Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) SEPTEMBRE 2014

E dabe ti e na aita so ayeke sara kua ti ngoi kue

E dabe ti e na aita so ayeke sara kua ti ngoi kue

“E yeke dabe ti e lakue na kusala so mabe apusu ala ti sara, ngangu kua so ndoye apusu ala ti sara ni.”1 ATHES. 1:3.

1. Paul atene nyen na ndo ti azo so asara na Jéhovah na ngangu ti ala kue?

BAZENGELE Paul adabe ti lo lani na aita so asara kua ngangu ndali ti nzoni tënë. Lo tene: “Teti e yeke dabe ti e lakue na kusala so mabe apusu ala ti sara, ngangu kua so ndoye apusu ala ti sara ni nga na gbungo ngangu so ala yeke na ni ndali ti beku ti ala na Seigneur ti e Jésus Christ, na lê ti Nzapa ti e nga Babâ ti e.” (1 aThes. 1:3). Ti tâ tënë ni, Jéhovah adabe ti lo na ngangu kua so ndoye apusu awakua ti lo so ayeke be-ta-zo ti sara ni, atâa dutingo ti ala amû lege na ala ti sara na lo mingi wala mingi ape.aHéb. 6:10.

2. Nyen la e yeke sara tënë na ndo ni na yâ ti article so?

2 Mingi ti awakua ti Jéhovah, ti giriri wala ti laso, asara akota sacrifice mingi ti voro lo na mungo kua ti ngoi kue. Zia e bâ tongana nyen ambeni wakua ti Jéhovah asara na lo na ngoi ti akozo Chrétien. E yeke bâ nga akua ti ngoi kue wa la a yeke sara na ngoi ti e. Na ndo ni e yeke bâ tongana nyen la e lingbi ti dabe ti e na ala so amû tere ti ala wani ti sara kua ti ngoi kue.

NA NGOI TI AKOZO CHRÉTIEN

3, 4. (a) Kua wa la ambeni ita asara lani na ngoi ti akozo Chrétien? (b) Tongana nyen la aita so awara aye so ala yeke na bezoin ni?

3 Kete na peko ti so Jésus awara batême, lo to nda ti sara mbeni kua so a lingbi a sara ni na yâ ti dunia kue (Luc 3:21-23; 4:14, 15, 43). Na peko ti kuâ ti Jésus abazengele ti lo amû li ni na yâ ti kua so ti  sara si amû ndo (Kus. 5:42; 6:7). Ambeni Chrétien, tongana Philippe, ayeke awafango tënë nga amissionnaire na Palestine (Kus. 8:5, 40; 21:8). Paul na ambeni Chrétien ague na ambeni ndo so ayo ti fa tënë (Kus. 13:2-4; 14:26; 2 aCor. 1:19). Ambeni Chrétien, na tapande, Silvain (Silas), Marc na Luc, nga asû Bible wala ala sara kua tongana awakuasu ti azo so asû Bible (1 Pi. 5:12). Aita-wali nga asara kua na tere ti aita-koli be-ta-zo so (Kus. 18:26; aRom. 16:1, 2). Anzoni ye so asi lani na aita so asara si dikongo mbage ti Bible so aChrétien asû ândö na Grec anzere. Nga a fa so Jéhovah adabe ti lo na awakua ti lo nzoni mingi.

4 Tongana nyen la aita so asara kua ti ngoi kue na ngoi ti akozo Chrétien awara aye so ala yeke na bezoin ni? Na ambeni ngoi amba ti ala aChrétien ayamba ala na ndo ti ala, nga amû maboko na ala na ambeni lege nde. Me ala la ahunda hundango na amba ti ala ni ti sara tongaso ape (1 aCor. 9:11-15). Ambeni ita wani wala congrégation kue amû maboko na ala. (Diko Kusala 16:14, 15; aPhilippien 4:15-18.) Paul nga na ambeni mba ti lo so ayeke gue na ando nde nde asara ambeni kua so amû ngoi ti ala kue ape ti wara na aye so ala yeke na bezoin ni.

