Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) JANVIER 2015

Sara si mariage ti mo akpengba nga ayeke na ngia

Sara si mariage ti mo akpengba nga ayeke na ngia

“Tongana L’Éternel asara da ni pëpe, kusala ti ala so asara da ni ayeke senge senge.”PS. 127:1a.

1-3. Akpale wa la azo so asara mariage awe ayeke wara ni? (Bâ foto so ayeke na tongo nda ti article ni.)

MBENI ita-koli so awara ngia na yâ ti mariage ti lo asara ngu 38 awe atene: “Tongana mo sara ngangu na bê ti mo kue nga tongana mo fa so mo ye ti tene mariage ti mo aga nzoni, Jéhovah alingbi ti iri tënë nzoni na ndo ti mo.” Biani, akoli na awali ti ala alingbi ti duti na ngia na popo ti ala nga ti mû maboko na mba na yâ ti angoi ti kpale.—aProv. 18:22.

2 Azo so asara mariage awe ayeke manke ka pëpe ti wara “aye ti vundu na yâ ti mitele ti ala.” (1 aCor. 7:28). Ngbanga ti nyen? Ngbanga ti so akpale so ala yeke wara ni lango oko oko alingbi ti buba songo ti mariage ti ala. Teti so akoli na awali so asara mariage ayeke na siokpari na tere ti ala, na ambeni ngoi ala yeke son bê ti mba, ala yeke mä tere pëpe nga ala yeke sara nzoni lisoro na popo ti ala pëpe. Aye ni so alingbi ti buba yâ ti mbeni nzoni mariage (Jacq. 3:2, 5, 8). Azo mingi so asara mariage awe ayeke wara nga kpale na lege so ala yeke sara akua so amû ngoi ti ala kue nga ala yeke bâ lege ti amolenge ti ala. Ti ambeni zo so asara mariage awe gingo bê nga na fatigue alingbi ti sara si a yeke ngangu na ala ti wara ngoi so ala yeke na bezoin ni ti tene ala kpengba songo ti mariage ti ala. Kpale ti nginza, kpale ti seni, wala ambeni kpale ni nde alingbi ti  sara si ala ye tere nga ala ne mba tongana ti kozo pëpe. Na ndo ni, “akusala ti mitele” tongana lango-sioni, sarango sioni ye na kamene pëpe, kengo tere, tiri, mbanda, sarango ngonzo lakue nga papa alingbi ti buba yâ ti mbeni mariage so a bâ ni tongana mbeni nzoni mariage.—aGal. 5:19-21.

3 Mbeni ye so ayeke sioni mingi ayeke sarango ye ti azo na “alango ti nda ni” so. Ala yeke azo ti kion, ala kpe mbeto ti Nzapa pëpe. Aye so alingbi ti buba songo ti mbeni mariage (2 Tim. 3:1-4). Ti hunzi na ni, a lingbi azo so asara mariage aluti ngangu na lê ti atara ti mbeni wato so ayeke sioni mingi. Bazengele Pierre amû na e wango so, lo tene: “Wato ti ala Zabolo ayeke tambela tongana mbeni bamara so ayeke toto, na lo yeke gi mbeni zo ti te lo.”—1 Pi. 5:8; Apoc.12:12.

4. Tongana nyen la mbeni koli na wali ti lo alingbi ti kpengba songo ti mariage ti ala nga ti duti na ngia?

4 Mbeni ita-koli, so ayeke na Japon, atene: “Mbi yeke gi bê ti mbi lani mingi ndali ti nginza. Nga, ndali ti so mbi sara lisoro na wali ti mbi ape, lo kue vundu ahon ndo ti lo. Na ndo ni, lo wara akota kpale ti seni ade ti ninga ape. Na ambeni ngoi ye so asara si e londo na papa.” Ambeni kpale ayeke dä so azo so asara mariage awe alingbi ti kpe ni ape, me a yeke akpale so ala lingbi ti hon ndo ni. Na lege ti mungo maboko ti Jéhovah, songo ti akoli na awali alingbi ti kpengba nga ala wara ngia na yâ ti mariage ti ala. (Diko Psaume 127:1.) Zia e bâ aye oku so akoli na awali so asara mariage awe alingbi ti sara ti tene songo ti mariage ti ala akpengba nga aninga. Na pekoni, e yeke bâ tongana nyen la ndoye alingbi ti mû maboko na ala ti sara aye oku so.

