Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) JUILLET 2014

Awakua ti Jéhovah “adö lege ti ye so ayeke mbilimbili pëpe azia”

Awakua ti Jéhovah “adö lege ti ye so ayeke mbilimbili pëpe azia”

“Zia zo kue so airi Jéhovah na iri ti lo adö lege ti ye so ayeke mbilimbili pëpe azia.”—2 TIM. 2:19.

1. Nyen la ayeke kota mingi na yâ ti vorongo ti e?

MO BÂ iri ti Jéhovah na tere ti mbeni da wala na tere ti ambeni ye awe? Kite ayeke pëpe so tere ti mo anzere mingi na ngoi so mo bâ ni. E so e yeke aTémoin ti Jéhovah, iri ti Nzapa ayeke kota mingi na yâ ti vorongo ti e. Na yâ ti dunia kue, mbeni bungbi ti azo so asara kua na iri ti Nzapa tongana ti e ayeke dä ape. Me, so e yeke na pasa ti tene iri ti Jéhovah ayeke na ndo ti e ahunda na e ti sara ambeni ye.

2. Pasa so e yeke na ni ti tene iri ti Jéhovah ayeke na ndo ti e ahunda na e ti sara nyen?

2 Gi dingo iri ti Nzapa la asara si Jéhovah abâ e na nzoni lê ape. A lingbi e sara ye ague oko na andia ti lo. A yeke ndali ni la Bible adabe ti e so a lingbi awakua ti Jéhovah ‘azia lege ti sioni’. (Ps. 34:15). Bazengele Paul asara tënë polele na ndo ti tënë so na ngoi so lo tene: “Zia zo kue so airi Jéhovah na iri ti lo adö lege ti ye so ayeke mbilimbili pëpe azia.” (Diko 2 Timothée 2:19.) E so e yeke aTémoin ti lo, a hinga e tongana azo so airi Jéhovah  na iri ti lo. Me, tongana nyen la e lingbi ti dö lege ti ye so ayeke mbilimbili pëpe e zia?

“ZIA” LEGE TI SIONI

3, 4. Tënë wa la awandara ti Bible agi nda ni gbä? Ngbanga ti nyen?

3 Na 2 Timothée 2:19, Paul asara tënë ti “ngangu gere ti ye so Nzapa azia”. A sû atënë use na tere ti “ngangu gere ti ye so Nzapa azia” so. Kozo tënë ni ayeke so “Jéhovah ahinga ala so ayeke ti lo.” A yeke na Nombre 16:5. (Bâ kozo article.) Use tënë ni ayeke so “Zia zo kue so airi Jéhovah na iri ti lo adö lege ti ye so ayeke mbilimbili pëpe azia.” Awandara ti Bible agi nda ti tënë so gbä. Ngbanga ti nyen?

4 Atënë ti Paul afa so tënë so lo sara kua na ni so, lo mû ni na mbeni ndo nde. Me, na bango ni mbeni versê oko na yâ ti Mbeti ti Nzapa so a sû ândö na Hébreu ague oko na tënë ti Paul so pëpe. Tongaso, Paul ayeke sara tënë ti nyen na ngoi so lo tene: “Zia zo kue so airi Jéhovah na iri ti lo adö lege ti ye so ayeke mbilimbili pëpe azia”? Paul amû kozo tënë so lo tene na Nombre chapitre 16, so asara tënë ti kpengba-li ti Koré. Use tënë ni nga kue asara tënë gi na ndo ti aye so asi na ngoi so Koré asara kpengba-li so?

5-7. Aye wa la asi na ngoi ti Moïse so Paul asara tënë ni na 2 Timothée 2:19? (Bâ foto so ayeke na tongo nda ti article ni.)

5 Bible atene so Dathan na Abiram amolenge ti Eliab abungbi oko na Koré na ala mû li ni ti sara kpengba-li na tere ti Moïse na Aaron (Nom. 16:1-5). Ala fa polele so ala ne Moïse ape nga ala ke komandema so Nzapa amû na lo. Azo ti kpengba-li so angbâ lani na popo ti awakua ti Jéhovah, a sara si ala yeke tongana mbeni kpale teti azo ti Israël so ayeke be-ta-zo. Na ngoi so ngoi ti tene Jéhovah azia kangbi na popo ti awakua ti lo so ayeke be-ta-zo na lo na azo ti kpengba-li alingbi, lo mû mbeni commandement.