AITA SO LASO AYEKE SARA KUA TI NGOI KUE

5. Nyen la mbeni ita-koli na wali ti lo atene na ndo ti fini ti ala so ala mû ti sara na kua ti ngoi kue?

5 Laso nga kue aita mingi asara ngangu ti sara akua ti ngoi kue. (Bâ encadré “Akusala ti ngoi kue.”) Ala tene nyen na ndo ti kua so ala soro ti sara so? A yeke mbeni hundango ndo so mo lingbi ti hunda na ala, kiringo tënë ti ala ayeke mû maboko na mo. Bâ mbeni tapande: Mbeni ita-koli so ayeke lani pionnier permanent, pionnier spécial, missionnaire, nga so asara kua na Béthel na mbeni kodoro wande, atene: “Mbi bâ so ti sara kua ti ngoi kue ayeke mbeni pendere desizion so ahon atanga ni kue la mbi mû na yâ ti gigi ti mbi. Na ngoi so mbi yeke lani na ngu 18, a lingbi mbi soro ti manda mbeti na dasendagi, wala ti sara kua ti nginza, wala ti ga pionnier. A yeke lani ngangu na mbi ti soro ye na popo ti aye so. Aye so asi na mbi afa na mbi so Jéhovah agirisa pëpe asacrifice so e sara ti sara kua ti ngoi kue. Mbi sara kua na akode so Jéhovah amû na mbi na mbeni lege so mbi lingbi fade ti sara ni ape tongana mbi soro fade ti sara kua na yâ ti dunia so.” Wali ti lo atene: “Akua kue so a mû na e amû maboko na mbi ti gue na li ni. Jéhovah abata e nga lo fa lege na e fani mingi na mbeni lege so lo lingbi fade ti sara ni ape tongana e soro ti ngbâ na kete ndo ti e so e duti dä nzoni. Mbi mû merci lakue na Jéhovah ndali ti so e mû fini ti e ti sara kua ti ngoi kue.” Mo ye ti tene gigi ti mo kue aduti tongaso?

6. Jéhovah ayeke bâ kua so e sara na lo tongana nyen?

6 Biani dutingo ti ambeni ita amû lege na ala ti sara kua ti ngoi kue ape. Me e hinga na bê ti e kue so Jéhovah ayeke bâ na nene ni kua so ala yeke sara na lo na ngangu ti ala kue. Gbu li na ndo ti azo so Paul adi iri ti ala na Philémon 1-3, nga na ala ti congrégation ti Colosses. (Diko ni.) Paul abâ na nene ni ngangu kua so ala sara, na Jéhovah nga kue. Babâ ti e so ayeke na yayu abâ nga na nene ni kua so mo sara na lo. Me tongana nyen la mo lingbi ti mû maboko na aita so ayeke sara kua ti ngoi kue?

MÛ MABOKO NA APIONNIER

7, 8. Kua ti nyen la apionnier ayeke sara? Tongana nyen la aita alingbi ti mû maboko na apionnier?

7 Legeoko tongana ti awafango tënë ti ngoi ti akozo Chrétien, apionnier so asara kua ti ala na bê kue ayeke kpengba mingi acongrégation. Mingi ti ala ayeke sara ngangu ti mû ngbonga 70 nze na nze ti fa tënë. Tongana nyen la mo lingbi ti mû maboko na ala?

8 Mbeni ita-wali pionnier, so iri ti lo ayeke Shari, atene: “Apionnier ayeke angangu zo, ala yeke sigigi na fango tënë lakue. Me ala yeke na bezoin ti tene a kpengba ala.” (aRom. 1:11, 12). Mbeni ita-wali ni so asara kua ti pionnier teti angu mingi atene tënë ti apionnier ti congrégation ti lo, lo tene: “Ala yeke sara kua ngangu nga lakue lakue. Tongana ambeni ita ayô ala na oto ti gue na fango tënë, atisa ala ti te kobe, amû na ala kete nginza ti  vo na essence wala ti sara na ambeni ye, ala yeke kiri singila mingi. A fa na ala so mo yeke pensé biani na ala.”

9, 10. Nyen la ambeni ita asara ti mû maboko na apionnier so ayeke na yâ ti congrégation ti ala?