ZIA JÉHOVAH NA YÂ TI MARIAGE TI MO

5, 6. Nyen la akoli na awali alingbi ti sara ti zia Jéhovah na yâ ti mariage ti ala?

5 Ti tene songo ti mariage ti mbeni koli na wali ti lo akpengba, a lingbi ala duti be-ta-zo na Jéhovah nga ala mä yanga ti lo. (Diko Zo-ti-fa-tene 4:12.) Akoli na awali alingbi ti zia Jéhovah na yâ ti mariage ti ala tongana ala sara ye alingbi na awango so lo mû na ala na ndoye. Bible asara tënë so na ndo ti awakua ti Jéhovah ti giriri, a tene: “Tongana i gue na koti, wala na gati, fade mê ti i amä yanga na peko ti i, so atene, So ayeke lege ni, i tambela dä.” (És. 30:20, 21). Laso, akoli na awali ti ala alingbi ti ‘mä’ atënë ti Jéhovah tongana ala diko Mbeti ti Nzapa legeoko (Ps. 1:1-3). Ala lingbi nga ti sara si mariage ti ala akiri akpengba tongana ala yeke voro Nzapa lakue na yâ ti sewa. A yeke nzoni vorongo Nzapa na yâ ti sewa ni anzere nga akpengba zo. Tongana mbeni koli na wali ti lo ayeke sambela ndo oko lango oko oko, ala yeke kpengba songo ti mariage ti ala tongaso si ala luti na lê ti atara ti dunia ti Satan.

6 Gerhard so ayeke na Allemagne atene: “Tongana akpale ti e wani wala aye so e mä tere dä ape asara si e yeke na ngia ape, awango ti Bible amû maboko na e ti kanga bê na mba nga ti pardone mba. Ti tene mbeni koli na wali ti lo awara ngia na yâ ti mariage ti ala, a yeke kota ye ti tene ala duti na asarango ye so.” Tongana akoli na awali asara kue ti zia Jéhovah na yâ ti mariage ti ala na lege so ala sara kua ti Nzapa legeoko, ala yeke ngbâ nduru na lo nga na mba nga ala yeke duti na ngia na yâ ti mariage ti ala.

Tongana akoli na awali asara kua ti Nzapa legeoko, ala yeke ngbâ nduru na lo nga na mba nga ala yeke duti na ngia na yâ ti mariage ti ala (Bâ paragraphe 5, 6))

A LINGBI AKOLI AMÛ LI NI NA YÂ TI SEWA TI ALA NA NDOYE

7. A lingbi akoli amû li ni na yâ ti sewa ti ala tongana nyen?

7 Fason so mbeni koli ayeke mû li ni na yâ ti sewa ti lo alingbi ti sara si songo ti lo na wali ti lo akpengba nga ala wara ngia na yâ ti mariage ti ala. Bible atene: “Mokonzi ti akoli kue ayeke Christ, mokonzi ti wali ayeke koli.” (1 aCor. 11:3). Atënë so angoro versê so afa na akoli tongana nyen la ala lingbi ti mû li ni. A lingbi ala mû li ni tongana ti so Christ amû li ni na ndo ti akoli. Jésus asara ye lâ oko pëpe  na ngangu me lo sara ye lakue na ndoye, na nzoni bê, lo sara ye alingbi na dutingo ti zo oko oko, lo sara ye na ngangu pëpe, nga lo sara tere ti lo kete.—Mat. 11:28-30.

8. Nyen la mbeni koli alingbi ti sara ti tene wali ti lo aye lo nga ane lo?

8 Akoli so ayeke aChrétien ayeke pëpe na bezoin ti forcé awali ti ala lakue ti ne ala. Me ala “ngbâ ti duti na awali ti ala na lege ti hingango ye”. Ala “ne awali tongana mbeni ta so awoko ti lo mingi”. (1 Pi. 3:7). Na lê ti azo nga na ngoi so ala yeke gi use, a lingbi akoli atene na awali ti ala atënë so ane zo nga ala sara ye na ala na nzoni bê ti fa so ala ne awali ti ala (aProv. 31:28). Tongana akoli amû li ni na ndoye tongaso, a yeke sara si awali ti ala aye ala, ane ala nga Nzapa ayeke iri tënë nzoni na ndo ti mariage ti ala.

