Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) JANVIER 2014

Mû anzoni desizion na ngoi so mo de maseka?

Mû anzoni desizion na ngoi so mo de maseka?

“Apendere koli na amasia, . . . ala sepela iri ti [Jéhovah].”—PS. 148:12, 13.

1. Pendere kusala wa la amaseka mingi amû tere ti ala dä?

E YEKE na yâ ti angoi so azo kutu mingi na popo ti amara kue ayeke ga ti voro Jéhovah. A yeke mbeni ye so ade ti si lâ oko pëpe na yâ ti mbaï ti azo (Apoc. 7:9, 10). Amaseka mingi awara aye ti nzoni mingi na ngoi so ala yeke mû maboko na amba ti ala amaseka ti hinga tâ tënë so ayeke mû fini na zo so ayeke na yâ ti Bible (Apoc. 22:17). Ambeni maseka ni ayeke manda Bible na azo, ti mû maboko na ala ti duti nzoni na yâ ti gigi ti ala. Ambeni nga ayeke sara kua na ngangu ti ala kue ti fa nzoni tënë na ando so azo ni ayeke tene mbeni yanga ti kodoro nde (Ps. 110:3; És. 52:7). Nyen la mo lingbi ti sara ti mû maboko mingi na pendere kusala so?

2. Na lege wa tapande ti Timothée afa so Jéhovah aye ti mû na amaseka akusala ti sara? (Bâ foto so ayeke na tongo nda ti article ni.)

2 So mo ngbâ maseka, mo lingbi ti soro mbeni ye so alingbi ti zi lege na mo na yâ ti angoi so ayeke ga ti sara kusala ti Jéhovah. Na tapande, Timothée amû anzoni desizion so amû lege na lo ti sara kusala tongana missionnaire na ngoi so lo wara ngu 20 tongaso (Kus. 16:1-3). Peut-être gi anze kete na pekoni, Paul azia fini congrégation so abâ gigi na Thessalonique lo hon ngbanga ti aye ti ngangu so a sara na lo kâ, me lo sara confiance na Timothée na lo  tokua lo ti gue na Thessalonique ti kpengba aita (Kus. 17:5-15; 1 aThes. 3:1, 2, 6). Tere ti Timothée anzere lani mingi na ngoi so a mû na lo kusala so.

DESIZION TI MO SO AYEKE KOTA AHON ATANGA NI KUE

3. Kota desizion wa la mo lingbi ti mû na yâ ti gigi ti mo? Lawa la a yeke nzoni mo mû desizion ni?

3 Tongana mo de maseka, a yeke ngoi ti tene mo mû akota desizion la. Na yâ ti adesizion so mo yeke mû, mbeni oko ayeke kota mingi ahon atanga ni kue. A yeke desizion so mo yeke mû ti sara na Jéhovah. Lawa la a yeke nzoni ngoi ti tene mo mû desizion so? Jéhovah atene: “Mo dabe mo na Lo so acréé mo, na lâ ti pendere ti mo.” (Zo-ti. 12:3). Oko lege ti dabe ti mo na Jéhovah ayeke ti sara na lo na bê ti mo kue (Deut. 10:12). Desizion so mo mû ti sara na Jéhovah na bê ti mo kue ayeke kota ahon atanga ni kue. A yeke sara ngangu na yâ ti tanga ti gigi ti mo kue.—Ps. 71:5.

4. Ambeni kota desizion wa alingbi ande ti sara ngangu na ndo ti lege so mo yeke sara na Nzapa?

4 Ti tâ tënë ni, desizion so mo mû ti sara na Jéhovah ayeke pëpe gi oko desizion so ayeke sara ande ngangu na yâ ti gigi ti mo. Na tapande, mo yeke na bezoin ti soro ti sara mariage wala ti sara ni ape, tongana mo ye ti sara mariage ni mo yeke sara ni na zo wa, nga kusala wa la mo ye ti sara ande. Adesizion so ayeke akota desizion, me kozoni kue a lingbi mo soro ti sara na Jéhovah na bê ti mo kue (Deut. 30:19, 20). Ngbanga ti nyen? A yeke ngbanga ti so adesizion so kue ayeke sara ngangu na ndo ti mba. Desizion so mo yeke mû na ndo ti tënë ti mariage nga na ndo ti kua ti nginza ti mo, a yeke sara ngangu na ndo ti lege so mo yeke sara na Nzapa (Bâ Luc 14:16-20.) Legeoko nga, nzara so mo yeke na ni ti sara na Jéhovah ayeke sara nga ngangu na ndo ti desizion so mo yeke mû na ndo ti tënë ti mariage nga na kua ti nginza. Tongaso, na popo ti aye so, soro ye so ayeke kota mingi ahon atanga ni na yâ ti fini ti mo.—aPhil. 1:10.

