Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) MAI 2015

 SANGO NA NDO TI MBAÏ TI BUNGBI TI E

Lo bâ so aita asara ye na ndoye na place ti tengo kobe

Lo bâ so aita asara ye na ndoye na place ti tengo kobe

E YEKE ka na ngia mingi na angoi so e yeke gue na akota bungbi ti tene Jéhovah afa ye na e. Na ngoi so awakua ti Nzapa ayeke bungbi na ngoi ti kota bungbi, akobe so ala yeke te ni legeoko ayeke sara nga si ala yeke na ngia.

Na nze ti septembre, ngu 1919, aWamandango Bible asara mbeni kota bungbi so asara lango miombe na Cedar Point, Ohio na Amerika. Azo so asara kua na Hôtel la adoit ti leke ndo ti lango na aita so aga ndali ti kota bungbi ni nga ti mû kobe na ala, me aita saki na saki akiri aga. Teti so aita ni ayeke mingi, gbâ ti azo so asara kua na yâ ti Hôtel ni azia kua ti ala. Kota zo ti place ti tengo kobe ni ahunda wala ambeni maseka so aga ndali ti kota bungbi ni alingbi ti mû maboko. Amaseka mingi ayeda. Mbeni maseka ni so iri ti lo ayeke Sadie Green, a tene: “A yeke kozo ti tene mbi sara kua na place ti tengo kobe la, me anzere lani na e mingi.”

Sierra Leone, 1982

Na yâ ti angu so aga na pekoni, a leke aye ti tene atö kobe na place ti akota bungbi. Ye so amû lege na gbâ ti avolontaire ti mû maboko na aita ti ala. So aita ni asara kua legeoko na amba ti ala aChrétien amû nga maboko na amaseka mingi ti leke na bê ti ala ti sara na Jéhovah. Gladys Bolton so asara kua na place ti tengo kobe na ngoi ti kota bungbi ti ngu 1937, a tene: “Mbi wara aita ti ambeni kodoro nde nga mbi mä tongana nyen la ala hon ndo ti akpale ti ala. A yeke na ngoi ni so la mbi leke na bê ti mbi ti ga pionnier.”

Beulah Covey so ague na kota bungbi ni atene: “Aita ni asara kua na bê ti ala kue asara si aye kue atambela na lege ni.” Me, akpale amanke pëpe. A yeke gi na ngoi so Angelo Manera asi na Dodger Stadium na Los Angeles na Californie, na ngu 1969 la lo ga ti hinga so lo yeke na popo ti azo so ayeke sara kua na place ti tengo kobe. Lo tene: “A yeke lani mbeni ye so mbi ku tere ti mbi na ni ape.” Na popo ti aye so a leke ndali ti kota bungbi ni a hunda nga ti zi mbeni kota canal so ayo mètre ngbangbo osio ti tene tuyau ti gaz ahon na yâ ni ague na cuisine.

Francfort, Allemagne, 1951

Na ngu 1982 na Sierra Leone, a hunda na avolontaire so ayeke sara kua ngangu ti leke ndo nga ti leke place ti tengo kobe na aye so ala yeke na ni na yâ ti kodoro ni. Na Francfort, na Allemagne, aita-koli so ayeke na kode  aloué mbeni train so ayeke kpe na ngu ti wâ; guru ti ngu ti wâ ni so ayeke sigigi dä amû lege ti tene a tö ye na yâ ti atawa 40. Aita akangbi kobe na azo 30000 na yâ ti l’heure oko. Aita so aga na kota bungbi ni aga na azembe nga na afourchette ti ala ti sara si kua ti aita 576 so asara kua na place ti sukulango asembe ayapu. Na Yangon, Myanmar, aita so atö kobe asara ye na nzoni bê, ala zia gbâ ti ndongo pëpe na yâ ti kobe so ala tö na aita so aga na kota bungbi ni.

“ALA LUTI NA NDUZU SI ALA YEKE TE YE”

Annie Poggensee awara ye ti nzoni na ngoi so lo yeke luti na gbe ti lâ na popo ti azo so akpo molongo ti gue ti mû kobe na ngoi ti mbeni kota bungbi so a sara ni na Amerika na ngu 1950. Lo tene: “Mbi dengi mê ti mbi lani nzoni na ngoi so ambeni ita-wali use so alondo na Europe na bateau si aga ayeke sara lisoro.” Ala use kue ayeke fa tongana nyen la Jéhovah amû maboko na ala ti ga na kota bungbi ni. Annie atene: “Tere ti aita-wali use so anzere mingi ahon ti azo kue so aga na kota bungbi ni. Ngoi so ala mû ti luti na yâ ti molongo ni nga na yâ ti ndowa asara ye oko na ala ape.”

Séoul, Corée, 1963

Na akota bungbi so gbâ ti azo aga dä, a leke akota tente so na yâ ni a zia atable so zo ayeke luti gi lutingo na tere ni ti te ye si aita ate ye hio na ala zia place na amba ti ala. A sara tongana so ti tene azo saki na saki alingbi ti te ye na ngoi ti wungo tere. Mbeni koli so ayeke Témoin ape atene: “A yeke mbeni bungbi ti Nzapa so ayeke nde. Ala luti na nduzu si ala yeke te ye.”

Bê ti aturugu nga na akota zo ti kodoro adö mingi na ngoi so ala bâ so aita asara kua nzoni nga aye kue atambela na lege ni. Na peko ti so aturugu ti Amerika ague abâ place ti tengo kobe so ayeke na Yankee Stadium na New York City, na Amerika, ala tene na Pakara Faulkner, turugu ti kota kamba ti Grande-Bretagne, ti gue ti bâ ni nga. Tongaso, lo na wali ti lo ague na assemblée so a sara na Anglais na so mama-tene ni ayeke: “Royaume so asö benda.” A sara assemblée ni na ngu 1955 na Twickenham na Angleterre. Lo tene so lo bâ so aita asara ye na ndoye na place ti tengo kobe ni.

Teti angu mingi, aita amû tere ti ala wani ti tö apendere kobe so ngere ni ayeke ngangu ape na aita so aga na kota bungbi. Me fani mingi ti sara kota kua so a hunda ti tene gbâ ti avolontaire asara kua angoi mingi. Ye so asara même si ala yeke mä ambeni diskur ti kota bungbi ni ape wala ala mä diskur oko ape. Na popo ti ngu 1978 na ngu 1979, a yapu yâ ti aye so a leke ni ndali ti tongo kobe na ngoi ti akota bungbi na yâ ti ambeni kodoro. A to nda ni na ngu 1995, a hunda na aita so aga na akota bungbi ti ga na akobe ti ala wani. Ye so amû lege na aita so atö kobe lani nga ayeke kangbi ni ti mä adiskur na ngoi ti akota bungbi nga ti sara lisoro na amba ti ala aChrétien. *

Jéhovah abâ na nene ni mingi aita so ayeke sara kua ngangu ti mû maboko na amba ti ala aChrétien. Vundu alingbi ti sara ambeni ita tongana ala dabe ti ala na apendere ngoi so lani ala yeke sara kua na place ti tongo kobe. Me mbeni ye ayeke dä so a lingbi e girisa ni ape: Aita angbâ lakue ti ye tere na ngoi ti akota bungbi ti e.—Jean 13:34, 35.

^ par. 12 Biani, akua mingi ayeke dä so aita alingbi ti sara ti mû maboko na ngoi ti akota bungbi.