Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) OCTOBRE 2014

Ala yeke ga ande “royaume ti asacrificateur”

Ala yeke ga ande “royaume ti asacrificateur”

“Fade i ga royaume ti asacrificateur teti Mbi, na i ga mara ti nzoni-kue.”EX. 19:6.

1, 2. A lingbi a bata lani hale ti wali ni ngbanga ti nyen?

KOZO prophétie so ayeke na yâ ti Bible ayeke mbeni kota ye so amû maboko na e ti hinga tongana nyen ye so Nzapa aleke na bê ti lo ti sara ayeke ga tâ tënë. Tongana Nzapa amû zendo na yâ ti yaka ti Éden, lo tene: “Fade Mbi zia tënë ti ke na popo ti mo [Satan] na wali so, [nga] na popo ti hale ti mo na hale ti lo.” Kengo tere so ayeke duti tongana nyen? Jéhovah atene: “Fade lo [hale ti wali ni a]mboko li ti mo [Satan], na fade mo mboko ndagere ti lo.” (Gen. 3:15). Kengo tere so ayeke na popo ti ngbo ni na wali ni ayeke ngangu mingi, a sara si Satan asara kue ti hunzi na hale ti wali ni.

2 A yeke ye ti dongo bê ape so mbeni zo ti sungo psaume asambela ndali ti awakua ti Nzapa, lo tene: “Bâ, awato ti Mo asara wuluwulu, na azo so ake Mo ayä li ti ala mveni. Ala wa tere ti ala na mayele ti ke azo ti Mo, na ala wa tere ti ala ti ke azo so Mo yeke bata ala. Ala tene, Ga, e futi ala si ala ngbâ mara mbeni pëpe.” (Ps. 83:3-5). A lingbi a bata molongo ti hale ti wali ni tongaso si Satan afuti ala ape nga si ala ga sioni ape. Ti sara ni Jéhovah akiri asigigi na ambeni mbele so ague oko na ndia ti lo  ti sara si ye so lo leke na bê ti lo ti sara aga tâ tënë.

MBENI MBELE SO ABATA HALE NI

3, 4. (a) Lawa la mbele ti Ndia ato nda ti sara kua? Nyen la mara ti Israël ayeda ti sara lani? (b) Nyen la mbele ti Ndia amû lege ti tene a bata ni?

3 Na ngoi so amolenge ti Abraham, ti Isaac na ti Jacob aga gbani gbani, Jéhovah asara si ala ga mbeni mara: Israël ti giriri. Na lege ti Moïse, Jéhovah ate mbeni mbele gi na azo ti Israël na lege ti Ndia so lo mû na ala, na ala yeda na atënë ti mbele ni. A iri mbele so mbele ti Ndia. Bible atene: “[Moïse a]kamata mbeti ti mbele ni, na lo diko mbeti ni na gbele azo ni; na ala tene, Fade e sara ye kue so L’Éternel atene, na fade e mä Lo. Moïse akamata mênë [ti akoli-bagara so a mû na sandaga], na lo ki mênë ni na ndo azo ni, lo tene, Bâ, mênë ti mbele so L’Éternel ate na i na lege ti tënë so kue.”Ex. 24:3-8.

4 Mbele ti Ndia ato nda ti sara kua na ngu 1513 kozo ti Christ na Hoto ti Sinaï. Na lege ti mbele so, Nzapa asoro mara ti Israël ti giriri ti ga azo ti lo. Jéhovah aga ‘Juge ti ala, Zo Ti Lu Ndia ti ala, nga na Gbia ti ala’. (És. 33:22). Mbaï ti azo ti Israël afa ye so asi na ngoi so mara ni asara ye alingbi na andia ti Nzapa so ayeke mbilimbili. A fa nga ye so asi na ngoi so ala sara sanka ni. So Ndia ni ake na ala ti sara mariage na apaïen nga ake na ala ti voro anzapa ti wataka, a yeke ti bata molongo ti hale ti Abraham tongaso si ala ga sioni ape.Ex. 20:4-6; 34:12-16.

5. (a) Mbele ti Ndia asara si mara ti Israël ayeke na pasa wa? (b) Nzapa ake azo ti Israël ngbanga ti nyen?