NYEN LA MO YEKE SARA ANDE TONGANA MO GA MASEKA?

5, 6. Fa tongana nyen mungo anzoni desizion alingbi ti mû lege na e ti sara na Jéhovah mingi. (Bâ nga article “Ye so mbi soro ti sara na ngoi so mbi ngbâ lani kete” na yâ ti Tour ti Ba Ndo so.”)

5 Na pekoni so mo soro ti sara na Nzapa awe, gi ti hinga ye so lo ye mo sara, na soro fadeso lege so mo lingbi ande ti sara na lo. Mbeni ita-koli ti kodoro ti Japon atene: “Na ngoi so mbi yeke lani na ngu 14, mbi na mbeni ancien ti congrégation e sigigi na fango tënë na ancien ni abâ so fango tënë ni anzere na mbi ape. Na nzoni bê, lo tene na mbi, lo tene: ‘Yuichiro, mo kiri na yanga-da. Mo duti kpô na devant ti table ti mo, mo gbu li ti mo nzoni na ndo ti aye so Jéhovah asara ndali ti mo.’ Mbi sara tongana ti so lo hunda na mbi. Mbi gbu li ti mbi teti alango mingi, nga mbi sambela na yâ ti alango ni. Yeke yeke, sarango ye ti mbi achangé. Kete na pekoni, mbi bâ so mbi yeke na ngia ti sara na Jéhovah. A nzere na mbi mingi ti diko ye na ndo ti kusala ti amissionnaire, na mbi komanse ti pensé ti sara na Jéhovah mingi ahon ti kozo.”

6 Yuichiro ato nda ti mû anzoni desizion. Ye so amû lege na lo ti sara na Jéhovah na yâ ti mbeni kodoro nde. Lo tene: “Na tapande, mbi soro ti manda yanga ti Anglais. Na ngoi so mbi hunzi lani ti manda mbeti, mbi soro ti sara kua so amû ngoi ti mbi kue pëpe, so ayeke ti fango yanga ti anglais na azo, tongaso si mbi lingbi ti sara kua ti pionnier. Mbi komanse ti manda yanga ti Mongol na mbi wara lani pasa ti gue ti bâ mbeni groupe ti awafango tënë ti yanga ti Mongol na ngoi so mbi yeke na ngu 20. Ngu use na pekoni, na ngu 2007, mbi gue na Mongolie. Na ngoi so mbi sigigi na fango tënë na ambeni pionnier na mbi bâ so azo mingi asara nzara ti hinga tâ tënë, mbi yeke na nzara ti gue kâ ti mû maboko na ala. Mbi kiri na Japon ti leke tere ti mbi. Mbi yeke fa tënë na Mongolie ngbene ye na avril 2008. Na Mongolie gigi akpengba. Me azo ayeke mä nzoni tënë, na mbi  lingbi ti mû maboko na ala ti ga nduru na Jéhovah. Mbi bâ so ye so mbi soro ti sara ayeke tâ nzoni ye so mbi lingbi ti sara na yâ ti gigi ti mbi.”

7. Adesizion wa la a lingbi e mû? Tapande wa Moïse azia na e?

7 A yeke ti zo oko oko ti soro tongana nyen la lo lingbi ti mû fini ti lo ti sara na Jéhovah (Jos. 24:15). E lingbi pëpe ti tene na ala, ala amaseka ti sara mariage, ti fa na ala zo so a lingbi ala sara mariage na lo wala ti fa na ala kua ti nginza so a lingbi ala sara. Ala yeke soro ande ti sara mbeni kua so mandango ni ahunda ngoi mingi ape? Ambeni maseka Chrétien ayeke na yâ ti akete kodoro so yere ayeke dä; ambeni ayeke na yâ ti akota kodoro ti mosoro. Sarango ye ti ala, hingango ndo ti ala, ye so ala manda, ye so anzere na ala ayeke nde nde nga mabe ti ambeni akpengba ahon ti ambeni. Peut-être dutingo ti ala ayeke nde nde tongana ti so dutingo ti Moïse ayeke nde na ti amaseka so ayeke aHébreu na Égypte ti giriri. Moïse ayeke lani na apasa kue so azo so ayeke na yâ ti yangbo ti gbia ayeke na ni, me ambeni maseka so ayeke aHébreu ayeke lani angbâa (Ex. 1:13, 14; Kus. 7:21, 22). Legeoko tongana ti e, amaseka so ayeke lani na yâ ti angoi so a lingbi ala mû akota desizion (Ex. 19:4-6). A lingbi zo oko oko asoro ye so lo yeke sara na yâ ti gigi ti lo. Moïse amû lani nzoni desizion ti sara ye so Jéhovah aye.—Diko aHébreu 11:24-27.

