tene: “Ên-ën, mbi diko ni fani 30 lango oko oko.” Kingsley amû nze oko na ndo ni, lo duti na ndo ti konza ti lo, lo diko aversê ni lo kiri lo diko ni juska lo bata atënë ni kue na li.

Fadeso a yeke lango ti devoir ti Kingsley. Na ngoi so lo hunzi ti sara devoir ti lo, na ngia aita apika maboko ngangu, na ambeni atoto ndali ti so ala bâ ngangu so fini élève so asara. Mbeni wafango tënë, so azia ti sara devoir na ekole ndali ti so mbeto asara lo, ahunda ti kiri ti zia iri ti lo na ekole. Ndali ti nyen? Lo tene: “Tongana Kingsley asara ni, mbi kue mbi lingbi ti sara ni!”

Na peko ti so Kingsley amanda Bible teti ngu ota, lo fa so lo mû tere ti lo na Jéhovah na ngoi so lo wara batême na lango 6 ti septembre, ngu 2008. Lo yeke mbeni Témoin so angbâ be-ta-zo juska na ngoi so lo kui na lango 13 ti mai, ngu 2014. Kingsley ahinga lani biani so na ngoi so sese ayeke ga ande Paradis, lo yeke kiri ti ngbâ ti sara na Nzapa na ngangu ti lo kue nga na seni so ayeke nzoni-kue (És. 35:5, 6).—Tënë ti Paul McManus.

^ par. 4 A sigigi na ni na ngu 1995; fadeso a imprimé ni encore ape.