A LINGBI AWALI ASARA TERE TI ALA KETE NGA ALA MÄ YANGA

9. Tongana nyen la mbeni wali alingbi ti fa so lo sara tere ti lo kete nga lo mä yanga?

9 Tongana afango ye ti Jéhovah so ayeke na yâ ti Bible la apusu e ti ndoye lo, a yeke mû maboko na e ti sara tere ti e kete na gbe ti ngangu maboko ti lo (1 Pi. 5:6). Mbeni kpengba lege so mbeni wali so asara tere ti lo kete ayeke fa so lo ne komandema ti Jéhovah ayeke ti sara kua maboko na maboko na koli ti lo. Bible atene: “Awali, ala woko tere na gbe ti akoli ti ala tongana ti so alingbi na azo ti Seigneur.” (aCol. 3:18). Ti tâ tënë ni, a yeke pëpe adesizion kue so mbeni koli ayeke mû la wali ti lo ayeke yeda na ni. Me, wali so asara tere ti lo kete ayeke yeda ti sara ye alingbi na adesizion ti koli ti lo tongana lo bâ so ague nde pëpe na andia ti Nzapa.—1 Pi. 3:1.

10. Ngbanga ti nyen a yeke kota ye ti tene ndoye la apusu awali ti mä yanga?

10 Wali ayeke na kota ndo na yâ ti sewa. Lo yeke “fon”, wala mba ti koli ti lo (Mal. 2:14). Na ngoi so mbeni koli na wali ti lo aye ti mû adesizion na yâ ti sewa, wali ni ayeke fa apensé ti lo na mbeni lege so afa so lo ne koli ti lo nga lo ngbâ ti mä yanga. Mbeni koli so asara ye na ndara ayeke dengi mê nzoni ti mä wali ti lo (aProv. 31:10-31). Tongana ndoye apusu awali ti mä yanga, a yeke sara si azo ti sewa ni ayeke na ngia, siriri nga beoko. Ye  ti peko ni ayeke so tere ti akoli na awali ni ayeke nzere ndali ti so ala hinga so ala zia ngia na bê ti Jéhovah.—aÉph. 5:22.

ALA NGBÂ TI PARDONE MBA NA BÊ TI ALA KUE

11. Ngbanga ti nyen a yeke kota ye ti tene koli na wali apardone mba?

11 Mbeni ye so mbeni koli na wali ti lo alingbi ti sara ti tene mariage ti ala aninga, a yeke ti pardone mba. Tongana akoli na awali ‘angbâ ti kanga bê na amba ti ala na popo ti ala, na ti pardone mba na bê ti ala kue,’ songo ti mariage ti ala ayeke kpengba (aCol. 3:13). Ye oko, tongana mbeni koli na wali ti lo angbâ ti bata afaute so ala sara na mba nga ala yeke kiri na ndo ni ti gi na yanga ti mba, songo ti mariage ti ala ayeke woko. Tongana tere ti mbeni da asuru, a lingbi ti sara si da ni awoko. Legeoko nga, atënë ti songo bê na ngonzo alingbi ti sara si a yeke ngangu mingi na mbeni koli na wali ti lo ti pardone mba. Me songo ti mariage ti mbeni koli na wali ti lo ayeke kpengba tongana ala pardone mba tongana ti so Jéhovah apardone ala.—Mi. 7:18, 19.

