Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Juillet 2014

“Fade ala yeke duti atémoin ti mbi”

“Fade ala yeke duti atémoin ti mbi”

“[Jésus a]tene na ala: ‘. . . fade ala yeke duti atémoin ti mbi . . . juska na ambage ti sese so ayeke tâ yongoro.’”—KUS. 1:7, 8.

1, 2. (a) Kota témoin ti Jéhovah ayeke zo wa? (b) Nda ti iri Jésus ayeke nyen? Tongana nyen la Molenge ti Nzapa asara ye ague oko na iri ti lo?

NA NGOI so Jésus Christ ayeke na gbele ngbanga, lo tene na mbeni gouverneur ti Judée so ayeke Romain, lo tene: “Nda ni so a dü mbi nga nda ni so mbi ga na yâ ti dunia ayeke ti tene mbi fa tënë ti témoin na ndo ti tâ tënë.” (Diko Jean 18:33-37.) Jésus alondo ti fa so lo yeke mbeni gbia. Angu mingi na pekoni, bazengele Paul asara tënë ti tapande ti Jésus tongana témoin “so afa lani tënë pendere mingi dandara na gbele Ponce Pilate”. (1 Tim. 6:13). Biani, na ambeni ngoi a hunda ti tene e sara ye na mbeto pëpe si e duti “témoin so ayeke be-ta-zo si ayeke tene gi tâ tënë” na yâ ti dunia ti Satan so azo so aye amba ti ala ape ahon ndo ni.—Apoc. 3:14.

2 Teti so Jésus ayeke mbeni zo ti mara ti aJuif, a dü lo dungo témoin ti Jéhovah (És. 43:10). Lo ga kota témoin so ahon atanga ni kue so agbu koko ti iri ti Nzapa. Jésus abâ na nene ni mingi nda ti iri ti lo so Nzapa amû na lo. Na ngoi so mbeni ange atene na Joseph, babâ ti Jésus so abata lo, so ngo so Marie amû  ayeke na lege ti yingo vulu, ange ni atene nga atene: “Fade lo yeke dü molenge ti koli. A lingbi mo zia iri ti lo Jésus, ndali ti so lo yeke sö ande azo ti lo na yâ ti asiokpari ti ala.” (Mat. 1:20, 21). Mingi ti awandara ti Bible ayeda so iri Jésus ayeke mbeni tënë ti yanga ti Hébreu, Jeshua, nga a yeke wara na yâ ni iri ti Nzapa. Nda ti iri Jésus na Hébreu aye ti tene “Jéhovah ayeke salut.” Jésus asara ye ague oko na nda ti iri ti lo, lo mû maboko na “angasangbaga ti da ti Israël so agirisa” ti zia lege ti siokpari ti ala tongaso si Jéhovah akiri abâ ala na nzoni lê (Mat. 10:6; 15:24; Luc 19:10). Ni la Jésus afa tënë ti Royaume ti Nzapa na bê ti lo kue. Marc so asû mbeni Évangile atene: “Jésus ague na Galilée, lo yeke fa nzoni tënë ti Nzapa, lo tene: ‘Ngoi so a diko ni alingbi awe, na royaume ti Nzapa aga nduru awe. Ala changé bê ti ala, na ala mä na bê na nzoni tënë.’” (Marc 1:14, 15). Na mbeto pëpe, Jésus asigigi na nda ti akota zo ti vorongo ti aJuif. A yeke mbeni ye so asara si ala fâ lo na ndo ti keke.—Marc 11:17, 18; 15:1-15.

“APENDERE YE SO NZAPA ASARA”

3. Nyen la asi lango ota na pekoni so Jésus akui?

3 Lango ota na peko ti kuâ ti ngangu so Jésus awara, Jéhovah azingo lo na tere ti zo pëpe me na tere ti yingo so alingbi ti hinga kuâ pëpe (1 Pi. 3:18). Ti tene Jésus afa so a zingo lo na kuâ awe lo mû tere ti zo na ngoi so lo fa tere ti lo na ala. Na lango so a zingo lo na kuâ, lo fa tere ti lo fani oku na adisciple nde nde.—Mat. 28:8-10; Luc 24:13-16, 30-36; Jean 20:11-18.

4. Nyen la asi na ngoi so Jésus afa tere ti lo na adisciple ti lo? Nyen la lo hunda na ala ti sara?

4 Jésus afa tere ti lo ti fani oku ni na abazengele ti lo nga na azo so abungbi oko na ala. Na kota lango so, Jésus afa tënë ti Nzapa na ala. “Lo zi lege ti hingango ndo ti ala kue ti gbu nda ti Mbeti ti Nzapa.” Ala ga ti hinga so Bible afa kozo awe so awato ti Nzapa la ayeke fâ lo nga Nzapa ayeke zingo lo na lege ti miracle. Na hunzingo ti lango so a zingo Jésus na kuâ, lo fa na adisciple ti lo polele kua so ala yeke na ni ti sara. Lo tene na ala so “na lege ti iri ti lo a fa na amara kue tënë ti changengo bê ti wara pardon ti asiokpari. Ti londo na Jérusalem, a lingbi ala duti atémoin ti aye so.”Luc 24:44-48.

