Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Août 2014

Atënë so azo ahunda

Atënë so azo ahunda

Jésus atene lani na aSadducéen so azo so a yeke zingo ala na kuâ “ayeke sara mariage pëpe nga awali ni ayeke sara mariage pëpe”. (Luc 20:34-36). Lo yeke sara lani tënë ti azo so a yeke zingo ala na kuâ ti wara fini na ndo ti sese?

Ala lingbi ti duti na kota nzara ti kiri ti duti na songo ti ala ti mariage na koli wala wali ti ala so a yeke zingo lo na kuâ na yâ ti fini dunia. Mbeni koli so wali ti lo akui atene: “Mbi na wali ti mbi e soro ti fâ yâ ti mariage ti e ape. E ye lani na bê ti e kue ti ngbâ beoko ti voro Jéhovah koli na wali teti lakue lakue. Mbi changé bango ndo ti mbi na ndo ni ape.” Mbeni nzoni raison ayeke dä ti tene so azo so ayeke zingo ande na kuâ alingbi ti sara mariage? Na nduru tënë, e hinga kiringo tënë ni ape.

Teti angu mingi, na yâ ti ambeti ti e a tene so tënë so Jésus atene na ndo ti zingongo ti akuâ nga na mariage, abâ peut-être azo so a yeke zingo ala na kuâ ti wara fini na ndo ti sese. A tene so ala yeke sara mariage na yâ ti fini dunia ape. * (Mat. 22:29, 30; Marc 12:24, 25; Luc 20:34-36). Me, e lingbi ti tene so tënë ti Jésus so abâ azo so a yeke zingo ala na kuâ ti wara fini na yayu? Atâa so e lingbi ti kiri tënë polele na ndo ti tënë so ape, zia e bâ tënë so Jésus atene.

Zia e bâ ye so asara si Jésus atene tënë so. (Diko Luc 20:27-33.) A-Sadducéen, so ayeda na tënë ti zingongo ti akuâ pëpe, ahunda lani mbeni tënë na Jésus ti tene lo tï na yâ ti gbanda ti ala. Ala hunda lo na ndo ti tënë ti zingongo ti akuâ nga na ndo ti mbeni wali so asara mariage na ita ti koli ti lo. * Jésus akiri tënë, a tene: “Amolenge ti aye ti ngoi so ayeke sara mariage na awali, na awali ni nga ayeke sara mariage na akoli, me ala so a bâ so ala lingbi ti wara fini na yâ ti aye ti ngoi so ayeke ga, na so ayeke zingo na popo ti akuâ ayeke sara mariage pëpe nga awali ni ayeke sara mariage pëpe. Biani, ala lingbi ti kui mbeni pëpe teti ala yeke tongana a-ange. Teti so a yeke zingo ala ande na kuâ, ala yeke duti ande amolenge ti Nzapa.”Luc 20:34-36.

Ngbanga ti nyen a tene na yâ ti ambeti ti e a tene so Jésus ayeke sara lani peut-être tënë ti azo so a yeke zingo ala na kuâ ti wara fini na ndo ti sese? A tene tongaso ndali ti akota raison use. Kozoni, peut-être a-Sadducéen ayeke pensé lani na ndo ti zingongo azo na kuâ ti wara fini na ndo ti sese na Jésus akiri tënë na ala alingbi na ye so ala pensé na ni. Use ni, Jésus ahunzi tënë ti lo na sarango tënë na ndo ti Abraham, Isaac nga na Jacob, akoli be-ta-zo so a yeke zingo ala ande na kuâ ti wara fini na ndo ti sese.Luc 20:37, 38.

Me, peut-être Jésus ayeke sara lani tënë ti zingongo ti azo na kuâ ti wara fini na yayu. Ngbanga ti nyen e tene tongaso? Zia e bâ atënë use na yâ ti tënë so Jésus akiri na ni na a-Sadducéen so.