9 Mo ye ti mû maboko na apionnier na fango tënë? Ita Bobbi, so ayeke mbeni pionnier adema, atene: “E yeke na bezoin mingi ti tene aita amû maboko na e na yâ ti yenga oko oko.” Mbeni mba ti lo pionnier, so ayeke na yâ ti oko congrégation ni, atene: “Ti wara aita ti fa tënë na ala legeoko na peko ti midi ayeke tënë.” Mbeni ita-wali so ayeke sara kua fadeso na Béthel na Brooklyn atene na ndo ti kua ti lo ti pionnier ândö, lo tene: “Mbeni ita-wali so ayeke na oto atene: ‘Lakue tongana mo wara mbeni zo ti fa tënë legeoko na mo ape, iri mbi, mbi na mo e gue.’ Lo mû maboko na mbi ti ngbâ ti sara kua ti mbi ti pionnier.” Ita Shari, so e sara tënë ti lo fade, atene: “Tongana fango tënë ahunzi awe apionnier so ayeke akumbamba angbâ mingi ni gi ala oko. Ngoi na ngoi, mo lingbi ti tisa aita so ayeke akumbamba ti ga na ngoi ti vorongo Nzapa na yâ ti sewa ti mo ti tene mo na ala asara ni legeoko. Tongana mo yeke mû na ala ambeni kua ti sara alingbi nga ti mû maboko na ala ti ngbâ ngangu.”

10 Mbeni ita-wali so asara kua ti ngoi kue teti ngu 50 tongaso adabe ti lo na ndo ti kua ti pionnier so lo na ambeni ita-wali so ayeke kumbamba asara, lo tene: “A-ancien ti congrégation ti e ayeke sara vizite na apionnier nze use use. Ala yeke hunda e na ndo ti seni ti e nga na ndo ti kua ti nginza ti e. Ala yeke gi nga ti hinga wala e yeke na ambeni gingo bê. Ala sara ni biani na bê ti ala kue. Ala yeke bâ ndo ti lango ti e ti bâ wala e yeke na bezoin ti mungo maboko.” Ye so alingbi ti dabe ti mo na singila so Paul akiri na ni na sewa ti mbeni koli so amû maboko na lo na Éphèse.2 Tim. 1:18.

11. Kua ti nyen la apionnier spécial ayeke sara?

11 Ambeni ita awara aye ti nzoni ndali ti so ala yeke na apionnier spécial na yâ ti congrégation ti ala. Mingi ti apionnier spécial ayeke fa tënë teti angbonga 130 nze na nze. Ndali ti so ala yeke mû ngoi mingi ti fa tënë nga ti mû maboko na yâ ti congrégation, ala yeke na ngoi mingi ape wala ala yeke même na ngoi ape ti sara kua ti nginza. Filiale ayeke mû na ala mbeni kete pata nze na nze tongaso si ala lingbi ti ngbâ gi ti fa tënë.

12. A-ancien nga na aita alingbi ti mû maboko na apionnier spécial tongana nyen?

12 E lingbi ti mû maboko na apionnier spécial  tongana nyen? Mbeni ancien, so ayeke na yâ ti mbeni filiale, so lo yeke sara lisoro na mingi ti ala, atene: “A lingbi a-ancien asara lisoro na ala ti bâ wala dutingo ti ala ayeke tongana nyen, nga ti bâ tongana nyen la ala lingbi ti mû maboko na ala. Ambeni ita abâ atene apionnier spécial ayeke na aye kue awe ndali ti so a yeke mû na ala kete pata ti bâ na lege ti abezoin ti ala, me aita ti congrégation ti ala alingbi ti mû maboko na ala na alege mingi.” Legeoko tongana ti apionnier permanent, apionnier spécial aye mingi ti tene ala na aita asigigi legeoko na fango tënë. Mo lingbi ti sigigi legeoko na ala na fango tënë?

MÛ MABOKO NA ASURVEILLANT TI CIRCONSCRIPTION

13, 14. (a) Nyen la a lingbi e girisa ape na ndo ti asurveillant ti circonscription? (b) Nyen la mo bâ so mo lingbi ti sara ti mû maboko na aita so ayeke sara kua ti circonscription?

