Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Mai 2015

Zia lê ti mo akpengba Satan aye ti te mo!

Zia lê ti mo akpengba Satan aye ti te mo!

“Zia lê ti ala akpengba. Wato ti ala Zabolo ayeke tambela tongana mbeni bamara so ayeke toto, na lo yeke gi mbeni zo ti te lo.”1 PI. 5:8.

1. Fa tongana nyen la mbeni créature ti yingo aga Satan.

NA TONGO nda ni, créature ti yingo so, wala ange so, ayeke lani na nzoni songo na Jéhovah. Me na pekoni, nzara ti tene azo avoro lo akomanse ti maï na yâ ti lo. Ahon ti tene lo zi nzara so, lo bata ni akono juska adü siokpari (Jacq. 1:14, 15). E hinga iri so lo yeke na ni kozo ape, me e iri lo fadeso Satan. Lo “ngbâ na yâ ti tâ tënë pëpe”. Lo sara ngangu-li na Jéhovah na lo ga “babâ ti mvene.”—Jean 8:44.

2, 3. Aye wa la tënë “Satan,” “Zabolo,” “ngbo” nga na “sioni nyama” afa na ndo ti kota wato ti Jéhovah?

2 Ngbene ye na ngoi so Satan asara ngangu-li, lo ga kota wato ti Jéhovah nga wato ti azo kue. A-iri so a zia na ndo ti Satan afa so lo ga sioni mingi. Satan so aye ti tene “wato”, a fa so sioni ange so amû mbage ti komandema ti Nzapa ape, lo ke ni nga lo tiri na ni na ngangu ti lo kue. Satan aye na bê ti lo kue ti tene komandema ti Jéhovah aduti dä mbeni pëpe.

3 Na Apocalypse 12:9, a iri Satan a tene Zabolo, so aye ti tene “zo ti pango zo”. Ye so adabe ti e na sioni tënë so Satan atene na ndo ti Jéhovah lo tene Jéhovah ayeke zo ti mvene. Tënë “ngbo ti  giriri” adabe ti e na lango ti vundu so Satan ahanda lani Ève na yâ ti yaka ti Éden na lege ti mbeni ngbo. Tënë “kota sioni nyama” alingbi nga na Satan ndali ti so lo yeke ngangu nga lo yeke sioni. Lo ye ti sara si ye so Jéhovah aleke na bê ti lo ti sara atï na ngu, nga lo ye ti futi azo ti Jéhovah.

4. Nyen la e yeke sara tënë ndo ni na yâ ti article so?

4 A yeke polele so, Satan la asara si a yeke ngangu na e mingi ti ngbâ be-ta-zo na Jéhovah. A yeke ndani la Bible amû wango na e atene: “Ala zia li ti ala kpô, zia lê ti ala akpengba. Wato ti ala Zabolo ayeke tambela tongana mbeni bamara so ayeke toto, na lo yeke gi mbeni zo ti te lo.” (1 Pi. 5:8). Ti gue oko na wango so, na yâ ti article so e yeke sara tënë na ndo ti asarango ye ti Satan ota so afa ndani so a lingbi e sara hange na sioni wato so, so ayeke wato ti Jéhovah nga wato ti awakua ti lo.

SATAN AYEKE NA NGANGU

5, 6. (a) Mû mbeni tapande so afa so a-ange ayeke “na ngangu” mingi. (b) Na lege wa la Satan “ayeke na ngangu ti ga na kuâ”?

5 Acréature ti yingo so a iri ala a-ange ayeke “na ngangu” mingi (Ps. 103:20). Ala hinga ndo nga ala yeke na ngangu mingi ahon azo. Ni la, a-ange so ayeke be-ta-zo asara kua na ngangu ti ala ti sara na anzoni ye. Na tapande, na mbeni bï oko mbeni ange ti Jéhovah afâ aturugu 185000 ti Assyrie so ayeke awato ti awakua ti Nzapa. Mbeni ye so gi zo oko alingbi ti sara ni ape nga so a yeke même ngangu ti tene mbeni bungbi ti aturugu asara ni (2 aGbia 19:35, FD). Na mbeni ngoi nde, mbeni ange ni asara kua na akode ti lo nga na ngangu ti lo so ahon ti azo ti zi abazengele ti Jésus na kanga. Atâa so agarde so ayeke bata azo ti kanga ni ayeke lani dä, ange ni azi yanga ti da ni, lo zi abazengele ni, na pekoni lo kanga yanga ti da ni na peko ti ala sân ti tene agarde ni kue ahinga.—Kus. 5:18-23.

