Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) FÉVRIER 2014

A futa lani womua ti kodoro ti Sarepta ndali ti mabe ti lo

A futa lani womua ti kodoro ti Sarepta ndali ti mabe ti lo

MBENI womua so ayeke wayere agbu molenge ti lo ti koli na kate ti lo, gi oko molenge ti lo la. Li ti lo akpe. Nyen la asi nyen? Ade ti ninga ape lo yô kuâ ti molenge ti lo na maboko ti lo na lo yeke sû gbagba ti lo. Fadeso womua so abâ molenge ti lo so a zingo lo na kuâ nga a nzere na lo ti bâ ngia na yanga ti molenge ti lo. Gene so aga na ndo ti lo atene na lo: “Bâ, molenge ti mo la!”

A zingo molenge so na kuâ asara ngu 3000 na ndo ni awe. A yeke ye so apika bê mingi. A sara tënë ni na yâ ti Bible na mbeti oko ti aGbia chapitre 17. Gene ni ayeke Élie so ayeke mbeni prophète ti Nzapa. Ka mama ti molenge ni? A yeke mbeni womua so ayeke na kodoro ti Sarepta me a fa iri ti lo ape. Zingongo molenge ti lo na kuâ ayeke mbeni kota ye so akpengba mabe ti lo. Tongana e gbu li ti e na ndo ti lo, e yeke manda ande ambeni kpengba ye.

ÉLIE AWARA MBENI WOMUA SO AYEKE NA MABE

Jéhovah afa so na ngoi ti komandema ti Ahab, sioni gbia ti Israël mbeni kota buru so aninga ayeke tï. Na pekoni so Élie asara tënë ti kota buru ni, Nzapa ahonde lo ti tene Ahab asara sioni na lo ape na lo bata lo na lege ti miracle lo mû na lo mapa na nyama na lege ti apakpo. Na pekoni, Jéhovah atene na Élie atene: “Mo londo, mo gue na Sarepta kodoro so ayeke na sese ti Sidon, na mo duti kâ. Bâ, Mbi komande mbeni womua kâ ti mû kobe na mo.”—1 aGbia 17:1-9.

Na ngoi so Élie asi lani na Sarepta, lo wara mbeni womua so ayeke wayere so angbâ ti gi keke ti wâ. A yeke wali so la ayeke mû ande kobe na prophète ni? Lo yeke mû na lo kobe ni tongana nyen so lo yeke na ye ape so? Atâa agingo bê kue so Élie ayeke na ni lani, lo komanse ti sara lisoro na wali ni, lo tene: “Mbi hunda mo ti ga na kete ngu na yâ kangu, mbi nyon.” Na ngoi so lo gue ti ga na lo ngu ni, Élie akiri atene na lo: “Mbi hunda mo ti ga na nduru mapa na maboko ti mo.” (1 aGbia 17:10, 11). A yeke ngangu na womua ni ape ti mû  ngu na Élie, me ti mû na lo mapa ayeke mbeni kpale na lo.

Womua ni atene na lo: “[Jéhovah, FD] Nzapa ti mo ayeke! mbi yeke na mapa pëpe, gi fuku so alingbi na maboko oko ayeke na yâ ti ta, na kete kete mafuta ayeke na yâ ti ngbenda, na fadeso mbi yeke gi keke ti wâ use, si mbi lingbi gue ti leke kobe so teti mbi na molenge ti mbi, si e lingbi te so, na e kui.” (1 aGbia 17:12). Zia e gbu li ti e na ndo ti ye so lisoro so aye ti fa.

Womua so ahinga so Élie ayeke mbeni zo ti Israël so akpe mbeto ti Nzapa. Ye so asigigi polele na yâ ti tënë so lo tene ‘Jéhovah Nzapa ti mo ayeke.’ A yeke polele so atâa so lo hinga ambeni ye na ndo ti Nzapa ti azo ti Israël, tongana lo ye ti sara tënë ti Jéhovah lo yeke tene pëpe “Nzapa ti mbi”. Lo lango na kodoro ti Sarepta so ayeke na gbe ti komandema ti Phénicie gbata ti Sidon. Kite ayeke pëpe so azo so ayeke voro Baal ayeke lani na Sarepta. Me, Jéhovah abâ mbeni ye ti nzoni na mbage ti womua so.

Atâa so womua so ayeke wayere ayeke na popo ti azo so ayeke voro ayanda, lo fa so lo yeke na mabe. Jéhovah atokua prophète Élie na womua ni ndali ti nzoni ti womua ni nga ndali ti nzoni ti prophète ni. E lingbi ti manda mbeni nzoni ye dä.

