Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) NOVEMBRE 2014

Atënë so azo ahunda

Atënë so azo ahunda

Tongana nyen la a yeke soro a-ancien nga na awakua ti mungo maboko na yâ ti acongrégation oko oko?

Na ngoi ti akozo Chrétien, bazengele Paul atene na a-ancien ti congrégation ti Éphèse, lo tene: “Ala sara hange na ala wani nga na kundu ni kue, so yingo vulu azia ala na popo ni tongana azo ti bango ndo na ndo ni, si ala bata congrégation ti Nzapa, congrégation so lo vo na mênë ti Molenge ti lo wani.” (Kus. 20:28). Tongana nyen la laso yingo vulu ayeke mû maboko ti tene a soro a-ancien nga na awakua ti mungo maboko?

Kozoni, yingo vulu amû maboko na azo so asû Bible ti sû na yâ ni aye so a hunda ti tene mbeni zo asara ti ga ancien wala wakua ti mungo maboko. Na 1 Timothée 3:1-7, e yeke wara ambeni ye bale-oko na omene tongaso, so a hunda ti tene mbeni zo so aye ti ga ancien asara. E yeke wara ambeni ye ni na Tite 1:5-9 nga na Jacques 3:17, 18. Na 1 Timothée 3:8-10, 12, 13, e yeke wara aye so a hunda ti tene mbeni zo so aye ti ga wakua ti mungo maboko asara. Use ni, aita so a mû na ala kua ti tene ala fa iri ti aita so ala ye ti tene a soro ala ti ga a-ancien wala awakua ti mungo maboko ayeke sambela Jéhovah ti mû maboko na ala na lege ti yingo ti lo na ngoi so ala yeke bâ wala mbeni ita asara ye alingbi na aye so Bible ahunda ti lingbi na kua ni, me a lingbi ala sara ye ahon ndo ni pëpe. Aita so a mû na ala kua ti sorongo aita ni nga kue ayeke sara tongaso. Ota ni, a lingbi ita so a-ancien aye ti tene lo ga wakua ti mungo maboko wala ancien afa na yâ ti sarango ye ti lo so lo yeke sara ye alingbi na lengo ti yingo ti Nzapa (aGal. 5:22, 23). Tongaso, yingo vulu ti Nzapa ayeke mû maboko na yâ ti aye kue so a hunda ti sara ti soro mbeni ita.

Azo wa la mbilimbili ayeke soro aita so? Kozo, tongana a ye ti soro mbeni ita ti ga ancien wala wakua ti mungo maboko, a-ancien ti congrégation ti ita ni ayeke sara tënë ni na filiale na lege ti mbeni formulaire so na lê ni ala fa so ala bâ so ita ni alingbi ti ga ancien wala wakua ti mungo maboko. Kâ na filiale, ambeni ita so Bebungbi asoro ala ayeke gbu li ti ala na ndo ti aye so a sû na lê ti formulaire ni na ndo ti ita ni nga ala yeke soro ita ni tongana ala bâ so lo lingbi na kua ni. Na pekoni, filiale ayeke tokua mbeni lettre ti kiri tënë na bungbi ti a-ancien ti congrégation ti ita ni. Fadeso a-ancien ni ayeke bâ ita ni ti fa na lo so a soro lo awe ti ga ancien wala wakua ti mungo maboko. Ala yeke hunda lo ti bâ wala lo ye biani ti sara kua so nga lo lingbi biani na kua ni. Na nda ni, a yeke sara mbeni tokua ti fa tënë ni na congrégation.

Me tongana nyen la lani a yeke soro a-ancien nga na awakua ti mungo maboko na ngoi ti akozo Chrétien? Na ambeni ngoi, abazengele ayeke soro lani ambeni zo ti sara ambeni kua so ayeke nde. Na tapande, ala soro lani akoli mbasambala ti tene ala bâ lege ti akobe so a yeke mû na awomua lâ na lâ (Kus. 6:1-6). Me, peut-être akoli so aga a-ancien kozo ti tene a mû na ala kua so.

