Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) JANVIER 2014

Sara na Jéhovah kozo si angoi ti vundu asi

Sara na Jéhovah kozo si angoi ti vundu asi

“Mo dabe mo na Lo so acréé mo.”— ZO-TI. 12:3.

1, 2. (a) Wango wa na lege ti yingo ti Jéhovah Salomon amû na amaseka? (b) Ngbanga ti nyen a yeke nzoni aChrétien so ayeke na yâ ti ngu 50 nga na ala so aga mbakoro awe abibe ti ala na wango so?

NA LEGE ti yingo ti Jéhovah, Gbia Salomon atene na amaseka, lo tene: “Mo dabe mo na Lo so acréé mo, na lâ ti pendere ti mo, kozoni si lâ ti sioni aga.” “Lâ ti sioni” aye ti tene nyen? A ye ti sara tënë ti lâ ti mbakoro. Salomon asara kusala na asuma-tene ti fa akpale so ambakoro ayeke wara. Lo sara tënë ti maboko so adö, gere so adö, apembe so atuku, lê so abâ ndo nzoni ape, mê so amä ndo nzoni ape, kuä ti li so avuru nga na peko so aba. A lingbi zo a ku juska ngoi ni so asi awe si lo komanse ti sara na Jéhovah pëpe.—Diko Zo-ti-fa-tene 12:3-7.

2 Ambeni Chrétien mingi so ayeke na yâ ti ngu 50 nga na ambeni so aga mbakoro angbâ ngangu. Ala lingbi ti duti na avuru kuä ti li oko oko, me peut-être ade ala wara pëpe akpale ti seni so Salomon asara tënë ni. A-Chrétien so aga mbakoro awe alingbi ti bâ nzoni na lege ti wango so Salomon amû na amaseka, lo tene: “Mo dabe mo na Lo so acréé mo”. Wango so aye ti tene nyen?

3. Ti dabe ti e na Kota Wasarango e andu aye wa?

 3 Atâa tongana e sara na Jéhovah asara angu mingi awe, a yeke nzoni ti tene ngoi na ngoi e mû mbeni ngoi e gbu li ti e ti bâ tongana nyen la Jéhovah ayeke kota. Fini ayeke mbeni matabisi so ayeke kota mingi. Lege so Nzapa aleke na aye so ayeke na fini afa kota ndara ti lo, na ahon gbungo li ti zo. Gbâ ti apendere ye nde nde so Jéhovah acréé asara si e yeke na ngia. Tongana e gbu li ti e na ndo ti aye so Jéhovah acréé, e yeke kiri ti dabe ti e na ndoye ti lo, ndara ti lo nga na ngangu ti lo (Ps. 143:5). Me ti dabe ti e na Kota Wasarango e aye nga ti tene ti dabe ti e na aye so lo hunda na e. Tongana e gbu li ti e na ndo ti aye so kue, a yeke pusu e ti fa singila ti e na Wasarango e na lege so e yeke sara na lo na bê ti e kue na ngoi kue so e yeke na fini.—Zo-ti. 12:15.

APASA SO E YEKE NA NI TONGANA E YEKE MBAKORO

4. Hundango ndo wa aita so aga Chrétien asara angu mingi awe alingbi ti hunda tere ti ala na ni? Ngbanga ti nyen?

4 Tongana mo ga Chrétien asara angu mingi awe hunda tere ti mo: ‘Nyen la mbi lingbi ti sara na fini ti mbi fadeso so mbi ngbâ na ngangu so?’ Tongana mo ga Chrétien aninga awe, mo yeke na apasa so ambeni zo ayeke na ni pëpe. Mo lingbi ti fa na amaseka aye so mo manda na mbage ti Jéhovah. Mo lingbi ti kpengba amba ti mo tongana mo fa na ala aye ti nzoni so mo wara na yâ ti kua ti Nzapa. Gbia David asambela ti tene lo fa na azo aye so lo manda na mbage ti Jéhovah. Lo tene: “O Nzapa, a komanse tongana mbi de molenge, Mo fa lege na mbi . . . Tongana mbi ga mbakoro na kuali ti mbi avuru, O Nzapa, Mo zia mbi pëpe, juska mbi fa tënë ti ngangu ti Mo na awagame so ayeke ga.”—Ps. 71:17, 18.

