Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) OCTOBRE 2014

 GIGI TI MBENI ZO

Akpengba ye so asi na mbi na yâ ti kua ti Royaume so mbi sara

Akpengba ye so asi na mbi na yâ ti kua ti Royaume so mbi sara

Na ngu 1947, aprêtre Catholique na Santa Ana, na Salvador, agi ti ga na kpale na aTémoin ti Jéhovah. Na ngoi so aita ayeke manda Tour ti Ba Ndo so a yeke sara yenga oko oko, ambeni molenge-koli abo ndo na yâ ti da so amissionnaire alango dä na akota tênë. Na pekoni, aprêtre aga na gbâ ti azo. Ambeni aga na atorche, ambeni aga na a-image. Teti l’heure use tongaso, ala bo da ni na akota tênë nga ala yeke dekongo, ala tene: “Zia Marie angbâ na fini lakue!” nga “Zia Jéhovah akui!” Ala sara aye so ti tomba amissionnaire ni na yâ ti gbata ni. Mbi hinga ni, ndali ti so mbi yeke lani na popo ti amissionnaire ni, nga mbi gue na bungbi so a sara ngu 67 awe. *

NGU use kozo ti tene ye so mbi sara tënë ni na nduzu so asi, mbi na Evelyn Trabert, ita-wali so mbi na lo e sara kua ti missionnaire, e sara klase osio ti Ekole ti Galaad ti Mandango Bible ti Société Watchtower. Ndo so e sara Ekole ti Galaad ni dä ayeke nduru na Ithaca, na New York. A tokua e ti fa tënë na Santa Ana. Me, kozoni si mbi sara tënë na ndo ti aye so asi na mbi nduru na ngu 29 so mbi sara na yâ ti kua ti missionnaire, zia mbi fa na ala ndani so mbi soro ti sara kua so.

YE TI HÉRITIER TI MBI TI YINGO

Na ngu 1923 na ngoi so a dü mbi, babâ ti mbi John Olson nga na mama ti mbi Eva Olson alango lani na Spokane, Washington, na Amerika. Ala yeke na yâ ti Eglize Luthérien, me ala yeda pëpe na fango ye ti Eglize ni so atene Nzapa ayeke zö azo ti sioni na yâ ti enfer ti wâ ndali ti so ala tene Nzapa so ayeke ndoye alingbi ti sara pasi na zo na yâ ti wâ ape (1 Jean 4:8). Babâ ti mbi asara kua na place ti zongo gâteau. Mbeni lâ na bï, mbeni mba ti lo so lo na lo asara kua place oko atene na lo so Bible afa pëpe so enfer ayeke mbeni place so a yeke sara sioni na azo dä. Kete na pekoni, aTémoin ti Jéhovah akomanse ti manda Bible na babâ na mama ti mbi na ala hinga ye so Bible afa biani na ndo ti akuâ.

Mbi yeke lani gi na ngu gumbaya, me mbi dabe ti mbi na alisoro so babâ na mama ti mbi ayeke tene na ngia na ndo ti atâ tënë so ala wara na yâ ti Bible  fini fini. Tere ti ala anzere mingi na ngoi so ala hinga so iri ti tâ Nzapa ayeke Jéhovah. Ye so asara si ala mä na bê mbeni ape na tënë ti Nzapa Babâ, Nzapa Molenge nga na Nzapa Yingo vulu, mbeni fango ye so ayeke ngangu na zo ti mä yâ ni. Mbi komanse ti nyon afango ye ti Bible so legeoko tongana ti so mousse ayeke nyon ngu, mbi manda ‘tâ tënë so ayeke zi zo.’ (Jean 8:32). Tongaso, mandango Bible afun sen lâ oko ape na hon ti mbi, me a nzere na mbi lakue ti manda ni. Atâa so mbi yeke kamene, mbi na babâ na mama ti mbi e yeke gue na fango tënë. Ala wara batême na ngu 1934. Na ngu 1939 na ngoi so mbi yeke na ngu 16, mbi kue mbi wara batême.