6 A-ange so ayeke be-ta-zo asara kua na ngangu ti ala ti sara na anzoni ye, me Satan asara kua na ngangu ti lo ti sara na asioni ye. Na ndo ni, Satan ayeke na ngangu mingi nga lo yeke pusu azo ti sara asioni ye. Bible atene so lo yeke “mokonzi ti dunia so” nga “nzapa ti aye ti ngoi so”. (Jean 12:31; 2 aCor. 4:4). Satan Zabolo ayeke même “na ngangu ti ga na kuâ.” (aHéb. 2:14). So aye ti tene pëpe so lo yeke fâ azo kue gi na lê ni lê ni. Me sioni bibe so Satan ayeke na ni, so ayeke ti fango zo, amû yâ ti dunia. Nga ndali ti so Ève ayeda na mvene so Satan atene na so Adam ake yanga ti Nzapa, a sara si azo kue asara siokpari nga ala yeke kui (aRom. 5:12). A yeke tongaso la Zabolo “ayeke na ngangu ti ga na kuâ”. A yeke ndani la Jésus atene lo yeke “wafango zo”. (Jean 8:44). Satan ayeke biani mbeni wato so ayeke na ngangu!

7. Tongana nyen la asioni yingo afa so ala yeke na ngangu?

7 Tongana e ke Satan, e yeke ke nga azo kue so amû peko ti lo ti ke komandema ti Nzapa. Na yâ ti azo so a yeke wara nga a-ange so asara ngangu-li, wala asioni yingo (Apoc. 12:3, 4). Asioni yingo afa fani mingi so ala yeke na ngangu mingi ahon azo na lege so ala sara pasi na azo (Mat. 8:28-32; Marc 5:1-5). A lingbi e bâ pëpe tongana senge ye ngangu so asioni ange so ayeke na ni wala so “mokonzi ti asioni yingo” ayeke na ni (Mat. 9:34). Sân mungo maboko ti Jéhovah e lingbi pëpe ti hon Satan na yâ ti bira so e yeke sara na lo.

SATAN AYEKE SIONI MINGI

8. (a) Nyen la Satan aye gi ti sara? (Bâ foto so ayeke na tongo nda ti article ni.) (b) Na bango ndo ti mo wani, tongana nyen la dunia so ayeke sioni mingi tongana Satan?

8 Bazengele Pierre ahaka Satan na “mbeni  bamara so ayeke toto.” Mbeni mbeti afa so tënë ti Grec so a kiri pekoni na “toto” aye ti sara tënë ti “dekongo ti mbeni nyama so sioni nzara agbu lo.” Hakango ye so afa biani tongana nyen la Satan ayeke tâ sioni mingi. Atâa so dunia kue ayeke na gbe ti Satan ade alingbi lo ape. Lo yeke tongana mbeni bamara so ayeke na nzara ti te gbâ ti azo (1 Jean 5:19). Ti Satan, dunia so ayeke gi tongana mbeni senge salade so zo ayeke te awe si lo te vrai kobe na pekoni. Ni la, lo turnê na mbage ti vrai kobe ni so ayeke tanga ti aChrétien so a soro ala ti gue na yayu nga na “ambeni ngasangbaga” so amû peko ti ala (Jean 10:16; Apoc. 12:17). Satan aye gi ti futi awakua ti Jéhovah. Aye ti ngangu so lo sara na adisciple ti Jésus ngbene ye na ngoi ti akozo Chrétien juska laso afa polele so lo yeke sioni mingi.

