Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) OCTOBRE 2014

Duti na kpengba mabe na Royaume ti Nzapa

Duti na kpengba mabe na Royaume ti Nzapa

“Mabe ayeke hingango biani so aye so mo yeke ku ni kungo ayeke si biani.”AHÉB. 11:1.

1, 2. (a) Nyen la ayeke mû maboko na e ti hinga biani so Royaume ti Nzapa ayeke sara ande ye so bê ti lo aye teti azo? (b) Ti gue oko na aÉphésien 2:12 ambele ayeke kpengba e tongana nyen? (Bâ foto so ayeke na tongo nda ti article ni.)

E SO e yeke aTémoin ti Jéhovah e yeke tene lakue so Royaume ti Nzapa la ayeke oko yorö ti akpale ti e kue nga e yeke na ngia ti fa tâ tënë so na azo. Bê ti e adë nga ndali ti aye so Royaume ti Nzapa ayeke ga ande na ni na e. Me, nyen la amû lege na e ti tene so Royaume ni ayeke tâ ye so na lege ni Nzapa ayeke sara ye so lo leke na bê ti lo ti sara? Nyen la amû lege na e ti mä na bê biani so Royaume ti Nzapa ayeke sara ande ye so bê ti lo aye?aHéb. 11:1.

2 Royaume ti Nzapa so Christ ayeke Gbia ni ayeke mbeni ye so Nzapa ti ngangu ahon kue aleke ti mû lege na lo ti sara ye so bê ti lo aye ndali ti azo. Droit ti Jéhovah ti komande dunia kue la ayeke na gunda ti Royaume so. Aye so andu Royaume ni, so ti tene Gbia ni, azo so ayeke komande legeoko na Gbia ni, ndo so Royaume ni ayeke duti dä ti komande a fa ni na lege ti ambele. Ambele ni ayeke azendo so Nzapa wala molenge ti lo, Jésus Christ, amû so ague oko na andia so Nzapa amû.  Tongana e gbu li ti e na ndo ti ambele so, a yeke sara si e hinga nzoni mingi tongana nyen la ye so Nzapa aleke ti sara ayeke ga tâ tënë. A yeke mû nga maboko na e ti hinga tongana nyen la Royaume ti Nzapa ayeke ngbâ lakue.Diko aÉphésien 2:12.

3. Nyen la e yeke bâ na yâ ti article so nga na ti peko?

3 Bible asara tënë ti akota mbele omene so andu Royaume so Christ Jésus ayeke Gbia ni. A yeke (1) mbele so Nzapa ate na Abraham, (2) mbele ti Ndia, (3) mbele so Nzapa ate na David, (4) mbele so Nzapa ate na Jésus ti duti mbeni prêtre tongana Melkisédek, (5) fini mbele nga na (6) mbele ti Royaume. Zia e bâ tongana nyen la ambele ni oko oko kue andu Royaume ti Nzapa. E yeke bâ nga tongana nyen la ambele ni oko oko kue ayeke sara ande ye so Nzapa aleke na bê ti lo ndali ti sese nga na azo.—Bâ tableau “Tongana nyen la Nzapa ayeke sara ande ye so bê ti lo aye?”

MBENI ZENDO SO AFA TONGANA NYEN YE SO BÊ TI NZAPA AYE AYEKE GA TÂ TËNË

4. Tongana ti so a fa na mbeti ti Genèse akpengba tënë wa Nzapa atene so andu azo?

4 Na pekoni so Jéhovah ahunzi ti leke sese ti tene azo aduti dä, lo tene ambeni tënë ota so andu azo: Lo sara zo na image ti lo, a lingbi azo asara si sese kue aga Paradis nga ala dü amolenge so ayeke nzoni amû ndo ti sese kue, nga lo ke na azo ti te lê ti keke ti hinga nzoni na ti hinga sioni (Gen. 1:26, 28; 2:16, 17). A yeke gi atënë so Nzapa atene so andu azo awe la. Na pekoni so Nzapa acréé zo, a-use ndangba kpengba tënë so alingbi awe ti sara ye so bê ti Nzapa aye. Me ngbanga ti nyen la Nzapa ate mbele na azo?

5, 6. (a) Tongana nyen la Satan agi lani ti kanga lege na ye so Nzapa aleke na bê ti lo ti sara? (b) Tongana nyen la Jéhovah aleke kpale so Satan abi na sese na yaka ti Éden?

5 Na sioni bê, Satan Zabolo asara kpengba-li na lo ye ti kanga lege na ye so Nzapa aleke na bê ti lo ti sara. Lo sara ni na lege so lo luti na ndo ti mbeni oko ti akpengba tënë ota so, so lo lingbi ti wara zo dä hio, so andu mango yanga. Lo handa Ève, kozo wali, na Ève ate lê ti keke ti hinga nzoni na ti hinga sioni so Nzapa ake na ala ti te ni (Gen. 3:1-5; Apoc. 12:9). Na sarango tongaso Satan adë kite na droit ti Nzapa ti komande na ndo ti azo so lo sara ala. Na pekoni, Satan atene nga so azo ayeke voro Nzapa gi ndali ti so ala wara ye na pekoni.Job 1:9-11; 2:4, 5.