5, 6. (a) Ngbanga ti nyen Jésus atene: “Fade ala yeke duti atémoin ti mbi”? (b) Fini ye so Jéhovah aleke ti sara so adisciple ti Jésus ayeke fa ayeke nyen?

5 Tongaso, lango 40 na pekoni na ngoi so lo fa tere ti lo ti ndangba ni, adisciple ti lo ahinga tënë so lo ye ti tene na ngoi so lo mû na ala commandement so atene: “Fade ala yeke duti atémoin ti mbi na Jérusalem, na yâ ti Judée kue nga na Samarie na juska na ambage ti sese so ayeke tâ yongoro.” (Kus. 1:8). Ngbanga ti nyen Jésus atene: “Fade ala yeke duti atémoin ti mbi” me lo tene pëpe ti Jéhovah? Lo tene tongaso ndali ti so azo so lo yeke sara tënë na ala ayeke azo ti Israël so ayeke atémoin ti Jéhovah awe.

Legeoko tongana adisciple ti Jésus, e ngbâ ti fa na azo ye so Jéhovah aleke na bê ti lo ti sara na yâ ti angoi so ayeke ga (Ba paragraphe5, 6)

6 A lingbi fadeso adisciple ti Jésus afa mbeni fini ye so Jéhovah aleke ti sara. Ye so ayeke kota mingi ahon zingo azo ti Israël na ngbâa na Égypte nga na Babylone. Kuâ ti Jésus Christ nga zingongo ti lo na kuâ amû lege ti tene a zi e na gbe ti ngbâa ti siokpari nga na kuâ. Na Pentecôte ti ngu 33, afini disciple ti Jésus so a soro ala ti gue na yayu afa na azo “apendere ye so Nzapa asara”, na azo mingi so amä tënë so ayeda na ni. Jésus so aduti na yayu na mbage ti maboko ti Babâ ti lo ti koli ato nda ti bâ so iri ti lo akiri aga kota na ngoi so azo saki na saki achangé bê ti ala nga ala mä na bê so na lege ti lo la Jéhovah ayeke mû salut na azo.—Kus. 2:5, 11, 37-41.

 “NGERE SO A FUTA TI ZI NA AZO MINGI”

7. Aye so asi lani na lango ti Pentecôte ti ngu 33 afa nyen?

7 Aye so asi lani na lango ti Pentecôte ti ngu 33 afa so Jéhovah ayeke na ngia ti yeda na fini ti Jésus so alingbi kue so lo mû tongana ngere so a futa ti zi na azo na gbe ti siokpari (aHéb. 9:11, 12, 24). Jésus afa so lo ga “ti tene azo asara kua na lo pëpe, me lo ga ti sara kua na azo na ti mû âme ti lo tongana ngere so a futa ti zi na azo mingi.” (Mat. 20:28). “Azo mingi” so awara aye ti nzoni na lege ti sandaga ti Jésus ayeke pëpe gi aJuif so achangé bê ti ala. Me, Nzapa aye ti tene “mara ti azo nde nde kue asö fini ti ala” ndali ti so ngere so a futa “azi siokpari ti dunia so.”1 Tim. 2:4-6; Jean 1:29.

8. Fango tënë ti adisciple ti Jésus amû ndo lani tongana nyen? Nyen la amû maboko na ala ti sara ni?

8 Akozo disciple ti Jésus angbâ lani ti fa tënë na ndo ti lo na mbeto pëpe. Nyen la amû maboko na ala? Ala sara ni gi na ngangu ti ala ape. A yeke yingo vulu ti Jéhovah la apusu ala nga amû na ala ngangu ti ngbâ ti fa tënë. (Diko Kusala 5:30-32.) Ngu 27 tongaso na peko ti Pentecôte ti ngu 33, a lingbi lani ti tene so “a fa tâ tënë ti nzoni tënë” na aJuif nga na aGentil so ayeke na yâ ti “création kue so ayeke na gbe ti yayu”.—aCol. 1:5, 23.