9, 10. (a) Tongana nyen la Satan asara bira lani na mara ti Israël? (Fa ambeni tapande ni.) (b) Ngbanga ti nyen la Satan ayeke lani na mbeni raison nde ti zia lê ti lo gi na ndo ti azo ti Israël ti giriri? (c) Ti mo, bê ti Zabolo ayeke tongana nyen laso na ngoi so mbeni wakua ti Jéhovah asara mbeni kota siokpari?

9 Satan afa nga so lo yeke sioni mingi na mbeni lege nde. Bamara so nzara agbu lo mingi ayeke bâ pëpe mawa ti zo wala ti nyama so lo ye ti te. Kozo si lo fâ zo wala nyama ni lo yeke pëpe na vundu ti lo, nga na pekoni lo yeke gi bê ti lo na ndo ni ape. Legeoko nga, Satan ayeke nga pëpe na vundu ti azo so lo yeke gi ti fâ ala. Na tapande, mo pensé so bê ti Satan ayeke lani tongana nyen na angoi kue so lo bâ azo ti Israël asara siokpari tongana lango-sioni nga na bê ti ye? Mo lingbi ti bâ na yâ ti li ti mo nzerengo tere ti Satan na ngoi so lo bâ akpale so aga na peko ti lango-sioni so Zimri asara nga na bê ti ye so Guéhazi asara?—Nom. 25:6-8, 14, 15; 2 aGbia 5:20-27.

A nzere na Satan tongana lo bâ so mbeni wakua ti Jéhovah asara siokpari (Bâ paragraphe 10)

10 Satan ayeke lani na mbeni raison nde ti zia lê ti lo gi na ndo ti azo ti Israël ti giriri. Girisa pëpe so Messie ayeke ga na lege ti mara ti Israël so, nga lo la lo yeke futi Satan nga lo yeke fa so Jéhovah la ayeke na droit ti komande dunia kue (Gen. 3:15). Satan aye pëpe ti tene azo ti Israël asara ye so bê ti Nzapa aye, tongaso lo sara kue ti pusu ala ti sara siokpari. Pensé pëpe so Satan asara mawa ti David na ngoi so lo gi mbeni wali nde. Pensé nga pëpe so Satan asara vundu  na ngoi so a ke na Moïse ti lï na Sese ti Zendo. Kite ayeke pëpe so Satan ayeke na ngia mingi tongana mbeni wakua ti Jéhovah asara mbeni kota siokpari. Nga asongo benda ti Zabolo so ayeke na popo ti aye so lo yeke sara kua na ni ti gi na yanga ti Jéhovah.—aProv. 27:11.

11. Ngbanga ti nyen Satan aye lani ti tene Sara asara siokpari?

11 Satan ake mbilimbili molongo ti sewa so na lege ni Messie ayeke bâ gigi. Na tapande, bâ ye so asi lani kete na peko ti so a tene na Abraham so lo yeke ga “kota mara”. (Gen. 12:1-3). Na ngoi so Abraham na Sara ayeke lani na Égypte, Pharaon aga na Sara na da ti lo na lo ye ti tene Sara aga wali ti lo. Ye oko, Jéhovah abata Sara nga lo sö lo na yâ ti kota kpale so. (Diko Genèse 12:14-20.) Mara ti ye so akiri asi na gbata ti Guérar, kete kozo ti tene a dü Isaac (Gen. 20:1-7). Satan la ayeke lani na peko ti aye so asi so? Lo pensé so Sara, so azia pendere ndo ti lo na Ur ti lango na yâ ti atente, alingbi ti zia si pendere ndo ti Pharaon na ti Abimélek agboto lê ti lo? Lo pensé lani so Sara ayeke sara mariage na mbeni oko ti agbia so na lo zia vundu na bê ti koli ti lo nga na Jéhovah? Bible asara tënë na ndo ni ape, me e lingbi ti tene so a yeke nzere lani na Satan tongana fade Sara asara siokpari na lo perdre pasa so lo yeke na ni ti duti na yâ ti molongo ti sewa so Messie ayeke bâ gigi na lege ni. Satan ayeke gi nga bê ti lo lani ape tongana nzoni songo ti mariage ti wali so, nzoni sarango ye ti lo nga nzoni songo so lo yeke na ni na Jéhovah abuba fade. Satan ayeke tâ sioni mingi.

