Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) JUIN 2014

Atënë so azo ahunda

Atënë so azo ahunda

A yeke na lege ni ti tene aChrétien azö kuâ ti azo ti ala so akui?

Bible atene pëpe so ti zö kuâ ti mbeni zo ayeke sioni.

Ambeni mbaï ti Bible afa so a zö lani kuâ ti azo so akui wala a zö abio ti ala (Jos. 7:25; 2 Chron. 34:4, 5). Peut-être a sara tongaso lani na azo so a bâ so ala kpa pëpe ti tene alu ala tongana tanga ti azo. Me a yeke pëpe azo kue so a zö kuâ ti ala la ayeke azo so a bâ so ala kpa pëpe ti tene a lu ala.

E hinga ni na lege ti mbaï ti kuâ ti Gbia Saül na amolenge ti lo ti koli ota. Ala osio kue akui lani na yâ ti bira so ala sara na aPhilistin. Na popo ti amolenge ti Saül so akui, mo yeke wara Jonathan so ayeke lani nzoni kamarade ti David na so ayeke be-ta-zo na lo. Tongana azo ti Israël so asara mbeto pëpe so ayeke na Jabès ti Galaad amä tënë ti ye so asi, ala mû kuâ ti Saül na ti amolenge ti lo ala zö ni nga ala lu abio ti ala. Na pekoni David agonda ala teti ye so ala sara so.—1 Sam. 31:2, 8-13; 2 Sam. 2:4-6.

Bible amû na e beku so a yeke zingo ande azo so akui. So aye ti tene so Nzapa ayeke kiri na azo so akui na fini. Jéhovah ayeke na ngangu so katikati ni ayeke dä ape. Lo lingbi ti kiri na azo so akui na fini na mbeni tere so ayeke fini ni atâa a zö kuâ ti ala zongo wala pëpe. A-Hébreu ota so ayeke be-ta-zo asara lani pëpe mbeto ti kuâ na ngoi so Gbia Nebucadnetsar amû yanga ti tene a bi ala na yâ ti four ti wâ. Ala sara lani mbeto pëpe ndali ti so ala hinga so même tongana a zö ala na wâ, Nzapa alingbi ti zingo ala (Dan. 3:16-18). Legeoko nga, awakua ti Jéhovah be-ta-zo so akui na yâ ti acamp so aNazi asara pasi na azo dä na so a zö kuâ ti ala zongo ahinga so Nzapa alingbi ti zingo ala. Awakua ti Jéhovah be-ta-zo nde nde akui ngbanga ti so abombe asungba na afâ ala wala ambeni ye nde asara si ala kui na a wara kuâ ti ala ape. Me Jéhovah ayeke zingo ala.—Apoc. 20:13.

Jéhovah ayeke pëpe na bezoin ti bungbi ambage ti tere ti mbeni zo so akui oko oko kue awe si lo zingo zo ni. Zingongo aChrétien so a soro ala ti gue na yayu afa ni polele. Legeoko tongana ti so a zingo lani Jésus na “a kiri na lo na fini na yâ ti yingo,” a zingo aChrétien so a soro ala ti gue na yayu; ala yeke tâ gi a-oko zo so akui si a zingo ala me na yâ ti yingo. Tere ti ala ti zo so ala yeke na ni na sese ge la ala gue na ni na yayu ape.—1 Pi. 3:18; 1 aCor. 15:42-53; 1 Jean 3:2.

A yeke pëpe ye so a sara na kuâ ti azo so akui la asara si e yeke na beku so a yeke zingo azo so akui, me a yeke mabe so e yeke na ni na ngangu so Nzapa ayeke na ni nga nzara so lo yeke na ni ti sara si azendo ti lo aga tâ tënë (Kus. 24:15). E hinga pëpe mbilimbili tongana nyen la Nzapa azingo ândö azo nga tongana nyen la lo yeke zingo ande azo. Me e zia confiance ti e kue na Jéhovah. Lo mû na e “tâ beku” na lege so lo zingo Jésus.—Kus. 17:31; Luc 24:2, 3.

A yeke nzoni aChrétien agbu li ti ala na ndo ti ngobo ti kodoro ti ala, pensé ti azo ti ndo so ala yeke dä nga na aye so ndia ti kodoro ahunda ti sara tongana mbeni zo akui (2 aCor. 6:3, 4). Ni la, a yeke ti zo oko oko wala ti sewa oko oko ti yeda wala ti ke ti tene a zö kuâ ti mbeni fami ti lo so akui.