Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) FÉVRIER 2015

Mbeni nzoni ye so azo ti Japon aku tere ti ala na ni ape

Mbeni nzoni ye so azo ti Japon aku tere ti ala na ni ape

NA NGOI ti mbeni bungbi so a sara na Nagoya, na Japon na lango 28 ti avril, ngu 2013, Anthony Morris, so ayeke mbeni membre ti Bebungbi, atene mbeni pendere tokua so azo so aga na bungbi ni aku tere ti ala na ni ape. Lo sara tënë ti sigingo ti mbeni fini mbeti na yanga ti Japonais so iri ni ayeke: Bible: Nzoni tënë so Matthieu asû na mbeti. Azo so aga na bungbi ni wala so abâ ni na télé so wungo ti ala ahon 210000 apika maboko aninga.

Mbeti ti Évangile ti Matthieu so a sigigi na ni so ayeke na alembeti 128. A yeke Évangile ti Matthieu so ayeke na yâ ti Mbeti ti Nzapa ti fini dunia na yanga ti Japonais la a mû ni a imprimé ni na mbeni fason so ayeke nde mingi. Ita Morris afa so a sigigi na mbeti so “ndali ti azo ti Japon”. Mbeti ni ayeke tongana nyen? Ngbanga ti nyen la a sigigi na mbeti so? Nyen la azo atene na ndo ni?

MBETI NI AYEKE TONGANA NYEN?

Fason so a sû na mbeti ti Matthieu so apika bê ti azo so aga na bungbi ni mingi. Azo ti Japon alingbi ti sû mbeti ti ala ti londo na mbage ti wali ti gue na mbage ti koli wala ti londo na mbage ti nduzu ti kiri na mbage ti gbe ni. Nga, gi kete wungo ti ambeti-sango nga na ambeti ti e so a sigigi na ni ade ti ninga pëpe la a sû ni ti londo na mbage ti wali ti gue na mbage ti koli. Ye oko, a sû atënë so ayeke na yâ ti fini mbeti so ti londo na mbage ti nduzu ti kiri na mbage ti gbe ni alingbi na kode so azo ti Japon mingi ayeke sû na ambeti-sango nga na ambeni mbeti nde. Azo ti Japon mingi so ayeke diko mbeti abâ so lege so a sû na mbeti so ayeke ngangu ape ti diko ni. Nga, a mû anduru tënë so ayeke na li ti alembeti ti mbeti ti Matthieu ni a zia ni tongana akete li ti tënë na yâ ti aversê ni ti tene azo so adiko ni abâ akota tënë ti yâ ni hio.

Hio, aita ti Japon awara aye ti nzoni mingi na lege ti kode so a sû na mbeti ti Matthieu so. Mbeni ita-wali, so ayeke na ngu 80 tongaso, atene: “Mbi diko mbeti ti Matthieu fani mingi awe, me kode so a sû na fini mbeti ti Matthieu so ti londo na mbage ti nduzu ti kiri na mbage ti gbe ni nga na ali ti tënë so ayeke na yâ ti aversê ni amû maboko na mbi ti mä yâ ti fango ye ti Jésus na ndo ti Hoto nzoni mingi.” Mbeni ita-wali, so ayeke maseka, atene: “Mbi diko mbeti ti Matthieu ni kue mbi hunzi ni lango oko. Mbi habitué na dikongo ambeti ti yanga ti Japonais so a sû ni ti londo na mbage ti wali ti gue na mbage ti koli, me mingi ti azo ti Japon aye ti ala mingi ambeti so a sû atënë ni na mbage ti nduzu ti kiri na mbage ti gbe ni.”

A SARA NI NDALI TI AZO TI JAPON

Ngbanga ti nyen la mbeti ti Matthieu so alingbi biani na bezoin ti azo ti Japon? Atâa so azo ti Japon mingi ahinga Bible ape, ala ye ti diko ni. Mbeti ti Évangile ti Matthieu so ayeke mû pasa na azo so ade abâ Bible lâ oko ape ti gbu mbage ti Bible so na maboko ti ala na ti diko ni.

Ngbanga ti nyen a soro lani mbeti ti Matthieu? Ti mingi ti azo ti Japon, tongana a sara tënë ti “Bible” ye so aga na li ti ala ayeke Jésus Christ. Tongaso, a soro  mbeti ti Matthieu ndali ti so na yâ ni a sara tënë ti akotara ti Jésus nga na tënë ti dungo lo, fango ye ti lo na ndo ti Hoto so azo ahinga ni mingi nga na prophétie ti lo na ndo ti alango ti nda ni. Azo ti Japon mingi ayeke ye atënë so mingi.

Awafango tënë ti Royaume na Japon ayeke na ngia ti kangbi fini mbeti so da na da nga na angoi so ala yeke sara avizite. Mbeni ita-wali atene: “Fadeso mbi wara pasa mingi ti kangbi Mbeti ti Nzapa na azo na yâ ti territoire ti e. Mbi wara lani lege ti mû na mbeni zo mbeti ti Matthieu so gi na peko ti bungbi ni na lakui.”

NYEN LA AZO ATENE NA NDO NI?

Tongana nyen la awafango tënë ayeke zia mbeti ti Matthieu ni na azo? Azo ti Japon mingi ahinga atënë tongana “kete yanga ti gbagba”, “ala tuku aperle ti ala na gbe ti agaduru pëpe” na “ala gi bê ti ala lâ oko pëpe ngbanga ti kekereke”. (Mat. 6:34; 7:6, 13). Bê ti ala adö ti hinga so ayeke Jésus Christ la atene atënë so. Azo mingi, so abâ atënë so na yâ ti mbeti ti Évangile ti Matthieu so, atene: “Mbi ye dépuis ti diko Bible kamême fani oko.”

Na ngoi so awafango tënë akiri ti sara vizite na azo so ayeda ti mû mbeti ti Matthieu ni, fani mingi azo ni atene so na ngoi so ala wara mbeti ni so ala diko ni kue gi na lê ni lê ni, ti ambeni ala diko gi mbage ni. Mbeni koli, so ayeke na ngu 60 tongaso atene na mbeni ita, atene: “Mbi diko ni fani mingi nga adë bê ti mbi. Pardon, fa na mbi ye mingi na ndo ti Bible.”

Na ngoi so a fa tënë na mbeti ti Matthieu so na ando so azo ayeke dä mingi, mbeni ita-wali amû adresse ti e-mail ti lo na mbeni wali so ayeda ti mû mbeti ti Matthieu ni. A sara l’heure oko na peko ni, wali ni atokua mbeti na ita-wali ni na Internet, lo tene so lo diko mbage ti Bible ni na lo ye ti hinga ye mingi na ndo ni. Yenga oko na peko ni, lo to nda ti manda Bible nga kete na peko ni, lo komanse ti ga na abungbi.

A tokua mbeti ti Matthieu so ahon 1600000 na acongrégation ti Japon, nga nze na nze aita azia ni saki mingi na azo. Akozo tënë ti mbeti ti Matthieu ni afa atënë ti bê ti aita so asigigi na ni na lege ti tënë so: “E hinga na bê ti e kue so dikongo mbeti so ayeke sara si ala yeke ye Bible mingi.”