Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) MARS 2015

“Sarango tongaso anzere na lê ti mo”

“Sarango tongaso anzere na lê ti mo”

“Mo honde aye so ngangu na awandara nga na azo so ahinga ndo, me mo fa ni na akete molenge.”LUC 10:21.

1. Nyen la asara si “bê ti Jésus asi na ngia nga na yingo vulu”? (Bâ foto so ayeke na tongo nda ti article ni.)

MO LINGBI ti bâ na yâ ti li ti mo sarango ye ti Jésus na ngoi so “bê ti [lo] asi na ngia nga na yingo vulu”? Peut-être mo bâ yanga ti lo ayeke na ngia, lê ti lo aza na nzerengo tere. Nyen la asara si lo yeke na ngia tongaso? Lo tokua adisciple ti lo 70 ti gue ti fa nzoni tënë ti Royaume ti Nzapa. Lo ye mingi ti hinga tongana nyen la ala yeke sara kua ni, ndali ti so akota wato so aye nzoni tënë ape ayeke lani mingi. Na popo ti awato so, a yeke wara azo so ahinga ndo mingi nga na ascribe na aFarizien so ahinga mbeti mingi. Ala pusu azo mingi ti bâ Jésus tongana mbeni senge “sarapande” nga ti bâ adisciple ti lo tongana “azo so amanda mbeti pëpe na ala yeke asenge zo”. (Kus. 4:13; Marc 6:3). Atâa so kue, adisciple ni akiri na nzerengo tere na peko ti kua ni. Ala fa tënë atâa so azo nga na asioni yingo akanga lege na ala. Nyen la asara si tere ti ala anzere nga ala sara ye na mbeto ape?—Diko Luc 10:1, 17-21.

2. (a) Tongana nyen la adisciple ti Jésus ayeke tongana akete molenge? (b) Nyen la amû maboko na adisciple ti Jésus ti mä yâ ti akpengba tâ tënë ti Bible?

2 Jésus atene na Jéhovah, a tene: “Babâ, mbi sepela mo na lê ti azo kue, mo Seigneur ti yayu na ti sese, ngbanga ti so mo honde aye so na awandara nga na azo so ahinga ndo, me mo fa ni na akete molenge. Biani, Babâ, a nzere na lê ti mo ti sara tongaso.” (Mat.  11:25, 26). Jésus aye lani ti tene pëpe so adisciple ti lo ayeke avrai molenge. Me, lo hinga so ala yeke tongana akete molenge tongana a haka ala na azo ti dunia so, so ahinga ndo nga ahinga mbeti mingi, so abâ tere ti ala wani tongana azo ti ndara. Jésus afa na adisciple ti lo ti duti tongana akete molenge, ti ngbâ ti sara tere ti ala kete nga ti yeda ti tene a fa ye na ala (Mat. 18:1-4). Ye ti nzoni wa la ala wara ndali ti so ala sara tere ti ala kete? Na lege ti yingo vulu, Jéhovah amû maboko na ala ti mä yâ ti akpengba tâ tënë ti Bible. Me akota zo ti ndara nga na azo ti hingango ndo, so ake adisciple ni, amä yâ ti atâ tënë so pëpe ndali ti so Satan nga na baba ti ala avuko lê ti ala.

3. Nyen la e yeke sara tënë na ndo ni na yâ ti article so?

3 Kite ayeke pëpe so tere ti Jésus anzere lani mingi. Tere ti lo anzere ti bâ lege so Jéhovah afa na nda ti akpengba tâ tënë ti Bible na azo kue so asara tere ti ala kete atâa hingango ye ti ala ayeke tongana nyen wala ala manda mbeti asi na ndo wa. A nzere na lo so Babâ ti lo ayeda na kode ti fango ye so akpengba pëpe nga ayeke polele. Jéhovah achangé pëpe, me tongana nyen la lo fa so lo ngbâ ti yeda na mara ti kode ti fango ye so? Na ngoi so e yeke kiri tënë na hundango ndo so na yâ ti article so, tere ti e ayeke nzere tâ gi tongana ti Jésus lani.