13 Mingi ni, aita ayeke bâ asurveillant ti circonscription nga na awali ti ala tongana azo so akpengba na lege ti yingo, nga ala la alingbi ti kpengba aita. A yeke tâ tënë me ala nga kue ayeke na bezoin ti tene a kpengba ala, ti tene a sigigi na ala na fango tënë nga ti tene ala na aita asara ngia kete. Ka tongana tere ti ala ason nga a gbanzi ala na hôpital, peut-être ti tene a opéré ala wala ti kaï kobela ti ala? A yeke nzere na ala mingi tongana aita ti congrégation amû na ala aye so ala yeke na bezoin ni nga ala gue abâ ala. Luc so ayeke lani “wanganga so [aita a]ndoye lo mingi”, nga so lo la lo sû mbeti ti Kusala, abi bê ti lo mingi na ndo ti bazengele Paul nga na tanga ti aita so lo na Paul asara voyage legeoko na ala.aCol. 4:14; Kus. 20:5–21:18.

14 Asurveillant ti circonscription nga na awali ti ala ayeke na bezoin ti anzoni kamarade so aye ala mingi nga ayeke kpengba ala. Mbeni surveillant ti circonscription atene: “Mo bâ mo tene akamarade ti mbi ahinga ngoi wa la mbi yeke na bezoin ti tene a kpengba mbi. Ala yeke hunda na mbi atënë ti hinga ye so a yeke na bê ti mbi na amû lege na mbi ti fa na ala ye so mbi yeke gi bê ti mbi na ndo ni. Teti so ala mä mbi nzoni, ala mû maboko na mbi mingi.” Asurveillant ti circonscription nga na awali ti ala abâ na nene ni mingi ye so aita ayeke sara ti fa so ala bi bê na ala.

MÛ MABOKO NA AITA SO AYEKE SARA KUA NA BÉTHEL

15, 16. Kua wa la aita so ayeke na Béthel nga na aDa ti assemblée ayeke sara? E lingbi ti mû maboko na ala tongana nyen?

15 Na yâ ti dunia kue, ala so ayeke sara kua na Béthel nga na aDa ti assemblée ayeke mû maboko mingi na kua ti Royaume na yâ ti akodoro so filiale ti ala ayeke bâ ndo na ndo ni. Tongana aita so asara kua na Béthel ayeke na yâ ti congrégation ti mo wala na yâ ti circonscription ti mo, tongana nyen la mo lingbi ti fa so mo pensé na ala?

16 Na ngoi so aita so alï na Béthel kpâ, ala lingbi ti duti na vundu kete ndali ti so ala zia afami nga na akamarade ti ala so ala ye ala mingi. Tere ti aita so alï na Béthel fini fini so ayeke nzere mingi tongana aita ti fini congrégation ti ala asara kamarade na ala (Marc 10:29, 30). Kapa ti kua ti ala na Béthel amû lege na ala ti sara bungbi na congrégation nga ti sigigi na fango tënë yenga na yenga. Me ngoi na ngoi ala lingbi ti wara ambeni kua na ndo ti so ala yeke sara ka. Tongana aita na yâ ti acongrégation ahinga ni tongaso nga ala fa so ala bâ kua so aita so ayeke sara so na nene ni, azo kue ayeke wara ye ti nzoni dä.Diko 1 aThessalonicien 2:9.

MÛ MABOKO NA AITA SO AYEKE SARA KUA TI NGOI KUE NA KODORO WANDE

17, 18. Akua wa la ambeni ita so ayeke na yâ ti kua ti ngoi kue ayeke sara na kodoro wande?

17 Aita so ayeda ti sara kua na akodoro wande alingbi ti tingbi na akobe, ayanga ti kodoro, asarango ye nga na ambeni ye so ayeke tâ nde mingi na ti ndo so ala londo dä. Ngbanga ti nyen la ala yeda na akpale so aga na peko ti mara ti achangement so?

18 Ambeni ayeke amissionnaire, so amû ngoi ti ala mingi ti fa tënë na yâ ti aterritoire.  Nga aita ayeke bâ nzoni na lege ti kode ti fango ye ti ala. Filiale ayeke mû na ala mbeni nzoni ndo ti lango nga na kete pata ti tene ala bâ na lege ti abezoin ti ala. Ambeni ayeke sara kua na yâ ti mbeni filiale wala ala yeke mû maboko na kua ti lekengo aDa ti filiale. Ala yeke mû nga maboko na lekengo ando ti kiringo na peko ti ambeti na ambeni yanga nde, aDa ti assemblée nga na aDa ti Royaume. A yeke mû na ala akobe nga na ndo ti lango. Legeoko tongana ti aita so ayeke na Béthel ala nga kue ayeke gue na abungbi lakue na yâ ti congrégation nga ala yeke fa tënë lakue. Tongaso, aita ti congrégation ni ayeke bâ nzoni na lege ti aita so.

