Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Février 2015

Atënë so azo ahunda

Atënë so azo ahunda

Nyen la a lingbi ti sara ti mû maboko na aita so fion ti parfum asara ala kobela?

Aita so fion ti parfum asara ala kobela ayeke na yâ ti mbeni kota kpale. Ndali ti so lâ na lâ ala yeke tingbi na azo so a hinga ala ape, kite ayeke pëpe so ala yeke tingbi na azo so azia parfum na tere ti ala. Ambeni ita ahunda wala lege ayeke dä ti tene a hunda na aita ti sara parfum ape na ngoi so ala ye ti gue na abungbi nga na akota bungbi.

Biani, mbeni Chrétien ayeke ye pëpe ti kanga lege na mbana na mbeni zo ti gue na bungbi. E kue e yeke na bezoin ti awango so e yeke wara na ngoi ti abungbi (aHéb. 10:24, 25). Tongaso, mbeni ita, so fion ti parfum asara lo kobela na a sara si a yeke ngangu na lo ti gue na bungbi, alingbi ti sara tënë ni na a-ancien. Atâa so Bible asara tënë pëpe na ndo ti sarango parfum ti gue na bungbi nga so a yeke na lege ni ape ti lu ndia na ndo ni, a-ancien alingbi ti mû wango ti mû maboko na aita ti congrégation ti hinga kpale so ambeni ita ayeke na yâ ni. A dépend, a-ancien alingbi ti sara kusala na ambeni mbeti ti e so asara tënë na ndo ti kpale so na yâ ti bezoin ti congrégation na ngoi ti Bungbi ti Kusala. Wala ala lingbi ti sara tënë ni na congrégation na kode na lege ti mbeni tokua. * Ye oko, a-ancien alingbi ti kiri lakue na ndo ti atokua tongaso ape. Na ngoi ti abungbi ti e, e yeke wara lakue afini zo nga na agene so ahinga ti ala kpale ni ape, na e ye ti yamba ala nzoni. A lingbi zo oko asara pëpe si mba ti lo aduti nzoni ape ndali ti parfum so lo sara kete.

Tongana na yâ ti mbeni congrégation, ambeni ita ayeke dä so fion ti parfum asara ala kobela, bungbi ti a-ancien alingbi ti leke mbeni ndo na yâ ti Da ti Royaume ndali ti aita ni ti tene ala duti dä tongana lege ayeke dä. Na tapande, a lingbi ti tene na aita ni ti duti na yâ ti salle secondaire so abafle ayeke dä tongaso si ala mä tënë. Tongana kpale ni angbâ lakue nga ambeni ita ni angbâ ti bâ pasi ngangu, congrégation alingbi ti leke ti tene a-enregistré abungbi na aita ni wala alingbi ti leke ti tene aita ni amä abungbi na lege ti téléphone tongana ti so a yeke sara na aita so alingbi pëpe ti tambela.

Na yâ ti angu so ahon ade ti ninga ape, na yâ ti Kusala ti Royaume, a wa aita ti sara ye na hange na ndo ti tënë ti sarango parfum ti gue na akota bungbi. A wa aita ti sara hange na ni mbilimbili na angoi ti akota bungbi, ndali ti so a yeke ngangu ti wara mbeni ndo nde ti zia azo so fion ti parfum asara ala kobela dä. Ye oko, tënë so a tene ni so ayeke pëpe mbeni ndia so a lingbi aita asara ye alingbi na ni na ngoi ti abungbi, nga a lingbi aita abâ ni tongaso ape.

So e yeke na angoi ti nda ni ti dunia so, e kue e yeke bâ pasi ndali ti siokpari so ayeke na tere ti e. E bâ na nene ni mingi ngangu so aita ayeke sara ti sara si e bâ pasi ahon ndo ni ape. Ti tene ambeni ita asara parfum ape ti mû lege na mbeni ita ti ga na abungbi, a lingbi ti hunda na ala ti sara sacrifice. Me, ndoye so e yeke na ni na mbage ti ita ni alingbi ti pusu e ti sara ni.

 Aye so azo asû na mbeti afa biani so Ponce Pilate ayeke lani dä?

