Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) NOVEMBRE 2014

 SANGO NA NDO TI MBAÏ TI BUNGBI TI E

Lumière aza na yâ ti kodoro so lâ alondo dä

Lumière aza na yâ ti kodoro so lâ alondo dä

Na Tokyo, a kangbi ambeti ti tisango ndo ti diskur nga a-avion atuku ambeni mbeti ti tisango ni na Osaka

NA LANGO 6 ti septembre, ngu 1926, mbeni ita so ayeke zo ti Japon so ayeke surveillant so ayeke gue na ando nde nde alondo na Amerika lo kiri na Japon ti sara kua ti missionnaire. Mbeni koli ayeke ku lani ita so ti yamba lo. Gi koli so oko la asara abonnement ti wara a-Tour ti Ba Ndo nga lo yeke manda Bible na groupe ti ambeni zo na gbata ti Kobe. Awamandango Bible ni asara kozo kota bungbi ti ala na gbata so na lango 2 ti janvier, ngu 1927. Azo 36 la aga na kota bungbi ni na azo 8 awara batême. Aye ni akomanse lani nzoni. Me, tongana nyen la kete wungo ti azo so alingbi ti fa tënë na azo ti Japon kutu 60 so ayeke na bezoin ti tene a fa tâ tënë ti Bible na ala?

Na mai, ngu 1927 aWamandango Bible asigigi na mbeni fini kode ti komanse mbeni kota kapa ti fango tënë na lege so ala yeke gue na ando so azo ayeke dä mingi na ala yeke mû ambeni diskur. Aita ni amû kozo diskur ti ala na Osaka. Me kozo ti tene ala mû ni, ala zia akota pancarte na tere ti alege na yâ ti gbata ni kue nga ala tokua ambeti ti tisango ndo 3000 na akota zo so ayeke na yâ ti gbata ni. Ala kangbi ambeti ti tisango ndo 150000 nga ala sara tënë ti diskur ni na yâ ti ambeti-sango ti Osaka so azo aye ti diko ni mingi. Ala sû nga tënë ni na ndo ti aticket 400000 ti train. Na lango ti diskur ni, a-avion use ahuru na yâ ti gbata ni atuku ambeti ti tisango ndo 100000 amû yâ ti gbata ni. Azo 2300 tongaso asi yâ ti da ti Osaka Asahi ti mä mbeni diskur na Anglais, so li ti tënë ni ayeke: “Royaume ti Nzapa aga nduru awe.” A tene na azo saki-oko tongaso a tene ala lingbi ti mä diskur ni ape ndali ti so place ayeke dä ape. Azo so wungo ti ala ahon 600 angbâ na peko ti diskur ni ti hunda atënë ti tene a kiri tënë na ala. Na yâ ti anze so aga na pekoni, a mû ambeni diskur na Kyoto nga na yâ ti ambeni gbata so ayeke na do ti Japon.

Na octobre, ngu 1927 aWamandango Bible aleke ti mû adiskur na gbata ti Tokyo. Ala kiri atokua ambeti ti tisango ndo na akota zo so ayeke na yâ ti gbata ni: kozo gbenyon-gbia, amembre ti gouvernement, akota zo ti bungbi ti nzapa nga na azo so amû li ni na ndo ti aturugu. Aita ni asara kua na apancarte, ambeti-sango nga na ambeti ti tisango ndo 710000 ti tisa na azo. Azo so aga amä adiskur ota so aita ni amû na Tokyo ayeke 4800.