A yeke pëpe azo kue so ayeke na kodoro ti Sarepta la ayeke voro Baal. So Jéhovah atokua Élie na womua so afa so Jéhovah ayeke bâ nzoni bibe so ambeni zo so ade aga wakua ti lo ape ayeke na ni. Biani, “na yâ ti amara kue, zo so akpe mbeto ti lo na asara ye so ayeke mbilimbili, lo yeke nzere na lê ti Nzapa.”—Kus. 10:35.

Tongana nyen la azo mingi so ayeke na yâ ti territoire ti mo ayeke tongana womua ti Sarepta? Atâa so azo so ayeke na tere ti ala ayeke na yâ ti vorongo nzapa ti wataka, ala lingbi ti ye mbeni ye ti nzoni. Peut-être ala hinga tënë kete na ndo ti Jéhovah wala ala hinga ye oko ape na ndo ti lo na ala yeke na bezoin ti tene amû maboko na ala ti voro lo. Mo yeke gi mara ti azo so nga mo yeke mû maboko na ala?

“KOZONI, MO SARA KETE GÂTEAU TETI MBI”

Gbu li nzoni na ndo ti ye so Élie ahunda na womua so ti sara. Womua ni alondo ti tene na lo so tongana ni sara kobe so tënë ti ni na molenge ti ni si ani te ni awe ani yeke kui. Me, Élie atene nyen? Lo tene: “Mo sara mbeto pëpe, mo gue mo sara ye so mo tene, me kozoni, mo sara kete gâteau teti mbi, na mo ga na ni na mbi, na nda ni, mo sara mbeni teti mo mveni na molenge ti mo. Teti [Jéhovah, FD] Nzapa ti Israël atene tongaso, Fade fuku so ayeke na yâ ti ta a hunzi pëpe, na mafuta so ayeke na yâ ti ngbenda awe pëpe juska lâ ni so [Jéhovah, FD] ato ngu-nduzu na sese so.”—1 aGbia 17:11-14.

Ambeni zo alingbi ti tene: ‘Nyen? e mû tanga ti kobe ti e na mo, so mara tënë ti nyen?’ Me womua so lo sara ye lani tongana nyen. Atâa so lo hinga ye mingi na ndo ti Jéhovah ape, lo yeda na tënë so Élie atene, na lo sara ye so Élie ahunda na lo ti sara. So ayeke mbeni kota tara ndali ti mabe ti lo, me lo mû desizion na lege ti ndara.

Mabe so womua so ayeke na ni na Jéhovah, Nzapa ti Élie, la abata fini ti lo nga na ti molenge ti lo

Jéhovah azia womua so ayeke wayere so ape. Gi tongana ti so Élie atene na lo, Jéhovah asara si kobe ti lo ni akiri aga mingi na alingbi na Élie, na womua ni nga na molenge ti lo juska buru ni ahunzi. Biani, ‘fuku so ayeke na yâ ti ta ahunzi pëpe, na mafuta so ayeke na yâ ti ngbenda awe pëpe, alingbi na tënë ti Jéhovah so Lo tene na lege ti Élie.’ (1 aGbia 17:16; 18:1). Tongana womua so asara fade ye so Élie ahunda na lo so ape, na lo mû kete tanga ti fuku ti lo so nga na kete mafuta ti lo so lo sara na gâteau gi teti  lo na molenge ti lo, ka lo yeke wara mbeni ye encore ti te ape. Me lo sara ye na mabe, lo zia bê ti lo na Jéhovah nga lo mû kobe na Élie kozo.

Ye so e manda ayeke so Nzapa ayeke iri tënë nzoni na ndo ti azo so afa so ala yeke na mabe. Tongana mo yeke na mabe na ngoi so mo tingbi na ambeni ye so alingbi ti sara si mo duti be-ta-zo ape, Jéhovah ayeke mû ande maboko na mo. Lo lingbi ti ga Zo so ayeke mû ye na mo, Zo so ayeke bata mo nga Kamarade ti mo ti mû maboko na mo ti gbu ngangu na yâ ti tara ni.—Ex. 3:13-15.

Na ngu 1898, Tour ti Ba Ndo (Zion’s Watch Tower) afa mbeni ye so e lingbi ti manda na lege ti mbaï ti womua so: “Tongana wali so ayeke lani na mabe so asara si lo mä yanga, lo lingbi biani na mungo maboko so Seigneur amû na lo na lege ti prophète; tongana lo yeke lani na mabe ape, a lingbi fade ti wara mbeni womua nde so ayeke na mabe. A yeke nga legeoko tongaso teti e, na angoi nde nde na yâ ti fini ti e Seigneur ague na e na ndo so lo yeke tara mabe ti e dä. Tongana e yeke na mabe, a yeke iri ande tënë nzoni na ndo ti e, me tongana e yeke na mabe ape, a yeke iri nga ande tënë nzoni na ndo ti e ape.”

