Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  AOÛT 2014

Ala yeke wara “kobe ti ala na ngoi ni so alingbi”?

Ala yeke wara “kobe ti ala na ngoi ni so alingbi”?

E YEKE na yâ ti mbeni ngoi so ayeke ngangu mingi so mara ni ade ti si lâ oko ape na yâ ti mbaï ti azo (2 Tim. 3:1-5). Lâ oko oko, e yeke wara atara so alingbi ti sara si e ke ti ndoye Jéhovah nga e ke ti sara ye alingbi na andia ti lo so ayeke mbilimbili. Jésus ahinga kozo awe so ngoi so ayeke duti ngangu mingi, ni la lo dë bê ti adisciple ti lo, lo tene so ala yeke wara ngangu so ala yeke na bezoin ni ti gbu ngangu juska na nda ni (Mat. 24:3, 13; 28:20). Ti mû maboko na ala, Jésus azia ngbâa be-ta-zo ti mû na ala “kobe ti ala na ngoi ni so alingbi” na lege ti yingo.Mat. 24:45, 46.

Ngbene ye so a zia ngbâa be-ta-zo na ngu 1919, a bungbi “azo ti kua” kutu mingi so ayeke tene yanga ti akodoro nde nde na yâ ti bungbi ti Jéhovah nga a yeke mû na ala kobe na lege ti yingo (Mat. 24:14; Apoc. 22:17). Me, a yeke wara pëpe ambeni mbeti ti e na yanga ti ambeni kodoro nde. Nga a yeke azo kue la ayeke na pasa ti diko ambeti ti e so a zia na ndo ti Internet ape. Na tapande, azo mingi alingbi pëpe ti bâ avidéo nga ti diko a-article so a zia ni na ndo ti site jw.org. So aye ti tene so ambeni ita amanke ambeni kobe so ala yeke na bezoin ni ti ngbâ na nzoni seni na lege ti yingo? Ti kiri tënë na hunda so, zia e bâ akiringo tënë na ambeni kota hundango ndo osio.

 1. Kota ye so Jéhovah asara kua na ni ti mû na e kobe ayeke so wa?

Na ngoi so Satan atara Jésus ti sara si tênë aga mapa, Jésus atene na lo, a tene: “Zo ayeke ngbâ na fini gi na lege ti mapa pëpe, me na lege ti tënë kue so asigigi na yanga ti Jéhovah.” (Mat. 4:3, 4). A sû atënë ti Jéhovah na yâ ti Bible (2 Pi. 1:20, 21). Tongaso, Bible ayeke kota ye so Jéhovah asara na kua ti mû na e kobe ti e na lege ti yingo.2 Tim. 3:16, 17.

Bungbi ti Jéhovah asigigi na Mbeti ti Nzapa ti fini dunia kue wala gi mbage ni na ayanga ti kodoro ahon 120, nga ngu oko oko a yeke sigigi na ni na ambeni yanga ti kodoro nde. Nde na Fini dunia, a sigigi na ambeni Bible kue wala gi mbage ni ngbundangbu mingi na ayanga ti kodoro saki na saki. Ye so ague oko na ye so bê ti Jéhovah aye so ayeke ti tene “mara ti azo nde nde kue asö fini ti ala na ala si na tâ hingango ye na ndo ti tâ tënë.” (1 Tim. 2:3, 4). Nga, teti so mbeni ye oko so “ahonde na lê ti [Jéhovah] ayeke dä pëpe,” e hinga so lo yeke gboto “ala so ahinga so ala yeke na bezoin ti aye ti yingo” ti ga na ala na yâ ti bungbi ti lo na lo yeke mû kobe na ala na lege ti yingo.aHéb. 4:13; Mat. 5:3, 6; Jean 6:44; 10:14.