A sû iri ti Pilate na yanga ti Latin na ndo ti tênë so

Azo so ayeke diko Bible ahinga Ponce Pilate ndali ti so lo la lo fâ ngbanga na ndo ti Jésus nga lo hunda ti tene a fâ Jésus (Mat. 27:1, 2, 24-26). Ye oko, a wara nga iri ti lo fani mingi na yâ ti ambeni mbeti ti mbaï so azo ti ngoi ti e asû ni. Mbeni mbeti (The Anchor Bible Dictionary) atene so ambeti so asara tënë na ndo ti Ponce Pilate ayeke “mingi nga afa anzene nzene tënë mingi na ndo ti lo ahon agouverneur kue ti Judée so ayeke aRomain.”

A wara iri ti Pilate fani mingi na yâ ti ambeti so Josèphe, mbeni wasungo-mbaï so ayeke Juif asû ni. Lo sara tënë na ndo ti aye ti ngangu ota so asi na Pilate na ngoi so lo komande na Judée. Philon, so ayeke nga mbeni wasungo-mbaï so ayeke Juif, asara tënë na ndo ti osio ye ti ngangu ni. Tacite, mbeni wasungo-mbeti so ayeke Romain so asû mbaï ti atogbia ti Rome, afa polele so Ponce Pilate la ahunda ti tene a fâ Jésus na ngoi ti komandema ti Tibère.

Na ngu 1961, azo so ayeke gi ye na gbe ti sese, so asara kua na yâ ti ngbene place ti theâtre ti Rome na Césarée na Israël, awara mbeni kota tênë so a sû iri ti Pilate na ndo ni na yanga ti Latin. Tënë so (so a fa ni ge so) ayeke gi mbage ti atënë so ayeke lani na ndo ti tênë ni, me peut-être tënë so ayeke lani na ndo ti tênë ni ayeke so: “Tiberieum Ponce Pilate (ni), so ayeke gouverneur ti Judée, asara ni na anzapa so a ne ala mingi.” Da so a sara tënë ni ayeke peut-être mbeni temple so a sara ni ti mû gonda na Tibère, togbia ti Rome.

Tongana mbeni wafango tënë so ayeke wali ayeke sara étude, lo yeke na bezoin ti kanga siriki na li ti lo tongana mbeni wafango tënë so ayeke koli ayeke dä?

Na yâ ti article “Atënë so azo ahunda”, so ayeke na yâ ti Tour ti Ba Ndo ti lango 15 ti juillet, ngu 2002, a tene so tongana mbeni ita-wali ayeke sara étude, a lingbi lo kanga siriki na li ti lo tongana mbeni wafango tënë so ayeke koli so awara batême awe wala so ade ti wara batême ape ayeke dä. Gbungo li mingi na ndo ti tënë so a mû lege ti bâ so a yeke nzoni a sara mbeni changement na yâ ti tënë so.

Tongana ita-wali ni ayeke sara mbeni étude, lo yeke kanga siriki na li ti lo tongana wafango tënë so lo na lo asigigi ayeke mbeni ita-koli so awara batême awe. Tongaso, lo yeke fa so lo ne akoli so Jéhovah azia ala ti mû li ni na yâ ti congrégation ndali ti so lo yeke sara kua so gi aita-koli la alingbi fade ti sara ni (1 aCor. 11:5, 6, 10). Wala lo lingbi ti hunda na ita-koli ni ti sara étude ni tongana ita ni alingbi ti sara ni.

Na mbage, tongana mbeni ita-wali asigigi na fango tënë na mbeni wafango tënë so ayeke koli ti lo pëpe na so ade ti wara batême ape, Bible atene pëpe so a lingbi ita-wali ni akanga siriki na li ti lo na ngoi so lo yeke sara étude na mbeni zo. Ye oko, yingo-ti-hinga ti ambeni ita-wali ayeke pusu ala ti kanga siriki na li ti ala même na angoi tongaso.

^ par. 2 Ti kiri ti dabe na ndo ti tënë so, bâ article “Aider les malades” na yâ ti Réveillez-vous ! ti lango 8 ti août, ngu 2000, lembeti 8-10.