LO FA NDA TI AKPENGBA TÂ TËNË NA AZO KUE

4. Na alege wa Tour ti Ba Ndo so a sara ni na mbeni lege so akpengba ape ayeke mbeni cadeau?

4 Na yâ ti angu so ahon ade ti ninga ape, aye so bungbi ti Jéhovah afa na e afa biani so bungbi ni aye mingi ti tene afango ye ti Bible aduti polele nga akpengba pëpe. Zia e bâ ambeni tapande ni ota. Kozo ni, na ayanga ti ambeni kodoro e yeke na Tour ti Ba Ndo so a sara ni na mbeni lege so akpengba ape. * Azo so ahinga ayanga ti kodoro ni so nzoni ape wala so ayeke na kpale ti dikongo mbeti abâ Tour ti Ba Ndo so tongana mbeni cadeau so amû na ala na nzoni bê. Azo so amû li ni na yâ ti sewa abâ so ndali ti Tour ti Ba Ndo so, fadeso amolenge ti ala akiri tënë mingi na ngoi ti Mandango Tour ti Ba Ndo. Tour ti Ba Ndo ayeke kpengba ye so na lege ni e yeke wara kobe ti yingo. Aita mingi asû ambeti na aita ti Bebungbi. Na yâ ti ambeti ni ala tene atënë so andu bê ti fa singila ti ala. Mbeni ita-wali atene so lo yeke lani na mbeto ti kiri tënë na ngoi ti Mandango Tour ti Ba Ndo. Me ti fadeso, na peko ti so lo wara Tour ti Ba Ndo so, lo tene: “Mbi yeke kiri tënë fadeso mingi, nga mbeto asara mbi encore ape. Mbi kiri merci na Jéhovah nga na ala.”

5. Ambeni nzoni ye wa la ayeke na yâ ti Mbeti ti Nzapa ti fini dunia so a kiri a leke yâ ni?

5 Use ni, a kiri a leke yâ ti lege so a sû na Mbeti ti Nzapa ti fini dunia na Anglais, na a sigigi na ni na ngoi ti bungbi ti ngu oko oko so a sara ni na lango 5 ti octobre, ngu 2013. * Mingi ti aversê ni, atënë ni ayeke mingi tongana ti kozo ape, me nda ti aversê ni achangé ape nga zo ayeke mä yâ ni hio. Na tapande, Job 10:1 so kozo wungo ti atënë ti yâ ni ayeke 27 akiri 19; aProverbe 8:6 so atënë ni kozo ayeke 20 akiri 13. Atënë ti yâ ti aversê so use kue asigigi polele na yâ ti fini Bible ni. Mbeni ita-koli so a soro lo ti gue na yayu, so asara na Jéhovah be-ta-zo teti angu mingi, atene: “Mbi diko mbeti ti Job na yâ ti fini Bible so, na a yeke mo bâ mo tene kozo ti tene mbi mä yâ ni la.” Azo mingi atene mara ti tënë ti lo so.

6. Atënë ti bê ti mo ayeke so wa na ndo ti afini fango ye so e wara na ndo ti Matthieu 24:45-47?

 6 Ota ni, gbu li na ndo ti ambeni fini fango ye so e wara ade ti ninga ape so amû lege na e ti mä yâ ti ambeni versê ti Bible nzoni. Na tapande, Tour ti Ba Ndo ti lango 15 ti juillet ngu 2013 amû lege na e ti hinga ye nzoni mingi na ndo ti “ngbâa be-ta-zo so ayeke sara ye na ndara”. (Mat. 24:45-47). Tour ti Ba Ndo ni afa so ngbâ be-ta-zo ayeke Bebungbi. Nga “azo ti kua” ni ayeke azo kue so ngbâa be-ta-zo ayeke mû kobe na ala, atâa ala so a soro ala ti gue na yayu wala “ambeni ngasangbaga”. (Jean 10:16). A nzere na e mingi ti hinga atâ tënë so nga ti fa ni na afini zo. Na ambeni lege wa la Jéhovah afa so lo yeda ti tene a fa ye na mbeni kode so akpengba ape nga ayeke polele?

A FA NDA TI AMBAÏ TI BIBLE NA LEGE SO AKPENGBA APE

7, 8. Ambeni mbaï wa na yâ ti Bible ayeke fä ti mbeni ye so ayeke si ande?

7 Tongana e sara na Jéhovah asara angu mingi awe, peut-être e hinga achangement so a sara na ndo ti lege so a fa na nda ti ambaï ti Bible na yâ ti ambeti ti e. Ândö e yeke tene ka mingi so ambeni mbaï ti Bible aye ti sara tënë ti ambeni ye so ayeke si ande. Mbeni raison ayeke dä so amû lege na e ti fa nda ti ambaï ti Bible tongaso? En. Na tapande, Jésus asara tënë ti “fä ti prophète Jonas.” (Diko Matthieu 12:39, 40.) Jésus afa ndani lo tene so lango so Jonas asara na yâ ti susu aye ti sara tënë ti lango so lo yeke sara na yâ ti dû ti kuâ. Yâ ti susu ni alingbi lani ti duti dû ti kuâ ti Jonas tongana fade Jéhovah abata lo na fini ape.