12. Tongana nyen la ndoye akanga ndo ti “asiokpari mingi”?

12 Tâ ndoye ‘ayeke diko pëpe sioni so a sara na lo.’ Me, “ndoye akanga ndo ti asiokpari mingi.” (1 aCor. 13:4, 5; diko 1 Pierre 4:8.) Ti tene ni na mbeni lege nde, ndoye afa pëpe lege oke la a lingbi e pardone asioni ye so azo asara na e. Na ngoi so bazengele Pierre ahunda na Jésus ti hinga fani oke la a lingbi lo pardone azo, Jésus akiri tënë na lo, a tene: “Juska fani bale-mbasambala na mbasambala.” (Mat. 18:21, 22). Jésus aye lani ti fa so a lingbi aChrétien angbâ lakue ti pardone amba ti ala.—aProv. 10:12. *

13. Nyen la koli na wali alingbi ti sara ti duti nduru ti pardone mba?

13 Annette, so ayeke na Allemagne, atene: “Tongana koli na wali aye ti pardone mba ape, ala yeke bata tënë na bê nga ala yeke na confiance na mba ape na ye so ayeke buba yâ ti mariage. Ti pardone mba asara si songo ti mariage akpengba nga koli na wali ni ayeke ga nduru mingi na mba.” Tongana koli na wali ayeke gi ti kiri singila na mba nga ala duti nduru ti gonda mba, a yeke sara si ala yeke pardone mba. Gi ti bâ ambeni ye so wali wala koli ti mo asara nga gonda lo ndali ni (aCol. 3:15). Tongana ala pardone tere, a yeke sara si ala yeke duti na ngia, siriri, beoko nga Nzapa ayeke iri tënë nzoni na ndo ti ala.—aRom. 14:19.

SARA NA MBA TI MO YE SO MO YE TI TENE LO SARA NA MO

14, 15. Tënë wa la Jésus atene na Luc 6:31? Tongana nyen la sarango ye alingbi na ni ayeke sara si mbeni mariage akpengba?

14 Kite ayeke pëpe so e ye ti tene azo ane e. A yeke nzere na mo tongana azo amä mo nga ala bâ na nene ni bango ndo ti mo. A si na mo awe ti mä mbeni zo atene: “Mbi yeke sara na lo ye so lo sara na mbi so”? Na ambeni ngoi bango ndo so alingbi peut-être ti duti na lege ni. Ye oko, Bible atene na e atene: ‘Mo tene pëpe, Fade mbi sara na lo alingbi na ye so lo sara na mbi.’ (aProv. 24:29). Jésus afa nzoni lege so ahon atanga ni kue ti lekengo angangu kpale. Lo tene: “Gi tongana ti so ala ye azo asara na ala, ala sara tongaso na azo ni nga.” (Luc 6:31). A yeke mbeni fango ye so azo mingi ahinga ni. Jésus aye lani ti fa so a lingbi e sara ye na azo tongana ti so e ye ala sara na e, me pëpe ti sara na ala ye so ala sara na e. So aye ti tene so na yâ ti mariage, a lingbi e sara kue ti sara na mba aye so alingbi ti sara si mariage ti e aga nzoni.

15 Tongana azo so asara mariage awe ayeke  bâ atënë ti bê ti mba na nene ni songo ti ala ayeke kpengba. Mbeni ita-koli, so asara mariage awe so ayeke na Afrika ti Mbongo, atene: “E yeke gi ti sara nzoni na mba, a yeke tâ tënë so na ambeni ngoi e yeke sara ngonzo, me e sara ngangu ti sara na mba ye so e ye a sara na e so ti tene ti ne mba.”

16. Nyen la a lingbi koli na wali so asara mariage awe asara na mba pëpe?

16 Fa na azo pëpe awokongo ti koli wala ti wali ti mo nga ngbâ pëpe ti sara tënë na ndo ti aye so lo sara so ason bê ti mo. Sara ni pëpe même na yâ ti atënë ti ngia. A lingbi mo hinga so mariage ayeke pëpe sarango mbeni mandako ti hinga zo so ayeke ngangu, zo so ahinga ti dekongo na li ti mba, wala zo so ahinga ti tene yanga ti mbana. Tâ tënë, e kue e yeke na siokpari na tere ti e nga na ambeni ngoi e yeke son bê ti amba ti e. Me koli na wali so asara mariage awe ayeke na mbeni nzoni raison pëpe ti zia kamene na lê ti mba wala ti sara kua na atënë ti songo bê wala asioni tënë ti pika na mba.—Diko aProverbe 17:27; 31:26.