2. Na lege wa ambeti ti e ayeke mbeni kota mbage ti kobe ti e ti yingo?

Ti tene mabe ti mbeni zo akpengba, a lingbi lo diko Bible, lo mä yâ ti ye so lo diko nga lo sara ye alingbi na ni (Jacq. 1:22-25). A yeke ye so a lingbi kota zo ti Éthiopie so ayeke lani na ngoi ti akozo Chrétien asara. Lo yeke diko lani Bible na ngoi so Philippe, so ayeke mbeni wafango tënë, ahunda lo, atene: “Mo yeke mä yâ ti ye so mo yeke diko so biani?” Kota zo ti Éthiopie ni akiri tënë na lo, a tene: “Ti tâ tënë ni, mbi lingbi ti mä yâ ni tongana nyen tongana mbeni zo ti fa nda ni na mbi ayeke dä pëpe?” (Kus. 8:26-31). Na pekoni, Philippe amû maboko na lo ti mä yâ ti ye so lo yeke diko so. Ye so lo manda so andu bê ti lo na lo wara batême (Kus. 8:32-38). Legeoko nga, ambeti ti e amû maboko na e ti hinga tâ tënë so ayeke na yâ ti Bible nzoni. Aye so e diko na yâ ni andu bê ti e nga apusu e ti sara ye alingbi na ye so e manda.aCol. 1:9, 10.

Awakua ti Jéhovah ayeke wara gbâ ti aye ti te na ti nyon na lege ti ambeti ti e (És. 65:13). Na tapande, Tour ti Ba Ndo, so a yeke sigigi na ni na ayanga ti kodoro ahon 210, ayeke fa nda ti aprophétie na e, a sara si e mä yâ ti atâ tënë so ndani alï mingi nzoni nga apusu e ti sara ye alingbi na afango ye ti Bible. Réveillez-vous!, so a yeke sigigi na ni na ayanga ti kodoro 100 tongaso, amû maboko na e ti hinga ye mingi na ndo ti aye so Jéhovah asara nga afa na e tongana nyen e lingbi ti sara ye alingbi na anzoni wango so ayeke na yâ ti Bible (aProv. 3:21-23; aRom. 1:20). Ngbâa be-ta-zo asigigi na ambeti so asara tënë na ndo ti Bible na ayanga ti kodoro ahon 680. Mo yeke mû ngoi lâ oko oko ti diko Bible? Mo yeke diko afini périodique kue so a yeke sigigi na ni ngu oko oko na yanga ti kodoro ti mo?

Nde na ambeti so bungbi ti Jéhovah ayeke sigigi na ni, bungbi ni ayeke leke nga adiskur so ayeke mû ni na ngoi ti abungbi nga na akota bungbi. Adiskur, ascénette, adémonstration, nga na a-interview so a yeke sara na ngoi ti abungbi nga na akota bungbi so anzere na mo? Biani, Jéhovah amû na e gbâ ti kobe ti yingo.És. 25:6.

 3. Tongana a sigigi na ambeni mbeti ti e na yanga ti kodoro ti mo ape, so aye ti tene so mo wara kobe ti yingo alingbi na ni ape?

Kiringo tënë ni ayeke ên-ën. A lingbi bê ti e adö ape tongana ambeni wakua ti Jéhovah awara kobe ti yingo mingi ahon ambeni. Ngbanga ti nyen? Bâ tapande ti abazengele. A fa na ala aye mingi ahon ambeni disciple na ngoi ti akozo Chrétien (Marc 4:10; 9:35-37). Atâa so kue, ambeni disciple so awara kobe ti yingo alingbi na ala; ala wara ye so ala yeke na bezoin ni.aÉph. 4:20-24; 1 Pi. 1:8.

A yeke nzoni e girisa ape so a yeke aye kue so Jésus atene wala aye kue so lo sara na ngoi so lo yeke na sese ge la a sû ni na yâ ti a-évangile ape. Bazengele Jean atene: “Ti tâ tënë ni, ambeni ye mingi nga ayeke dä so Jésus asara lani, so tongana a sû fade anzene nzene ye ni kue na mbeti, mbi bâ ti mbi so ambeti ni so a sû, dunia so alingbi ti wara ndo ti zia ni kue dä pëpe.” (Jean 21:25). Atâa so adisciple ti Jésus ti ngoi ti akozo Chrétien ahinga ye mingi ahon e na ndo ti Jésus, koli so ayeke nzoni-kue, ye oko amanke e ape. Jéhovah asara kue si e hinga ye mingi na ndo ti Jésus tongaso si e mû peko ti gere ti lo.1 Pi. 2:21.