8. Ti tene amaseka amû anzoni desizion, ala lingbi ti wara mungo maboko na ndo wa?

8 Jéhovah ayeke mû maboko na ala amaseka ti mû anzoni desizion. Na lege ti afango ye ti Bible, lo mû na ala awango so alingbi ti mû maboko na ala oko oko (Ps. 32:8). Ababâ na amama ti ala so ayeke aChrétien nga na a-ancien alingbi ti mû maboko na ala ti sara ye alingbi na afango ye ti Bible so (aProv. 1:8, 9). Zia e bâ akota fango ye ti Bible ota so alingbi ti mû maboko na ala ti mû anzoni desizion so ayeke sara si ala wara ye ti nzoni na yâ ti gigi ti ala ti kekereke.

AFANGO YE TI BIBLE OTA SO AYEKE MÛ MABOKO NA MO

9. (a) Tongana nyen la Jéhovah ane e na lege so lo mû na e liberté ti soro ye so bê ti e aye? (b) ‘Ti gi Royaume kozoni’ ayeke ga na aye ti nzoni wa?

9 Gi Royaume ti Nzapa na mbilimbili ti lo kozoni. (Diko Matthieu 6:19-21, 24-26, 31-34.) Jéhovah ane ala amaseka, ni la lo mû na ala liberté ti soro ye so ala ye ti sara. Lo tene na ala pëpe ti mû ngoi ti ala kue ti fa gi tënë. Me, Jésus afa na e so a yeke kota ye ti gi Royaume kozoni. Tongana ala sara ye alingbi na tënë ti Jésus so, lege ayeke zi na ala mingi ti fa ndoye ti ala na mbage ti Nzapa nga na mbage ti amba ti ala. Lege ayeke zi nga na ala ti kiri singila ndali ti beku ti fini ti lakue lakue. Na ngoi so ala yeke gbu li ti ala ti sara mariage wala ti sara kua ti nginza, ala gi ti bâ wala adesizion ti ala ayeke sara ande si ala gi bê ti ala mingi na ndo ti aye ti mitele wala ayeke fa so tënë ti Royaume ti Nzapa na mbilimbili ti lo la agbu bê ti ala mingi.

10. Nyen la asara si Jésus ayeke lani na ngia? Nyen la a lingbi amaseka asara ti duti na ngia?

10 Duti na ngia ti sara kua teti ambeni zo. (Diko Kusala 20:20, 21, 24, 35.) So ayeke kota ye so ayeke mû maboko na zo na yâ ti gigi. Jésus ahinga ni, ni la lo yeke lani na ngia mingi ndali ti so lo sara ye so Babâ ti lo aye me lo sara ye ti bê ti lo wani ape. A nzere na Jésus ti bâ azo so asara tere ti ala kete ayeda na nzoni tënë (Luc 10:21; Jean 4:34). Peut-être ala amaseka nga kue ala wara ngia awe na ngoi so ala mû maboko na azo. Tongana ala zia si afango ye ti Jésus amû maboko na ala na yâ ti adesizion ti ala, a yeke sara si ala wara ngia nga Jéhovah kue ayeke wara ngia.—aProv. 27:11.