Atâa so Bible afa anzene nzene ye kue pëpe na ndo ti tongana nyen la a yeke soro lani a-ancien nga na  awakua ti mungo maboko na ngoi ti akozo Chrétien, ambeni ye ayeke dä so afa na e tongana nyen la a yeke sara ni lani. Bible atene na e so na ngoi so Paul na Barnabas ayeke kiri lani na peko ti kozo voyage ti ala ti missionnaire, “ala zia a-ancien . . . na yâ ti congrégation oko oko. Tongana ala sambela na ala mû jeûne awe, Paul na Barnabas azia ala na tïtî Jéhovah, Lo so azo so amä na bê na Lo awe.” (Kus. 14:23). Angu mingi na pekoni, Paul asara lettre na Tite, mba ti lo so lo na lo ayeke sara avoyage, lo tene: “Mbi zia mo lani ti ngbâ na Crête ndali ti ye so: Ti tene mo leke aye so atambela nzoni pëpe nga ti tene mo zia azo tongana a-ancien na yâ ti agbata oko oko, tongana ti so mbi mû lani yanga na mo.” (Tite 1:5). Legeoko nga, a mû na Timothée, so avoyagé fani mingi na bazengele Paul mara ti kua so (1 Tim. 5:22). A yeke polele so na ngoi ni kâ, asurveillant so ayeke gue na ando nde nde la ayeke soro azo ni lani, me pëpe abazengele nga na a-ancien so ayeke na Jérusalem.

Ti gue oko na aversê so, Bebungbi ti aTémoin ti Jéhovah achangé lege so a yeke soro na a-ancien nga na awakua ti mungo maboko. Ti londo na lango oko ti septembre, ngu 2014, a yeke soro aita tongaso: A-ancien ayeke fa na surveillant ti circonscription iri ti aita so ala bâ so ala lingbi ti ga a-ancien wala awakua ti mungo maboko. Na pekoni surveillant ni ayeke gbu li ti lo nzoni na ndo ti aita ni ti bâ wala ala lingbi. Na ngoi so lo yeke sara avizite na acongrégation, lo yeke gi ti hinga aita ni, lo yeke sara kue ti fa tënë legeoko na ala tongana lege ayeke dä. Na pekoni so lo sara lisoro na ndo ti aita ni na bungbi ti a-ancien ti congrégation so aita ni ayeke dä, lo la lo yeke soro aita ni ti ga a-ancien wala awakua ti mungo maboko na yâ ti acongrégation so ayeke na yâ ti circonscription ti lo. Ye so ague oko na tapande so akozo Chrétien azia.

A-ancien ayeke sara lisoro na surveillant ti circonscription na ndo ti mbeni ita ti bâ wala lo lingbi na kua so a-ancien ni aye ti tene a soro lo ndali ni (Malawi)

Zo wa la ayeke bâ ndo na ndo ti kua ti sorongo aita so? A yeke lakue “ngbâa be-ta-zo so ayeke sara ye na ndara” la ayeke na kota kua ti mû kobe ti yingo na azo ti kua (Mat. 24:45-47). Yingo vulu ayeke mû maboko na ngbâa so ti gi ambeni versê ti Bible so alingbi ti mû maboko na lo ti hinga tongana nyen ti sara ye alingbi na afango ye ti Bible so andu lege so aye ayeke tambela na ni na yâ ti acongrégation ti dunia kue. Nga a yeke ngbâa be-ta-zo la ayeke soro asurveillant ti circonscription kue nga na aita ti Komite ti Filiale. Nga, filiale oko oko la ayeke fa tongana nyen la a lingbi ti sara ye alingbi na fango lege ti ngbâa ni. Bungbi ti a-ancien oko oko kue ayeke na kota kua ti gbu li nzoni na ndo ti aye so Bible ahunda ti tene aita so aye ti ga a-ancien wala awakua ti mungo maboko asara ti tene a soro ala na yâ ti congrégation ti Nzapa. Surveillant ti circonscription oko oko kue ayeke na kota kua ti gbu li ti lo nzoni na ndo ti aita so a-ancien abâ so ala lingbi ti ga a-ancien wala awakua ti mungo maboko nga lo yeke zia ni na yâ ti sambela. Na pekoni, lo la lo yeke soro aita so alingbi na kua ni.

Tongana e hinga tongana nyen la a yeke soro aita ti ga a-ancien nga na awakua ti mungo maboko, e yeke hinga nzoni mingi tongana nyen la yingo vulu ayeke mû maboko ti tene a soro ala. Ye so ayeke sara si e zia bê ti e kue na aita so a soro ala na yâ ti congrégation nga e ne ala mingi.—aHéb. 13:7, 17.

Atémoin use so Apocalypse chapitre 11 asara tënë ti ala ayeke azo wa?