Mbi na mama na babâ ti mbi na ngoi ti kota bungbi so a sara ni na Saint Louis, na Missouri na ngu 1941

Na juillet ti ngu 1940, babâ na mama ti mbi akä da ti ala, nga e ota kue e komanse kua ti ngoi kue na Coeur d’Alene na Idaho. E loué lani mbeni étage ti lango dä, na gbe ni a yeke leke a-oto so abuba. A yeke sara nga lani bungbi na ndo ti e. Na ngoi ni kâ, acongrégation mingi ayeke na aDa ti Royaume ape, tongaso, aita ayeke sara bungbi na ndo ti ambeni ita wala na yâ ti ada so ala loué ni.

Na ngu 1941, mbi na babâ na mama ti mbi e gue na kota bungbi na Saint Louis, na Missouri. Lango ti dimanche ti kota bungbi ni ayeke lani “Lango ti Amolenge”. Amolenge so ayeke na ngu 5 ti si na ngu 18 aduti na akozo banc so ayeke na devant ti estrade. Nduru na hunzingo ti diskur ti Ita Joseph Franklin Rutherford, lo tene na e kue so e yeke amaseka, lo tene: ‘Amolenge kue so ayeda ti mä yanga ti Nzapa nga na Gbia ti lo, ala londo.’ E kue e londo. Na pekoni, Ita Rutherford atene: “Ala bâ, afini témoin ti Royaume ahon 15 000.” Ngoi ni so akiri akpengba mbi ti ngbâ na ndo ti desizion ti mbi ti sara kua ti pionnier na yâ ti fini ti mbi kue.

AKUA SO MBI NA BABÂ NA MAMA TI MBI E SARA

Nze kete na peko ti kota bungbi ti Saint Louis, mbi na babâ na mama ti mbi e gue na mbongo ti Californie. A tokua e na gbata ti Oxnard ti sara si mbeni fini congrégation abâ gigi kâ. E lango lani na yâ ti mbeni kete oto so gbogbo ayeke na yâ ni gi oko. Lakue na bï mbi yeke leke gbogbo ti mbi na ndo ti table so e yeke te ye dä. Kozo mbi yeke lani na chambre ti mbi wani, me fadeso ye ni achangé.

Ngoi kete kozoni si e si na Californie, azo ti Japon asara bira na Pearl Harbor na Hawaii na lango 7 ti nze ti décembre, ngu 1941. Na ndade ni, azo ti Amerika alï na yâ ti Use Bira so Amû Sese Kue. Azo so ayeke na komandema ahunda ti tene a mingo awâ kue na bï, a sara si na bï e yeke mingo wâ kue. Ala hunda ti tene azo asara ni ndali ti so azo ti Japon ayeke tambela lani na abateau na gbe ti ngu ti bembe ndo na Californie. Me, tongana a mingo awâ kue na bï, azo ti Japon alingbi pëpe ti bâ aye so ayeke na ndo ti kuru sese si ala pika ni na ngombe.

Ambeni nze na pekoni, na septembre, ngu 1942, e gue na mbeni kota bungbi (New World Theocratic Assembly) na Cleveland na Ohio. Na ngoi ti kota bungbi ni, Ita Nathan Homer Knorr amû mbeni diskur so li ti tënë ni ayeke: “Siriri: A lingbi ti ninga?” Lo sara tënë na ndo ti Apocalypse chapitre 17 so asara tënë na ndo ti mbeni “nyama ti ngonda” so “[a]yeke ândö, me lo yeke fadeso pëpe, na lo yeke nduru ti londo na yâ ti kota dû so alï mingi ti sigigi”. (Apoc. 17:8, 11). Ita Knorr afa so “nyama ti ngonda” so ayeke Bungbi ti Amara so akaï akua ti lo na ngu 1939. Bible atene kozo awe atene so a yeke changé Bungbi so, ye so ayeke sara si mbeni ngoi ti siriri ayeke duti dä. Na a yeke ye so asi na ngu 1945, ngoi so Use Bira so Amû Sese Kue ahunzi. Na pekoni, “nyama” so aga Bendo ti Gigi. Tongaso, aTémoin ti Jéhovah akiri afa tënë mingi, a sara si wungo ti aita ague na li ni mingi ahon ti kozo.