5. Tongana nyen la aChrétien so aga mbakoro alingbi ti fa na azo aye so ala manda?

5 Tongana nyen la mo lingbi ti mû maboko na azo ti wara ndara so mo wara na yâ ti angu mingi? Mo lingbi ti tisa amaseka na ndo ti mo ti tene mo na ala asara lisoro so akpengba zo? Mo lingbi ti hunda na ala ti tene mo na ala asigigi na fango tënë nga ti fa na ala ngia so mo wara na yâ ti kua ti Jéhovah? Elihu atene: “Zia ambakoro asara tënë, na azo ti ngu mingi afa ndara.” (Job 32:7). Bazengele Paul awa aita-wali so asara kua ti Jéhovah asara angu mingi ti kpengba azo na lege ti tënë ti yanga ti ala nga na tapande ti ala. Lo tene: ‘Zia ambakoro-wali aduti awafango na azo ye so ayeke nzoni.’—Tite 2:3.

YE SO MO LINGBI TI SARA TI MÛ MABOKO NA AZO

6. A-Chrétien so aga mbakoro alingbi ti sara nyen?

6 Tongana mo ga Chrétien aninga mingi awe, mo lingbi ti sara ye mingi ti mû maboko na azo. Gbu li na ndo ti aye so mo hinga ni fadeso so mo hinga ni kozo ape na yâ ti angu 30 wala 40 so ahon. Mo hinga lege ti sara kua na afango ye ti Bible na yâ ti fini ti mo na yâ ti aye nde nde. Kite ayeke pëpe so mo hinga ti sara kua na tâ tënë so ayeke na yâ ti Bible na kode ti ndu bê ti azo. Tongana mo yeke ancien, mo hinga tongana nyen ti mû maboko na aita so amû mbeni sioni lege (aGal. 6:1). Peut-être mo hinga ti bâ ndo na ndo ti akua so ayeke sara na yâ ti acongrégation, na andokua ti kota bungbi wala na ndo ti kua ti lekengo Da ti Royaume. Peut-être mo hinga tongana nyen ti wa adocteur ti sara kua na ambeni kode so ahunda ti sara kua na mênë pëpe na ngoi so ala yeke opéré azo. Atâa mo hinga tâ tënë gi fade fadeso, mo hinga ambeni nzoni ye na yâ ti gigi. Na tapande, tongana mo bata amolenge, mo lingbi ti maï ambeni kode so ayeke mû maboko na zo. A-Chrétien so aga mbakoro awe alingbi ti kpengba aita ti ala awakua ti Jéhovah na lege so ala yeke fa ye na ala, ala yeke fa lege na ala nga ala yeke wa ala.—Diko Job 12:12.

7. Anzoni ye wa aChrétien so aga mbakoro alingbi ti fa na amaseka?

7 Na ambeni lege wa mo lingbi ti sara kua na akode so mo yeke na ni ti mû maboko  na azo? Peut-être mo lingbi ti fa na amaseka lege ti to nda ti mbeni étude nga ti sara ni. Tongana mo yeke mbeni ita-wali, mo lingbi ti fa na aita-wali so ade maseka na so ayeke mama ti amolenge tongana nyen ti sara akua ti ala ti Chrétien nga na oko ngoi ni ti bâ lege ti akete molenge ti ala. Tongana mo yeke mbeni ita-koli, mo lingbi ti fa na aita-koli so ayeke maseka tongana nyen ala lingbi ti mû diskur na bê ti ala kue nga ti fa tënë nzoni mingi ahon ti kozo. Mo lingbi ti fa na ala tongana nyen la ala lingbi ti sara vizite na aita so aga mbakoro awe ti kpengba ala na lege ti yingo. Même tongana mo yeke na ngangu tongana ti kozo ape, mo yeke na anzoni pasa ti fa ye na amaseka. Bible atene: “Ngangu ti apendere koli ayeke gloire ti ala, na vuru kuali ti ambakoro-koli ayeke ye ti yango-iri ti ala.”—aProv. 20:29.

