Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) AVRIL 2015

Mo yeke biani na nzoni songo na Jéhovah?

Mo yeke biani na nzoni songo na Jéhovah?

“Ala ga nduru na Nzapa, na fade lo yeke ga nduru na ala.”—JACQ. 4:8.

1. Ngbanga ti nyen a lingbi e ngbâ lakue ti kpengba songo ti e na Jéhovah?

MO YEKE Témoin ti Jéhovah so awara batême awe? Tongana a yeke tongaso, mo yeke na mbeni ye so ngere ni ayeke kota mingi: songo ti mo na Nzapa. Ye oko, dunia ti Satan so nga na awokongo ti e aye ti buba songo so e yeke na ni na Nzapa. A-Chrétien kue ayeke wara kpale so. Tongaso, a lingbi e ngbâ lakue ti kpengba songo ti e na Jéhovah.

2. (a) Ti sara songo na mbeni zo aye ti tene nyen? (Bâ kete tënë na gbe ni.) (b) E lingbi ti kpengba songo ti e na Jéhovah tongana nyen?

2 Mo yeke biani na nzoni songo na Jéhovah? Mo ye ti tene songo ti mo na Jéhovah akiri akpengba? Jacques 4:8 afa na mo ye so mo lingbi ti sara: “Ala ga nduru na Nzapa, na fade lo yeke ga nduru na ala.” Bâ so a yeke mbeni ye so a lingbi e na Jéhovah kue e sara. * Na ngoi so e yeke sara ambeni ye ti ga nduru na Nzapa, lo nga kue lo yeke sara ambeni ye ti ga nduru na e. Tongana e  sara tongaso lakue, yeke yeke songo ti e na Jéhovah ayeke kpengba. Na nda ni, e yeke bâ so e yeke biani na nzoni songo na lo nga atënë ti bê ti e ayeke duti tongana ti Jésus so atene: “Lo so atokua mbi ayeke dä biani na . . . mbi hinga lo.” (Jean 7:28, 29). Me, nyen la mo lingbi ti sara mbilimbili ti ga nduru na Jéhovah ahon ti kozo?

Mo lingbi ti sara lisoro na Nzapa tongana nyen? (Bâ paragraphe 3)

3. E lingbi ti sara lisoro na Jéhovah tongana nyen?

3 Mbeni ye so a lingbi e sara tongana e ye ti ga nduru na Jéhovah a yeke ti sara lisoro na lo lakue. Me tongana nyen la mo lingbi ti sara lisoro na Nzapa? Gbu li ti mo na ndo ti lege so mo yeke sara kâ lisoro na mbeni kamarade ti mo so alango yongoro na mo. Kite ayeke dä pëpe so ala yeke sara lettre na mba nga ala yeke iri mba na téléphone, peut-être lakue lakue. Mo yeke sara lisoro na Jéhovah tongana mo sambela lo lakue. (Diko Psaume 142:3.) Nga, Jéhovah ayeke sara lisoro na mo na ngoi so mo yeke diko Bible lakue nga mo yeke gbu li ti mo na ndo ti aye so mo yeke diko. (Diko Ésaïe 30:20, 21.) Zia e bâ fadeso tongana nyen la lisoro so e na Jéhovah e yeke sara alingbi ti kpengba songo ti e na lo nga alingbi ti sara si e bâ lo tongana kota Kamarade ti e.

JÉHOVAH AYEKE SARA TËNË NA MO NA NGOI SO MO YEKE DIKO BIBLE

4, 5. Tongana nyen la Jéhovah ayeke sara lisoro na mo wani na lege ti Bible? Mû mbeni tapande.

4 E hinga so atënë ti Nzapa so ayeke na yâ ti Bible abâ azo kue. Me, eskê Bible afa nga ye so mo wani mo lingbi ti sara ti ga nduru na Jéhovah? En. Tongana mo yeke diko Bible nga mo yeke manda ni lakue, gi ti hinga atënë ti bê ti mo na ndo ti aye so mo yeke diko nga gbu li ti mo ti bâ tongana nyen la mo lingbi ti sara ye alingbi na aye so mo yeke manda. Tongana mo sara tongaso, mo yeke zia si Jéhovah asara lisoro na mo na lege ti Bible. Ye so ayeke sara si songo ti mo na lo akiri akpengba ahon ti kozo.—aHéb. 4:12; Jacq. 1:23-25.