Diplôme ti mbi ti Galaad

 Prophétie so amû maboko na mbi ti hinga ye na ndo ti aye so ayeke si ande. Na ngoi so a tene so Ekole ti Galaad ayeke komanse na ngu ti peko, nzara ti tene mbi ga missionnaire ahon ndo ti mbi. Na ngu 1943, a tokua mbi na Portland, na Oregon ti sara kua ti pionnier. Na ngoi ni kâ, e yeke gue na yanga-da ti azo na e yeke zia na ala adiskur so e enregistré ni ti tene ala mä ni. Na pekoni, e yeke mû na ala ambeti so asara tënë na ndo ti Royaume ti Nzapa. Na yâ ti ngu ni kue, mbi ngbâ ti pensé gi na ndo ti kua ti missionnaire.

Na ngu 1944, tere ti mbi anzere lani mingi na ngoi so a tene na mbi na kamarade ti mbi, Evelyn Trabert ti gue na Ekole ti Galaad. Teti nze oku, aita so afa ye na e afa na e ye so e lingbi ti sara ti wara ngia na lege ti mandango Bible. Teti so ala sara tere ti ala kete apika bê ti e mingi. Na ambeni ngoi, na ngoi ti tengo kobe, aita ni la ayeke kangbi na e kobe ni. E wara diplôme ti e na lango 22 ti janvier, ngu 1945.

KUA TI MBI TI MISSIONNAIRE

Mbi na Evelyn nga na Leo Mahan na wali ti lo Esther e si na Salvador na nze ti juin, ngu 1946. E bâ so akobe ti yaka ni “abe awe ti tene a ko ni.” (Jean 4:35). Kpale so e sara tënë ni na tongo nda ti article so afa so akota zo ti nzapa asara lani ngonzo mingi. Yenga oko kozo ti tene kpale so asi, e sara kozo kota bungbi ti e ti circonscription na Santa Ana. E tisa azo gbani ti ga ti mä kota diskur, na tere ti e anzere lani mingi ti bâ so azo nduru na 500 aga amä diskur ni. E kpe kodoro ni ape, me e leke na bê ti e ti ngbâ na kodoro ni nga ti mû maboko na azo so aye ti hinga ye na ndo ti Bible. Atâa so akota zo ti nzapa ni ake na azo ti diko Bible nga gi azo kete la ayeke na nginza ti vo ni, azo mingi aye lani ti hinga tâ tënë. Ala kiri singila na e mingi ndali ti ngangu so e sara ti manda Espagnol ti mû lege na e ti fa tâ tënë na ala na ndo ti tâ Nzapa, Jéhovah, nga na ndo ti zendo so lo mû ti sara si sese aga Paradis.

Na popo ti e so e sara Ekole ti Galaad a tokua e oku na Salvador. Ti londo na mbage ti wali ti gue na mbage ti koli: Evelyn Trabert, Millie Brashier, Esther Mahan, mbi, nga na Leo Mahan

Rosa Ascencio ayeke lani na popo ti akozo zo so mbi manda Bible na ala. Na pekoni so lo komanse ti manda Bible, lo kangbi na koli so lo na lo avivre. Na pekoni, koli ni akomanse ti manda Bible. Ala sara mariage, ala wara batême nga ala ga aTémoin ti Jéhovah so ayapu na fango tënë. Rosa ayeke kozo zo ti Santa Ana so aga pionnier. *

Rosa ayeke na mbeni kete magazin so lo yeke kä aye dä. Na ngoi so lo sigigi na fango tënë lo yeke kanga ni na lo zia bê ti lo kue na Jéhovah ti mû na lo aye so lo yeke na bezoin ni. Tongana lo kiri na yanga-da na lo zi magazin ni, a ninga ape aclient ayeke ga gbani gbani ti vo ye. Lo bâ na lê ti lo wani so tënë so ayeke na Matthieu 6:33 ayeke tâ tënë nga lo ngbâ be-ta-zo juska na kuâ ti lo.