8 Ambeni mbaï ti Bible ayeke dä so ayeke fä ti mbeni ye so ayeke si ande. Bazengele Paul asara tënë ti ambeni mingi. Na tapande, songo ti Abraham na Agar na Sara ayeke fä ti songo so ayeke na popo ti Jéhovah na mara ti Israël nga na mbage ti bungbi ti Jéhovah so ayeke na yayu (aGal. 4:22-26). Legeoko nga, tabernacle nga na temple, Lango ti Kangango ndo ti asiokpari, kota prêtre, nga na ambeni ye so ayeke na yâ ti Ndia ti Moïse ayeke “gbede ti anzoni ye so ayeke ga”. (aHéb. 9:23-25; 10:1). Tongana e manda ambaï ti Bible so nga na aye so ambaï ni aye ti tene ayeke kpengba mabe ti e. Me so aye ti tene so azo kue so a sara tënë ti ala na yâ ti Bible, aye kue so asi na aye kue so Bible asara tënë ni ayeke fä ti mbeni zo wala ti mbeni ye nde?

9. Ândö, a fa nda ti mbaï ti Bible so asara tënë ti Naboth tongana nyen?

9 Ândö, fani mingi na yâ ti ambeti ti e, a fa so azo kue so a sara tënë ti ala na yâ ti ambeni mbaï ti Bible, aye kue so asi na aye kue so ambeni mbaï ti Bible asara tënë ni ayeke fä ti mbeni zo wala ti mbeni ye nde. Na tapande, zia e bâ mbaï ti Naboth so Gbia-wali Jézabel aleke si a fâ lo tongaso si Achab, so ayeke koli ti lo, amû yaka ti vigne ti lo (1 aGbia 21:1-16). Na ngu 1932, na yâ ti mbeni Tour ti Ba Ndo, a fa so mbaï so ayeke fä ti mbeni ye. A fa so Achab na Jézabel ayeke fä ti Satan na bungbi ti lo; Naboth ayeke fä ti Jésus; kuâ ti Naboth ayeke fä ti kuâ ti Jésus. Me, angu mingi na peko ni, na yâ ti buku “Que ton nom soit sanctifié,” so a sigigi na ni na ngu 1961, a fa so Naboth ayeke fä ti aChrétien so a soro ala ti gue na yayu nga Jézabel ayeke fä ti aChrétien ti wataka. Tongaso, ye ti ngangu so Jézabel asara na Naboth aduti fä ti ye ti ngangu so a sara na aChrétien so a soro ala ti gue na yayu na alango ti nda ni. Teti angu mingi, afango nda ti ye so akpengba mabe ti awakua ti Jéhovah. Tongaso, ka ngbanga ti nyen la a changé fadeso yâ ti afango nda ti ye ni?

10. (a) Tongana nyen la ngbâa be-ta-zo ayeke sara hange mingi tongana lo ye ti fa nda ti ambeni mbaï ti Bible? (b) Afango ye so ayeke na yâ ti ambeti ti e aluti laso mingi na ndo ti nyen?

10 Teti angu mingi, Jéhovah amû maboko na “ngbâa be-ta-zo so ayeke sara ye na ndara”  ti sara ye na ndara mingi ahon ti kozo. Fadeso, ngbâa be-ta-zo ayeke sara ye na hange mingi tongana lo ye ti fa so mbeni mbaï ti Bible aye ti sara tënë ti mbeni ye so ayeke si ande. Lo yeke gi kozoni kue ti bâ wala ambeni versê ti Bible ayeke dä so afa polele so ayeke tongaso. Nga, a bâ so a yeke ngangu na aita mingi ti mä yâ ti angbene fango nda ti ye ti e na ndo ti ambeni mbaï ti Bible nga na aye so ambaï ni aye ti tene. A lingbi ti duti ngangu ti mä yâ ti anzene nzene ye so a fa na ndo ti ambaï ti Bible ni, ti dabe na ni, nga ti sara ye alingbi na ni. Mbeni kpale ni ayeke so, tongana a luti mingi gi na ndo ti lege so mbaï ni ayeke ga ande tâ tënë, a yeke sara si zo alingbi ti hinga pëpe nzoni sarango ye so ayeke na yâ ti mbaï ni nga na nzoni ye ti manda so ayeke na yâ ni. Tongaso, laso e bâ so na yâ ti ambeti ti e lege so a fa na nda ti ambaï ti Bible akpengba ape. Afango ye ni aluti mingi na ndo ti anzoni ye ti manda na ndo ti mabe, gbungo ngangu, vorongo Nzapa na bê kue, nga na ambeni nzoni sarango ye so e lingbi ti manda na yâ ti ambaï ni. *