‘Ala so a bâ so ala lingbi ti tene a zingo ala na popo ti akuâ.’ A-Chrétien so a soro ala ti gue na yayu so ayeke be-ta-zo ayeke “azo so alingbi na royaume ti Nzapa”. (2 aThes. 1:5, 11). A diko ala azo ti mbilimbili na lege ti ngere so Christ afuta ti zi azo nga na ngoi so ala kui Nzapa abâ ala tongana azo so a zi ala awe na gbe ti ngbanga ti siokpari (aRom. 5:1, 18; 8:1). A tene so ala ‘yeke na ngia nga ala yeke nzoni-kue’. A bâ ala tongana azo so alingbi ti tene a zingo ala ti wara fini na yayu (Apoc. 20:5, 6). Me, ti azo so a yeke zingo ala ti wara fini na ndo ti sese mo yeke wara na popo ti ala “azo ti mbilimbili pëpe.”  (Kus. 24:15). E lingbi ti tene so “a bâ so” “azo ti mbilimbili pëpe” so ‘alingbi’ ti tene a zingo ala na kuâ?

“Ala lingbi ti kui mbeni pëpe.” Jésus atene pëpe: “Ala yeke kui mbeni ape.” Me, lo tene: “Ala lingbi ti kui mbeni pëpe.” Na yâ ti ambeni Bible a kiri na peko ti tënë so, a tene: ‘Ala lingbi ti kiri ti kui mbeni pëpe.’ Wala “kuâ ayeke na ngangu na ndo ti ala mbeni pëpe”. A yeke zingo aChrétien so a soro ala ti gue na yayu so angbâ be-ta-zo ti wara fini na yayu. Ala yeke wara mbeni fini so alingbi ti hinga kuâ ape so ti tene ala lingbi ti kui ape nga a lingbi ti futi ala ape (1 aCor. 15:53, 54). Kuâ ayeke na ngangu mbeni pëpe na ndo ti ala so a yeke zingo ala ti wara fini na yayu. *

Na ndo ti atënë so e londo ti bâ so, e lingbi ti tene nyen na nda ni? E lingbi ti tene so tënë so Jésus atene na ndo ti mariage nga na zingongo ti akuâ so abâ azo so a yeke zingo ala na kuâ ti wara fini na yayu. Tongana a yeke tongaso, tënë ti lo so amû lege na e ti hinga aye ota na ndo ti azo so a yeke zingo ala na kuâ ti wara fini na yayu: Ala yeke sara mariage ape, ala lingbi ti kui ape nga ala yeke tongana a-ange, acréature ti yingo so ayeke na ndo ti yingo. Me, tënë so asara si ahundango ndo mingi abâ gigi.

Kozo hundango ndo ni: Tongana aSadducéen ayeke pensé lani na ndo ti zingongo ti akuâ ti wara fini na ndo ti sese, ngbanga ti nyen Jésus asara tënë ti azo so a yeke zingo ala na kuâ ti wara fini na yayu? A yeke lakue la Jésus akiri tënë na awato ti lo alingbi na aye so ala yeke pensé na ni ape. Na tapande, lo tene na aJuif so ahunda lo ti sara mbeni miracle, lo tene: “Ala kungbi temple so na sese, na fade mbi yeke yä ni ande na nduzu na yâ ti lango ota.” Peut-être Jésus ahinga so ala yeke pensé lani na ndo ti lekengo temple, “me temple so lo yeke sara tënë ni ayeke tere ti lo.” (Jean 2:18-21). Peut-être Jésus abâ so lo yeke na bezoin ape ti kiri tënë na aSadducéen so asara ye na handango lê ti zo na so amä na bê pëpe na tënë ti zingongo ti akuâ nga na tënë ti a-ange (aProv. 23:9; Mat. 7:6; Kus. 23:8). Me, peut-être lo ye lani ti fa na adisciple ti lo tâ tënë na ndo ti zingongo azo na kuâ ti wara fini na yayu. Ala yeke azo so ayeke be-ta-zo so ayeke na beku ti wara fini so.

