Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) FÉVRIER 2014

Jéhovah ayeke kota Kamarade ti e

Jéhovah ayeke kota Kamarade ti e

“A iri [Abraham] ‘kamarade ti Jéhovah.’”—JACQ. 2:23.

1. Teti so Nzapa asara e na image ti lo, e yeke na ngangu ti sara nyen?

‘TONGANA mo bâ molenge ni mo bâ babâ ni awe.’ A yeke tënë so azo mingi ayeke tënë ka ti sara tënë ti mbeni molenge so akpa babâ ti lo mingi. A yeke tâ tënë so ambeni molenge akpa ababâ wala amama ti ala mingi. A yeke na lege ni ndali ti so ala la adü ala. Jéhovah, Babâ ti e ti yayu, la amû fini na aye kue (Ps. 36:10). E so e yeke amolenge ti lo, e kpa lo na alege mingi. Teti so Nzapa asara e na “image” ti lo, e yeke na ngangu so amû lege na e ti gbu li ti e, ti mû adesizion nga ti sara kamarade na amba ti e.—Gen. 1:26.

2. Ngbanga ti nyen e lingbi ti sara kamarade na Jéhovah?

2 Jéhovah alingbi ti duti kota Kamarade ti e. E lingbi ti sara kamarade na Nzapa ngbanga ti so lo ndoye e nga ngbanga ti so e mä na bê na lo nga na Molenge ti lo. Jésus atene: “Nzapa andoye tâ azo ti dunia so mingi si lo mû gi oko Molenge ti lo ndali ti ala, si zo kue so amä na bê na lo, a lingbi ti futi lo pëpe, me lo wara fini ti lakue lakue.” (Jean 3:16). Azo mingi ayeke dä so ayeke lani na kpengba songo na Jéhovah. Zia e sara tënë na ndo ti ambeni use.

 “ABRAHAM NDEKO TI MBI”

3, 4. Nyen la asara si songo ti Abraham na Jéhovah ayeke nde na songo ti azo ti Israël na Jéhovah?

3 Jéhovah airi Abraham, kotara ti azo ti Israël “ndeko ti Mbi”. (És. 41:8). Na 2 Chronique 20:7 a iri nga Abraham ndeko, wala kamarade ti Nzapa. Nyen la asara si Abraham ayeke lani na nzoni songo na Wasarango lo? A yeke kpengba mabe so lo yeke na ni na Nzapa.—Gen.15:6; diko Jacques 2:21-23.

4 Jéhovah ayeke lani Babâ ti ahale ti Abraham so ayeke mara ti azo ti Israël, nga lo yeke kamarade ti ala. Me mawa ni ayeke so, songo so ala yeke na ni na Nzapa abuba. Ngbanga ti nyen? Ngbanga ti so ala zia ti mä na bê na azendo ti Jéhovah.

5, 6. (a) Tongana nyen la Jéhovah aga Kamarade ti mo? (b) Ahundango ndo wa la a lingbi e hunda tere ti e na ni?

5 Tongana mo manda ye mingi na ndo ti Jéhovah, mabe so mo yeke na ni na lo ayeke kpengba mingi nga mo yeke ye lo mingi. Dabe ti mo na ngoi so lani mo hinga so Nzapa ayeke tâ Zo nga mo lingbi ti ga kota kamarade ti lo. Mo hinga nga so e kue a dü e na yâ ti siokpari ndali ti so Adam ake yanga ti Nzapa. Mo hinga so azo kue ayeke na siriri na Nzapa ape (aCol. 1:21). Na pekoni, mo bâ so Babâ ti e ti yayu so aye e mingi ayeke pëpe mbeni zo so ayo mingi na e nga so abi bê ti lo na e pëpe. Na ngoi so e hinga so Jéhovah amû Molenge ti lo na sandaga nga e mä na bê na sandaga ni, e to nda ti sara songo na Nzapa.