FANGO TËNË NA ANDO SO BEZOIN TI AWAFANGO TËNË AYEKE DÄ MINGI

8. Nyen la bazengele Paul asara na ngoi so lo ga mbakoro?

8 Bazengele Paul angbâ ti sara kua ti Jéhovah mingi atâa so lo ga mbakoro. Lo sara lani kanga na Rome na a zi lo na ngu 61 tongaso. Me kozo ti tene a kanga lo, lo sara kua ngangu mingi nga lo wara atara mingi na yâ ti kua ti lo ti missionnaire. Lo lingbi lani ti soro ti zia lege ti kua ni na ti ngbâ ti fa tënë na Rome (2 aCor. 11:23-27). Kite ayeke pëpe so a yeke nzere lani mingi na aita so ayeke na Rome ti tene Paul angbâ amû maboko na ala. Me Paul abâ so bezoin ayeke mingi na yâ ti ambeni kodoro nde. Tongaso, lo kiri lo komanse kua ti lo ti missionnaire. Lo na Timothée na Tite ague na Éphèse, Crète nga peut-être na Macédoine (1 Tim. 1:3; Tite 1:5). E hinga ape wala lo sara lani vizite na Espagne, me lo ye lani ti gue kâ.—aRom. 15:24, 28.

9. Na ngoi wa la Pierre ague ti fa tënë na ndo so bezoin ayeke dä mingi? (Bâ foto so ayeke na tongo nda ti article ni.)

9 Bazengele Pierre ayeke peut-être na ngu 50 na ndo ni na ngoi so lo gue na ndo so bezoin ayeke dä mingi. E hinga ni tongana nyen? Tongana ngu ti lo na Jésus ayeke oko wala ngu ti lo ahon ti Jésus kete, lo lingbi ti duti na ngu 50 tongaso na ngoi ti bungbi so lo na ambeni bazengele asara na Jérusalem na ngu 49 (Kus. 15:7). Ambeni ngoi na peko ti bungbi so, Pierre ague na Babylone peut-être ti fa tënë na aJuif mingi so ayeke kâ (aGal. 2:9). Lo yeke lani kâ na ngoi so lo sû kozo mbeti ti lo, na ngu 62 tongaso (1 Pi. 5:13). Ti gue na ando so bezoin ayeke dä alingbi ti ga na akpale, me Pierre ague. Lo zia pëpe si ngu ti lo so ague na li ni akanga lege na lo ti sara na Jéhovah mingi na ti wara ngia na pekoni.

10, 11. Nyen la Robert na wali ti lo asara na ngoi so ala wara ngu 55?

10 Laso, aChrétien mingi so ayeke na yâ ti ngu 50 nga na ala so aga mbakoro awe abâ so dutingo ti ala achangé nga so ala lingbi ti sara na Jéhovah na ambeni lege nde. Ambeni ague na ando so bezoin ti awafango tënë ayeke dä mingi. Na tapande, Robert atene: “Mbi na wali ti mbi e yeke na ngu 55 na ngoi so e bâ so ambeni fini lege azi na e ti sara na Jéhovah. E yeke gi na molenge ti koli oko na lo yeke na gbe ti e mbeni ape, nga ababâ na amama ti e akui awe. Na ndo ni e wara mbeni kete nginza so ababâ na amama ti e azia na e na peko ti kuâ ti ala. Mbi leke ti tene e kä da ti e ti wara nginza ti futa na bon ti e nga ti tene a mû maboko na e juska ti tene mbi wara pension. E mä so na Bolivie azo mingi ayeda ti manda Bible nga ngere ti aye ayeke ngangu kâ ape. Tongaso, e soro ti gue. A yeke lani ngangu na e ti duti nzoni na yâ ti fini da ti e. Aye kue so ayeke na Bolivie ayeke nde na aye so e yeke na ni na Amerika ti Banga. Me angangu so e sara e wara aye ti nzoni mingi na pekoni.”