6 Tongana nyen la Jéhovah ayeke leke tënë so Satan abi na sese na yâ ti yaka ti Éden so? Biani, tongana lo futi azo ti kpengba-li so, sarango kpengba-li ti ala ni ayeke hunzi. Me a yeke sara nga si ye so Nzapa aleke ti sara so ayeke ti tene amolenge ti Adam na Ève so amä yanga asi ndo ti sese kue ayeke tï na ngu. A hon ti tene Jéhovah afâ ala na lê ni lê ni, lo leke tënë ni na lege ti mbeni kpengba prophétie ti fa so nyen na nyen anzene nzene ye kue so lo tene ayeke ga tâ tënë. Prophétie ni ayeke zendo so Nzapa amû na yâ ti yaka ti Éden.Diko Genèse 3:15.

7. Nyen la zendo so Nzapa amû na yâ ti yaka ti Éden afa na e na ndo ti ngbo ni nga na hale ti lo?

7 Na lege ti zendo so Nzapa amû na yâ ti yaka ti Éden, lo fâ ngbanga na li ti ngbo ni nga na hale ti lo, so ti tene Satan Zabolo nga na azo kue so amû peko ti lo ti ke droit ti Jéhovah ti komande dunia kue. Nzapa amû na hale ti wali ti lo so ayeke na yayu ngangu ti futi Satan nga na hale ti lo. Tongaso, zendo so Nzapa amû na yâ ti yaka  ti Éden afa so a yeke futi Satan so asara si kpengba-li abâ gigi. Nga aye ti sioni kue so aga na peko ti kpengba-li ti lo ayeke hunzi. Zendo ni afa nga tongana nyen la Jéhovah ayeke sara aye so.

8. Tongana nyen la a fa wali ni nga na hale ti lo?

8 Hale ti wali ni ayeke duti ande zo wa? Teti so hale ni ayeke mboko li ti ngbo ni, so ti tene, lo yeke “neka” Satan Zabolo so ayeke yingo, a lingbi hale ni aduti mbeni zo so ayeke yingo (aHéb. 2:14). Tongaso, a lingbi wali so ayeke dü hale ni ayeke nga mbeni zo so ayeke yingo. Teti ngu 4000 na peko ti zendo so Nzapa amû na yâ ti yaka ti Éden, na ngoi so hale ti ngbo ni aga gbani, a yeke lani ngangu ti hinga hale ni nga na wali ni. Na yâ ti angu ni so, Jéhovah ate ambele mingi so afa hale ni nga amû lege na awakua ti lo ti hinga biani so a yeke na lege ti hale so la lo yeke zi aye ti sioni kue so Satan aga na ni na ndo ti azo.

MBENI MBELE SO AFA HALE NI

9. Mbele wa la Nzapa ate na Abraham? A komanse ti ga tâ tënë lawa?

9 Ngu 2000 tongaso na pekoni so Jéhovah afâ ngbanga na ndo ti Satan, lo hunda na Abraham ti zia ndo ti lo na gbata ti Ur na Mésopotamie ti gue na sese ti Canaan (Kus. 7:2, 3). Jéhovah atene na lo, a tene: “Mo zia sese ti mo, asongo ti mo, na da ti babâ ti mo, ti gue na sese so fade Mbi fa na mo. Fade Mbi sara si mo ga kota mara, Mbi iri tënë nzoni na ndo mo, Mbi sara si iri ti mo aga kota, na mo ga lingu ti tënë nzoni. Fade Mbi iri tënë nzoni na ndo ala so airi tënë nzoni na ndo mo; ala so azonga mo, fade Mbi zonga ala; fade afamille kue ti sese awara tënë nzoni na lege ti mo.” (Gen. 12:1-3). A yeke mbele so Nzapa ate na Abraham. E hinga pëpe lawa la Jéhovah ate mbele so kozo na Abraham. Me, e hinga so tënë ti mbele ni akomanse ti ga tâ tënë na ngu 1943 kozo ti Christ, na ngoi so  Abraham so ayeke na ngu 75 azia kodoro ti Haran lo gue na mbage ti Ngu ti Euphrate.

10. (a) Tongana nyen la Abraham afa so lo yeke na mabe na azendo ti Nzapa? (b) Anzene nzene ye wa Jéhovah afa ni yeke na yeke na ndo ti hale ti wali ni?