6 Bible atene: “L’Éternel asara tënë na Moïse, Lo tene, Mo sara tënë na bungbi ti azo ni, mo tene, londo, i zia tere ti tente ti Koré, Dathan, na Abiram. Moïse alondo, lo gue na Dathan na Abiram; na a-ancien ti Israël ague na peko ti lo. Na lo sara tënë na bungbi ti azo ni, lo tene, Mbi voro i ti zia tente ti awasiokpari so, na i ndu ye oko ti ala pëpe, wala fade A fâ i ngbanga ti siokpari ti ala. Tongaso ala zia tere ti tente ti Koré, Dathan, na Abiram.” (Nom. 16:23-27). Na pekoni Jéhovah afâ azo kue so asara kpengba-li. Me, azo so ayeke lani be-ta-zo asö kuâ ngbanga ti so ala ‘dö lege ti ye so ayeke mbilimbili pëpe azia’ na lege so ala hon yongoro na azo ti kpengba-li.

7 Jéhovah ahinga ye so ayeke na yâ ti bê ti zo. Lo hinga azo so ayeke be-ta-zo na lo. Me, a lingbi azo ti lo so ayeke be-ta-zo aduti nde na azo so sarango ye ti ala ayeke mbilimbili pëpe. Tongaso, peut-être Paul ayeke sara lani tënë ti mbaï so ayeke na Nombre 16:5, 23-27 na ngoi so lo tene: “Zia zo kue so airi Jéhovah na iri ti lo adö lege ti ye so ayeke mbilimbili pëpe azia.” Tënë so alingbi ti gue oko na tënë ti Paul so lo tene: “Jéhovah ahinga ala so ayeke ti lo.”—2 Tim. 2:19.

“KE AHUNDANGO NDO TI BUBA NGA NA TI MBANA”

8. Ngbanga ti nyen ti di gi iri ti Jéhovah wala ti duti gi mbeni ita na yâ ti congrégation alingbi ape?

8 Na ngoi so Paul asara tënë ti aye so asi na ngoi ti Moïse, lo yeke dabe ti Timothée so a lingbi lo bata nzoni songo ti lo na Jéhovah. Gi ti duti mbeni ita na yâ ti congrégation alingbi ape, legeoko nga na ngoi ti Moïse gi senge iringo Jéhovah na iri ti lo alingbi ape. A lingbi awakua ti Jéhovah so  ayeke be-ta-zo “adö lege ti ye so ayeke mbilimbili pëpe azia” na bê oko. Tënë so abâ lani Timothée tongana nyen? Nga aye wa la laso awakua ti Jéhovah alingbi ti manda na lege ti wango ti Paul so?

9. “Ahundango ndo ti buba nga na ti mbana” asara lani nyen na ndo ti akozo Chrétien?

9 Bible amû ambilimbili wango na ndo ti mara ti aye so ayeke mbilimbili pëpe so a lingbi aChrétien adö lege ni azia wala ala ke ni. Na tapande, Paul atene na Timothée ti “tiri ndali ti atënë pëpe” nga ti “ke asenge senge tënë”. (Diko 2 Timothée 2:14, 16, 23.) Ambeni ita na yâ ti congrégation ayeke fa lani afango ye ti a-apostat. Nga, peut-être ambeni ita ayeke fa lani atënë ti dengo gaba. Même tongana atënë so ague pëpe tâ nde na aye so Bible afa, atënë so alingbi lani ti ga na kangbi na popo ti aita na yâ ti congrégation. A yeke ndali ni la Paul awa lani Timothée ti “ke ahundango ndo ti buba nga na ti mbana”.

10. Nyen la a lingbi e sara tongana e mä afango ye so ayeke ti a-apostat?

10 Laso, awakua ti Jéhovah ayeke wara lakue pëpe afango ye ti a-apostat na yâ ti congrégation. Me, tongana e mä afango ye so ague nde na ti Bible, atâa afango ye ni alondo na ndo wa, a lingbi e ke ni na bê oko. A yeke na lege ti ndara pëpe ti sara lisoro na a-apostat lê na lê, na lege ti Internet wala na mbeni lege nde. Même tongana e ye ti mû maboko na zo ni, mara ti lisoro tongaso alingbi ti gue nde na fango lege ti Bible so e londo ti bâ so. Me, e so e yeke awakua ti Jéhovah, e ke na bê oko afango ye ti a-apostat.

Kpe ti sara lisoro na a-apostat (Bâ paragraphe 10)

11. Nyen la alingbi ti sara si e hunda “ahundango ndo ti buba”? Tongana nyen la a-ancien alingbi ti zia nzoni tapande?

11 Nde na tënë ti a-apostat, ambeni ye ayeke dä so alingbi ti buba siriri ti congrégation. Na tapande, e lingbi ti duti na abango ndo so ayeke nde nde na ndo ti angia na ye so alingbi ti sara si e hunda “ahundango ndo ti buba nga na ti mbana”. Tongana mbeni zo na yâ ti congrégation agi ti pusu aita ti sara angia so ague nde na andia ti Jéhovah, a lingbi a-ancien azia lege pëpe na mara ti sarango ye tongaso gi ti kpe tënë (Ps. 11:5; aÉph. 5:3-5). Me, a lingbi a-ancien asara hange ti tene ala fa pëpe apensé ti ala. Ala yeke sara ye alingbi na wango so a mû na a-ancien, so atene: “Ala bata angasangbaga ti Nzapa so lo zia na maboko ti ala; . . . ala bata angasangbaga ni na sarango mokonzi pëpe na ndo ti ala so ayeke aye ti Nzapa, me ala ga atapande ndali ti angasangbaga ni.”—1 Pi. 5:2, 3; diko 2 aCorinthien 1:24.

