Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) DÉCEMBRE 2014

Lo ‘hinga lani lege ni’

Lo ‘hinga lani lege ni’

GUY HOLLIS PIERCE, so ayeke mbeni membre ti Bebungbi ti aTémoin ti Jéhovah, akui lani na mardi lango 18 ti mars, ngu 2014, na ngoi so lo yeke na ngu 79. A yeke na lango so la lo hunzi lani kusala ti lo na sese. Teti so lo yeke oko ti aita ti Christ, a zingo lo na kuâ na lo wara futa ti lo na yayu.—aHéb. 2:10-12; 1 Pi. 3:18.

A dü Guy Pierce na lango 6 ti novembre, ngu 1934 na Auburn na Californie na Amerika. Lo wara batême na ngu 1955. Lo sara mariage na Penny, wali ti lo so lo ye lo mingi, na ngu 1977 nga ala dü amolenge. Teti so lo yeke mbeni babâ ti sewa, lo yeke sara ye lani na mbage ti azo tongana mbeni babâ. Na ngu 1982, lo na wali ti lo Penny amû ngoi ti ala mingi ti sara kua ti pionnier; nga na ngu 1986, lo komanse kua ti surveillant ti circonscription na Amerika. Lo sara ngu 11 na yâ ti kua ni.

Na ngu 1997, Guy Pierce na wali ti lo Penny akomanse ti sara kua na Béthel ti Amerika. Ita Pierce asara kua na bureau ti service nga na ngu 1998 a soro lo ti mû maboko na Komite ti apersonnel ti Bebungbi. Na lango 2 ti octobre, ngu 1999 na ngoi ti mbeni bungbi ti ngu oko oko ti Société Watchtower, a tene na aita so Ita Pierce aga membre ti Bebungbi. Na yâ ti angu so ahon ade ti ninga ape, lo sara kua na yâ ti Komite ti apersonnel, na yâ ti Komite ti sungo ambeti, na yâ ti Komite ti sigingo na ambeti, nga na yâ ti Komite ti acoordinateur.

Azo so alondo na ando nde nde nga so sarango ye ti ala ayeke nde nde ayeke ga nduru na Ita Pierce ndali ti so lo yeke he ngia na azo nga lo yeke tene atënë ti ngia na ala. Me aye so asara si azo aye lo mingi ayeke so lo ye azo, lo sara tere ti lo kete, lo sara ye alingbi na afango ye ti Jéhovah nga na andia ti lo so ayeke mbilimbili nga lo yeke na kpengba mabe na Jéhovah. E hinga so lâ ayeke sigigi lakue lakue legeoko tongana ti so azendo ti Jéhovah ayeke ga lakue tâ tënë. Me, ti Guy Pierce, même tongana a si so lâ asigigi ape, azendo ti Jéhovah ayeke ga ti ala lakue gi tâ tënë. A yeke tâ tënë so lo ye ti tene azo ti dunia kue ahinga.

Ita Pierce afatigué na sarango kua ti Jéhovah ape. Lo yeke londo hio na ndapre nga ngoi na ngoi lo yeke sara kua juska l’heure ahon na bï. Avoyage so lo sara ti kpengba aita asara si lo si na akodoro mingi. Atâa so lo yeke sara lani kua mingi, lo yeke mû ngoi ti sara lisoro na aita oko oko kue ti Béthel nga na azo so aye ti sara kamarade na lo, ala so ahunda wango na lo nga na ala so ahunda mungo maboko. Même na peko ti angu mingi, amba ti lo aChrétien angbâ ti dabe ti ala so lo yeke yamba azo nzoni, nga lo yeke sara kamarade na azo. Nga ala ngbâ ti dabe ti ala na awango ti Bible so lo mû na ala ti kpengba ala.

Ita ti e Pierce so ayeke nga kamarade ti e so e ye lo mingi azia na peko ti lo wali na amolenge, a-âta nga na amolenge ti a-âta ti lo. Lo yeke nga na gbâ ti amolenge na lege ti yingo. Ita Mark Sanderson so ayeke nga membre ti Bebungbi la amû diskur ti kuâ ti Ita Pierce na lango 22 ti mars, ngu 2014 na Béthel ti Brooklyn. Na popo ti aye so lo sara tënë na ndo ni, lo sara tënë na ndo ti beku ti Ita Pierce ti wara fini na yayu nga lo diko atënë ti Jésus so atene: “Na yâ ti da ti Babâ ti mbi, ando ti lango ayeke mingi. . . . Tongana mbi gue mbi leke mbeni ndo ndali ti ala, mbi yeke kiri ti ga na mbi yeke yamba ala na ndo ti mbi, si na ndo so mbi yeke dä ala nga ala lingbi ti duti dä. Na ndo so mbi yeke gue dä, ala hinga lege ni.”—Jean 14:2-4.

Ti tâ tënë ni, e yeke pensé ande na Ita Pierce mingi. Me, e yeke na ngia so lo ‘hinga lani lege’ so ague na ‘ndo ti lango’ ti lo so lo yeke gue ti ngbâ dä biani biani.