5 Na yâ ti mbele ti Ndia a zia aprêtre ti sara kua na mara ti Israël. Aprêtre so ayeke lani fä ti mbeni groupe ti aprêtre so ayeke sara ande kua nzoni ndali ti azo kue (aHéb. 7:11; 10:1). Na lege ti mbele so, mara ti Israël ayeke na pasa ti ga “royaume ti asacrificateur”, wala ti aprêtre. Ti tene ala ga royaume ti aprêtre, a lingbi ala sara ye alingbi na andia ti Jéhovah. (Diko Exode 19:5, 6.) Me, azo ti Israël asara ye alingbi na andia ti Jéhovah ape. Ahon ti tene ala yeda na Messie ni, lo so lo yeke kozo mbage ti hale ti Abraham, ala ke lo. Ye so asara si Nzapa ake ala.

Kengo yanga ti azo ti Israël aye lani ti tene ape so mbele ti Ndia atï na ngu (Bâ paragraphe 3-6)

6. Nyen la Ndia ahunzi ti sara ni?

6 Teti so azo ti Israël angbâ be-ta-zo na Jéhovah ape, a sara si ala ga royaume ti aprêtre ape. Ye so aye ti tene ape so mbeni ye ayeke na lege ni ape na yâ ti Ndia ni. Ndia ni abata lani hale ni nga amû lege na azo ti hinga Messie ni. Na ngoi so Christ aga lani na sese nga azo ahinga lo, Ndia ni asara kua ti lo. Bible atene: “Ndia ahunzi na ndo ti Christ.” (aRom. 10:4). Me, mbeni hundango ndo so angbâ ayeke so: Azo wa la ayeke wara pasa ti ga royaume ti aprêtre? Jéhovah ate mbeni mbele so asara si mbeni fini mara abâ gigi.

 MBENI FINI MARA ABÂ GIGI

7. Tënë ti nyen la Jéhovah atene kozo awe na lege ti Jérémie na ndo ti fini mbele?

7 Angoi mingi kozo ti tene Jéhovah azia lani lege ti mbele ti Ndia so lo te na azo ti Israël, lo tene kozo awe na lege ti prophète Jérémie so lo yeke te mbeni “fini mbele” na azo ti Israël. (Diko Jérémie 31:31-33.) Mbele so ayeke duti nde na mbele ti Ndia na lege so mbele ni ayeke mû lege ti tene a pardone asiokpari ti azo sân ti tene a mû anyama na sandaga. Mbele ni ayeke sara ye so tongana nyen?

8, 9. (a) Nyen la mênë ti Jésus so atuku asara? (b) Pasa wa la azo so ayeke na yâ ti fini mbele ni ayeke na ni? (Bâ foto so ayeke na tongo nda ti article ni.)

8 Angu mingi na pekoni, Jésus azia na sese Kobe ti Seigneur na lango 14 ti Nisan ti ngu 33. Na ngoi so lo yeke sara tënë na adisciple ti lo 11 so ayeke be-ta-zo na ndo ti kopo ti vin, lo tene: “Kopo ti vin so ayeke fä ti fini mbele na lege ti mênë ti mbi so biani ayeke tuku ande ndali ti ala.” (Luc 22:20). Na yâ ti mbaï so Matthieu asû, lo kiri na ndo ti tënë so Jésus atene na ndo ti vin ni, lo tene: “So ayeke fä ti ‘mênë ti mbele ni’, mênë ti mbi so biani ayeke tuku ande ndali ti azo mingi ti tene a pardone asiokpari.”Mat. 26:27, 28.

9 Mênë ti Jésus so atuku asara si fini mbele akomanse kua ti lo. Mênë so atuku gi fani oko, nga a mû lege ti tene a pardone asiokpari ti azo teti lakue lakue. Jésus ayeke na yâ ti fini mbele ni ape. Teti so siokpari ayeke na tere ti lo ape, lo yeke na bezoin ti pardon ni ape. Me, Nzapa alingbi ti sara kua na ngere ti mênë ti Jésus ti ga na ye ti nzoni na azo. Lo lingbi nga ti soro na lege ti yingo vulu ti lo ambeni zo so ayeke be-ta-zo na lo “ti ga amolenge ti lo”. (Diko aRomain 8:14-17.) Teti so Nzapa abâ ala tongana azo so siokpari ayeke na tere ti ala ape, na mbeni lege ala yeke tongana Jésus, molenge ti Nzapa so ayeke na siokpari ape. A-Chrétien so, so a soro ala ti gue na yayu ayeke ga “ahéritier legeoko na Christ” nga ala yeke na pasa ti ga mbeni ‘royaume ti aprêtre’. A yeke pasa so mara ti Israël so ayeke lani na gbe ti Ndia alingbi fade ti wara. Na ngoi so bazengele Pierre asara tënë na ndo ti azo so ayeke ga “ahéritier legeoko na Christ,” lo tene: “Ala, ala yeke ‘mara so a soro ni awe, mbeni bungbi ti aprêtre so ayeke sara kua tongana agbia, azo ti mara so ayeke nzoni-kue, azo so ayeke ga ye ti Nzapa wani si ala lingbi ti fa anzoni’ ti lo so lo iri ala ti sigigi na yâ ti bingo ti ga na yâ ti pendere lumière ti lo.” (1 Pi. 2:9). Fini mbele so ayeke biani kota ye. A mû lege na adisciple ti Jésus ti ga use mbage ti hale ti Abraham.