Use hundango ndo ni: Ngbanga ti nyen Jésus ahunzi tënë ti lo na sarango tënë na ndo ti Abraham, Isaac nga na Jacob, akoli so a yeke zingo ala ande na kuâ ti wara fini na ndo ti sese? (Diko Matthieu 22:31, 32.) Bâ so kozo ti tene Jésus asara tënë ti akoli so, lo komanse tënë ti lo, lo tene: “Na ndo ti tënë ti zingongo ti akuâ”. Peut-être tënë so aye ti tene so lo changé lisoro ti lo na ndo ti tënë ti zingongo ti azo na kuâ ti wara fini na yayu lo kiri na ni na ndo ti tënë ti zingongo azo na kuâ ti wara fini na sese. Na pekoni, Jésus asara kua na atënë so Jéhovah atene na Moïse na tere ti mbeni keke so wâ amû ni ti fa na aSadducéen so zingongo ti azo na kuâ ti wara fini na sese ayeke tâ ye so Nzapa aleke na bê ti lo ti sara. Lo sara tongaso ndali ti so lo hinga so aSadducéen ayeda na atënë so Moïse asû.Ex. 3:1-6.

Ota hundango ndo ni: Tongana tënë so Jésus atene na ndo ti zingongo ti azo na kuâ nga na mariage abâ azo so a yeke zingo ala ti wara fini na yayu, a ye ti tene so azo so a yeke zingo ala ti wara fini na sese ayeke sara mariage? Bible akiri tënë na hundango ndo so polele tongaso ape. Tongana a yeke tâ tënë so Jésus ayeke sara lani tënë ti azo so a yeke zingo ala ti wara fini na yayu, tënë ti lo afa pëpe wala azo so a yeke zingo ala ti wara fini na sese ayeke sara ande mariage na yâ ti fini dunia.

Bible atene polele so kuâ afâ yâ ti songo ti mariage. Tongaso, tongana koli wala wali ti mbeni zo akui, a lingbi lo pensé pëpe so lo sara faute tongana lo soro ti kiri ti sara mariage. A yeke na zo oko oko ti mû desizion ti lo. Nga, a lingbi zo oko akasa pëpe desizion ti mbeni zo so agi ti sara mariage na mbeni koli wala wali.aRom. 7:2, 3; 1 aCor. 7:39.

Peut-être e yeke na atënë mingi ti hunda na ndo ti fini na yâ ti fini dunia. Ahon ti tene e gi ti fa akiringo tënë na ahundango ndo so, a lingbi e ku e bâ. Me ye so e hinga ayeke so: Azo so amä yanga ayeke duti na ngia ndali ti so Jéhovah ayeke mû na ala aye kue so ala yeke na bezoin ni nga lo yeke mû na ala aye kue so ala sara nzara ni na mbeni lege so ayeke nzoni mingi.Ps. 145:16.

^ par. 4Tour ti Ba Ndo ti lango oko ti juin, ngu 1987, lembeti 30-31 na Français.

^ par. 5 Na yâ ti sarango ye ti azo ti giriri, tongana koli ti mbeni wali akui sân ti tene wali ni adü na lo molenge, wali ni ayeke sara mariage na ita ti koli ni tongaso si lo na lo adü molenge ti bata hale ti ita ti lo so akui.Gen. 38:8; Deut. 25:5, 6.

^ par. 9 Azo so a yeke zingo ala ti wara fini na sese ayeke na beku ti wara fini ti lakue lakue me pëpe beku ti wara fini so alingbi ti hinga kuâ ape. Ti hinga ye mingi na ndo ti kangbi so ayeke na popo ti fini so alingbi ti hinga kuâ ape nga na fini ti lakue lakue, bâ Tour ti Ba Ndo ti lango oko ti juillet, ngu 1984 lembeti 30-31, na Français.