Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) OCTOBRE 2014

Bâ na nene ni pasa so mo yeke na ni ti sara kua legeoko na Jéhovah

Bâ na nene ni pasa so mo yeke na ni ti sara kua legeoko na Jéhovah

“E yeke sara kusala maboko na maboko na Nzapa.”1 ACOR. 3:9.

1. Jéhovah abâ kua tongana nyen? Ye so apusu lo ti sara nyen?

JÉHOVAH ayeke na ngia na yâ ti kua ti lo (Ps. 135:6; Jean 5:17). Ti mû lege na acréature ti lo ti wara mara ti ngia ti lo so nga ti wara anzoni ye na peko ti kua ti ala, lo mû na ala nzoni kua so ayeke sara si ala yeke na ngia. Na tapande, lo zia kozo Molenge ti lo na yâ ti kua ti lekengo aye. (Diko aColossien 1:15, 16.) Bible atene so kozo ti tene Jésus aga na sese, lo yeke lani na tere ti Nzapa na yayu “tongana wakode.”aProv. 8:30.

2. Nyen la afa so a-ange ayeke sara lakue ambeni kota kua so asara si ala yeke na ngia?

2 Na yâ ti Bible, ti londo na Genèse ti si na Apocalypse, e yeke wara atapande so afa so Jéhovah ayeke mû lakue kua na a-ange. Na pekoni so Adam na Ève asara siokpari na a tomba ala na yâ ti Paradis, Nzapa “[a]zia achérub na yaka ti Éden na mbage ti est, na menga-wa ti épée so aturnê na lege kue ti bata lege ti si na keke ti mû fini.” (Gen. 3:24). Apocalypse 22:6 atene nga so Jéhovah “atokua ange ti lo ti fa na angbâa ti lo aye so aga nduru ti si awe.”

 AKUA SO NZAPA AMÛ NA AZO

3. Tongana nyen la Jésus amû lani tapande ti Babâ ti lo na ngoi so lo yeke na ndo ti sese?

3 Na ngoi so Jésus so ayeke nzoni-kue ayeke lani na ndo ti sese, lo sara kua so Jéhovah amû na lo ti sara na ngia. Jésus amû tapande ti Babâ ti lo, lo mû nga kota kua na adisciple ti lo. Lo fa na ala kota ti kua so ala yeke sara ande, lo tene: “Biani, ti tâ tënë ni, mbi tene na ala: Zo so amä na bê na mbi, lo yeke sara nga akusala so mbi sara, na lo yeke sara akusala so ayeke kota mingi ahon akusala so mbi sara, teti mbi yeke gue na Babâ.” (Jean 14:12). Jésus afa na ala so a lingbi ala sara kua ni hio tongana lo tene: “A lingbi e sara akusala ti lo so atokua mbi na ngoi so lâ angbâ. Bï ayeke ga, ngoi so zo alingbi ti sara kua pëpe.”Jean 9:4.

4-6. (a) Ngbanga ti nyen la e lingbi ti kiri singila ndali ti so Noé na Moïse asara akua so Jéhovah amû na ala? (b) Aye use wa la aga na peko ti akua so Jéhovah amû na azo?

4 Même kozo ti tene Jésus aga na sese Nzapa amû lani na ambeni zo kua so asara si ala yeke na ngia. Atâa so Adam na Ève asara lani pëpe kua so Nzapa amû na ala, ambeni zo asara akua so Nzapa amû na ala (Gen. 1:28). Nzapa afa na Noé ambilimbili ye so a lingbi lo sara ti leke arche ti bata fini ti lo na ti azo ti sewa ti lo na yâ ni ndali ti kota ngu so ayeke pika. Noé asara tâ gi ye so Nzapa ahunda na lo ti sara. E yeke na fini laso ndali ti so Noé asara kua so Nzapa amû na lo na lege ni.Gen. 6:14-16, 22; 2 Pi. 2:5.

5 Jéhovah afa na Moïse ambilimbili ye so a lingbi lo sara ti leke na tabernacle nga ti leke azo ti sara kua ti prêtre. Moïse asara tâ gi ye so Jéhovah afa na lo ti sara (Ex. 39:32; 40:12-16). Même juska laso e wara aye ti nzoni ndali ti so lo sara kua so a mû na lo ti sara na lege ni. Ngbanga ti nyen e tene tongaso? Bazengele Paul afa atene so tabernacle ni nga na azo so ayeke sara kua tongana aprêtre aye ti sara tënë ti “anzoni ye so ayeke ga”.aHéb. 9:1-5, 9; 10:1.