A KOMANSE TI SARA KUA NA FINI MBELE NI

10. A komanse ti sara kua na fini mbele lawa? Ngbanga ti nyen la a sara kua na ni kozo na ngoi ni so ape?

10 Lawa la a komanse ti sara kua na fini mbele? A yeke pëpe na ngoi so Jésus asara tënë na ndo ni na ndangba bï ti fini ti lo na sese. Me ti tene a sara kua na fini mbele ni a lingbi mênë ti Jésus atuku nga a lingbi lo fa ngere ni na Jéhovah na yayu si. Na ndo ni, a yeke na bezoin ti tuku yingo vulu na ndo ti azo so ayeke ga “ahéritier legeoko na Christ”. Tongaso, a komanse ti sara kua na fini mbele ni na Pentecôte ti ngu 33 na ngoi so a tuku yingo vulu na ndo ti adisciple ti Jésus so ayeke be-ta-zo.

11. Tongana nyen la fini mbele amû lege ti tene aJuif nga na aGentil kue aga amembre ti Israël ti yingo? Azo oke la ayeke na yâ ti fini mbele ni?

11 Atâa so mbele ti Ndia aga lani “ngbene ye” awe na ngoi so Jéhovah atene na lege ti Jérémie so lo yeke te mbeni fini mbele na azo ti Israël, mbele ni angbâ lani na ngangu juska na ngoi so a komanse ti  sara kua na fini mbele (aHéb. 8:13). Na ngoi so a komanse ti sara kua na fini mbele ni, Nzapa abâ aJuif nga na aGentil so afâ ganza ape kue legeoko, ndali ti so “fango ganza ti [ala] ayeke fango ganza ti bê na lege ti yingo, me na lege ti mbeni mbeti ti andia pëpe.” (aRom. 2:29). Na lege ti fini mbele so Nzapa ate na ala, lo zia andia ti lo “na yâ ti li ti ala na [lo] yeke sû ni na ndo ti bê ti ala.” (aHéb. 8:10). Wungo ti azo kue so ayeke na yâ ti fini mbele ni ayeke 144 000, ala ga mbeni fini mara, “Israël ti Nzapa”, wala Israël ti yingo.aGal. 6:16; Apoc. 14:1, 4.

12. Na lege wa la mbele ti Ndia ayeke nde na fini mbele?

12 Na lege wa la mbele ti Ndia ayeke nde na fini mbele? Mbele ti Ndia ayeke mbele so Jéhovah ate na azo ti Israël, me fini mbele ayeke mbele so lo te na Israël ti yingo. Moïse la ayeke lani walekengo-songo ti ngbene mbele. Me Jésus la ayeke Walekengo-songo ti fini mbele. A komanse ti sara kua na mbele ti Ndia na lege ti mênë ti nyama. Me a komanse ti sara kua na fini mbele na lege ti mênë ti Jésus so atuku. Moïse la afa lege lani na azo ti Israël so ayeke na yâ ti mbele ti Ndia. Me Jésus so ayeke Li ti congrégation la afa lege na azo so ayeke na yâ ti fini mbele.aÉph. 1:22.

13, 14. (a) Na lege wa fini mbele andu Royaume? (b) Nyen la alingbi ti mû lege na Israël ti yingo ti komande legeoko na Christ na yayu?

13 Fini mbele ni andu Royaume na lege so asara si mbeni mara so ayeke nzoni-kue abâ gigi, na azo so ayeke na yâ ni ayeke ga agbia na aprêtre na yâ ti Royaume ti yayu. Mara so aga use mbage ti hale ti Abraham (aGal. 3:29). Tongaso, fini mbele amû maboko na e ti hinga biani so mbele so Nzapa ate na Abraham ayeke ga ande tâ tënë.

14 A ngbâ mbeni kota ye oko ti tene a sara na yâ ti Royaume ni. Fini mbele ni asara si Israël ti yingo abâ gigi nga amû lege ti tene amembre ti Israël ti yingo ni aga “ahéritier legeoko na Christ”. Me a lingbi a sigigi na mbeni fini mbele ti mû lege na ala ti bungbi oko na Jésus na yâ ti Royaume ti lo na yayu ti ga agbia nga na aprêtre.

