Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) DÉCEMBRE 2014

Mo dabe ti mo na ni

Mo dabe ti mo na ni

Mo diko a-article ti a-Tour ti Ba Ndo so asigigi ade ti ninga ape so nzoni? Bâ wala mo lingbi ti kiri tënë na ahundango ndo so ge:

A yeke na lege ni ti tene aChrétien azö kuâ ti azo ti ala so akui?

A yeke ti zo oko oko ti yeda wala ti ke ti tene a zö kuâ ti mbeni fami ti lo so akui. Atâa so Bible asara tënë polele na ndo ti tënë so ape, a lingbi e hinga so a zö kuâ ti Gbia Saül na molenge ti lo Jonathan na pekoni a lu abio ti ala (1 Sam. 31:2, 8-13).—15/6, lembeti 7.

Ngbanga ti nyen la e tene so Nzapa ayeke pëpe na gunda ti asioni ye so ayeke si so?

Alege ti Nzapa kue ayeke mbilimbili. Lo yeke be-ta-zo nga lo yeke nzoni-kue. Jéhovah ayeke tâ na ndoye mingi nga lo yeke sara nzoni bê na zo (Deut. 32:4; Ps. 145:17; Jacq. 5:11).—1/7, lembeti 4..

Akpale wa mbeni ita alingbi ti wara tongana lo gue na kodoro wande ti fa tënë na ndo so bezoin ayeke dä mingi?

Akpale ni ayeke ota: (1) Fason so azo ni ayeke vivre na ni, (2) nzara ti kodoro, nga na (3) sarango kamarade na aita ti ndo ni. Mingi ti aita so ahon ndo ti akpale so awara aye ti nzoni mingi.—15/7, lembeti 4-5..

Aita ti Joseph ake lo ngbanga ti nyen?

A yeke ndali ti so Jacob amû na Joseph mbeni bongo ti fa na lo yengo so lo ye na lo. Aita ti Joseph asara bê na tere ti lo na ala kä lo na ngbâa.—1/8, lembeti 11-13.

Ngbanga ti nyen afini tract so ayeke nzoni mingi nga a yeke ngangu ape ti sara kua na ni?

Fason so a sara na afini tract ni kue ayeke oko. Tract oko oko amû maboko na e ti diko mbeni versê na zo nga ti hunda mbeni tënë na lo. Atâa kiringo tënë ti zo ni ayeke so wa, e zi gi yâ ti tract ni na e fa na lo tënë so Bible atene. E lingbi nga ti hunda mbeni hundango ndo so e yeke kiri tënë na ni na vizite ti peko.—15/8, lembeti 13-14..

Syriaque Peshitta ayeke nyen?

Azo akomanse ti tene Syriaque so ayeke mbeni kete yanga ti kodoro ti Araméen mingi na ngu 200 wala na ngu 300 tongaso. Syriaque ayeke peut-être kozo yanga ti kodoro so a kiri na peko ti ambage ti Mbeti ti Nzapa so aChrétien asû ândö na Grec dä. Azo airi Bible so ayeke na yanga ti Syriaque so Peshitta.—1/9, lembeti 13-14.

Nyen la ababâ na amama so ayeke aChrétien alingbi ti sara ti bata amolenge ti ala?

A yeke kota ye ti tene ababâ na amama amä amolenge ti ala tongaso si ala hinga ala. A lingbi ala sara kue ti mû na ala kobe ti yingo. Nga a lingbi ala fa lege na ala na ndoye, na tapande na ngoi so ala yeke na kite na ndo ti aye ti yingo.—15/9, lembeti 18-21.

Aye wa la ayeke duti ande dä mbeni pëpe na gbe ti Royaume ti Nzapa?

Kobela, kuâ, kpale ti warango kua, bira, nzara nga na yere ayeke hunzi ande.—1/10, lembeti 6-7.

Mbele ti Bible wa la amû lege na ambeni zo ti komande legeoko na Christ?

Na peko ti so Jésus asara matanga ti Pâque na abazengele ti lo, lo te mbeni mbele na adisciple ti lo so ayeke be-ta-zo na lo na a iri ni mbele ti Royaume (Luc 22:28-30). A mû lege na ala ti hinga biani so ala yeke komande ande legeoko na Jésus na yayu.—15/10, lembeti 16-17.

Fa alisoro use so Bible asara tënë ni so afa so Satan ayeke dä biani.

Bible afa so Satan asara lisoro na Jésus ti tara lo. Na ngoi ti Job nga Satan asara lisoro na Nzapa. Ambaï use so afa so Satan ayeke zo ti yingo so ayeke dä biani.—1/11, lembeti 4-5.

Azo wa la ayeke “mbeni bungbi ti azo ndali ti iri ti lo” so Jacques asara tënë ti ala na mbeti ti Kusala 15:14?

A yeke lani aJuif nga na azo so ayeke aJuif ape so amä na bê so Nzapa asoro ala ti ga mbeni mara so lo soro ti “fa anzoni” ti lo so lo iri ala (1 Pi. 2:9, 10).—15/11, lembeti 24-25.

Timgad ayeke lani na ndo wa? Bango ndo wa la ambeni zo so ayeke kâ ayeke na ni lani?

Timgad ayeke lani mbeni kota gbata ti Rome na Afrika ti Banga (laso aga Algérie). Azo ti gingo ye na gbe ti sese awara mbeni ye so a sû na lê ni aye so ambeni zo ti Timgad ayeda na ni. A sû na lê ti ye ni, a tene: “Gingo nyama, sukulango ngu, sarango ngia nga hengo ngia: So nzoni gigi la!” A gue oko na bango ndo so ayeke na 1 aCorinthien 15:32.—1/12 lembeti 8-10.