11. Nyen la asara si Baruc ayeke lani na ngia ape? Wango wa Jéhovah amû na lo?

11 E yeke wara ngia mingi tongana e sara kua teti Jéhovah (aProv. 16:20). Amanke Baruc so ayeke wakuasu ti Jérémie agirisa lani tënë so. Na mbeni ngoi, lo yeke lani na ngia mbeni pëpe ti sara kua ti Jéhovah. Jéhovah atene na lo, a tene: “Mo yeke gi kota ye teti mo mveni? Mo gi ye so pëpe; teti fade Mbi sara si  sioye aga na ndo mi kue . . . fade Mbi mû fini ti mo na mo tongana ye so zo agbu na bira, na ndo kue so mo yeke gue dä.” (Jér. 45:3, 5). Nyen la alingbi ti sara si Baruc aduti na ngia? A yeke ti gi akota ye wala ti sara ye so Jéhovah aye na ti sö fini ti lo na ngoi so a yeke futi Jérusalem?—Jacq. 1:12.

12. Adesizion wa la Ramiro amû so amû maboko na lo ti wara ngia?

12 Ramiro ayeke mbeni ita so awara ngia na sarango kua teti ambeni zo. Lo tene: “Mbi londo na yâ ti mbeni sewa so ayeke na ye mingi ape na Bolivie. Na ngoi so yaya ti mbi aye ti futa ekole ti tene mbi sara na dasendagi, a yeke lani mbeni kota pasa teti mbi. Me mbi wara lani batême aninga ape nga mbeni pionnier ahunda na mbi ti tene mbi na lo e gue e fa tënë na mbeni kete gbata. Mbi gue na kete gbata ni, mbi manda ti sara coiffe ti akoli na mbi zi mbeni place ti sarango coiffe ti tene mbi bâ na lege ti abezoin ti mbi. Na ngoi so e hunda azo ti manda Bible na ala, ala mingi ayeda. Na pekoni, mbi gue na mbeni congrégation so abâ gigi fini fini so ayeke na kete yanga ti kodoro so a yeke tene na ndo ni. Mbi sara kua ti pionnier na congrégation so a sara ngu bale-oko awe.” Lo tene so mungo maboko na azo ti manda Bible na yanga ti kodoro ti ala asara si lo yeke na ngia mingi, mbeni kua nde alingbi ti sara si lo wara ngia so ape.

Ramiro awara ngia ti sara na Jéhovah ngbene ye so lo de maseka (Bâ paragraphe 12)

13. Ngbanga ti nyen ngoi ti maseka ayeke nzoni ngoi ti sara na Jéhovah na bê kue?

13 Duti na ngia ti sara kua teti Jéhovah na lâ ti maseka ti mo. (Diko Zo-ti-fa-tene 12:3.) Pensé ape so alingbi mo wara mbeni nzoni kua ti nginza awe si mo sara kua ti pionnier. Nzoni ngoi so mo lingbi ti sara kua ti Jéhovah na bê ti mo kue ayeke na ngoi so mo ngbâ maseka. Mingi ti amaseka ayeke na akua mingi ape na yâ ti sewa, ala yeke na seni nga ala yeke na ngangu ti sara angangu kua. Nyen la mo ye ti sara na Jéhovah na ngoi so mo ngbâ maseka? Peut-être mo ye ti ga pionnier wala mo ye ti fa tënë na mbeni ndo so azo ni atene mbeni yanga ti kodoro nde. Peut-être mo bâ so ambeni ye mingi ayeke dä so mo lingbi ti sara na yâ ti congrégation so mo yeke dä. Atâa ye wa la mo ye ti sara na yâ ti kua ti Nzapa, mo  yeke na bezoin ti sara mbeni ye ti bâ na lege ti abezoin ti mo. Hunda tere ti mo: ‘Kua wa la mbi yeke soro ti sara? Kua ni ayeke hunda ande ngoi oke ti manda ni?’

SARA KUA NA AFANGO YE TI BIBLE TI MÛ ANZONI DESIZION

14. Nyen la a lingbi mo sara hange na ni na ngoi so mo yeke gi kua ti sara?

14 Afango ye ti Bible ota so e sara tënë na ndo ni alingbi ti mû maboko na mo na ngoi so mo yeke soro mbeni kua ti sara. Kite ayeke pëpe so awafango mbeti na mo ahinga ye na ndo ti akua so alingbi ti wara na ndo so mo yeke dä. Wala peut-être mbeni ndokua ayeke dä so alingbi ti fa na mo kua so a yeke na bezoin ti azo ti sara ni na ndo so mo yeke dä wala na mbeni ndo so mo ye ti sara kua dä. Azo so alingbi ti mû maboko na mo, me sara hange. Azo so andoye Jéhovah ape alingbi ti gi ti yôro na yâ ti bê ti mo ndoye ti dunia so (1 Jean 2:15-17). Na ngoi so mo yeke bâ aye ti dunia so, girisa ape so bê ti mo alingbi hio ti handa mo.—Diko aProverbe 14:15; Jér. 17:9.