12, 13. (a) Tongana nyen la Satan afa so lo yeke sioni mingi na peko ti so a dü Jésus? (b) Mo pensé so bê ti Satan ayeke tongana nyen na ndo ti amolenge so aye Jéhovah nga so ayeke sara ngangu ti sara na lo laso?

12 A dü Abraham asara angu ngbangbo mingi awe si a dü Jésus. Pensé pëpe so lani Satan abâ so bébé so ayeke pendere wala so a lingbi aye lo mingi. Satan ahinga lani atene fini bébé so ayeke kono na lo yeke ga Messie so amû zendo ni. Jésus ayeke kozo mbage ti hale ti Abraham, lo la lo yeke “futi akusala ti Zabolo” ande. (1 Jean 3:8). Satan abâ so a yeke sioni mingi ti fâ mbeni bébé? Ên-ën. Ngbanga ti lo ayeke dä ape. Lo sara ye hio ti gi ti fâ Jésus so ade lani kete molenge. Tongana nyen?

13 Na ngoi so Gbia Hérode amä azo ti gingo nda ti aye na lege ti atongoro ahunda ti hinga “Lo so a dü lo gbia ti aJuif,” ngonzo asara lo ngangu na lo leke na bê ti lo ti fâ lo (Mat. 2:1-3, 13). Lo mû yanga ti tene a fâ akete molenge-koli kue so ayeke na ngu use wala ala so ade asi na ngu use ape so ayeke na Bethléhem nga na ando so ayeke na tere ni. (Diko Matthieu 2:13-18.) Jésus asö kuâ na ngoi so a yeke fâ amolenge so. Me nyen la ye so afa na e na ndo ti wato ti e Satan? A yeke polele so Zabolo abâ fini ti zo na nene ni ape. Lo bi bê ti lo nga na amolenge oko ape. Satan ayeke biani “mbeni bamara so ayeke toto”. Girisa lâ oko ape so lo yeke sioni mingi.

SATAN AYEKE ZO TI HANDANGO ZO

14, 15. Tongana nyen la Satan asara si “bibe ti azo so amä na bê pëpe avuko”?

14 Oko ye so Satan alingbi ti sara ti pusu azo ti buba songo ti ala na Jéhovah, Nzapa ti e so aye e, a yeke handango ala (1 Jean 4:8). Na lege ti handa, Satan ayeke kanga lege na azo ti hinga so ala yeke “na bezoin ti aye ti yingo”. (Mat. 5:3). Lo sara si “bibe ti azo so amä na bê pëpe avuko, tongaso si sungo ti nzoni tënë ti gloire na ndo ti Christ, so ayeke image ti Nzapa, asu na ndo ti ala pëpe”—2 aCor. 4:4.

15 Mbeni kota ye so Satan ayeke sara kua na ni ti handa na azo, a yeke bungbi ti vorongo nzapa ti wataka. Lo hinga so Jéhovah  ayeke “Nzapa so asara mbanda”. (Ex. 20:5). Tongaso, a nzere na Satan mingi tongana lo bâ so azo avoro akotara ti ala, wala aye so ayeke na yâ ti dunia, wala anyama, so ti tene, ambeni ye wala ambeni zo nde na Jéhovah. Même azo so apensé atene ala yeke voro Nzapa na lege ni ayeke angbâa ti afango ye ti wataka nga na angobo ti akotara. Ala yeke na yâ ti mawa tongana ti azo so lani Jéhovah atene na ala, a tene: “Teti nyen i mû nginza ti i teti ye so ayeke kobe pëpe? na teti nyen i sara kusala teti ye so alingbi na nzara ti i pëpe? I mä Mbi nzoni, na i te ye so ayeke nzoni, na zia âme ti i awara ngia na ye ti nzoni mingi.”—És. 55:2.

16, 17. (a) Ngbanga ti nyen Jésus atene na Pierre atene: “Hon na peko ti mbi kâ, Satan”? (b) Tongana nyen la Satan alingbi ti handa e ti tene e bâ so a yeke pëpe ngoi ti tene e sara ye hio?