6 Tongana e gbu li ti e na ndo ti lege so e hinga na Jéhovah, a yeke nzoni e hunda tere ti e: ‘Mbi ngbâ lakue ti sara si songo ti mbi na Nzapa akpengba? Mbi yeke zia bê ti mbi kue na Jéhovah nga lâ oko oko mbi ye lo mingi ahon ti kozo?’ Mbeni koli so ayeke nga lani na kpengba songo na Jéhovah ayeke Gédéon. Zia e bâ fadeso nzoni tapande ti lo so e lingbi ti mû pekoni.

‘JÉHOVAH AYEKE SIRIRI’

7-9. (a) Ye ti dongo bê wa asi lani na Gédéon? Nyen la asi na pekoni? (Bâ foto so ayeke na tongo nda ti article ni.) (b) E lingbi ti ga kamarade ti Nzapa tongana nyen?

7 Gédéon so ayeke juge asara na Jéhovah na mbeni ngoi ti ngangu na peko ti so azo ti Israël alï na Sese ti Zendo. A-Juge chapitre 6 atene so ange ti Jéhovah asi na Gédéon na Ophra. Na ngoi ni so, mbeto ti azo ti Madian so alango nduru na azo ti Israël asara ala mingi. Ye so asara si Gédéon apika blé na yâ ti presse ti vin na mbeni ndo so a lingbi ti bâ lo dä pëpe, tongaso si lo lingbi ti honde hio anzoni lê ti blé ni. Bê ti Gédéon adö ti bâ so ange ni airi lo “walombe ti ngangu.” Atâa so Jéhovah azi azo ti Israël na Égypte, Gédéon ahunda tere ti lo wala Jéhovah ayeke mû maboko na ala na ngoi ni so. Jéhovah atene na ange ni ti tene na Gédéon so fade lo yeke mû ande maboko na lo.

8 Gédéon agi bê ti lo na ndo ti ye so lo lingbi ti sara ti “sö azo ti Israël so ayeke na tïtî azo ti Madian”. Jéhovah akiri tënë na lo polele atene: “Biani, Mbi yeke na mo, na fade mo fâ azo ti Madian legeoko tongana ala yeke azo oko.” (aJu. 6:11-16). Teti so Gédéon agi bê ti lo, lo hunda na Jéhovah ti sara mbeni ye ti fa na lo so lo yeke mû maboko na lo biani. Bâ so na yâ ti lisoro ni Gédéon ayeke na kite ape so Jéhovah ayeke dä biani.

9 Ye so asi na pekoni akpengba mabe ti Gédéon nga asara si lo ga nduru na Nzapa. Gédéon aleke kobe na lo mû na ange ni. Na lege ti miracle ange ni andu kobe ni na keke so ayeke na maboko ti lo na wâ agbi kobe ni kue. A yeke ge la Gédéon aga ti hinga so Nzapa la atokua ange ni na mbeto asara lo. Gédéon atene: “Aï, O Seigneur L’Éternel! Mbi bâ Ange ti L’Éternel lê na lê!” (aJu. 6:17-22). Ye so asi so abuba songo ti Gédéon na Jéhovah? Ên-ën. A sara si Gédéon aduti  na siriri na Nzapa. E hinga ni ndali ti so a iri lani gbalaka so Gédéon aleke na place ni so “[Jéhovah, FD] Ayeke Siriri”. (Diko aJuge 6:23, 24.) Tongana e gbu li ti e na ndo ti aye so Jéhovah asara na e lâ na lâ, e yeke bâ so lo yeke nzoni Kamarade. Tongana e sambela Jéhovah lakue, e yeke duti lakue na siriri na lo nga songo ti e na lo ayeke ngbâ ti kpengba.

FADE ZO WA LA ‘ADUTI NA TABERNACLE TI JÉHOVAH?’