5 Na tapande, diko nga gbu li ti mo na ndo ti tënë ti Jésus so lo tene: “Zia ti bungbi amosoro ndali ti mo wani na ndo ti sese so.” Tongana mo bâ so mo zia aye ti Royaume na kozo ndo na yâ ti fini ti mo awe, a nzere na Jéhovah mingi. Me tongana mo bâ so a lingbi mo changé aye na yâ ti fini ti mo ti zia aye ti Royaume na kozo ndo, Jéhovah afa na mo mbeni ye so mo lingbi ti sara ti ga nduru na lo mingi ahon ti kozo.—Mat. 6:19, 20.

6, 7. (a) Tongana e manda Bible, ndoye so ayeke na popo ti e na Jéhovah ayeke ga tongana nyen? (b) Nyen la a lingbi e zia na gbele e na ngoi so e yeke manda Bible?

 6 Tongana e manda Bible, e yeke hinga aye so e lingbi ti changé ti sara na Jéhovah nzoni. A yeke sara nga si e bâ na nene ni mingi apendere sarango ye ti Jéhovah na ye so ayeke sara si e ye lo mingi ahon ti kozo. Nga tongana e ye Jéhovah mingi, lo kue lo yeke ye e mingi, na ye so ayeke sara si songo ti e na lo akpengba ahon ti kozo.—Diko 1 aCorinthien 8:3.

7 Ye oko, tongana e ye ti ga nduru mingi na Jéhovah, a lingbi e manda Bible gi tongaso pëpe. Jean 17:3 atene: “Ti wara fini ti lakue lakue, a lingbi ala manda ti hinga mo, mo so gi mo oko ayeke tâ Nzapa, nga ti hinga lo so mo tokua lo, Jésus Christ.” Tongaso, na ngoi so e yeke manda Bible, a lingbi e zia na gbele e ti “hinga” Jéhovah nzoni mingi me pëpe ti manda ye gi tongaso.—Diko Exode 33:13; Ps. 25:4.

8. (a) Ambeni zo alingbi ti pensé ti ala nyen na ndo ti fason so Jéhovah asara ye na Gbia Azaria? (b) Tongana nyen la tongana e hinga Jéhovah e yeke duti na kite pëpe na ndo ti asarango ye ti lo?

8 Tongana e hinga Jéhovah tongana tâ kamarade ti e, e yeke gi bê ti e ahon ndo ni pëpe tongana Bible afa na e pëpe ambeni raison so apusu lo ti sara mbeni ye. Na tapande, mo pensé ti mo nyen na ndo ti fason so Jéhovah asara na ye na Azaria, gbia ti Juda? (2 aGbia 15:1-5). Bâ so atâa so “azo ni angbâ ti mû sandaga na ti zö yombo na ndo-nduzu ni kue”, Azaria “asara ye so ayeke mbilimbili na lê ti L’Éternel”. Me “L’Éternel apika Azaria na lege ti kobela ti ngiba [wala buruma], lo yeke zo ti ngiba juska lâ ti kui ti lo”. Ngbanga ti nyen? Mbaï ni afa ndani pëpe. Ye so Jéhovah asara so ason bê ti mo, nga a sara si mo pensé so lo punir Azaria gi senge senge? Tongana e hinga afason ti sarango ye ti Jéhovah nzoni, bê ti e ayeke son ape. Lo yeke wa zo lakue “na lege ti ngbanga”, wala lo yeke punir zo lakue alingbi na ni (Jér. 30:11). Tongaso, atâa so peut-être mo hinga pëpe ndani so Jéhovah apunir lani Azaria, mo hinga biani so ye so Jéhovah asara so ayeke na lege ni.

