Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) FÉVRIER 2014

‘Bâ gloire ti Jéhovah’

‘Bâ gloire ti Jéhovah’

Aye ti vundu alingbi ti sara ngangu mingi na ndo ti e. A lingbi ti ga ye so e yeke pensé dä mingi, a lingbi ti woko e nga a lingbi ti sara si nzara ti gigi asigigi na yâ ti e. Aye ti ngangu mingi asi na David gbia ti Israël ti giriri. Me lo hon ndo ni tongana nyen? Na yâ ti mbeni psaume so asara zo mawa, David akiri tënë atene: “Mbi toto na yanga ti mbi na L’Éternel; mbi voro L’Éternel na yanga ti mbi. Mbi fa ye so ason bê ti mbi na gbele Lo, na mbi fa ye ti vundu ti mbi na gbele Lo. Tongana ngangu ti yingo ti mbi awe na yâ mbi, mo hinga lege ti mbi.” David asara tere ti lo kete lo sambela Nzapa ti mû maboko na lo.—Ps. 142:2-4.

Na yâ ti angoi ti ngangu, David asara tere ti lo kete lo sambela Jéhovah ti mû maboko na lo

Na yâ ti mbeni psaume ni nde David ahe bia atene: “Mbi hunda ye oko na L’Éternel, na fade mbi gi ye so; a yeke ti duti na da ti L’Éternel na lâ ti mbi kue, ti bâ gloire ti L’Éternel, na ti bâ Temple ti Lo na ngia.” (Ps. 27:4). David ayeke lani Lévite ape, me tara ti bâ lo na ngoi so lo luti na gigi ti gbagba so ayeke nzoni-kue nduru na tabernacle so ayeke lani ndo so a yeke voro Jéhovah dä. Bê ti David asi na singila ni la lo ye ti mû tanga ti fini ti lo kue ti ngbâ kâ ti ‘bâ gloire ti Jéhovah’

Tënë “gloire” aye ti sara tënë ti ye so “anzere na zo ti pensé na ndo ni, ye so andu bê ti zo wala ye so tongana zo abâ ni ayeke nzere na lo.” David abâ lani lakue ye so Nzapa aleke ndali ti vorongo lo na ngia. A yeke nzoni e hunda tere ti e: ‘Mbi yeke na oko bango ndo ti David so?’

‘BÂ NA NGIA’ YE SO NZAPA ALEKE

Laso, ye so Jéhovah aleke ti mû lege na e ti ga nduru na lo, a yeke pëpe mbeni ye so e yeke bâ ni na lê ti e. Me a ndu kota temple ti Nzapa na lege ti yingo: mbeni ye so ayeke nzoni-kue so Nzapa aleke teti vorongo lo. * Tongana e ‘bâ ye so Nzapa aleke na ngia’, e nga kue e lingbi ti ‘bâ gloire ti Jéhovah.’

Bâ gbalaka ti offrande so a-zo-na-wa so a sara tere ni na gengere so a zia ni na gbele yanga ti tabernacle (Ex. 38:1, 2; 40:6). Gbalaka ni ayeke ye so afa so Nzapa ayeda na fini ti Jésus so lo mû ni na sandaga (aHéb. 10:5-10). Gbu li na ndo ti aye ti nzoni so e lingbi ti wara dä. Bazengele Paul atene: “Na ngoi so e yeke lani awato, e ga azo so akiri asara songo na Nzapa na lege ti kuâ ti Molenge ti lo.” (aRom. 5:10). Tongana e mä na bê na mênë ti Jésus so atuku, Nzapa alingbi ti bâ e na nzoni lê nga kite ayeke pëpe so lo yeke bâ e tongana akamarade ti lo. Ye so asara si ‘Jéhovah afa tënë ti bê ti Lo’ na e.—Ps. 25:14.

Teti so a “mbô asiokpari” ti e, e yeke na ‘angoi ti kiringo ti wara ngangu so alondo na Jéhovah’. (Kus. 3:19). Dutingo ti e ayeke tongana ti mbeni zo ti kanga so asara vundu ndali ti aye ti sioni so lo sara na so a zia lege ti sioni ni biani biani na ngoi so lo yeke ku ti tene a fâ lo. Na bango ye so, mbeni juge ti nzoni bê ayeke gi ti zi ngbanga ti kuâ so a dë na li ti lo. Ye so ayeke sara si tere ti zo ti kanga ni anzere mingi nga bê ti lo ayeke dë. Legeoko tongana juge so, Jéhovah abâ azo so achangé bê ti ala na nzoni lê na lo zi ngbanga ti kuâ so ayeke na li ti ala.