11 Robert akiri atene: “Aye kue so e sara na yâ ti fini ti e andu gi akua ti congrégation. Ambeni zo so e manda Bible na ala awara batême. Mbeni sewa so e manda Bible na azo ni, a yeke na ye mingi ape, na ala lango na mbeni kete kodoro so ayo akilomètre mingi. Me yenga oko oko, azo ti sewa ni ayeke sara  angangu voyage ti ga na kota kodoro ti sara abungbi. E yeke na ngia mingi ti bâ so azo ti sewa ni ague na li ni na kozo molenge ni ti koli amû même kua ti pionnier.”

BEZOIN TI AWAFANGO TËNË NA ANDO SO AZO NI ATENE MBENI YANGA TI KODORO NDE

12, 13. Nyen la Brian na wali ti lo asara na pekoni so lo gue na retraite?

12 Acongrégation nga na agroupe so ayeke na yanga ti kodoro nde alingbi ti wara ye ti nzoni na lege ti tapande ti aita so ayeke ambakoro. Nga, a nzere mingi ti fa tënë na ando tongaso. Na tapande, Brian so alondo na Grande-Bretagne atene so na ngoi so lo gue na retraite na ngu 65, lo na wali ti lo ayeke na ngia na yâ ti fini ti ala ape. Lo tene: “Amolenge ti e akono ahon awe, nga a yeke ngangu ti tene e wara azo so asara nzara ti tâ tënë ti tene e manda Bible na ala. A si na mbeni ngoi, mbi wara mbeni maseka-koli so ayeke Chinois so ayeke sara lani recherche na dasendagi ti ndo ni. Mbi tisa lo ti ga na bungbi na lo yeda lo ga, na pekoni mbi to nda ti manda Bible na lo. Ayenga kete na pekoni, lo ga na mbeni mba ti lo ti sarango recherche ni so ayeke nga Chinois na bungbi, ala ga use. Yenga use na pekoni lo ga na mbeni nde dä, ala ga ota, nga ti peko lo ga na mbeni nde encore ala ga osio.

13 “Na ngoi so mbeni oku Chinois ni ahunda ti manda Bible, mbi gbu li ti mbi mbi tene: ‘So mbi yeke na ngu 65 aye ti tene pëpe so mbi yeke na retraite na yâ ti kua ti Jéhovah.’ Tongaso, mbi hunda wali ti mbi so mbi hon lo na ngu use wala lo ye ti manda yanga ti Chinois. E manda ni na lege ti mango ni na ndo ti kasete. A sara ngu bale-oko na pekoni awe. Fango tënë na ando so azo ni atene yanga ti kodoro nde asara si e kiri e bâ tere ti e tongana amaseka. E wara lege ti manda Bible na aChinois 112. Mingi ti ala aga na abungbi. Mbeni oko aga pionnier na lo yeke fa tënë legeoko na e.”

Atâa so mo ga mbakoro mo lingbi ti fa tënë mingi (Bâ paragraphe 12, 13)

 DUTI NA NGIA TI SARA YE ALINGBI NA NGANGU TI MO

14. Nyen la a lingbi aChrétien so aga mbakoro ahinga? Tongana nyen la tapande ti Paul alingbi ti mû na ala ngangu?

14 Atâa so aChrétien mingi so ayeke na yâ ti ngu 50 awara anzoni lege ti sara ambeni ye na yâ ti kua ti Jéhovah, ambeni awara lege ti sara ni pëpe. Ambeni ayeke na kpale ti seni, nga ambeni ayeke bâ lege ti ababâ na amama ti ala so aga mbakoro wala ala yeke bâ lege ti amolenge ti ala. A lingbi ala hinga so Jéhovah ayeke bâ na nene ni aye kue so ala yeke sara na yâ ti kua ti lo. Tongaso, ahon ti tene bê ti ala anze ndali ti ye so ala lingbi ti sara ape, ala duti na ngia ti sara ye alingbi na ngangu ti ala. Gbu li na ndo ti tapande ti bazengele Paul. Teti angu mingi, a kanga lo, lo wara lege pëpe ti ngbâ ti sara avoyage ti lo ti missionnaire. Me na angoi kue so azo aga ti bâ lo, lo fa tënë ti Nzapa na ala nga lo mû maboko na ala ti ngbâ ti sara na Nzapa be-ta-zo.—Kus. 28:16, 30, 31.