10. Tongana ti so Psaume 15:3, 5 afa, aye wa la Jéhovah ahunda na e ti sara tongana e ye ti ga kamarade ti lo?

10 Ti tene Jéhovah aga Kamarade ti e a lingbi e sara ambeni ye awe si. Na yâ ti bia ti David so ayeke na Psaume 15, lo fa aye so a lingbi e sara ti ‘duti na Tabernacle ti Jéhovah’ wala ti ga kamarade ti Nzapa (Ps. 15:1). Zia e bâ fadeso aye use na popo ti aye so a hunda na e ti sara: ti pa zo pëpe nga ti sara ye na lege ni. David atene tënë so na ndo ti zo so aduti na tabernacle ti Jéhovah lo tene: “Lo pa zo na yanga ti lo ape . . . Lo yeda ti mû goro pëpe ti bi tënë senge senge na li ti zo.”—Ps. 15:3, 5FD.

11. Ngbanga ti nyen a lingbi e kpe pango ndo?

11 Na yâ ti mbeni psaume nde, David atene: “Gbanzi menga ti mo na tënë ti sioni.” (Ps. 34:14). Tongana e sara ye alingbi na wango so ape, songo ti e na Babâ ti e ti yayu alingbi ti buba. Pango ndo ayeke sarango ye ti Satan, kota wato ti Jéhovah. Tënë “Zabolo” alondo na lege ti mbeni tënë na yanga ti Grec so aye ti tene “zo ti pango ndo”. Tongana e sara hange na atënë so e yeke tene na ndo ti azo, a yeke mû maboko na e ti ngbâ nduru na Jéhovah. A lingbi e sara hange na sarango ye ti e mbilimbili na mbage ti aita so a soro ala ti mû li ni na yâ ti congrégation.—Diko aHébreu 13:17; Jude 8.

12, 13. (a) Ngbanga ti nyen a lingbi e sara ye na lege ni na yâ ti aye kue? (b) Tongana e sara ye na lege ni, ye ti pekoni ayeke nyen?

12 Azo mingi ahinga so aTémoin ti Jéhovah ayeke sara ye na lege ni. Bazengele Paul atene: “Ala sambela ndali ti e, teti e hinga e tene e yeke na nzoni yingo-ti-hinga, ngbanga ti so e ye ti sara ye mbilimbili na yâ ti aye kue.” (aHéb. 13:18). Teti so e leke na bê ti e ti “sara ye mbilimbili na yâ ti aye kue,” e yeke kpe ti wara go na ndo ti aita ti e. Na tapande, tongana ala sara kua na e, e yeke sara kue ti sara ye na ala nzoni nga ti mû na ala nginza so e na ala e mä tere dä. E so e yeke aChrétien, e yeke sara ye na lege ni na azo ti kua ti e nga na azo kue. Tongana e sara kua na mbeni ita, a lingbi e gi ti wara go na ndo ti lo pëpe ti hunda lo ti sara ambeni ye ndali ti e.

13 Fani mingi azo ti dunia so ayeke gonda aTémoin ti Jéhovah ndali ti so ala yeke sara ye na lege ni. Na tapande, wayinda ti mbeni ndokua ti lekengo ada abâ so aTémoin ti Jéhovah ayeke sara ye alingbi na tënë ti yanga ti ala. Lo tene: “Ala yeke sara ye lakue alingbi na ye so ala yeda ti sara.” (Ps. 15:4). Sarango ye tongaso ayeke mû maboko na e ti bata songo ti e na Jéhovah. Na ndo ni, a yeke mû gonda na Babâ ti e ti yayu so aye e mingi.

MÛ MABOKO NA AZO TI GA AKAMARADE TI JÉHOVAH

E yeke mû maboko na azo ti ga akamarade ti Jéhovah (Bâ paragraphe 14, 15)

14, 15. Tongana nyen la na fango tënë e lingbi ti mû maboko na azo ti ga akamarade ti Jéhovah?