Mbeni lâ, prêtre ti ndo so e yeke dä ague abâ koli so e loué da ti lo. E yeke lani amissionnaire omene. Prêtre ni atene na koli so tongana e ngbâ ti loué da ni, a yeke tomba lo na wali ti lo na yâ ti eglize. Koli so ayeke mbeni zo ti dengo buze so azo ahinga lo mingi. Sarango ye ti prêtre ni ason bê ti koli ni nga lo sara mbeto ti tënë ti prêtre ni ape. Lo tene même na prêtre ni so même tongana a tomba ni na yâ ti eglize ni a bâ ni ape. Lo tene na e ti ngbâ na yâ ti da ni tongana ti so bê ti e aye.

 MBENI KOLI SO AZO ANE LO MINGI AGA TÉMOIN

Filiale so a leke ni na ngu 1955

Na San Salvador, mbeni missionnaire ayeke manda lani Bible na wali ti mbeni koli so iri ti lo ayeke Baltasar Perla, mbeni kota zo ti lekengo da. Koli so ayeke sara ye na nzoni bê so ake ti mä na bê na Nzapa ndali ti so akota zo ti nzapa asara ye na handa. Na ngoi so a ye lani ti leke mbeni filiale, atâa so ade Baltasar aga Témoin ti Jéhovah ape, lo sara plan ti da ni nga lo mû maboko na kua ti lekengo da ni sân ti tene a futa lo.

Na pekoni so Baltasar asara kua ti lekengo da ni place oko na aTémoin ti Jéhovah, lo bâ so lo wara tâ bungbi ti vorongo Nzapa. Lo wara batême na lango 22 ti juillet, ngu 1955, nga kete na pekoni wali ti lo, Paulina, awara batême. Amolenge ti ala use kue ayeke sara na Jéhovah be-ta-zo. Molenge ti lo ti koli, Baltasar, asara lani ngu 49 na Béthel ti Brooklyn, kâ lo mû maboko ti tene kua ti fango tënë ague na li ni nga fadeso lo yeke membre ti Komite ti Filiale ti Amerika. *

Na ngoi so e komanse ti sara akota bungbi na San Salvador, Ita Perla amû maboko na e ti wara mbeni kota ndo so a yeke sara ngia ti awanguru dä ti sara akota bungbi ni dä. Na tongo nda ni, wungo ti e ayeke mingi ape, me grâce na tufa ti Jéhovah, wungo ti e ague na li ni ngu oko oko juska ndo ni alingbi même e encore ape. Na apendere ngoi tongaso, mbi wara lege ti bâ azo so mbi manda Bible lani na ala. Tara ti bâ ngia so mbi yeke na ni na ngoi so angbene zo so mbi manda Bible na ala ayeke fa mbi na “a-âta” ti mbi, so ti tene azo so awara batême fini fini so ala manda Bible na ala.

Ita Frederick William Franz ayeke sara tënë na amissionnaire na ngoi ti mbeni kota bungbi

Na ngoi ti mbeni kota bungbi, mbeni ita-koli aga na mbage ti mbi lo tene so ni ye ti fa siokpari ti ni na gigi. Mbi hinga lo ape me mbi ye ti mä ye so lo ye ti tene. Lo tene: “Mbi yeke na popo ti amolenge-koli so abo ala lani na tênë na Santa Ana.” Fadeso lo ga Témoin ti Jéhovah tongana mbi. Bê ti mbi asi na ngia. Lisoro so e sara amû lege na mbi ti hinga biani so kua ti ngoi kue ayeke kua so zo alingbi ti soro ti sara ni so aga na aye ti nzoni mingi na zo.