15. Ngbanga ti nyen a lingbi e bâ aChrétien so aga mbakoro na nene ni mingi?

15 Jéhovah abâ nga na nene ni aye so aita so aga mbakoro awe alingbi ti sara na yâ ti kua ti lo. Atâa so Salomon atene so “lâ ti sioni”, wala lâ ti mbakoro, ayeke mbeni ngoi so ayeke ngangu na yâ ti fini ti zo, Jéhovah ayeke bâ na nene ni aye so aChrétien so ayeke mbakoro ayeke sara ti gonda lo (Luc 21:2-4). Aita na yâ ti congrégation abâ na nene ni tapande ti aita so aga mbakoro so angbâ be-ta-zo.

16. Apasa wa Anna awara lani ape? Nyen la lo sara ti voro Nzapa?

16 Bible asara tënë ti Anna, mbeni mbakoro-wali so ayeke be-ta-zo so angbâ lani ti gonda Jéhovah. Lo yeke lani womua so ayeke na ngu 84 na ngoi so a dü Jésus. Peut-être ngu ti lo amû lani lege na lo pëpe ti ngbâ na fini aninga ti ga mbeni disciple ti Jésus, ti tene a soro lo ti gue na yayu, wala ti gue ti fa tënë ti Royaume. Me Anna ayeke na ngia ti sara ye so alingbi na ngangu ti lo. “Lo yeke manke ti gue na temple lâ oko pëpe, lo yeke sara kusala so ayeke nzoni-kue bï na lâ”. (Luc 2:36, 37). Na tapande, lâ na lâ na ndapre nga na lakui so prêtre ayeke gue na temple ti zö yombo, Anna ayeke na popo ti azo so ayeke na yâ ti gbagba ti temple lo yeke sambela na yâ ti bê ti lo teti penze-ngbonga bale-ota tongaso. Na ngoi so lo bâ Jésus so angbâ lani bébé, lo komanse ti “sara tënë ti molenge ni na ala kue so ayeke ku ngoi ti zingo Jérusalem.”—Luc 2:38.

17. Tongana nyen la congrégation alingbi ti mû maboko na aita so aga mbakoro nga na ala so tere ti ala ason ti voro Jéhovah?

17 Laso, a yeke nzoni e gi alege ti mû maboko na aita so aga mbakoro awe wala ala so tere ti ala ason. Ambeni ita so aga mbakoro ayeke na nzara ti gue na abungbi nga na akota bungbi me ala yeke na ngangu ti gue ape. Na ambeni ndo, acongrégation ayeke leke ti tene aita so amä aye so a yeke fa na ngoi ti bungbi ni na téléphone. Me na ambeni ndo lege ayeke dä ape. Atâa so aita so alingbi ti gue na abungbi ape, ala lingbi ti mû maboko ti voro Jéhovah. Na tapande, ala lingbi ti sambela ti tene congrégation amaï.—Diko Psaume 92:13, 14.

18, 19. (a) Tongana nyen la aita so aga mbakoro alingbi ti kpengba azo? (b) Wango so atene: “Mo dabe mo na Lo so acréé mo” abâ azo wa?

18 Aita so aga mbakoro alingbi ti bâ pëpe so ala yeke mû maboko na azo mingi. Na tapande, atâa so Anna ayeke gue lani lakue na temple teti angu mingi, peut-être lo hinga lani pëpe so tapande ti lo ayeke mû ngangu ande na azo angu mingi na pekoni. A sara tënë ti ndoye so Anna ayeke na ni na mbage ti Jéhovah na yâ ti Bible. Legeoko nga, aita ayeke girisa ande pëpe ndoye so ala ambakoro ala yeke na ni na mbage ti Jéhovah. Ni la Bible atene: “Kuali so avuru ayeke couronne ti gloire, zo awara so na lege ti mbilimbili.”—aProv. 16:31.

19 Ngangu so e oko oko kue e yeke na ni ti sara na Jéhovah ayeke legeoko ape. Me a yeke nzoni ala so ayeke na popo ti e so angbâ ngangu agirisa tënë so ape: “Mo dabe mo na Lo so acréé mo . . . kozoni si lâ ti sioni aga.”—Zo-ti. 12:3.