Tapande ti Naboth afa na e mbeni nzoni ye ti manda (Bâ paragraphe 11)

11. (a) Tongana nyen la e mä fadeso yâ ti mbaï so asara tënë na ndo ti Naboth? Tongana nyen la tapande ti lo amû maboko na e? (b) Na yâ ti angu so ahon ade ti ninga ape, ngbanga ti nyen na yâ ti ambeti ti e a yeke ngangu ti tene a tene so ambeni mbaï ti Bible ayeke fä ti mbeni ye nde? (Bâ article “Tënë so azo ahunda” na yâ ti Tour ti Ba Ndo so.)

11 Tongana nyen la e mä fadeso yâ ti mbaï so asara tënë na ndo ti Naboth? Mbaï ni ayeke polele nga zo amä yâ ni hio. So lani Naboth so ayeke zo ti mbilimbili akui, a yeke pëpe ndali ti so lo yeke fä ti Jésus wala fä ti aChrétien so asoro ala ti gue na yayu, me lo kui ngbanga ti so lo leke na bê ti lo ti ngbâ ti duti be-ta-zo na Nzapa. Lo ngbâ ti sara ye alingbi na Ndia ti Jéhovah atâa so azo so ayeke na komandema asara ye ti ngangu mingi na lo (Nom. 36:7; 1 aGbia 21:3). Tapande ti lo amû maboko na e ndali ti so e kue e lingbi ti wara mara ti kpale ti lo so. (Diko 2 Timothée 3:12.) A-Chrétien kue alingbi ti mä yâ ti mbaï ni, ti dabe na ni, nga ti sara ye alingbi na ni ti kpengba mabe ti ala.

12. (a) Tënë wa la a lingbi e tene pëpe na ndo ti ambaï ti Bible? (b) Nyen la amû lege na e ti mä même yâ ti afango ye so alï mingi? (Bâ kete tënë na gbe ni.)

12 E lingbi ti tene na nda ni so ambaï ti Bible afa gi ye ti manda awe me afa mbeni ye nde pëpe? Ên-ën. Laso, ambeti ti e afa so  mbeni mbaï oko alingbi ti dabe ti e na mbeni mbaï nde, wala alingbi ti mû maboko na e ti mä yâ ti mbeni mbaï nde. Fadeso, a yeke ngangu ti tene na yâ ti ambeti ti e a fa nda ti mingi ti ambaï ti Bible a tene so ayeke fä ti mbeni ye nde. Na tapande, e lingbi ti tene biani so dutingo be-ta-zo ti Naboth na yâ ti aye ti ngangu juska na kuâ adabe ti e na dutingo be-ta-zo ti Christ nga na ti aChrétien so a soro ala ti gue na yayu. Ye oko, ye so alingbi nga ti dabe ti e na dutingo be-ta-zo ti “ambeni ngasangbaga” mingi. Mara ti hakango ye tongaso, so akpengba pëpe so, afa so a yeke mbeni fango ye so alondo na Jéhovah. *

A FA NDA TI ATOLI TI JÉSUS NA LEGE SO AKPENGBA APE

13. Atapande wa afa so fadeso e yeke fa nda ti ambeni toli ti Jésus na mbeni lege so akpengba pëpe nga ayeke polele?

13 Jésus Christ ayeke Kota Wafango ye so ahon tanga ti azo kue na yâ ti dunia. Mbeni kode ti fango ye so lo ye ti sara kua na ni mingi ayeke sarango kua na atoli (Mat. 13:34). Atoli ayeke nzoni mingi ndali ti so ayeke fa nda ti aye so akpengba mingi na mbeni lege so akpengba ape so alingbi ti sara si e gbu li ti e nga alingbi ti ndu bê ti e. Teti angu mingi, ambeti ti e afa nda ti atoli ti Jésus na mbeni lege so akpengba ape nga ayeke polele. Na tapande, Tour ti Ba Ndo ti lango 15 ti juillet, ngu 2008 amû maboko na e ti mä yâ ti atoli ti Jésus nzoni mingi na ndo ti mama ti mapa, lê ti moutarde nga na gbanda ti gbungo na susu. Fadeso e bâ polele so atoli so aye ti sara tënë ti Royaume ti Nzapa so amû maboko na azo mingi ti ke sioni dunia so ti ga adisciple ti Christ.