10 Jéhovah akiri na ndo ti zendo so fani mingi na Abraham ti fa na lo ambeni nzene nzene tënë na ndo ni (Gen. 13:15-17; 17:1-8, 16). Na ngoi so Abraham afa so lo yeke na mabe na azendo ti Nzapa na lege so lo yeda ti mû oko molenge ti lo na sandaga, Jéhovah akiri atene ambeni tënë ti mû ngangu na mbele ni ti fa so zendo ni ayeke ga tâ tënë. (Diko Genèse 22:15-18; aHébreu 11:17, 18.) Na pekoni so mbele so Nzapa ate na Abraham akomanse ti ga tâ tënë, yeke na yeke Jéhovah afa ambeni nzene nzene kpengba ye na ndo ti hale ti wali ni. Hale ni ayeke ga na lege ti Abraham. Na yâ ti hale ni, a yeke wara gbâ ti azo, ala yeke ga ande agbia, ala yeke futi awato ti Nzapa na ala yeke ga na aye ti nzoni na azo mingi.

Abraham afa so lo yeke na mabe na azendo ti Nzapa (Bâ paragraphe 10)

11, 12. Tongana nyen la Bible afa so mbele so Nzapa ate na Abraham ayeke ga tâ tënë na mbeni lege so ayeke kota mingi? Ye ti nzoni wa la e yeke wara dä?

11 Zendo so Nzapa amû na Abraham aga tâ tënë ti kozoni, na ngoi so ahale ti Abraham asi na Sese ti Zendo. Bible afa so mbele so ayeke ga nga tâ tënë na mbeni lege so ayeke kota mingi (aGal. 4:22-25). Tongana ti so bazengele Paul atene, kozo mbage ti hale ti Abraham ayeke Christ nga use mbage ni ayeke aChrétien 144 000 so a soro ala ti gue na yayu (aGal. 3:16, 29; Apoc. 5:9, 10; 14:1, 4). Wali so ayeke dü hale ni, a yeke mbeni wali nde ape me a yeke “Jérusalem ti nduzu”, so ayeke mbage ti bungbi ti Jéhovah so ayeke na yayu, so na yâ ni a yeke wara a-ange so ayeke be-ta-zo (aGal. 4:26, 31). Tongana ti so Nzapa amû zendo ni na yâ ti mbele so lo te na Abraham, hale ti wali ni ayeke ga na aye ti nzoni na azo.

12 Mbele so Nzapa ate na Abraham andu Gbia nga na azo so ayeke komande legeoko na lo na yâ ti Royaume ni, nga a fa so Royaume ti lo so lo zia gere ni na yayu ayeke dä biani (aHéb. 6:13-18). Mbele so ayeke ninga ande teti ngoi oke? Genèse 17:7 atene so a yeke “mbele ti lakue lakue”. A yeke ngbâ ande juska na ngoi so Royaume so Christ ayeke Gbia ni ayeke futi awato ti Nzapa nga azo kue na ndo ti sese ayeke wara ande aye ti nzoni (1 aCor. 15:23-26). Na pekoni, azo so ayeke duti ande na ndo ti sese ayeke bâ nzoni ti peko ti mbele so teti lakue lakue. Mbele so Jéhovah ate na Abraham afa so Jéhovah aye biani ti sara ye so lo leke na bê ti lo ti sara so ayeke ti tene azo asi “singo na sese”.Gen. 1:28.

MBELE SO AFA BIANI SO ROYAUME NI AYEKE NGBÂ TETI LAKUE LAKUE

13, 14. Nyen la mbele so Nzapa ate na David afa biani na ndo ti Royaume so Christ ayeke Gbia ni?

13 Zendo so Nzapa amû na Adam na Ève na yaka ti Éden nga na mbele so lo te na Abraham afa so andia ti Jéhovah so ayeke mbilimbili la ayeke na gunda ti komandema ti lo. Tongaso, andia ti Jéhovah so ayeke mbilimbili ayeke nga na gunda ti Royaume ti lo so Christ ayeke Gbia ni (Ps. 89:15). Mbeni ye ti sioni alingbi ti buba yâ ti Royaume ti Nzapa so? A lingbi ti changé Royaume ni? Mbeni mbele ni afa so aye so ayeke si lâ oko ape na Royaume ni.

14 Jéhovah amû mbeni zendo na David so ayeke gbia ti Israël ti giriri. Zendo so ayeke mbele so Nzapa ate na David. (Diko 2 Samuel 7:12, 16.) Jéhovah ate mbele so na David na ngoi so David ayeke gbia ti Jérusalem. Lo tene na lo so Messie, wala Christ ayeke ga na yâ ti hale ti lo (Luc 1:30-33). Tongaso, Jéhovah akiri afa ambeni nzene nzene tënë na ndo ti sewa so Messie ni ayeke bâ gigi na lege ti hale ti lo. Jéhovah atene so hale ti David,  “so ye so ayeke ti Lo”, ayeke ga gbia ti Royaume ni (Ézéch. 21:30-32). Na lege ti Jésus, komandema ti David ayeke “duti lakue”. Biani hale ti David ayeke ‘ngbâ teti lakue, na trône ti lo angbâ tongana lâ’. (Ps. 89:36-38). E hinga biani so mbeni ye ti sioni ayeke buba pëpe Royaume so Christ ayeke Gbia ni nga aye ti nzoni so Royaume ni ayeke ga na ni ayeke ngbâ lakue lakue.