6 Ngoi na ngoi Jéhovah ayeke mû na awakua ti lo akua so ayeke nde nde na ngoi so lo yeke sara aye ti tene ye so lo leke na bê ti lo ti sara aga tâ tënë. Me atâa so akua so ala wara ayeke nde nde, akua ni amû lakue gloire na Jéhovah nga aga na aye ti nzoni na azo. A yeke nga legeoko tongana ti akua so Jésus asara na ngoi so lo yeke na yayu nga na sese ge (Jean 4:34; 17:4). Legeoko nga, akua so Jéhovah amû na e laso amû gloire na lo. (Mat. 5:16; diko 1 aCorinthien 15:58.) Ngbanga ti nyen la e tene tongaso?

NGBÂ TI DUTI NA NZONI BANGO NDO NA NDO TI AKUA SO A MÛ NA MO

7, 8. (a) Fa akua so e yeke na pasa ti sara ni na yâ ti bungbi. (b) Tongana Jéhovah afa lege na e, a lingbi e sara nyen?

7 Bê ti mo alingbi ti dö mingi ti bâ so Jéhovah amû na azo so siokpari ayeke na tere ti ala pasa ti sara kua legeoko na lo (1 aCor. 3:9). Aita so laso ayeke na yâ ti kua ti lekengo aDa ti assemblée, aDa ti Royaume nga na afiliale ayeke sara kua ti lekengo aye tongana ti so Noé na Moïse asara lani. Tongana mo yeke mû mbage na kua ti lekengo peko ti aDa ti Royaume na yâ ti kodoro so mo yeke dä wala mo yeke sara kua ti lekengo kota ndokua ti e na Warwick, na New York, bâ pasa so na nene ni. (Bâ foto so ayeke na tongo nda ti article ni.) Akua so kue ayeke akua ti Jéhovah la. Me, a hunda na aChrétien kue ti mû mbage ti ala na yâ ti kua ti fango tënë. Kua so nga ayeke mû gloire na Jéhovah nga ayeke ga na aye ti nzoni na azo (Kus. 13:47-49). Bungbi ti Jéhovah afa tâ nzoni lege ti sara ni. Ye so alingbi ti sara si na ambeni ngoi a mû na e ambeni kua nde.

8 Awakua ti Jéhovah so ayeke be-ta-zo ayeke lakue nduru ti sara ye alingbi na fango  lege ti lo. (Diko aHébreu 13:7, 17.) E lingbi ti hinga araison kue so asara si a mû na e ambeni kua nde ape. Me, e yeke sara akua so ndali ti so e hinga so a yeke Jéhovah la aye tongaso nga so aye ti nzoni ayeke ga na pekoni.

9. Nzoni tapande wa la a-ancien azia na aita na yâ ti congrégation?

9 A bâ kota nzara so a-ancien ayeke na ni ti sara ye so bê ti Jéhovah aye na lege so ala yeke mû li ni na yâ ti congrégation (2 aCor. 1:24; 1 aThes. 5:12, 13). Ala fa so ala ye ti sara kua ngangu nga ala yeke sara ye alingbi na aye so bungbi ti Jéhovah ayeke sigigi na ni. Ala yeke nduru ti sara ye alingbi na afini kode ti fango na tënë ti Royaume ti Nzapa. Atâa so na tongo nda ni ambeni ayeke gi bê ti ala ndali ti so a leke ti tene a fa tënë na téléphone, na aplace so abateau ayeke luti dä, wala na ndo so azo ayeke dä mingi, a ninga ape ala bâ anzoni ye so aga na pekoni. Na tapande, ambeni ita pionnier osio na Allemagne aleke ti fa tënë na mbeni ndo ti dengo buze so a ninga a fa tënë dä ape. Michael, so ayeke mbeni oko ti ala, atene: “Mbeto ahon ndo ti e ndali ti so a sara angu mingi e fa tënë na mara ti ando tongaso ape. Jéhovah ahinga ni ndali ti so lo sara si na ndapre ni e fa tënë nzoni, na e yeke girisa ni ape. A nzere na e mingi so e sara ye alingbi na awango so ayeke na yâ ti Kusala ti Royaume nga e zia bê ti e na Jéhovah ti mû maboko na e.” Mo ye mingi ti tara ti sara ye alingbi na afini kode ti fango tënë na yâ ti territoire ti mo?