Na ngoi so e tingbi na ambeni tara, a lingbi e gi fango lege ti Jéhovah na yâ ti Bible nga na yâ ti ambeti ti e aTémoin ti Jéhovah. Na pekoni, a lingbi e sara ye ague oko na fango lege ti Jéhovah même tongana e bâ so ye so lo hunda na e ti sara ayeke ngangu na e ti yeda na ni. E yeke wara ande aye ti nzoni mingi tongana e sara ye ague oko na tënë ti ndara so ayeke na aProverbe so atene: “Zia bê ti mo kue na L’Éternel, na zia bê ti mo na hingango ye ti mo mveni pëpe. Mo bi bê ti mo na Lo na lege ti mo kue, na fade Lo sara si lege ti mo aga mbilimbili.”—aProv. 3:5, 6.

‘MO GA NA NDO SO TI FÂ MOLENGE TI MBI?’

Womua so atingbi na mbeni ye nde so akiri atara mabe ti lo. Bible atene so “na peko ti ye so, kobela asara molenge ti womua, mveni ti da ni; na lo zia ti wu teti kobela ni ahon ndo ti lo.” Teti so mama so ayeke na vundu so aye ti hinga nda ti ye ti ngangu so, lo tene na Élie, lo tene: “Tënë nyen ayeke na popo ti mbi na mo? O zo ti Nzapa. Mo ga na ndo so ti dabe mbi na sioye ti mbi na ti fâ molenge ti mbi?” (1 aGbia 17:17, 18). Ngbanga ti nyen womua so atene atënë ti songo bê so?

Wali so adabe ti lo na mbeni siokpari so lo sara so asara si lo gi bê ti lo mingi? Lo pensé lani so Nzapa la atokua Élie ti fâ molenge ti lo nga ayeke punition ti Nzapa? Bible asara tënë na ndo ni ape, me mbeni ye ayeke dä so ayeke polele: Womua so atene pëpe so Nzapa asara ye na mbage ti ni na lege ni ape.

Élie asara vundu mingi ngbanga ti kuâ ti molenge ti womua so nga na tënë so womua ni atene ti fa so a yeke ngbanga ti so Élie aga na ndo ti lo la asara si lo wara kota vundu. Na peko ti so Élie ayô molenge ni lo gue na lo na ndo ti lango, lo toto lo tene: “O L’Éternel Nzapa ti mbi, womua so mbi duti na lo, Mo ye ti sara sioye na lo na lege so Mo fâ molenge ti lo?” Prophète ni abâ ti lo so a yeke na lege ni ape ti tene wali so asara ye na nzoni bê nga lo yeke zo ti yambango agene so abâ pasi mingi tongaso. Lo hinga nga so iri ti Nzapa ayeke wara zonga na a sara si lo gi bê ti lo mingi. Tongaso, Élie avoro yanga na Nzapa, lo tene: “O L’Éternel Nzapa ti mbi, mbi voro Mo, Mo zia âme ti molenge so akiri na lo.”—1 aGbia 17:20, 21.

“BÂ, MOLENGE TI MO AYEKE NA FINI”

Jéhovah ayeke mä lani sambela ti Élie. Lo hinga so womua ni abâ lege ti prophète ti lo nga lo fa so lo yeke na mabe. Nzapa azia si tere ti molenge ni ason na lo kui ndali ti so lo hinga so a yeke zingo molenge ni nga ye so ayeke mû ande beku na azo kue. So ayeke kozo zingongo zo na kuâ so Bible asara tënë ni. Na ngoi so Élie avoro tere ti lo na Jéhovah, Jéhovah akiri na molenge ni na fini. Tara ti bâ ngia so womua so ayeke na ni na ngoi so Élie atene na lo, a tene: “Bâ, molenge ti mo ayeke na fini!” Tongaso, womua ni atene na Élie atene: “Fadeso mbi hinga mo yeke zo ti Nzapa, na mbi hinga tënë ti L’Éternel so ayeke na yanga ti mo ayeke tâ tënë.”—1 aGbia 17:22-24.

Tënë so ayeke na kozo mbeti ti aGbia chapitre 17 akiri afa ambeni ye nde pëpe na ndo ti wali so. So Jésus asara nzoni tënë ti wali so, peut-être wali so asara lani na Jéhovah be-ta-zo na yâ ti fini ti lo kue (Luc 4:25, 26). Aye so asi na wali so afa na e so Nzapa ayeke iri tënë nzoni na ndo ti azo so asara ye ti nzoni na awakua ti lo (Mat. 25:34-40). A fa so Nzapa ayeke bâ lege ti azo so ayeke be-ta-zo même na yâ ti akpale so ayeke ngangu mingi (Mat. 6:25-34). A mû lege na e ti hinga biani so Jéhovah ayeke na nzara ti zingo azo so akui nga lo yeke na ngangu ti sara ni (Kus. 24:15). So ayeke biani ambeni raison so ndali ni e yeke dabe ti e na ye so asi na womua ti Sarepta.