14 Atâa so azo so e yeke wara ala na fango tënë ahinga peut-être so Nzapa ayeke dä, ala bâ lo pëpe tongana kota Kamarade ti ala. E lingbi ti mû maboko na ala tongana nyen? Bâ yanga so Jésus amû na adisciple ti lo 70 na ngoi so lo tokua ala ti fa tënë: “Na ndo kue so ala lï na yâ ti mbeni da, ala tene kozoni: ‘Siriri aduti na da so.’ Na tongana mbeni zo so aye siriri ayeke dä, fade siriri ti ala aduti na lo. Me tongana mbeni  zo tongaso ayeke dä pëpe, fade siriri ti ala akiri na ala.” (Luc 10:5, 6). Azo alingbi ti sara nzara ti tâ tënë mingi tongana e sara ye na nzoni bê na mbage ti ala. Tongana e sara tongaso nga na mbage ti azo so ayeke kanga lege na e, a lingbi ti sara si ala zia lege ni nga ala yeda na tâ tënë mbeni lâ.

15 Tongana e wara azo so aye tënë ti nzapa ti ala mingi wala so ayeke mû peko ti angobo ti vorongo nzapa ti wataka, e yeke ngbâ ti sara ye na mbage ti ala na nzoni bê nga ti duti na siriri na ala. E yeke yamba na ngia azo kue so aga na abungbi ti e, mbilimbili ala so bê ti ala anze ndali ti aye so ayeke si na yâ ti dunia laso nga so aye ti hinga ye mingi na ndo ti Nzapa so e voro lo. Na yâ ti a-article so li ni atene, “Bible achangé fini ti azo” na yâ ti a-Tour ti Bâ Ndo e yeke wara gbâ ti atapande ti azo tongaso.

E SARA KUA LEGEOKO NA KOTA KAMARADE TI E

16. Na lege wa e lingbi ti duti akamarade ti Jéhovah nga e lingbi ti “sara kusala maboko na maboko” na lo?

16 Mingi ni azo so ayeke sara kua oko ayeke ga akota kamarade. Azo kue so amû tere ti ala na Jéhovah awe ayeke na pasa ti duti akamarade ti lo nga ti “sara kusala maboko na maboko” na lo. (Diko 1 aCorinthien 3:9.) Tongana e fa tënë nga e sara si azo aga adisciple, e yeke kiri ti hinga ye mingi na ndo ti apendere sarango ye ti Babâ ti e ti yayu. E yeke bâ tongana nyen yingo vulu ti lo amû maboko na e ti sara kua ti e ti fango nzoni tënë.

17. Tongana nyen la kobe ti yingo so e wara na ngoi ti akota bungbi ti e afa so Jéhovah ayeke Kamarade ti e?

17 Tongana e fa tënë mingi, a yeke sara si e ga nduru mingi na Jéhovah. Na tapande, e bâ tongana nyen Jéhovah akanga lege na awato so aye ti kanga lege na kusala ti fango tënë. Lo fa lege na e nga bê ti e adö ti bâ tongana nyen la lo ngbâ ti fa ye na e na lege ti abungbi nga na ambeti ti e. Na ngoi ti akota bungbi ti e, e bâ so Jéhovah ahinga akpale ti e nga na abezoin ti e nzoni mingi. Mbeni sewa afa singila ti ala teti mbeni kota bungbi na yâ ti mbeni lettre atene: “Aye so afa na ngoi ti kota bungbi so andu bê ti e mingi. E bâ tongana nyen la Jéhovah aye e oko oko kue mingi nga lo ye ti tene e duti nzoni.” Na peko ti mbeni kota bungbi ti lango oko na Irlande, mbeni koli na wali ti lo so alondo na Allemagne asara lettre na Filiale ti fa singila ti ala ndali ti so a yamba ala nga a bâ lege ti ala nzoni. Ala tene nga atene: “Me e kiri singila mingi na Jéhovah nga na Jésus Christ Gbia so lo soro. Ala tisa e ti duti na yâ ti mara so ayeke biani beoko so. E yeke tene tënë ti dutingo beoko ni gi na yanga ape me a yeke ye so ayeke na popo ti e lâ oko oko. Aye so asi na e na ngoi ti kota bungbi ti lango oko so e sara na Dublin ayeke dabe ti e  lakue na kota pasa so e yeke na ni ti sara kua na kota Nzapa ti e legeoko na ala kue.”