14. (a) Tongana nyen la e fa lani nda ti toli ti zo ti Samarie so asara nzoni bê na mba ti lo? (b) Tongana nyen la e mä yâ ti toli ti Jésus so fadeso?

14 Tongana nyen la e lingbi ti mä yâ ti ambaï wala atoli ti Jésus so lo fa anzene nzene ye mingi na yâ ni? Ambeni mbaï ni ayeke na lege ti fä, ambeni ayeke atënë ti prophétie nga ambeni afa na e anzoni ye ti manda. Me e yeke hinga yâ ni tongana nyen? Tongana angu ayeke hon, kiringo tënë ni asigigi polele. Na tapande, bâ lege so e fa lani nda ti toli ti Jésus na zo ti Samarie so asara nzoni bê na mba ti lo (Luc 10:30-37). Na ngu 1924, na yâ ti mbeni Tour ti Ba Ndo a tene so zo ti Samarie ni aye ti sara tënë ti Jésus; lege so alondo na Jérusalem azu na Jéricho aye ti sara tënë ti asioni ye so asi na azo ngbene ye so kengo yanga abâ gigi na Éden; azo ti nzi so ayeke na ndo ti lege ni aye ti sara tënë ti akota ndo ti dengo buze nga na azo ti dengo buze so aye ti wara go na ndo ti azo; nga prêtre na Lévite ni aye ti sara tënë ti akota zo ti abungbi ti vorongo nzapa ti wataka. Me laso, mbeti ti e asara kua na toli so ti dabe ti e aChrétien kue so a lingbi e sara kangbi na popo ti azo pëpe. A lingbi e mû maboko na azo kue so ayeke na bezoin ni, me mbilimbili a lingbi e mû maboko na ala ti hinga tâ tënë na ndo ti Nzapa. A nzere na e mingi ti bâ so Jéhovah asara si e mä yâ ti afango ye ti lo polele.

15. Nyen la e yeke bâ ande na yâ ti article ti peko?

15 Na yâ ti article ti peko, e yeke sara tënë na ndo ti mbeni toli ti Jésus na ndo ti amasia bale-oko (Mat. 25:1-13). Jésus aye lani ti tene adisciple ti lo, so ayeke na yâ ti alango ti nda ni, amä yâ ti kpengba toli ti lo so tongana nyen? Azo kue so lo sara tënë ti ala na yâ ti toli ni, aye kue so toli ni asara tënë ni nga na aye kue so asi na yâ ti toli ni aye ti sara tënë ti mbeni zo wala ayeke fä ti mbeni ye so ayeke si ande? Wala lo ye lani ti tene adisciple ti lo amanda mbeni nzoni ye dä so ayeke mû maboko na ala na alango ti nda ni so? E yeke hinga ni ande.

^ par. 4 A sigigi na Tour ti Ba Ndo so a sara ni na mbeni lege so akpengba ape kozo na yanga ti Anglais na nze ti juillet, ngu 2011. Na pekoni, a sigigi na ni na ambeni yanga ti kodoro, me mingi ape.

^ par. 5 A yeke sigigi ande na ni na ambeni yanga ti kodoro nde.

^ par. 10 Na tapande buku Sara ye na mabe tongana ti ala asara tënë mingi na ndo ti azo 14 so Bible asara tënë ti ala. Buku ni agboto lê mingi na ndo ti anzoni ye ti manda me pëpe na ndo ti aye so mbaï ti azo ni aduti fä ni.

^ par. 12 Na yâ ti Bible, e yeke wara nga aye so akpa aye so ayeke “ngangu ti mä yâ ni,” so na popo ni a yeke wara ambeni tënë so Paul atene. Ye oko, azo kue so asû Bible asû ni na gbe ti yingo vulu. A yeke oko yingo so la amû maboko laso na atâ Chrétien ti mä yâ ti atâ tënë so ayeke na yâ ti Bible, “même aye ti Nzapa so nda ni alï mingi.”—2 Pi. 3:16, 17; 1 aCor. 2:10.