9. Anzene nzene ye wa la amû lege na e ti hinga ndani so Jéhovah apunir lani Azaria na kobela ti buruma?

9 Bible afa na e anzene nzene ye mingi na ndo ti fini ti Gbia Azaria, so a hinga lo nga tongana Gbia Ozias (2 aGbia 15:7, 32). Na yâ ti mbaï so ayeke na 2 Chronique 26:3-5, 16-21, a fa so atâa so Ozias asara ye so ayeke mbilimbili na lê ti Jéhovah teti mbeni ngoi, a si na mbeni ngoi “bê ti lo aga kota na lo futi lege ti lo.” Baba apusu lo ti sara akua so a mû lani gi na aprêtre ti sara ni. Aprêtre bale-miombe na oko atene na lo so ye so lo sara so ayeke na lege ni pëpe na ala tene na lo ti zia lege ni. Ozias asara ye tongana nyen? Lo sara ye na baba. “Ngonzo agbu” lo na tere ti aprêtre ni. A yeke ndali ni la Jéhovah apika lo na kobela ti buruma.

10. Ngbanga ti nyen e yeke lakue na bezoin pëpe ti hinga araison so apusu Jéhovah ti sara aye? Nyen la alingbi ti sara si e hinga biani so Jéhovah ayeke sara ye lakue na lege ni?

10 E girisa pëpe kota ye so e manda na yâ ti mbaï so. Tongana fade Bible afa anzene nzene ye pëpe na ndo ni tongana ti so lo fa pëpe anzene nzene ye na ndo ti ambeni nduru mbaï so ayeke na yâ ti Bible, mo yeke sara tongana nyen? Mo yeke hunda tere ti mo wala Jéhovah asara ye lani na lege ni? Wala mo yeke pensé so Bible ayeke na gbâ ti asango so amû lege na mo ti hinga biani so Jéhovah ayeke sara ye lakue na lege ni? (Deut. 32:4). Tongana e hinga Jéhovah nzoni, e yeke ye lo mingi nga e yeke zia bê ti e kue na lo. Ye so ayeke sara si e yeke duti pëpe na bezoin ti hinga araison kue so  apusu Jéhovah ti sara ye. Tongana mo yeke diko Bible, a yeke sara si songo ti mo na Jéhovah akpengba nga mo yeke ga nduru na lo mingi ahon ti kozo.—Ps. 77:13, 14.

MO YEKE SARA TËNË NA JÉHOVAH NA LEGE TI SAMBELA

11-13. E hinga tongana nyen so Jéhovah ayeke mä asambela? (Bâ foto so ayeke na tongo nda ti article ni.)

11 E yeke ga nduru na Jéhovah na lege ti sambela. E yeke gonda lo, e yeke kiri singila na lo nga e yeke hunda lo ti fa lege na e (Ps. 32:8). Me ti tene mo duti na kpengba songo na lo, a lingbi mo hinga biani so lo yeke mä asambela.

12 Ambeni zo atene so Nzapa ayeke mä asambela pëpe nga sambela ayeke gi mbeni ye so tongana zo atene ni ayeke sara si lo duti nzoni. Ala pensé so sambela ayeke mû gi maboko na zo ti gbu li ti lo nzoni na ndo ti akpale ti lo na ti hinga ye so lo lingbi ti sara ti leke na akpale ni. Biani, sambela alingbi ti mû maboko na mo na alege so. Me na ngoi so mo yeke sara lisoro na Jéhovah na yâ ti sambela, lo yeke mä mo biani. Nyen la afa ni?

13 Gbu li ti mo kete: Kozo ti tene Jésus aga na sese, lo bâ na lê ti lo so Jéhovah akiri tënë na asambela ti awakua ti lo so ayeke na sese ge. Na pekoni, na ngoi so Jésus aga na sese, lo sara lisoro na Babâ ti lo so ayeke na yayu na lege ti sambela ti fa atënë ti bê ti lo na lo. Tongana Jésus apensé lani so Jéhovah ayeke mä sambela ti lo pëpe, lo lingbi lani ti sambela lo wala même ti mû mbeni bï oko kue ti sambela lo? (Luc 6:12; 22:40-46). Tongana Jésus apensé lani so Jéhovah ayeke mä asambela pëpe, lo lingbi fade ti fa na adisciple ti lo tongana nyen ti sambela Jéhovah? Biani, Jésus ahinga so sambela ayeke biani sarango lisoro na Jéhovah. Mbeni lâ Jésus atene: “Babâ, mbi kiri singila na mo so mo mä mbi. Ti tâ tënë ni, mbi hinga so mo yeke mä mbi lakue.” E nga kue e hinga biani so Jéhovah ayeke ‘lo so lo yeke mä sambela’.—Jean 11:41, 42; Ps. 65:3.