WARA NGIA NA VORONGO JÉHOVAH

Na popo ti aye nde nde so a yeke sara ti voro na Jéhovah, David abâ amba ti lo azo ti Israël mingi mingi so abungbi na yâ ti da ti Jéhovah. Lo bâ so a yeke diko Ndia na gbele azo na a yeke fa nda ni na ala. A yeke zö yombo nga aprêtre na aLévite ayeke sara kusala so ayeke nzoni-kue (Ex. 30:34-38; Nom. 3:5-8; Deut. 31:9-12). Aye so a sara lani na Israël ti giriri ti voro na Nzapa akpa tere na ti so ayeke sara ni laso.

Legeoko tongana ti giriri, laso “a yeke nzoni  na a nzere mingi, tongana aita aduti na beoko!” (Ps. 133:1). Azo mingi mingi aga na popo ti “sewa ti e ti aita” ti dunia kue (1 Pi. 2:17). A yeke diko Bible nga a yeke fa nda ni na gbele azo na ngoi ti abungbi ti e. Na lege ti bungbi ti Jéhovah, lo leke mbeni nzoni kapa ti fango ye ndali ti e. E yeke nga na gbâ ti kobe ti yingo so e yeke wara na lege ti ambeti ti e so amû lege na e ti manda ye e wani wala na sewa. Mbeni membre ti Bebungbi atene: “Gbungo li na ndo ti tënë ti Jéhovah so ayeke na yâ ti Bible nga na ye so a ye ti tene, nga sarango recherche ti hinga nda ti tënë ni asara si na yâ ti lango ni kue mbi yeke pensé na ndo ti apendere tâ tënë ti Bible na anzere na mbi.” Biani, ‘hingango ye alingbi ti nzere na âme ti e’.—aProv. 2:10.

Laso, awakua ti Nzapa so ayeke be-ta-zo ayeke sambela lo lâ na lâ. Na lê ti Jéhovah, asambela so ayeke tongana yombo so afun pendere na gbele lo (Ps. 141:2). A nzere na e mingi ti hinga so Jéhovah ayeke na ngia mingi tongana e ga nduru na lo na lege ti sambela.

Moïse asambela lo tene: “Zia nzobe ti L’Éternel Nzapa ti e aduti na ndo e; Mo sara si kusala ti maboko ti e aga nzoni.” (Ps. 90:17). Na ngoi so e yeke fa tënë na bê ti e kue, Jéhovah airi tënë nzoni na ndo ti kua so e yeke sara (aProv. 10:22). E lingbi ti mû maboko na ambeni zo ti hinga tâ tënë. Peut-être e gbu ngangu na yâ ti kua ti fango tënë teti angu mingi awe atâa so azo asara nzara ti tënë ni ape, e yeke na kpale ti kobela, e yeke na vundu wala a kanga lege na e (1 aThes. 2:2). Me, e ‘bâ gloire ti Jéhovah’ nga e hinga so Babâ ti e ti yayu ayeke na ngia mingi ndali ti angangu so e yeke sara.

David ahe bia atene: “L’Éternel ayeke Ye Ti Héritier ti mbi, na Kopo ti mbi. A yeke Mo so abata ndo ti mbi. Kamba ti mbi atï na ndo ti nzoni.” (Ps. 16:5, 6). David akiri singila mingi ndali ti “Ye Ti Héritier” ti lo, wala ndali ti so lo yeke na nzoni songo na Jéhovah nga na pasa so lo yeke na ni ti voro Jéhovah. Legeoko tongana David, aye ti ngangu alingbi ti si na e, me e yeke na aye ti nzoni mingi na lege ti yingo. Tongaso, zia e ngbâ ti wara ngia na vorongo Jéhovah nga ti ‘bâ na ngia’ temple ti Jéhovah na lege ti yingo.

^ par. 6Tour ti Ba Ndo ti lango 1 ti juillet, ngu 1996, lembeti 14-24 na Français.