12, 13. (a) Bango ndo wa la aTémoin ti Jéhovah ayeke na ni na ndo ti angia so ala yeke soro ti sara? Afango ye ti Bible wa la ala sara ye alingbi na ni? (b) Tongana nyen la e lingbi ti sara ye alingbi na afango ye so ayeke na paragraphe 12 na yâ ti aye nde nde so abâ gi e wani?

12 Na ndo ti tënë ti angia, bungbi ti Jéhovah afa pëpe ambeni film, ajeux ti vidéo, abuku wala abia so alingbi e kpe ni. Ngbanga ti nyen? Bible awa zo oko oko ti fa lege na “ngangu ti gbungo li ti [lo] . . . ti hinga popo ti ye ti nzoni na ye ti sioni.” (aHéb. 5:14). Bible afa ambilimbili ye so mbeni Chrétien alingbi ti gbu li ti lo na ndo ni na ngoi so lo yeke soro angia so lo ye ti sara. Na yâ ti adesizion kue so e yeke mû, a lingbi e zia na gbele e ti “ngbâ ti bâ yâ ti aye nzoni ti hinga ye so anzere biani na lê ti Seigneur.” (aÉph. 5:10). Bible afa so azo so ayeke mû li ni na yâ ti sewa ayeke na mbeni komandema. Tongaso, ala lingbi ti ke na azo ti sewa ti ala ti sara ambeni ngia. *1 aCor. 11:3; aÉph. 6:1-4.

13 Afango ye ti Bible so e sara tënë na  ndo ni so amû maboko na e gi ti soro angia ape. Abango ndo so e yeke na ni na ndo ti yungo bongo, lekengo tere, seni, akobe nga na ambeni ye so abâ gi e wani alingbi nga ti ga na papa. Tongaso, tongana abango ndo so ague nde pëpe na afango ye ti Bible, awakua ti Jéhovah akpe ti papa na ndo ti mara ti atënë tongaso ndali ti so “ngbâa ti Seigneur atiri pëpe, me lo duti zo so asara ye na ngangu pëpe na azo kue”.—2 Tim. 2:24.

KPE ASIONI KAMARADE

14. Tapande wa la Paul amû ti fa so a lingbi e kpe asioni kamarade?

14 Na mbeni lege wa la ala so “airi Jéhovah na iri ti lo adö lege ti ye so ayeke mbilimbili pëpe azia”? Ala yeke sara ni na lege so ala yeke kpe ti sara songo na azo so asara ye so ayeke mbilimbili pëpe. A pika bê mingi ti bâ so Paul amû mbeni tapande na peko ti so lo sara tënë na ndo ti tapande ti “ngangu gere ti ye so Nzapa azia”. Lo sara tënë ti “mbeni kota da” so na yâ ni a yeke “wara pëpe gi ata so a sara ni na lor nga na argent, me a yeke wara nga ata so a sara ni na keke nga so a sara ni na sese; ambeni ta ni ayeke ti sara na kota kusala, me ambeni ayeke ti sara na senge kusala.” (2 Tim. 2:20, 21). Na pekoni lo wa aChrétien ti ‘duti yongoro’ wala ti duti nde na ata so ayeke sara na “senge kusala.”

15, 16. Tapande so asara tënë ti “mbeni kota da” afa na e nyen?

15 Tapande ti Paul so aye ti tene nyen? A lingbi ti haka “kota da” so na congrégation ti aChrétien. “Ata” so ayeke na yâ ti da ni a lingbi ti haka ni na amembre ti congrégation. Na yâ ti da, ambeni ye alingbi ti sara sioni na zo tongana ayeke saleté. Wa ti da ni ayeke zia aye so ayeke saleté so nde na ati so ayeke saleté ape, na tapande aye so a yeke tö na kobe.

16 Legeoko nga, a lingbi laso awakua ti Jéhovah so ayeke sara ngangu ti duti na  sioni oko pëpe akpe ti sara songo na azo so na yâ ti congrégation ayeke sara lakue sanka ti afango ye ti Jéhovah. (Diko 1 aCorinthien 15:33.) Tongana a lingbi e kpe ti sara songo na asioni kamarade na yâ ti congrégation, a fa so a yeke nga kota ye mingi ti tene e kpe ti sara songo na azo so ayeke na yâ ti congrégation ape. Ala mingi ayeke ‘azo so andoye nginza, azo so ake yanga ti ababâ na amama ti ala, azo so ayeke abe-ta-zo pëpe, azo ti pango amba ti ala, azo so ayeke asioni zo, azo so andoye nzoni ye pëpe, azo ti kango amba ti ala, nga na azo so andoye angia ahon ti ndoye Nzapa’.—2 Tim. 3:1-5.