Gbu nga li ti mo na ndo ti alettre so abazengele atokua na acongrégation ti ngoi ti akozo Chrétien. Mbeni lettre ayeke dä so bazengele Paul asû ni me ayeke na yâ ti Bible ape; peut-être ambeni nga ayeke dä (aCol. 4:16). So aye ti fa so e yeke pëpe na kobe ti yingo so alingbi e ndali ti so e yeke na lettre so ape? Ên-ën. Jéhovah ahinga aye so e yeke na bezoin ni nga lo mû na e aye mingi tongaso si e ngbâ ti kpengba na lege ti yingo.Mat. 6:8.

Jéhovah ahinga aye so e yeke na bezoin ni nga lo mû na e aye mingi tongaso si e ngbâ ti kpengba na lege ti yingo

Laso, ambeni wakua ti Jéhovah ayeke wara kobe ti yingo mingi ahon ambeni. Mo yeke tene mbeni yanga ti kodoro so a sigigi na ambeti ti e dä gi kete? Tongana a yeke tongaso, hinga so Jéhovah abi bê ti lo na mo. Manda ambeti so mo yeke na ni, nga mo gue na abungbi so a sara ni na yanga ti kodoro so mo mä ni. Nga, hinga so Jéhovah ayeke sara si mo ngbâ ti kpengba na lege ti yingo.Ps. 1:2; aHéb. 10:24, 25.

4. Tongana mo lingbi pëpe ti bâ avidéo nga ti diko a-article so a zia ni na ndo ti site jw.org, mo yeke woko na lege ti yingo?

Na ndo ti site ti e, e yeke wara apériodique nga na ambeni mbeti so asara tënë na ndo ti Bible. Na ndo ti site ni, a yeke wara nga aye so alingbi ti mû maboko na azo so asara mariage awe, amaseka nga na azo so ayeke na akete molenge. Asewa ayeke wara aye ti nzoni na ngoi so ala yeke sara kua na aye so na ngoi ti vorongo Nzapa na yâ ti sewa. Na ndo ti site ti e, a yeke fa nga na e peko ti akota ye so a sara, na tapande, mungo diplôme na aita so asara Ekole ti Galaad nga na bungbi so a sara ni ngu oko oko. A yeke fa nga na sewa ti aita ti e na yâ ti dunia kue peko ti akota kpale so asi na ambeni ita, aye tongana kota pupu wala ngu so asuku amû ndo. A yeke fa nga peko ti atënë so andu awakua ti Jéhovah so a gue na ni na gbele ngbanga (1 Pi. 5:8, 9). Site ti e ayeke nga mbeni pendere ye ti fango na tënë so amû lege si nzoni tënë asi même na yâ ti akodoro so e yeke fa tënë dä mingi ape wala so a ke na e ti fa tënë dä.

Me, atâa mo lingbi ti gue na ndo ti site ti e wala pëpe, mo lingbi ti ngbâ ti kpengba na lege ti yingo. Ngbâa be-ta-zo asara kua ngangu ti sigigi na ambeti mingi ti tene azo ti kua kue ate kobe nzoni na lege ti yingo. Tongaso, a lingbi mo pensé ape so mo doit ti vo mbeni ordinateur wala mbeni ngangu téléphone ti gue na ndo ti site jw.org. Ambeni ita wani alingbi ti imprimé ambeni kete wungo ti a-article so ayeke na ndo ti site ti e ti mû ni na aita so ayeke na Internet ape. Me, a hunda pëpe na a-ancien ti leke ti tene aita asara tongaso.

E kiri singila mingi na Jésus so asara ye alingbi na zendo ti lo ti mû na e aye so e yeke na bezoin ni na lege ti yingo. Teti so alango ti nda ni so, so ayeke ngangu, aga nduru ti hunzi awe, e hinga na bê ti e kue so Jéhovah ayeke ngbâ ti mû na e ‘kobe ti e na ngoi ni so alingbi’ na lege ti yingo.