Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Janvier 2014

Ye so mbi soro ti sara na ngoi so mbi ngbâ lani kete

Ye so mbi soro ti sara na ngoi so mbi ngbâ lani kete

Na ngoi so mbi ngbâ kete

Na ngu 1985, mbi yeke lani gi na ngu bale-oko na ngoi so amolenge so alondo na Cambodge asi na ekole so mbi yeke dä na Columbus, Ohio na Amerika. Mbeni molenge ni ti koli oko atene Anglais kete kete. Na lege ti ambeni dessin, lo sara na mbi tënë ti ambeni mbaï so amû mbeto mingi. A yeke mbaï ti azo so a sara sana na ala, azo so a fâ ala nga na ala so akpe. Na ngoi so mbi yeke pensé lani na amolenge so, mbi yeke toto na bï. Mbi ye lani ti sara na ala tënë ti beku ti Paradis nga na ti zingongo ti akuâ, me ala hinga yanga ti kodoro ti mbi ape. Atâa so mbi ngbâ lani kete, mbi ye ti manda yanga ti kodoro ti azo ti Cambodge ti mû lege na mbi ti sara tënë ti Jéhovah na amba ti mbi ti ekole. Na ngoi ni so, mbi hinga lani pëpe so yanga ti kodoro so mbi manda so ayeke mû maboko na mbi na ngoi so mbi kono.

A yeke lani ngangu na mbi ti manda yanga ti kodoro ti azo ti Cambodge. Fani use mbi ye ti zia lege ni, me Jéhovah amû ngangu na mbi na lege ti babâ na mama ti mbi ti zia ni ape. Na mbeni ngoi, aprofesseur ti mbi nga na amba ti mbi ti klase awa mbi ti manda mbeti ayo ti wara nzoni kua ti nginza. Me mbi ye lani ti mû kua ti pionnier, tongaso mbi soro ti gue na lycée ti manda ambeni ye so alingbi ti mû maboko na mbi ti wara mbeni kua ti nginza so amû ngoi ti mbi mingi ape tongaso si mbi sara kua ti mbi ti pionnier. Tongana ekole ahunzi awe, mbi yeke wara tere lani na ambeni pionnier ti fa tënë. Mbi mû tere ti mbi wani nga ti fa Anglais na a-élève so ayeke manda lani Anglais, ye so aga na mbi aye ti nzoni mingi na pekoni.

Na ngoi so mbi yeke na ngu 16, a sara na mbi tënë ti ambeni zo ti Cambodge na Long Beach, Californie, na Amerika. Mbi gue mbi bâ ndo ni na mbi manda ti diko mbeti na yanga ti kodoro ti azo ti Cambodge. Na ngoi so mbi hunzi mandango mbeti ti mbi awe, mbi ga pionnier nga mbi ngbâ ti fa tënë na azo ti Cambodge so ayeke nduru na da ti mbi. Na ngoi so mbi wara ngu 18, mbi pensé lani ti gue na Cambodge. A yeke lani mbeni kodoro so ayeke nzoni ape, me mbi hinga lani so na popo ti azo kutu bale-oko so ayeke kâ, ambeni oko oko amä nzoni tënë ti Royaume awe. Na ngoi ni so, na yâ ti kodoro ni kue, mo yeke wara gi congrégation oko so awafango tënë 13 la ayeke dä. Na ngoi so mbi si na Cambodge kpâ mbi yeke lani na ngu 19. Ngu use na pekoni, mbi gue mbi sara kodoro kâ. Mbi wara lani mbeni kua ti traduction nga na ti fango yanga ti anglais so amû ngoi ti mbi kue ape so amû maboko na mbi na yâ kua ti mbi ti pionnier. Na pekoni mbi sara mariage na mbeni ita-wali so aye nga lani kua ti pionnier. A nzere na e mingi lani ti mû maboko na azo ti Cambodge mingi ti tene ala mû tere ti ala na Nzapa.

Jéhovah amû na mbi ‘aye so bê ti mbi aye.’ (Ps. 37:4). Ti sara si azo aga adisciple ayeke mbeni kua so amû ngia na zo mingi ahon tanga ti akua kue. Na yâ ti angu 16 so mbi sara na Cambodge, kete wungo ti awakua ti Jéhovah 13 so ayeke kâ ague na li ni na a sara si congrégation 12 nga na agroupe 4 abâ gigi.—Tënë ti Jason Blackwell.