9. Tongana ti so a fa kozo awe, nyen la asi na congrégation ti akozo Chrétien?

9 Me, mawa ni ayeke so a to nda ti fa aye so ayeke na lege ni ape na yâ ti congrégation ti akozo Chrétien (Kus. 20:29, 30; 2 Pi. 2:2, 3; Jude 3, 4). Tongana ti so Jésus afa, mara ti fango ye so, so alondo na Satan “Zo ti sioni” ayeke ngbâ ti gue na li ni nga ayeke sara si a yeke ngangu ti hinga tâ vorongo juska na “ngoi so aye ti ngoi so ayeke gue ti hunzi.” (Mat. 13:37-43). Na pekoni, Jéhovah ayeke zia Jésus Gbia na ndo ti azo kue. Ye so asi lani na octobre, ngu 1914. A yeke na ngoi so la si “alango ti nda ni” ti sioni dunia ti Satan ato nda ni.—2 Tim. 3:1.

10. (a) Kota lango wa aChrétien so a soro ala ti gue na yayu afa lani tënë ni? (b) Nyen la asi na octobre, ngu 1914? E hinga ni tongana nyen?

10 Ngu 30 na ndo ni kozoni na octobre, ngu 1914, aChrétien so a soro ala ti gue na yayu ato nda ti fa so Royaume ti Nzapa ayeke to nda ti komande na kota lango so. Ala hinga ni na lege ti prophétie ti Daniel so asara tënë ti mbeni kota keke so a fâ ni na so ayeke kiri ti sigigi na peko ti “ngoi mbasambala”.  (Dan. 4:16). Jésus asara tënë ti oko ngoi so tongana “ngoi so a diko teti amara” na yâ ti prophétie ti lo so lo sara tënë ti singo ti lo nga na “ngoi so aye ti ngoi so ayeke gue ti hunzi”. Ngbene ye na ngu 1914, azo kue abâ polele ‘fä ti ngoi so Christ ayeke si na lo yeke duti dä’ tongana fini Gbia ti dunia (Mat. 24:3, 7, 14; Luc 21:24). Tongaso, ngbene ye na ngoi so, Jéhovah azia Jésus Gbia na ndo ti azo kue na ye so ayeke na popo ti “apendere ye so Nzapa asara”.

11, 12. (a) Nyen la fini Gbia ti sese ato nda ti sara na ngu 1919? (b) Nyen la a bâ ni polele na ngu 1935? (Bâ foto so ayeke na tongo nda ti article ni.)

11 Na ngu 1914, na ngoi so Jésus Christ aga fini Gbia ti sese, lo to nda ti zi adisciple ti lo so a soro ala ti gue na yayu na gbe ti ngbâa ti “Babylone, Ngangu gbata”. (Apoc. 18:2, 4). Na ngu 1919, hio na pekoni so Kozo Bira so Amû Sese Kue ahunzi, lege azi ti tene a fa tënë ti ye so Nzapa asara ti mû lege na azo ti wara salut nga ti tene a fa nzoni tënë ti Royaume ti Nzapa. A-Chrétien so a soro ala ti gue na yayu amû ngoi ni so ti fa tënë mingi, a sara si ambeni zo saki na saki amanda Bible na a soro ala ti gue na yayu ti duti agbia legeoko na Christ.

12 Ngbene ye na ngu 1935 ti ga na ni, a bâ polele so Christ ato nda ti bungbi “ambeni ngasangbaga” ti lo kutu mingi so ayeke ga “azo mingi mingi” so ayeke ti amara nde nde. Na gbe ti fango lege ti aChrétien so a soro ala ti gue na yayu, azo mingi mingi so ayeke mû nga tapande ti Jésus so asara ye na mbeto ape na ala yeke fa na gbele ti azo so a yeke gi na lege ti Nzapa nga na Christ la ala lingbi ti wara salut. Tongana ala gbu ngangu na yâ ti kua ti fango tënë nga ala ngbâ ti mä na bê na ngere so Christ afuta ti zi na azo, ala yeke duti na pasa ti sö kuâ na ngoi ti “kota ye ti vundu” so na lege ni a yeke futi ande sioni dunia ti Satan.—Jean 10:16; Apoc. 7:9, 10, 14.

‘ZI MBETO NA YÂ TI MO TI FA NZONI TËNË’

13. E so e yeke aTémoin ti Jéhovah e leke na bê ti e ti ngbâ ti sara nyen? Nyen la alingbi ti mû maboko na e ti sara ni?

13 Zia e ngbâ ti bâ na nene ni pasa so e yeke na ni ti fa tënë ti “apendere ye” so Jéhovah Nzapa asara nga na azendo so lo mû ndali ti kekereke. Tâ tënë, a yeke lakue kete ye ape ti fa tënë. Aita ti e mingi ayeke fa tënë na yâ ti aterritoire so mingi ti azo aye tâ tënë ape, ala yeke he ala wala ala yeke sara aye ti ngangu mingi na ala. E lingbi ti sara tâ gi ye so bazengele Paul na amba ti lo asara. Paul atene: “Nzapa ti e asara si e zi mbeto na yâ ti e ti fa nzoni tënë ti lo na ala na yâ ti kota tiri.” (1 aThes. 2:2). Tongaso, a lingbi e zia lege ti fango tënë pëpe. Zia e leke na bê ti e ti ngbâ ti sara ye  alingbi na mungo tere ti e so e mû na Nzapa na ngoi so dunia ti Satan angbâ ti buba ti gue na ni (És. 6:11). E lingbi ti sara ni gi na ngangu ti e pëpe, me legeoko tongana ti akozo Chrétien, a lingbi e sambela Jéhovah ti mû na e “ngangu so ahon ti so zo ayeke na ni” na lege ti yingo vulu ti lo.—Diko 2 aCorinthien 4:1, 7; Luc 11:13.