MBELE NDALI TI MBENI PRÊTRE

15-17. Ti gue oko na mbele so Jéhovah ate ndali ti mbeni prêtre tongana Melkisédek, kua wa la a mû nga na hale ni? Ngbanga ti nyen?

15 Atâa so mbele so Nzapa ate na Abraham nga mbele so lo te na David afa biani so hale ti wali ni ayeke ga gbia, gi dutingo gbia oko alingbi ti ga na aye ti nzoni na azo ti amara kue ape. Ti tene ala wara aye ti nzoni biani, a lingbi a zi siokpari so ayeke na tere ti ala nga ala ga na yâ ti sewa ti Jéhovah so abungbi awakua ti lo so ayeke na yayu nga na sese. Ti sara ye so, a lingbi hale ni asara nga kua tongana prêtre. Jéhovah aleke mbeni ye nde na lege ti mbeni mbele, mbele ndali ti mbeni prêtre tongana Melkisédek.

16 Jéhovah afa na lege ti Gbia David so lo yeke te mbeni mbele na Jésus ndali ti akua use: ti “duti na koti ti [Nzapa]”, juska a mû na lo ngangu ti futi awato ti lo nga ti duti “Sacrificateur [wala prêtre] teti lakue lakue, alingbi na lege ti Melkisédek”, wala tongana ti Melkisédek. (Diko Psaume 110:1, 2, 4.) Me, ngbanga ti nyen Jésus ayeke duti prêtre tongana ti Melkisédek? A yeke ngbanga ti so angu mingi kozo ti tene ahale ti Abraham asi na Sese ti Zendo, Melkisédek, gbia ti Salem, asara kua tongana “prêtre ti Nzapa so ayeke na nduzu na ndo ti aye kue”. (aHéb. 7:1-3). Jéhovah la azia lo ti sara kua ti prêtre. Gi Melkisédek oko la mbage ti Bible so a sû ândö na Hébreu atene so lo sara kua tongana gbia nga na prêtre. Na ndo ni, teti so kozo na lo wala na peko ti lo mbeni zo ade ti duti prêtre nga na gbia tongana ti lo so ape, a lingbi ti tene so lo yeke “prêtre teti lakue lakue”.

17 Na lege ti mbele so Jéhovah ate na Jésus, lo soro lo ti ga prêtre. Jésus ayeke duti ande “prêtre teti lakue lakue tongana ti Melkisédek.” (aHéb. 5:4-6). Mbele so afa biani so Jéhovah ayeke sara kua na Royaume ti lo so Christ ayeke Gbia ni ti sara si ye so lo leke na bê ti lo ti sara teti azo nga na sese aga tâ tënë.

AMBELE LA AYEKE NA GUNDA TI ROYAUME NI

18, 19. (a) Ambele so e londo ti sara tënë na ndo ni so, a fa nyen na ndo ti Royaume ti Nzapa? (b) Nyen la e yeke sara tënë na ndo ni na yâ ti article ti peko?

18 Na lege ti ambele so e londo ti sara tënë na ndo ni so, e bâ so ambele ni kue asara tënë na ndo ti Royaume ti Nzapa so Christ ayeke Gbia ni. E bâ nga so ambele la ayeke na gunda ti Royaume ni. Zendo so Jéhovah amû na Adam na Ève na yaka ti Éden afa biani so Jéhovah ayeke sara si ye so lo leke na bê ti lo ti sara teti sese nga na azo aga tâ tënë na lege ti hale ti wali ni. Zo wa la ayeke hale ni? Kua ti nyen la lo yeke sara? Mbele so Nzapa ate na Abraham afa ni.

19 Mbele so Nzapa ate na David afa anzene nzene ye mingi na ndo ti sewa so Messie ni ayeke ga na lege ti lo. Mbele ni afa nga so Jésus ayeke na droit ti komande na ndo ti sese teti lakue lakue. Mbele ndali ti mbeni prêtre tongana Melkisédek ayeke ye so amû lege na hale ni ti sara kua ti prêtre. Me, a yeke gi Jésus lo oko ape la ayeke sara ande si azo kue aga nzoni-kue. A soro ambeni Chrétien ti gue na yayu ti sara kua tongana agbia nga na aprêtre. A soro ala na ndo wa? Article ti peko ayeke sara tënë na ndo ni.