17. Tongana nyen la akoli so asara mariage awe alingbi ti sara ye tongana ti Jésus?

17 Na ambeni ndo akoli ayeke sara ye ti ngangu na awali ti ala wala ala yeke pika awali ti ala ti fa so ala yeke na ngangu. Me Bible atene: ‘Zo so ngonzo asara lo fade pëpe, lo yeke nzoni ahon walombe, na zo so akomande yingo ti lo, lo yeke nzoni ahon zo so agbu kodoro.’ (aProv. 16:32). A lingbi zo asara ngangu si lo kanga nzara ti bê ti lo tongana ti so Jésus Christ so ayeke kota ahon azo kue asara lani. Mbeni koli so asara ye ti ngangu na wali ti lo wala lo pika wali ti lo, lo yeke zo so awoko nga lo yeke buba songo ti lo na Jéhovah. David, mbeni zo ti sungo psaume, so ayeke lani na ngangu nga so asara ye na mbeto pëpe, atene: “Tongana ngonzo agbu i, i bata si i sara siokpari pëpe; i gi bê ti i na ndo tange ti i, na i kaï.”—Ps. 4:5.

“ALA YÜ NDOYE”

18. Ngbanga ti nyen a yeke kota ye ti tene akoli na awali ti ala angbâ ti ndoye tere?

18 Diko 1 aCorinthien 13:4-7. Na yâ ti mariage, ndoye ayeke kota ahon ye kue. “Ala yü tâ bango mawa ti zo, sarango nzoni na zo, tâ be-ti-molenge, sarango ye na ngangu pëpe; ala yü nga kangango bê ti ku. Me, na ndo ti aye so kue, ala yü ndoye, teti ndoye ayeke kamba ti bungbingo ye mbilimbili.” (aCol. 3:12, 14). A lingbi akoli na awali afa so ala ndoye tere nga ala mû tapande ti Christ so ayeda lani ti mû tere ti lo wani na sacrifice ndali ti azo. Tongana mbeni koli na wali ayeke na ndoye so, yâ ti mariage ti ala ayeke fâ pëpe tongana ala wara kpale ti seni, ti nginza wala ala wara kpale na akogara ti ala.

19, 20. (a) Nyen la akoli na awali alingbi ti sara ti tene mariage ti ala akpengba nga ayeke na ngia? (b) Nyen la e yeke manda na yâ ti article ti peko?

19 Ti tene mbeni mariage aga nzoni, a lingbi koli na wali ni asara ngangu, ala ndoye mba nga ala duti be-ta-zo. Tongana koli na wali ni awara akpale, a lingbi ala fâ yâ ti mariage ti ala pëpe. A lingbi ala leke na bê ti ala ti ga nduru mingi na mba ahon ti kozo. A lingbi akoli na awali so aye Jéhovah nga aye tere aleke na bê ti ala ti leke akpale ti ala, ngbanga ti so “ndoye ayeke hon lâ oko pëpe.”—1 aCor. 13:8; Mat. 19:5, 6; aHéb. 13:4.

20 Na yâ ti “angoi ti akpale” so, a yeke ngangu mingi ti sara si mbeni mariage akpengba nga ayeke na ngia (2 Tim. 3:1). Me na lege ti mungo maboko ti Jéhovah, mbeni mariage alingbi ti kpengba nga ayeke na ngia. A lingbi akoli na awali asara ngangu lakue ti hon ndo ti asioni nzara ti bungbingo koli na wali so amû ndo na yâ ti dunia so. Article ti peko ayeke fa ye so akoli na awali alingbi ti sara ti bata mariage ti ala si ala gi mbeni wali wala mbeni koli nde pëpe.

^ par. 12 Atâa so akoli na awali ayeke gi ti pardone mba nga ti leke akpale ti ala, Bible atene so tongana koli wala wali ti mbeni zo asara lango-sioni, a yeke na zo ni ti soro ti pardone koli wala wali ni wala ti sara divorce na lo (Mat. 19:9). Bâ li ti tënë “Bango ndo ti Bible na ndo ti divorce nga na kangbingo tere” na yâ ti buku Ndoye ti Nzapa, lembeti 219-221.