14, 15. (a) Tongana e fa atënë ti bê ti e polele na ngoi so e yeke sambela, e yeke wara aye ti nzoni wa? (b) Tongana nyen la asambela ti Kathy amû maboko na lo ti kpengba songo ti lo na Jéhovah?

14 Na ambeni ngoi, Jéhovah alingbi ti kiri tënë na asambela ti mo na mbeni lege so mo hinga pëpe. Ye oko, tongana mo fa atënë  ti bê ti mo polele na Jéhovah na ngoi so mo yeke sambela lo, mo yeke bâ polele so lo kiri tënë na sambela ti mo nga songo ti mo na lo ayeke kpengba mingi. Na ndo ni, tongana mo fa agingo bê ti mo kue na Jéhovah, lo yeke ga nduru mingi na mo ahon ti kozo.

15 Gbu li ti mo na ndo ti ye so asi na Kathy. * Atâa so lo yeke fa lani tënë lakue, lo ye lani fango tënë pëpe. Lo tene: “Mbi ye lani fango tënë pëpe. Mbi ye lani fango tënë oko ape. Na ngoi so mbi gue na retraite, mbeni ancien atene na mbi so mbi yeke ga ande pionnier permanent, lo mû même na mbi mbeni formulaire ti tene mbi remplir ni. Mbi mû desizion ti mû kua ti pionnier, me mbi sambela nga Jéhovah lâ na lâ ti tene lo mû maboko na mbi ti ye fango tënë. Jéhovah akiri tënë na sambela ti lo? Kathy atene: “Mbi yeke fadeso na yâ ti ngu ota ti mbi ti kua ti pionnier la. So mbi mû ngoi mingi ti fa tënë nga mbi manda ye na mbage ti ambeni ita-wali, a sara si yeke yeke mbi maï kode ti fango tënë ti mbi. Laso, mbi ye gi fango tënë pëpe, me mbi ye ni mingi. Kota ye ni ayeke so mbi ga nduru mingi na Jéhovah ahon ti kozo.” Biani, asambela ti Kathy asara si lo duti biani na kpengba songo na Jéhovah.

SARA YE SO A LINGBI MO SARA

16, 17. (a) Nyen la a lingbi e sara ti tene songo ti e na Jéhovah angbâ lakue ti kpengba? (b) Nyen la e yeke sara tënë na ndo ni na yâ ti article ti peko?

16 Ti kpengba songo ti e na Jéhovah ayeke ye so e yeke sara ni na yâ ti gigi ti e kue. A lingbi e sara ambeni ye ti ga nduru na Nzapa tongana e ye ti tene lo nga kue lo ga nduru na e. Tongaso, zia e sara kue ti ngbâ lakue ti sara lisoro na Nzapa na lege ti mandango Bible nga na sambela. Ye so ayeke sara si songo ti e na Jéhovah ayeke ngbâ lakue ti kpengba nga ayeke mû lege na e ti hon ndo ti akpale ti e.

Ti kpengba songo ti e na Jéhovah ayeke ye so e yeke sara ni na yâ ti gigi ti e kue (Bâ paragraphe 16, 17)

17 Ye oko, tongana e sambela Jéhovah na bê ti e kue si akpale ti e angbâ gi ngbango, mbeni kpale alingbi ti londo. Na angoi tongaso, e lingbi ti zia bê ti e kue na Jéhovah tongana ti kozo pëpe. E lingbi ti komanse ti hunda tere ti e wala Jéhovah ayeke mä biani asambela ti e wala lo bâ e tongana kamarade ti lo. Tongana e wara mara ti apensé so, nyen la e lingbi ti sara? E yeke sara tënë na ndo ni na yâ ti article ti peko.

^ par. 2 Mbeni bakari atene so sarango songo na mbeni zo aye ti sara tënë ti lege so azo use ayeke pensé na mba nga ala yeke sara ye na mbage ti mba. Tongaso, a lingbi ala use kue asara mbeni ye si songo ti ala angbâ ti kpengba.

^ par. 15 A changé iri ni.