MBENI MBELE SO A MÛ LEGE NA AMBENI ZO TI KOMANDE LEGEOKO NA CHRIST

15. Mbele wa la Jésus ate na abazengele ti lo so ayeke be-ta-zo?

15 Na peko ti so Jésus azia na sese Kobe ti Seigneur, lo te mbeni mbele na adisciple ti lo so ayeke be-ta-zo na lo, na a iri ni mbele ti Royaume. (Diko Luc 22:28-30.) Jéhovah ayeke na yâ ti tanga ti ambele me lo yeke pëpe na yâ ti mbele ti Royaume. A yeke mbele so ayeke na popo ti Jésus na adisciple ti lo so a soro ala ti gue na yayu. Na ngoi so Jésus atene “legeoko tongana Babâ ti mbi ate lani mbele na mbi,” peut-être lo yeke sara tënë ti mbele so Nzapa ate na lo ti ga “prêtre teti lakue lakue tongana ti Melkisédek.”aHéb 5:5, 6.

16. Pasa wa la mbele ti Royaume amû na aChrétien so a soro ala ti gue na yayu?

16 Abazengele 11 so ayeke be-ta-zo ‘angbâ na tere ti Jésus na yâ ti atara so asi na lo.’ Mbele ti Royaume amû lege na ala ti hinga biani so ala yeke duti na tere ti Jésus na yayu na ndo ti atrône ti komande tongana agbia nga ti sara kua ti aprêtre. Me, a yeke gi abazengele 11 so la ayeke na pasa so ape. Jésus so ayeke na gloire afa tere ti lo na bazengele Jean na yâ ti mbeni suma na lo tene na lo, lo tene: “Zo so asö benda, fade mbi yeke mû lege na lo ti duti legeoko na mbi na ndo ti trône ti mbi, gi tongana ti so mbi kue mbi sö benda si mbi duti legeoko na Babâ ti mbi na ndo ti trône ti lo.” (Apoc. 3:21). Tongaso, aChrétien 144 000 so a soro ala ti gue na yayu ayeke na yâ ti mbele ti Royaume (Apoc. 5:9, 10; 7:4). A yeke mbele so la amû na aChrétien so  a soro ala ti gue na yayu droit ti komande legeoko na Jésus. A yeke nga legeoko tongana ti mbeni wali so a soro lo ti sara mariage na mbeni gbia. Tongana ala sara mariage awe, wali ni alingbi ti komande legeoko na gbia ni. Bible asara tënë ti aChrétien so a soro ala ti gue na yayu tongana “wali” so Christ ayeke sara mariage na lo, “mbeni maseka-wali so ade ti hinga koli pëpe na so ayeke na sioni oko pëpe”.Apoc. 19:7, 8; 21:9; 2 aCor. 11:2.

MÄ NA BÊ NA ROYAUME TI NZAPA

17, 18. (a) Fa ambele omene so e sara tënë na ndo ni so andu Royaume ti Nzapa. (b) Ngbanga ti nyen a lingbi e mä na bê na Royaume ti Nzapa?

17 Ambele kue so e sara tënë na ndo ni na yâ ti a-article so asara tënë na ndo ti mbeni ye oko wala aye mingi so ayeke akota ye so andu Royaume ti Nzapa. (Bâ tableau “Tongana nyen la Nzapa ayeke sara ande ye so bê ti lo aye?” so ayeke na yâ ti kozo article ni.) A yeke polele so ambele so ague oko na andia ti Nzapa la ayeke na gunda ti Royaume ni, tongaso ye so Nzapa aleke ti sara na lege ti Royaume ni ayeke ga ande tâ tënë. Ni la, e yeke biani na raison ti zia bê ti e kue na ndo ti Royaume ti Nzapa so Christ ayeke Gbia ni tongana ye so Nzapa ayeke sara kua na ni ti sara ye so lo leke lani na bê ti lo ti sara teti sese nga na azo.Apoc. 11:15.

Na lege ti Royaume so Christ ayeke Gbia ni, Jéhovah ayeke sara si ye so lo leke na bê ti lo ti sara ndali ti sese ayeke ga tâ tënë (Bâ paragraphe 15-18)

18 E yeke na kite oko ape so ayeke gi Royaume ti Nzapa oko la ayeke zi akpale ti azo kue. E hinga biani na bê ti e kue so Royaume ni ayeke ga ande na azo anzoni ye so ayeke ngbâ lakue lakue. Tongaso, zia si e fa na azo tâ tënë so na bê ti e kue.Mat. 24:14.