ACOLPORTEUR SO AYAPU NA FANGO TËNË

Katsuo na Hagino Miura

Acolporteur wala apionnier asara ngangu mingi ti gue ti fa tënë ti Royaume na azo na yanga-da ti ala. Matsue Ishii, so ayeke na popo ti akozo acolporteur na Japon, na koli ti lo Jizo afa tënë na yâ ti kota mbage ti kodoro ni, ti londo na Sapporo so ayeke na mbage ti banga ti gue na Sendai, Tokyo, Yokohama, Nagoya, Osaka, Kyoto, Okayama, nga na Tokushima. Ita-wali Ishii nga na mbeni ita-wali, Sakiko Tanaka, so ngu ti lo ahon ti lo ayü ambeni bongo so a iri ni kimono ti gue ti bâ akota zo ti gouvernement. Mbeni oko ti akota zo ni ahunda na ala ti ga na lo buku La Harpe de Dieu et Délivrance 300 ti tene lo zia ni na yâ ti abibiothèque ti da ti kanga.

 Katsuo Miura na wali ti lo Hagino ayeda ti mû ambeti so Ita-wali Ishii amû na ala nga ala yeda na tâ tënë. Ala wara batême na ngu 1931 na ala ga acolporteur. Haruichi Yamada na wali ti lo Tane, nga na mingi ti afami ti ala ayeda na tënë ti Royaume kozo na ngu 1930. Haruichi na wali ti lo Tane aga acolporteur nga molenge ti ala ti wali, Yukiko, ague asara kua na Béthel ti Tokyo.

“AJÉHU”: AKOTA NI NA AKETE NI

Kota Jéhu so ayô apionnier omene

Na ngoi ni kâ, ngere ti a-oto ayeke ngangu mingi nga alege abuba mingi. Tongaso, Kazumi Minoura nga na ambeni colporteur so ayeke amaseka ayeke na a-oto so ambeni ye ayeke na pekoni tongana da nga so ayeke na moteur ape. Ala iri a-oto so aJéhu ndali ti so Jéhu ayeke lani kpengba zo ti kpengo na puse ti mbarata, so aga mbeni gbia ti Israël (2 aGbia 10:15, 16). Akota Jéhu ni ayeke ota. Yongo ni ayeke mètre 2 tongaso, konongo ti yâ ni ayeke nduru na mètre 2 tongaso nga yongo ni na nduzu ayeke nduru na mètre 2 tongaso. Jéhu oko alingbi ti yô apionnier omene tongaso. Nga, filiale ti Japon aleke avélo 11 so ayeke gboto akete Jéhu so azo use alingbi ti lango na yâ ni. Kiichi Iwasaki, so amû maboko na kua ti lekengo aJéhu so adabe ti lo so “Jéhu oko oko ayeke na tente nga na mbeni batterie ti oto ndali ti lumière.” Acolporteur so aza lumière ti tâ tënë na yâ ti Japon, ala pusu aJéhu nga ala gboto ni na ndo ti ahoto nga na yâ ti apopo-hoto ti londo na banga ti Hokkaido ti gue na Kyushuna na mbage ti mbongo.

Kete Jéhu so ayô azo use

Ikumatsu Ota, so ayeke mbeni colporteur, atene: “Tongana e si na yâ ti mbeni gbata, e yeke zia lani Jéhu ti e na yanga ti ngu wala na yâ ti mbeni terrain. E yeke gue kozoni ti bâ akota zo ti kodoro ni, a peut ti duti mokonzi-gbata ni, nga na pekoni e yeke gue na yanga-da ti azo ti fa na ala ambeti ti e. Tongana e hunzi territoire ni awe, e yeke gue na mbeni gbata nde.”

A yeke lani gi kete groupe ti aWamandango Bible 36 so ayeke na gbata ti Kobe la asara kozo kota bungbi ti ala (Zach. 4:10). Gi ngu oku tongaso na pekoni, na ngu 1932, acolporteur 103 nga na awafango tënë ti Japon amû rapport ti ala. Ala kangbi ambeti ahon 14000 na azo. Laso na Japon, aita ayeke fa tënë na ando so gbâ ti azo ayeke dä nga awafango tënë nduru na 220000 angbâ ti za lumière na yâ ti “kodoro so lâ alondo dä.”—Sango na ndo ti mbaï ti bungbi ti e na Japon.

Adessin so Kiichi Iwasaki so aleke aJéhu na Béthel ti Japon asara ni