Kozo kota bungbi ti circonscription so e gue dä na Salvador

MBI SORO ANZONI YE

Nduru na ngu 29, mbi ngbâ ti sara kua ti missionnaire na Salvador. Kozo a tokua mbi na gbata ti  Santa Ana, na pekoni mbi gue na Sonsonate, na pekoni na Santa Tecla, nga na nda ni na San Salvador. Na ngu 1975, na pekoni so mbi gbu li ti mbi nga mbi fa tënë ni na Jéhovah na yâ ti sambela, mbi zia kua ti missionnaire, mbi kiri na Spokane. Babâ na mama ti mbi so ayeke be-ta-zo nga so aga mbakoro awe ayeke na bezoin ti mbi ti mû maboko na ala.

Na peko ti so babâ ti mbi akui na ngu 1979, mbi bâ lege ti mama ti mbi so ayeke na ngangu encore ape nga so zo ti mungo maboko na lo ayeke dä ape. Ngu miombe na pekoni, lo kui na ngoi so lo yeke na ngu 94. Na yâ ti ngoi ti kpale so, ngangu ti mbi ahunzi kue. A sara si abouton akomanse ti sigigi na tere ti mbi. Me grâce na sambela nga na mungo maboko ti Jéhovah, mbi wara lege ti gbu ngangu na yâ ti kpale ni. Tongana ti so Jéhovah atene, “juska kuali ti i avuru . . . , fade Mbi yô i na Mbi sö i.”És. 46:4.

Na ngu 1990, mbi gue na Omak na Washington. Kâ mbi kiri mbi bâ so mbi lingbi ti fa tënë na yâ ti territoire so azo ni atene yanga ti Espagnol nga gbâ ti azo so mbi manda Bible na ala awara batême. Na novembre, ngu 2007, mbi lingbi lani ti bâ lege ti da ti mbi na Omak mbeni ape. Tongaso, mbi gue na yâ ti mbeni da so ayeke nduru na gbata ti Chelan na Washington. Aita ti congrégation so ayeke tene Espagnol angbâ ti bâ lege ti mbi nzoni, nga mbi kiri singila mingi na ala. Teti so gi mbi oko la mbi yeke mbakoro na yâ ti congrégation ni, aita “amû” mbi tongana “âta ti ala ti wali.”

Atâa so mbi soro ti ngbâ kumbamba nga ti duti na molenge ape tongaso si mbi fa tënë mingi “na ziango si mbeni ye agboto lê ti [mbi] pëpe”, mbi yeke na gbâ ti amolenge na lege ti yingo (1 aCor. 7:34, 35). Mbi tene so na yâ ti dunia ti laso, mbi lingbi ti wara aye kue ape. Tongaso, mbi zia ye so ayeke na kozo ndo na place ni: yanga so mbi mû ti sara na Jéhovah na bê ti mbi kue. Na yâ ti fini dunia, e yeke wara ande ngoi mingi ti sara anzoni kua kue. Versê so mbi ye tënë ni mingi, a yeke Psaume 145:16 so atene so Jéhovah ayeke “mû ye alingbi na nzara ti ye kue so ayeke na fini.”

Kua ti pionnier asara si mbi bâ so mbi ngbâ lakue maseka

Mbi yeke na ngu 91, na mbi ngbâ na nzoni seni kamême. Tongaso, mbi ngbâ ti sara kua ti pionnier. Kua ti pionnier amû maboko na mbi ti bâ so mbi ngbâ lakue maseka nga asara si mbi yeke na ngia. A yeke gi na ngoi so mbi si na Salvador la e komanse ti fa tënë na ndo ni. Atâa so Satan angbâ ti kanga lege na kua ti fango tënë, wungo ti awafango tënë ahon fadeso 39 000 na yâ ti kodoro ni. Ye so akpengba biani mabe ti mbi. Biani, kite ayeke ape so yingo ti Jéhovah ayeke mû ngangu na awakua ti lo.

^ par. 4Annuaire des Témoins de Jéhovah 1981, lembeti 45-46.

^ par. 19Annuaire 1981, lembeti 41-42.

^ par. 24Annuaire 1981, lembeti 66-67, 74-75.