19. Nyen la a lingbi e pensé na ndo ni na ndo ti azo so asara kua na kodoro wande?

19 Tongana nyen la mo lingbi ti mû maboko na aita so? Girisa ape so tongana ala si kpâ ambeni kobe ayeke dä so ala hinga ti te ni ape wala anzere na ala ape. A lingbi mo pensé na ni tongana mo tisa ala ti te ye. Mo lingbi ti hunda na ala ti fa na mo kobe wa la anzere na ala wala kobe wa la ala ye ti tara ni. Kanga bê ti mo na ala tongana ala yeke manda yanga ti kodoro nga na sarango ye ti ndo so mo yeke dä. A lingbi ti mû ngoi mingi ti tene ala mä yâ ti atënë kue so mo yeke tene na ala, me a yeke nzoni mo mû maboko na ala na nzoni bê. Ala ye ti manda ni.

20. Na lege wa la mo lingbi ti mû maboko nzoni na aita so ayeke sara kua ti ngoi kue nga na ababâ na amama ti ala?

20 Tongana ngoi ayeke hon, ngu ti aita so ayeke sara kua ti ngoi kue ayeke gue na li ni, nga ngu ti ababâ na amama ti ala nga kue. Tongana ababâ na amama ni ayeke aTémoin ti Jéhovah, kite ayeke pëpe so ala ye mingi ti tene amolenge ti ala angbâ ti sara kua ti ala ti ngoi kue (3 Jean 4). Aita so ayeke sara kua ti ngoi kue ayeke sara kue ti bâ lege ti ababâ na amama ti ala nga ti ga ti mû maboko na ala tongana lege ayeke dä. Me, aita so ayeke ndo oko na ababâ na amama ti aita so ayeke na yâ ti kua ti ngoi kue alingbi ti mû maboko na aita so. Ala yeke sara ni na lege so ala yeke bâ lege ti abezoin ti ababâ na amama ti aita so. Girisa ape so aita so ayeke sara kua ti ngoi kue ayeke na kua mingi ti sara na yâ ti kota kua so a yeke sara na yâ ti dunia kue (Mat. 28:19, 20). Mo lingbi ti mû maboko na ababâ na amama ti aita so na ngoi so ala yeke na bezoin ni? Congrégation ti mo alingbi ti sara ni?

21. Bango ndo wa aita so ayeke na yâ ti kua ti ngoi kue ayeke na ni na ndo ti atënë so aita ayeke tene ti kpengba ala nga na mungo maboko so aita ayeke mû na ala?

21 Aita so ayeke sara kua ti ngoi kue asara ni pëpe ti tene a futa ala ndali ni, me ala sara ni ndali ti so ala ye ti mû ye na Jéhovah nga na azo. A yeke nzere na ala mingi tongana mo mû maboko na ala. Mbeni ita-wali, so ayeke sara kua ti ngoi kue na kodoro wande, atene: “Même gi mbeni mbeti so mbeni ita asara na mo ti fa na mo so lo bâ kua ti mo na nene ni afa so ambeni ita ayeke pensé na mo nga ala yeke na ngia ndali ti aye so mo yeke sara.”

22. Tënë ti bê ti mo ayeke so wa na ndo ti kua ti ngoi kue?

22 Ti sara na Jéhovah na yâ ti kua ti ngoi kue ayeke sara si e wara aye ti nzoni mingi na yâ ti gigi ti e. E lingbi ti wara akpale dä, me a yeke fa ye na e nga e yeke wara ngia dä. A yeke leke e nzoni ndali ti mbeni nzoni kua, so ayeke ngbâ lakue, so ayeke ku awakua ti Jéhovah kue so ayeke be-ta-zo na lo na gbe ti Royaume ti Nzapa. Zia e kue e “dabe ti e lakue na kusala so mabe apusu” aita so ayeke na yâ ti kua ti ngoi kue ti sara nga na “ngangu kua so ndoye apusu ala ti sara ni”.1 aThes. 1:3.