10. Nyen la a changé na yâ ti bungbi ti Jéhovah na yâ ti angu so ahon ade ti ninga ape?

10 Na ambeni ngoi bungbi ti Jéhovah ayeke changé ambeni ye. Ade ti sara angu mingi ape, a bungbi ambeni filiale aga oko. Atâa so sarango tongaso ahunda ti tene aita ni achangé ambeni ye, a ninga ape aita ni abâ aye ti nzoni so aga na peko ti changement so (Zo-ti. 7:8). Aita so amû tere ti ala wani ti sara kua so ayeke na ngia mingi ti mû mbage na yâ ti kua so awakua ti Jéhovah ayeke sara laso.

11-13. Akpale wa la ambeni ita awara ndali ti so a changé aye na yâ ti bungbi?

11 E lingbi ti manda akpengba ye na mbage ti aita ti afiliale so a bungbi ni. Ambeni asara kua na yâ ti afiliale so teti angu mingi. A hunda na mbeni ita-koli na wali ti lo so ala sara kua na yâ ti mbeni kete Béthel ti gue na Béthel ti Mexique, so a lingbi a mû wungo ti azo ti kete Béthel ni so fani 30 si alingbi na ni. Rogelio, ita-koli ni, atene: “Ti zia afami nga na akamarade ti mbi ti hon ayeke lani kete ye ape.” Juan, mbeni ita-koli so a tene na lo ti gue na Mexique, atene: “A yeke mo bâ mo tene a kiri a dü mo fini fini; mo doit ti gi afini kamarade. A hunda nga ti tene mo changé asarango ye ti mo si mo lingbi ti sara ye tongana ti azo ti fini ndo so mo gue dä nga mo changé lege so mo yeke pensé na ni.”

12 Ambeni ita so asara kua na aBéthel ti ambeni kodoro ti Europe so a hunda na ala ti gue na filiale ti Allemagne nga kue awara akpale. Ambeni so alondo na Suisse so ala ye ahoto mingi, a yeke lani ngangu na ala ti zia apendere kodoro ti ala so ahoto ayeke dä. Nga, aita so alondo na Autriche azia lani kete sewa ti ala ti Béthel so ala ye ni mingi.

13 Ti ala so ague na ambeni kodoro wande, ala yeke lango na yâ ti ambeni da nde, ala na ambeni ita so ala hinga ala kozo ape la ayeke sara kua legeoko, na peut-être ala yeke manda ti sara mbeni kua nde. Ala yeke gue na mbeni fini congrégation nga ala yeke fa tënë na yâ ti fini territoire, na peut-être na yanga ti mbeni kodoro nde. Ti sara achangement so kue, a lingbi ti duti ngangu. Me mingi ti aBéthelite ayeda ti sara ni. Ngbanga ti nyen?

14, 15. (a) Tongana nyen la aita mingi afa so ala bâ na nene ni pasa so ala yeke na ni ti sara kua legeoko na Jéhovah atâa kua wa la ala sara? (b) Tongana nyen la ala zia na e nzoni tapande?

 14 Grethel, mbeni ita-wali, atene: “Mbi yeda ti gue ndali ti so a yeke lege so mbi lingbi ti fa na Jéhovah so mbi ye lo mingi ahon kodoro, da wala kua so mbi yeke sara na yâ ti bungbi.” Dayska, mbeni ita-wali ni, atene: “Na ngoi so mbi hinga so a yeke Jéhovah la ahunda na mbi ti gue, mbi yeke na ngia ti gue.” André na wali ti lo Gabriela kue ayeke na oko pensé so, ala tene: “A yeke mbeni lege la azi na e ti sara na Jéhovah mingi na ti zia aye so bê ti e aye na peko.” Ala yeda so tongana bungbi ti Jéhovah asara mbeni changement, a yeke nzoni mingi ti yeda na ni na ngia ahon ti ke ni.

