Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) MAI 2014

‘Kobe ti mbi ayeke ti sara ye so bê ti nzapa aye’

‘Kobe ti mbi ayeke ti sara ye so bê ti nzapa aye’

Nyen la anzere na mo mingi nyen? A yeke aye so azo ayeke sara ka, aye tongana mariage, bango lege ti sewa, wala dutingo ndo oko na akamarade la anzere na mo mingi? Kite ayeke pëpe so a nzere na mo ti te kobe ndo oko na ambeni zo so mo ye ala. Me e so e yeke awakua ti Jéhovah, tongana e sara ye so bê ti Nzapa aye, e manda Mbeti ti lo nga e fa nzoni tënë e yeke wara ye ti nzoni dä ape?

Na yâ ti mbeni bia so David, gbia ti Israël ti giriri, ahe ti gonda na Wasarango ye, lo tene: “Mbi ye ti sara ye so bê ti Mo aye, O Nzapa ti mbi, Ndia ti Mo ayeke na yâ bê ti mbi.” (Ps. 40:9). Atâa so David awara akpale nga azo asara ngangu na lo, a nzere na lo mingi ti sara ye so Nzapa aye. Biani, a yeke gi pëpe David oko la lani ayeke wakua ti Jéhovah so anzere na lo ti sara na tâ Nzapa.

Bazengele Paul afa so tënë ti versê ti Psaume 40:9 abâ Christ, wala Messie, lo tene: “Tongana [Jésus a]lï na yâ ti dunia so, lo tene: ‘“ Mo ye sandaga ti anyama nga na offrande pëpe, me mo leke mbeni tere ndali ti mbi. Mo yeda pëpe na a-offrande so a zö ni kue na wâ nga offrande so a mû ndali ti siokpari.” Tongaso mbi tene: “Ô Nzapa, bâ, mbi ga ti sara ye so bê ti mo aye (a sû tënë na ndo ti mbi na yâ ti mbeni mbage ti buku ni).”’”—aHéb. 10:5-7.

Na ngoi so Jésus ayeke lani na ndo ti sese a nzere na lo ti bâ aye so Nzapa asara, ti duti ndo oko na akamarade nga ti te ye legeoko na azo (Mat. 6:26-29; Jean 2:1, 2; 12:1, 2). Me, ye so ayeke lani kota mingi na lê ti lo nga anzere mingi na lo ahon tanga ti aye kue ayeke ti sara ye so bê ti Babâ ti lo ti yayu aye. Ni la, Jésus atene: “Kobe ti mbi ayeke ti sara ye so bê ti lo so atokua mbi aye nga ti hunzi kusala ti lo.” (Jean 4:34; 6:38). Adisciple ti Jésus amanda na tere ti lo, so lo yeke Maître ti ala, tongana nyen ti duti na tâ ngia. Na ngia na bê ti ala, ala fa tënë ti Royaume na azo na bê ti ala kue nga na nzara ni.—Luc 10:1, 8, 9, 17.

‘ALA GUE, ALA SARA SI AZO AGA ADISCIPLE’

Jésus amû yanga lani na adisciple ti lo, lo tene: “Ala gue, ala sara si azo na popo ti amara kue aga adisciple. Ala batize ala na iri ti Babâ, na ti Molenge na ti yingo vulu. Ala fa na ala ti bata aye kue so mbi mû yanga na ala ti sara. Bâ, mbi yeke na tere ti ala juska na lâ ni so aye ti ngoi so ayeke gue ti hunzi.” (Mat. 28:19, 20). Ti sara kua so, a hunda ti gue na ndo kue so azo ayeke dä ti fa tënë na ala, ti kiri  ti bâ azo so ayeda na tënë ni na ti manda Bible na ala. Sarango kua so ayeke sara si zo aduti na ngia mingi.

Ndoye apusu e ti ngbâ ti fa tënë atâa so azo asara sanka ti tënë ni

Atâa azo amä e wala pëpe, bango ndo so e yeke na ni la ayeke mû lege na e ti ngbâ ti duti na ngia ti fa tënë. Ngbanga ti nyen la e yeke ngbâ ti fa nzoni tënë atâa azo asara sanka ti tënë ni? A yeke ngbanga ti so e hinga so tongana e fa tënë ti Royaume nga e sara si azo aga adisciple, e yeke fa so e ndoye Nzapa nga na amba ti e. Tongana e sara ni e yeke sö fini ti e nga na ti azo so ayeke nduru na e (Ézéch. 3:17-21; 1 Tim. 4:16). Zia e bâ ambeni ye so amû maboko na ambeni mba ti e ti ngbâ ti fa tënë na nzara ni wala ti kiri ti wara ngia ti ala na yâ ti aterritoire so azo ni aye ti mä nzoni tënë ape.