16 Satan alingbi ti handa même awakua ti Jéhovah so ayeke sara na lo na ngangu ti ala kue. Na tapande, bâ ye so asi na ngoi so Jésus atene na adisciple ti lo so a ga nduru ti fâ lo awe. Na nzoni bê, bazengele Pierre ague na Jésus na mbeni ndo na lo tene na Jésus, lo tene: “Zia a zi mo na yâ ti ye so, Seigneur; ye tongaso ayeke si ande na mo oko pëpe.” Jésus atene na Pierre polele, lo tene: “Hon na peko ti mbi kâ, Satan!” (Mat. 16:22, 23). Ngbanga ti nyen la Jésus airi Pierre “Satan”? A yeke ngbanga ti so Jésus ahinga lani ye so aye ti si. L’heure aga nduru awe ti tene Jésus akui tongana ngere so a futa nga ti fa so Zabolo ayeke zo ti mvene. Na ngoi ni so Jésus aye ti sara mbeni kota ye na yâ ti mbaï ti azo, a yeke lani pëpe ngoi ti tene Jésus agi lege ti tene “a zi” lo na yâ ti “ye so”. Tongana lê ti Jésus akpengba ape ka ayeke nzere lani na Satan mingi.

17 Teti so aga nduru awe ti futi aye ti ngoi so, e kue e yeke na yâ ti angoi ti ngangu. Satan aye ti tene lê ti e akpengba ape, ti tene e gi gi ti duti nzoni na yâ ti dunia so, tongaso si e bâ pëpe so a yeke ngoi ti tene e sara ye hio. Zia pëpe si ye tongaso asi na mo. “Lango pëpe”. (Mat. 24:42). Mä lâ oko pëpe mvene ti Satan, so lo tene ngoi ti futingo aye ti ngoi so angbâ ayo mingi wala so lo tene a yeke futi ande aye ti ngoi so ape.

18, 19. (a) Tongana nyen la Satan alingbi ti handa e ti bâ so Jéhovah aye e ape? (b) Tongana nyen la Jéhovah ayeke mû maboko na e ti ngbâ ti zia li ti e kpô nga ti zia lê ti e angbâ ti kpengba?

18 Satan ayeke gi nga ti handa e na mbeni lege nde. Lo ye ti tene e bâ so Jéhovah aye e ape nga so lo yeke pardone asiokpari ti e ape. So ayeke amvene so alondo na Satan. Gbu li ti mo kete, zo wa la biani Jéhovah aye lo ape? A yeke Satan. Zo wa la biani Jéhovah ayeke pardone lo ape? A yeke nga gi Satan. Bible adë bê ti e atene: “Nzapa ayeke pëpe zo so ayeke mbilimbili pëpe si lo girisa kusala ti ala nga na ndoye so ala fa teti iri ti lo.” (aHéb. 6:10). Jéhovah abâ angangu so e yeke sara ti nzere na lo na nene ni mingi, nga lo yeke bâ akua so e sara na lo tongana senge ye pëpe. (Diko 1 aCorinthien 15:58.) Tongaso, e zia si Satan ahanda e na amvene ti lo ape.

19 Tongana ti so e londo ti bâ, Satan ayeke na ngangu, lo yeke sioni mingi nga lo yeke zo ti handango zo. Tongana nyen la e lingbi ti sö benda na yâ ti bira so e yeke sara na mara ti wato so amû mbeto na zo so? Jéhovah azia e gi tongaso ape. Mbeti ti lo afa na e ye na ndo ti akode ti Satan, nga “e hinga nzoni mingi aye so lo ye ti sara.” (2 aCor. 2:11). Tongana e hinga akode ti Satan, a yeke sara si e yeke ngbâ ti zia li ti e kpô nga lê ti e ayeke ngbâ ti kpengba. Me ti hinga gi aye so Satan aye ti sara alingbi ape. Bible atene: “Ala ke Zabolo, na fade lo yeke kpe yongoro na tere ti ala.” (Jacq. 4:7). Article ti peko ayeke sara tënë na ndo ti aye ota so e lingbi ti sara ti tiri na Satan na ti sö benda.