15, 16. Azo wa la alingbi ti mû na mo anzoni wango na ndo ti kua?

15 Tongana mo hinga kua so mo ye ti sara awe, mo yeke na bezoin ti anzoni wango (aProv. 1:5). Zo wa la alingbi ti mû maboko na mo ti sara kua na afango ye ti Bible ti soro mbeni kua ti sarango ni? Mä azo so andoye Jéhovah, so andoye mo nga so ahinga mo na dutingo ti mo nzoni. Ala yeke mû maboko na mo ti hinga kua so mo lingbi ti sara alingbi na kode so mo yeke na ni nga ti hinga ye so apusu mo ti gi ti sara mbeni kua. Tongana babâ na mama ti mo andoye Jéhovah, ala lingbi ti mû maboko na mo mingi. A-ancien so ayeke na yâ ti congrégation ti mo alingbi nga ti mû na mo anzoni wango. Hunda nga na apionnier nga na asurveillant so ayeke gue na ando nde nde ndani so ala soro ti sara kua ti ngoi kue. Ala komanse kua ti pionnier tongana nyen? Nyen la ala sara ti bâ lege ti abezoin ti ala? Anzoni ye wa la ala wara na yâ ti kua ti pionnier?—aProv. 15:22.

16 Azo so ahinga mo nzoni alingbi ti mû na mo anzoni wango. Na tapande, bâ so mo ye ti zia mandango mbeti ti mo na lycée ti mû kua ti pionnier ndali ti so mo ye pëpe ti sara angangu kua so a lingbi mo sara na ekole. Zo so andoye mo alingbi ti hinga ndani so mo ye ti zia lege ti ekole. Tongaso, lo lingbi ti mû maboko na mo ti bâ so ekole alingbi ti mû maboko na mo ti hinga tongana nyen ti ngbâ ti gbu ngangu na yâ ti aye. A yeke kota ye ti gbu ngangu tongana mo ye ti sara na Jéhovah teti lakue lakue.—Ps. 141:5; aProv. 6:6-10.

17. Adesizion wa la alingbi e ke ti mû ni?

17 Azo kue so asara na Jéhovah ayeke tingbi na akpale so alingbi ti sara si mabe ti ala awoko nga so alingbi ti gue na ala yongoro na Jéhovah (1 aCor. 15:33; aCol. 2:8). Ambeni kua ayeke dä so alingbi ti sara si mo wara kpale mingi na lege ti yingo. Me ambeni ayeke dä so kpale ayeke dä mingi ape. Peut-être mo hinga ambeni ita so mabe ti ala atï na peko ti so ala soro ti sara mbeni kua (1 Tim. 1:19). A yeke nzoni mo ke ti mû adesizion so alingbi ti buba songo ti mo na Jéhovah.—aProv. 22:3.

SO MO YEKE MBENI CHRÉTIEN SO ADE MASEKA SO BÂ NZONI DÄ

18, 19. Nyen la alingbi mo sara tongana mo yeke na nzara ti sara na Jéhovah ape?

18 Tongana mo ye biani ti sara na Jéhovah, bâ nzoni na lege ti apasa so lo mû na mo na ngoi so mo ngbâ maseka. So ayeke ngoi ti tene mo mû adesizion so ayeke mû lege na mo ti sara na Jéhovah la.—Ps. 148:12, 13.

19 Nyen la alingbi mo sara tongana mo yeke na nzara ti sara na Jéhovah ape? Ngbâ ti gi ti sara si mabe ti mo akpengba. Paul afa ye so lo sara ti wara tënë nzoni ti Jéhovah. Lo tene: “Tongana ala yeke na mbeni bibe nde na ndo ti mbeni tënë, Nzapa ayeke fa ande na ala bango ndo ni so e sara tënë ni fade. Atâa nyen la asi, ndo so e maï ngbii si e si dä awe so, zia e ngbâ ti tambela mbilimbili na ndo ti oko lege ni so.” (aPhil. 3:15, 16). Girisa ape so Jéhovah aye mo. Awango ti lo ayeke nzoni mingi. Zia lo mû maboko na mo na ngoi so mo ngbâ maseka ti mû anzoni desizion.