Kota pasa so e yeke na ni, a yeke ti sara kua ti Jéhovah

15 Ndali ti so a bungbi ambeni filiale, a tokua ambeni Béthelite ti sara kua ti pionnier. A yeke ye so asi na ambeni Béthelite mingi na ngoi so a bungbi filiale ti Danemark, Norvège na Suède aga filiale ti Scandinavie. Florian na wali ti lo Anja ayeke na popo ti aBéthelite so, ala tene: “E bâ fini kua so a mû na e so tongana mbeni ngangu kua so ayeke ga na e ngia. Ti e, a yeke nzoni mingi ti sara kua na Jéhovah na ndo kue so lo ye e sara kua dä. E lingbi ti tene biani so e wara aye ti nzoni mingi.” Atâa so mingi ti e alingbi lâ oko ape ti sara achangement so, e lingbi ti mû tapande ti aita so, so ayeke nduru ti sara ye alingbi na ye so Jéhovah afa ti zia na kozo ndo aye so andu Royaume (És. 6:8). Jéhovah ayeke iri tënë nzoni lakue na ndo ti azo so abâ na nene ni pasa so ala yeke na ni ti sara kua legeoko na lo, atâa kua wa la ala sara.

NGBÂ TI BÂ NA NENE NI PASA SO MO YEKE NA NI

16. (a) A-Galate 6:4 atene na e ti sara nyen? (b) Kua wa la ahon atanga ni kue so zo alingbi ti sara?

16 Ndali ti so siokpari ayeke na tere ti e, fani mingi e yeke gi ti haka tere ti e na amba ti e. Me Bible atene na e ti sara gi ye so e wani e lingbi ti sara. (Diko aGalate 6:4.) E kue e lingbi pëpe ti ga ancien, pionnier, missionnaire wala Béthelite. Ti tâ tënë  ni a yeke apendere kua la. Me a lingbi e girisa ape so kua so ahon atanga ni kue so zo alingbi ti sara, a yeke kua so e kue e yeke sara. A yeke kua ti fango nzoni tënë so e yeke sara maboko na maboko na Jéhovah. Zia e bâ kua so na nene ni.

17. Na yâ ti dunia ti Satan so, nyen la e lingbi ti dë kite na ni ape? Ngbanga ti nyen a lingbi bê ti e anze ape?

17 Na yâ ti dunia ti Satan so, e lingbi ti sara na Jéhovah nzoni tongana ti bê ti e ape. Ambeni ye ayeke dä so e lingbi ti changé ni ape, aye tongana kua ti bango lege ti sewa wala kpale ti seni. Me a yeke nzoni bê ti e anze ape. Bâ tongana senge ye ape pasa so mo yeke na ni ti sara kua maboko na maboko na Jéhovah ti fa iri ti lo nga na Royaume ti lo na azo. Ye so ayeke kota ye mingi ayeke so, mo yeke sara ye so mo lingbi ti sara teti Jéhovah nga mo yeke sambela ti tene lo iri tënë nzoni na ndo ti aita ti mo so alingbi ti sara kusala mingi ahon ti so mo sara. Girisa ape so, Jéhovah abâ azo kue so amû gonda na iri ti lo na nene ni.

18. Nyen la a lingbi e duti nduru ti zia na peko? Ngbanga ti nyen?

18 Atâa so siokpari ayeke na tere ti e, Jéhovah ayeda ti tene e sara kua maboko na maboko na lo. So ayeke kota pasa la e yeke na ni ti sara kua legeoko na Nzapa na yâ ti alango ti nda ni so. Tongaso, a lingbi e duti nduru ti zia aye so agbu bê ti e na peko, teti so e hinga so na yâ ti fini dunia Jéhovah ayeke mû lege na e ti wara “tâ fini”, so ayeke fini ti lakue lakue so e yeke duti na ngia nga na siriri.1 Tim. 6:18, 19.

Mo bâ pasa so mo yeke na ni ti sara na Jéhovah na nene ni? (Bâ paragraph 16-18)

19. Nyen la Jéhovah amû zendo ti mû na e?

19 Kete kozo ti tene azo ti Israël alï lani na Sese ti Zendo, Moïse atene na ala, lo tene: “Fade L’Éternel Nzapa ti i asara si nzoye ti i awu ahon ndo ni, na kusala ti maboko ti i kue.” (Deut. 30:9). So e ga nduru ti lï na yâ ti fini dunia awe so, gbu li ti mo na ndo ti tënë so Moïse atene na ala so. Na peko ti Harmaguédon azo so asara kua legeoko na Jéhovah, lo yeke mû na ala sese so lo mû zendo ni na ala. Na pekoni, lo yeke mû na e mbeni fini kua so ayeke ti sara si sese aga mbeni pendere paradis.