Apocalypse 11:3 asara tënë ti atémoin use so ayeke tene prophétie teti alango 1260. Mbaï ni atene nga so nyama ti ngonda ayeke “sö benda na ndo ti ala nga lo yeke fâ ala.” Me na peko ti “lango ota na ndambo ni,” a yeke zingo atémoin use so na ye so ayeke dö bê ti azo kue so ayeke bâ ni.—Apoc. 11:7, 11.

Atémoin use so ayeke azo wa? Anzene nzene tënë so ayeke na yâ ti mbaï ni amû maboko na e ti hinga ala. Kozoni, Bible atene na e so “a haka ala na akeke ti olive use nga na aye ti yongo lampe use”. (Apoc. 11:4). Ye so adabe ti e na fotoforo, wala ye ti yongo na lampe nga na akeke ti olive use so prophétie so ayeke na mbeti ti Zacharie asara tënë ni. A tene so akeke ti olive so aye ti sara tënë ti “azo use so A sa mafuta na ndo ala” so ti tene, Gbia Zorobabel na Kota Prêtre Josué so “aluti na tere ti Seigneur ti sese kue.” (Zach. 4:1-3, 14). Use ni, a tene so atémoin use so asara mara ti afä so Moïse na Élie asara lani.—Bâ Apocalypse 11:5, 6 na Nombre 16:1-7, 28-35; nga na 1 aGbia 17:1; 18:41-45.

Nyen la aversê so kue asara tënë na ndo ni? Aversê ni kue asara tënë ti awakua ti Nzapa so a tuku mafuta na li ti ala so amû li ni na mbeni ngoi ti ngangu tara. Tongaso, tënë so ayeke na Apocalypse chapitre 11 aga tâ tënë na lege so aChrétien so a soro ala ti gue na yayu so amû li ni na ngoi so a zia Royaume ti Nzapa na yayu na ngu 1914 ‘ayü bongo ti fungo na asac’, na ala fa lani tënë teti ngu ota na ndambo.

Tongana lango so ala yü bongo ti fungo na asac ti fa na tënë ahunzi awe, a bi aChrétien so a soro ala ti gue na yayu na da ti kanga, so na yâ ti prophétie ni a haka ni na fango atémoin use so. Ala ngbâ na da ti kanga ni teti mbeni kete ngoi so na yâ ti prophétie ni a haka ni na lango ota na ndambo. Awato ti ala abâ ti ala so kua ti fango tënë akaï awe, na ye so anzere na ala mingi.—Apoc. 11:8-10.

Me, tongana ti so prophétie ni atene, na hunzingo ti lango ota na ndambo ni, a zingo atémoin use so. A zi aChrétien so a soro ala ti gue na yayu so na da ti kanga nga na lege ti Jésus Christ, Seigneur ti ala, Nzapa amû na ala so angbâ be-ta-zo mbeni kua. Na ngu 1919, ala yeke na popo ti azo so a soro ala ti ga “ngbâa be-ta-zo so ayeke sara ye na ndara” ti mû kobe ti yingo na awakua ti Nzapa na alango ti nda ni so.—Mat. 24:45-47; Apoc. 11:11, 12.

Apocalypse 11:1, 2 afa so aye so aye ti sara tënë ti ngoi so Jésus ayeke ga ti bâ aye so a sara na yâ ti temple ti yingo. Malachie chapitre 3 asara nga tënë ti ngoi so Jésus ayeke ga ti bâ temple ti yingo nga na ngoi so lo yeke zi saleté na yâ ni (Mal. 3:1-4). Kua ti bango yâ ti temple ti yingo so nga na kua ti zingo saleté na yâ ni aninga lani ngoi oke? A komanse na ngu 1914 juska na kozo mbage ti ngu 1919. Lango 1260 (wala nze 42) nga na lango ota na ndambo so Apocalypse chapitre 11 asara tënë ni so ayeke na yâ ti ngoi ni so.

A nzere na e mingi so Jéhovah aleke ti tene a sara kua ti zingo saleté so ti sukula ambeni zo so ayeke duti gi azo ti lo ti sara anzoni kusala (Tite 2:14). Nga, e bâ na nene ni mingi tapande ti aChrétien be-ta-zo so a soro ala ti gue na yayu so amû li ni lani na ngoi ti ngangu so nga ala sara kua tongana atémoin use so. *

^ par. 18 Ti hinga ye mingi na ndo ni, bâ Tour ti Ba Ndo ti lango 15 ti juillet, ngu 2013, lembeti 22 paragraphe 12.