TONGANA E NGBÂ BE-TA-ZO NA JÉHOVAH LO YEKE IRI TËNË NZONI NA NDO TI E

17. Nyen la afa so azo ti Israël so ayeke be-ta-zo asara kue ti ke ye so ayeke mbilimbili pëpe?

17 Bible afa mbilimbili ye so azo ti Israël asara na ngoi so a tene na ala ti “zia tere ti tente ti Koré, Dathan, na Abiram.” Mbaï ni afa so ‘hio, ala londo ala hon yongoro, FD.’ (Nom. 16:24, 27). Ala dë kite wala ala ku kungo ape. “Azo kue so alango angoro terê ti atente . . . alondo ahon yongoro, FD.” Azo so ayeke lani be-ta-zo na Jéhovah asara ye so a hunda na ala na bê ti ala kue. Ala fa polele so ala mû mbage ti Jéhovah na ala ke ye so ayeke mbilimbili pëpe. Tapande so afa nyen na e?

18. Paul aye lani ti tene nyen na ngoi so lo wa Timothée ti “kpe yongoro na anzara ti bê so ayeke gbu ka amaseka”?

18 A lingbi e sara ye hio ti bata kpengba songo so e yeke na ni na Jéhovah. A yeke tënë so Paul aye lani ti tene na ngoi so lo wa Timothée ti “kpe yongoro na anzara ti bê so ayeke gbu ka amaseka”. (2 Tim. 2:22). Na ngoi ni so, Timothée aga koli awe na lo yeke peut-être na ngu 30 na ndo ni. Me, “anzara ti bê so ayeke gbu ka amaseka” alingbi ti gbu akota zo nga kue. Tongana amara ti nzara tongaso agbu Timothée, a lingbi lani lo “kpe yongoro” na ni. So ti tene a lingbi Timothée “adö lege ti ye so ayeke mbilimbili pëpe azia.” Jésus atene mara ti tënë so na ngoi so lo tene: “Tongana lê ti mo ayeke sara ti tene mo tï, gboto ni na bi ni yongoro na mo.” (Mat. 18:9). A lingbi aChrétien so laso aye ti sara ye alingbi na wango so nga so aye ti bata songo ti ala na Nzapa aleke na bê ti ala ti ngbâ ti sara ye hio.

19. Nyen la ambeni ita asara ti bata songo ti ala na Jéhovah?

19 Azo so ayeke angbâa ti sämba kozo ti tene ala ga aTémoin amû desizion ti nyon sämba encore ape. Ambeni ake ti sara ambeni ngia so ayeke nga sioni ape me so alingbi ti zingo nzara ti tere ti ala (Ps. 101:3). Na tapande, mbeni ita aye lani mingi ti gue na aplace ti dodo so azo ni asara ye kirikiri kozo ti tene lo ga Témoin. Me na pekoni so lo hinga tâ tënë, lo ye mbeni pëpe ti dodo même na ngoi so aita abungbi ti sara ngia teti so alingbi ti sara si lo kiri lo wara asioni nzara wala asioni pensé so lo yeke na ni ândö. A hunda pëpe na aChrétien ti ke ti nyon sämba, ti dodo wala ti sara ambeni ye so ayeke nga sioni ape. Me, a lingbi e kue e sara hange si e ngbâ ti bata songo ti e na Jéhovah.

20. Atâa so a yeke kete ye ape ti ‘dö lege ti ye so ayeke mbilimbili pëpe ti zia’, nyen la adë bê ti e?

20 Pasa so e yeke na ni ti tene iri ti Jéhovah ayeke na ndo ti e ahunda na e ti sara ambeni ye. A lingbi e ‘dö lege ti ye so ayeke mbilimbili pëpe e zia’ nga e “zia lege ti sioni”. (Ps. 34:15). Tâ tënë, ti sara ni ayeke lakue kete ye ape. A dë bê ti e mingi ti hinga so Jéhovah ayeke ndoye lakue “ala so ayeke ti lo” nga so asara ye alingbi na andia ti lo so ayeke mbilimbili.—2 Tim. 2:19; diko 2 Chronique 16:9a.

^ par. 12 Gue na ndo ti site jw.org na bâ article QUESTIONS FRÉQUENTES/PRATIQUES/Y a-t-il des films, des livres ou des chansons qui sont interdits aux Témoins de Jéhovah ?