FA TËNË NA ALEGE KUE SO AZI NA MO

Ti sara kua na anzoni hundango ndo na fango tënë ayeke ga mingi ni na aye ti nzoni. Na mbeni ndapre, Amalia abâ mbeni koli so ayeke diko mbeti-sango na mbeni place ti wungo tere. Lo ga nduru na tere ti koli ni na lo hunda lo wala lo diko mbeni nzoni tënë na yâ ti mbeti-sango ni. Na ngoi so koli ni atene ni wara nzoni sango na yâ ni ape, Amalia atene na lo, a tene: “Mbi ga na ala nzoni tënë ti Royaume ti Nzapa.” Tënë ni anzere na koli ni na lo yeda ti manda Bible. Amalia awara lege ti to nda ti manda Bible na azo ota na place ti wungo tere so.

Janice asara si place ti kua ti lo aga territoire so lo yeke fa tënë dä. Na ngoi so mbeni zo so ayeke bata ndo ni nga na mba ti lo afa so mbeni article ti Tour ti Ba Ndo anzere na ala, Janice ayeda ti ga na ala apériodique lakue lakue. Janice asara nga tongaso na mbeni mba ti lo ti place ti kua so anzere na lo ti diko aye nde nde so a sara tënë ni na yâ ti a-Tour ti Ba Ndo nga na a-Réveillez-vous! Ye so asara si mbeni zo ti kua ni nga ahunda ti wara apériodique. Janice atene: “So tâ tufa ti Jéhovah la!” Na ndani lo wara azo 11 so lo yeke mû apériodique na ala lakue.

DUTI NA NZONI BANGO NDO NA NDO TI AZO SO MO FA TËNË NA ALA

Mbeni surveillant so ayeke gue na ando nde nde ahunda na awafango tënë so tongana ala fa tënë da na da, a yeke nzoni na nda ti lisoro ni ala tene gi pëpe na zo ni so ala yeke kiri mbeni lâ. Me a lingbi ala hunda zo ni atene: “Mo ye ti tene mbi fa na mo tongana nyen la e yeke manda Bible na azo?” wala “Lawa la mo ye ti tene mbi kiri ti tene e sara lisoro ti e ni, nga na l’heure ti nyen?” Surveillant ni atene so sarango kusala na kode so asara si aita ti congrégation so lo yeke dä ato nda ti manda Bible na azo 44 na yâ ti yenga oko.

Tongana e kiri hio ti sara avizite ti e, même gi na yâ ti alango kete na peko ti so e fa tënë na mbeni zo, alingbi ti ga na aye ti nzoni. Ngbanga ti nyen? Ngbanga ti so tongana e sara tongaso e fa so e ye mingi ti mû maboko na azo so aye biani ti hinga atënë ti Nzapa so ayeke na yâ ti Bible. Na ngoi so a  hunda mbeni wali ti hinga ngbanga ti nyen la lo yeda ti manda Bible na aTémoin ti Jéhovah, lo tene: “Mbi yeda ti manda Bible ngbanga ti so mbi bâ so ala pensé na mbi nga ala ye mbi.”

Mo lingbi ti hunda wa ti da ni, mo tene: “Mo ye ti tene mbi fa na mo tongana nyen la e yeke manda Bible na azo?”

Na peko ti so Madaí asara Ekole ti aPionnier, gi na yâ ti kete ngoi na peko ti ekole ni, lo manda Bible na azo 15 nga lo mû ambeni étude ti lo 5 na ambeni ita. Mingi ti azo so lo manda Bible na ala ayeke gue na abungbi lakue. Nyen la amû maboko na Madaí ti to nda ti gbâ ti a-étude? Ekole so lo sara amû maboko na lo ti bâ so, a yeke kota ye ti tene lo ngbâ ti kiri ti bâ azo so ayeda na tënë ni juska lo wara ala. Mbeni ita so amû maboko na azo mingi ti manda Bible atene: “Mbi bâ so ti ngbâ lakue ti kiri ti sara avizite ayeke kota ye so alingbi ti mû maboko na azo so aye ti hinga Jéhovah.”

Tongana e kiri hio ti sara avizite, e fa so e bi bê ti e biani na azo so aye ti hinga ye na ndo ti Bible

A hunda ti tene e sara ngangu mingi si e kiri e sara avizite nga a-étude. Me aye ti nzoni so e yeke wara na pekoni ahon ngangu kue so e sara. Tongana e fa tënë nzoni, e yeke mû maboko na azo ti “si na tâ hingango ye na ndo ti tâ tënë”, na ye so alingbi ti sara si ala sö fini ti ala (1 Tim. 2:3, 4). Ti ti e, e yeke duti na ngia so mara ni ayeke dä ape.