AKAMARADE AYEKE SARA LISORO NA POPO TI ALA

18. Hundango ndo wa la a lingbi e hunda tere ti e na ni na ndo ti sarango lisoro na Jéhovah?

18 Akamarade ayeke ga nduru mingi na mba tongana ala sara lisoro nzoni na popo ti ala. Laso, azo ayeke sara kua mingi na Internet nga ala yeke tokua amessage mingi. Tongana e haka ngoi so e yeke mû ti sara kua na aye so na ngoi so e yeke mû ti sara lisoro na Jéhovah, kota Kamarade ti e, so wa la ayeke mingi? Jéhovah ayeke ‘Lo so amä sambela’. (Ps. 65:3). Fani oke la e yeke mû ngoi ti sara tënë na lo?

19. Tongana a yeke ngangu na e ti fa atënë ti bê ti e na Jéhovah, nyen la alingbi ti mû maboko na e?

19 A yeke ngangu na ambeni wakua ti Nzapa ti zi bê ti ala nga ti fa vundu so ayeke na yâ ti bê ti ala. Me Jéhovah aye ti tene e sara tongaso ape na ngoi so e yeke sambela (Ps. 119:145; Toto ti Jér. 3:41). Tongana e bâ so a yeke ngangu na e ti fa atënë ti bê ti e, e yeke na mbeni ye ti mû maboko na e. Paul atene na aChrétien ti Rome lo tene: “Teti kpale ni ayeke so: ye so a lingbi e sambela ndali ni tongana e yeke na bezoin ni, e hinga ni pëpe. Me yingo wani ayeke hunda teti e na atënë ti dema so asigigi pëpe. Me lo so ayeke bâ yâ ti bê ahinga nda ti yingo, teti yingo ni ayeke hunda ye tongana ti so Nzapa aye ndali ti azo so ayeke nzoni-kue.” (aRom. 8:26, 27). Tongana e diko atënë so ayeke na mbeti ti Job, Psaume nga na aProverbe na e gbu li ti e na ndo ni ayeke mû maboko na e ti fa atënë so ayeke na gbe ti bê ti e na Jéhovah.

20, 21. Tënë ti dengo bê wa e wara na yâ ti tënë ti Paul so ayeke na aPhilippien 4:6, 7?

20 Tongana e yeke na yâ ti angangu kpale, zia e dabe ti e na tënë so Paul atene na aPhilippien, lo tene: “Ala gi bê ti ala na ndo ti mbeni ye pëpe, me na yâ ti aye kue, na lege ti sambela, na lege ti vorongo tere na Nzapa nga na sambela ti kiringo singila, ala hunda na Nzapa aye so agbu bê ti ala.” Tongana e sambela Jéhovah tongaso, e lingbi ti wara ngangu nga na dengo bê ndali ti so Paul akiri atene: “Fade siriri ti Nzapa so ahon ndo ti bibe kue ayeke bata bê ti ala nga na lege ti hingango ndo ti ala na lege ti Christ Jésus.” (aPhil. 4:6, 7). A lingbi e kiri singila mingi ndali ti “siriri ti Nzapa” so mbeni ye ti lingbi na ni ayeke dä ape so ayeke bata bê ti e nga na lege ti hingango ndo ti e.

Tongana nyen la sambela ayeke mû maboko na e ti kpengba songo ti e na Nzapa? (Bâ paragraphe 21)

21 Sambela ayeke mû maboko na e ti sara si e duti na songo na Jéhovah. Tongaso, zia ‘e ngbâ ti sambela lakue.’ (1 aThes. 5:17). A lingbi e ngbâ ti kpengba songo ti e na Nzapa nga e sara ye so lo hunda na e. Zia e mû ngoi nga ti gbu li ti e na ndo ti aye ti nzoni so e wara ndali ti so Jéhovah ayeke biani Babâ ti e, Nzapa ti e nga Kamarade ti e.