14, 15. (a) A sara ye lani na atâ Chrétien tongana nyen na ngoi ti akozo Chrétien? Bazengele Pierre atene nyen na ala? (b) A lingbi e sara ye tongana nyen tongana a sara ngangu na e ndali ti so e yeke aTémoin ti Jéhovah?

14 Laso, azo kutu mingi atene ala yeke aChrétien, me “na lege ti sarango ye ti ala, ala bere tënë ti [Nzapa], ngbanga ti so ala yeke azo so a ke ala, azo ti mango yanga pëpe nga a bâ so ala lingbi pëpe na mbeni nzoni kua.” (Tite 1:16). A yeke nzoni e girisa ape so na ngoi ti akozo Chrétien, mingi ti azo ake atâ Chrétien. A yeke ndali ni la bazengele Pierre atene: “Tongana a yeke zonga ala ndali ti iri ti Christ, ala duti na ngia, ngbanga ti so . . . yingo ti Nzapa . . . ayeke duti na ndo ti ala.”—1 Pi. 4:14.

15 Tënë so abâ nga aTémoin ti Jéhovah laso? En, ndali ti so e yeke fa tënë ti komandema ti Jésus. Tongaso, tongana a ke e ndali ti so iri ti Jéhovah ayeke na ndo ti e ayeke legeoko tongana ‘a zonga e ndali ti iri ti Jésus Christ’. Jésus atene na awato ti lo, lo tene: “Mbi ga na iri ti Babâ ti mbi na ala yamba mbi pëpe.” (Jean 5:43). Ti peko tongana azo asara ngangu na mo na fango tënë sara ye na mbeto ape. Ngangu so ala sara na mo afa so Nzapa abâ mo na nzoni lê nga yingo ti lo ‘ayeke na ndo ti mo’.

16, 17. (a) Awakua ti Jéhovah na yâ ti dunia kue abâ kua ti fango tënë tongana nyen? (b) Nyen la mo leke na bê ti mo ti ngbâ ti sara?

16 Girisa nga ape so na yâ ti dunia kue wungo ti azo so ayeda na tâ tënë angbâ ti gue na ni li. Même na yâ ti aterritoire so a fa tënë dä mingi, e ngbâ ti wara azo so ayeda na tâ tënë na so e lingbi ti fa na ala pendere tënë ti salut ti e. Zia e kiri lakue ti bâ azo so ayeda na tënë ni nga tongana lege ayeke dä e manda Bible na ala, e mû maboko na ala ti gue na li ni ti mû tere ti ala na Jéhovah nga ti wara batême. Peut-être tënë ti bê ti mo ayeke tongana ti Sarie so ayeke na Afrika ti Mbongo so ayapu na yâ ti kua ti fango tënë ahon ngu 60 awe. Lo tene: “Mbi kiri singila mingi ndali ti sandaga ti Jésus, mbi lingbi ti duti na nzoni songo na Jéhovah, Gbia ti dunia kue, nga mbi yeke na ngia so mbi lingbi ti fa iri ti lo so ayeke na gloire na azo.” Sarie na koli ti lo Martinus amû maboko na azo mingi nga na amolenge ti ala ota ti ga awakua ti Jéhovah. Sarie atene nga lo tene: “Mbeni kua nde ti mû ngia na zo tongaso ayeke dä ape. Na lege ti yingo vulu ti Jéhovah, lo mû na e kue ngangu so e yeke na bezoin ni ti ngbâ ti sara kua so amû lege na azo ti sö fini ti ala.”

17 Atâa e wara batême awe wala e yeke sara ngangu ti wara ni, a lingbi e kiri singila mingi ndali ti pasa so e yeke na ni ti duti na yâ ti congrégation ti aTémoin ti Jéhovah so ayeke na yâ ti dunia kue. Tongaso, ngbâ ti fa nda ti tënë kue na ndo ti nzoni tënë nga sara ngangu ti tene aye ti dunia ti Satan asara si mo ga sioni ape. Tongana mo sara tongaso, mo yeke mû gonda na Babâ ti e ti yayu so aye e mingi so e yeke na pasa ti tene iri ti lo so ayeke na gloire ayeke na ndo ti e.