Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) MARS 2016

Ézéchiel ayeke nduru ti sara ye mo bâ mo tene lo ngoro Jérusalem ti sara bira

Mû tapande ti bibe so aprophète ayeke na ni

Mû tapande ti bibe so aprophète ayeke na ni

MO YEKE sara mbeni ye so akpa tere na ye so aprophète ti ândö asara? Na yâ ti “Kete bakari” so ayeke na yâ ti Mbeti ti Nzapa ti fini dunia ti ngu 2013 na Anglais, a fa nda ti tënë prophète tongaso: “Zo so ayeke fa na azo aye so Nzapa aleke na bê ti lo ti sara. Aprophète ayeke azo so ayeke tene gi pëpe aprophétie, me ala yeke fa nga aye so Nzapa afa, acommandement ti lo nga na atënë ti fango ngbanga ti lo.” Atâa so mo yeke tene pëpe aprophétie, mo yeke sara tënë na iri ti Nzapa, na lege so mo yeke fa aye so ayeke na yâ ti Mbeti ti Nzapa.—Mat. 24:14.

A yeke mbeni pendere pasa la e yeke na ni ti fa na azo tënë na ndo ti Jéhovah Nzapa ti e, nga ti fa na ala ye so lo leke na bê ti lo ti sara ndali ti azo. E yeke sara kua so legeoko na ‘mbeni ange so ayeke huru kâ na lê ti nduzu’. (Apoc. 14:6). Ye oko, e lingbi ti tingbi na ambeni kpale so alingbi ti sara si e girisa pendere pasa so e yeke na ni ti sara kua so. Ambeni kpale ni ayeke so wa? E lingbi ti fatigué, bê ti e alingbi ti nze wala e lingbi ti bâ so e yeke ye oko ape. Aprophète ti giriri so ayeke be-ta-zo atingbi nga lani na mara ti akpale so, me ala zia lege ti kua ni ape. Jéhovah amû lani maboko na ala ti sara akua so lo mû na ala. Zia e bâ ambeni tapande ni nga e bâ tongana nyen la e lingbi ti sara ye tongana ala.

ALA SARA LANI KUA NA NGANGU TI ALA KUE

Na ambeni ngoi, e lingbi ti fatigué na peko ti akua so e yeke sara lâ oko oko na e bâ so e lingbi ti gue na fango tënë ape. Biani, e bezoin ti wu tere, même Jésus na abazengele ti lo awu lani tere (Marc 6:31). Me gbu li ti mo na ndo ti Ézéchiel nga na kua so a mû lani na lo ti sara na popo ti azo ti Israël so a gbu ala na Jérusalem a gue na ala na Babylone. Nzapa atene  lani na Ézéchiel ti mû mbeni brique na ti sara dessin ti gbata ti Jérusalem na ndo ni. Na pekoni a lingbi lo sara ye mo bâ mo tene lo ngoro gbata ni ti sara bira. A lingbi lo lango na mbage ti kate ti lo ti wali lango 390 na pekoni lo lango na mbage ti kate ti lo ti koli lango 40. Jéhovah atene na Ézéchiel: “Bâ, Mbi zia kamba na tere ti mo, na fade mo [tourné] tere ti mo na mbage na mbage pëpe juska lâ ti mo ti ngoro kodoro na bira awe.” (Ézéch. 4:1-8). Tongana lo sara tongaso azo ti Israël so a gue na ala na Babylone ayeke bâ ni. Ézéchiel asara kua so afatigué zo mingi so ahon ngu oko. Prophète ni asara kua ti lo ni tongana nyen?

Ézéchiel ahinga lani ndani so a tokua lo tongana mbeni prophète. Na ngoi so Nzapa atokua Ézéchiel, lo tene na lo: “Tongana [azo ti Israël a]ye ti mä, wala ala ye ti mä pëpe . . . , kamême fade ala hinga so prophète ayeke na popo ti ala.” (Ézéch. 2:5). Lo ngbâ lani ti bata na li ti lo ndani so a mû na lo kua ni so. Tongaso, lo yeke lani nduru ti sara ye mo bâ mo tene lo ngoro Jérusalem ti sara bira. Lo fa lani so lo yeke tâ prophète. A tene na lo nga na amba ti lo so “a futi kodoro awe.” Biani, azo ti Israël aga ti hinga so mbeni prophète ayeke lani na popo ti ala.—Ézéch. 33:21, 33.

Laso, e yeke wa azo e tene na yâ ti ngoi so ayeke ga a yeke futi sioni dunia ti Satan so kue. Atâa so e lingbi ti fatigué, e yeke sara ngangu ti fa tënë ti Nzapa na azo, ti kiri ti bâ ala nga ti manda Bible na ala. Tongana e bâ so aprophétie so asara tënë na ndo ti hunzingo ti aye ti dunia so aga tâ tënë, tere ti e anzere mingi ti duti mbeni “zo so ayeke fa na azo aye so Nzapa aleke na bê ti lo ti sara.”

ALA GBU LANI NGANGU NA NGOI SO BÊ TI ALA ANZE

Yingo ti Jéhovah amû maboko na e ti sara kue ti fa tënë, ye oko, na ambeni ngoi e lingbi ti découragé ndali ti sarango ye ti azo na ngoi so e yeke fa tënë na ala. A yeke nzoni e dabe ti e na tapande ti Jérémie. Lani azo ahe lo nga ala zonga lo ndali ti so lo fa tënë ti Nzapa na azo ti Israël. A si na mbeni ngoi, Jérémie atene même atene: “Fade mbi sara tënë ti Lo pëpe, wala mbi sara tënë na iri ti Lo mbeni pëpe.” Jérémie ayeke lani na abibe tongana ti e. Me lo ngbâ lani ti fa tënë ti Nzapa. Ngbanga ti nyen? Lo tene: “Ye aga na yâ bê ti mbi tongana wâ so agbi ye, a gbi na yâ bio ti mbi; mbi woko na lege ti batango ye so, na mbi lingbi bata ye so na yâ mbi mbeni pëpe.”—Jér. 20:7-9.

Legeoko nga, tongana bê ti e anze ndali ti sarango ye ti azo na mbage ti tënë so e yeke fa, e lingbi ti hon ndo ni tongana e gbu li na ndo ti tënë so e yeke fa. A yeke tongana mbeni ‘wâ so agbi ye na yâ ti bio ti e’. Wâ ni so ayeke ngbâ ti gbi na yâ ti e tongana e yeke diko Bible lâ na lâ.

ALA HON LANI NDO TI ASIONI BIBE

Ambeni ita ayeke gi bê ti ala tongana a mû na ala mbeni kua so ala hinga ti sara ni ape. A yeke peut-être ye so asi na prophète Osée lani. Jéhovah atene na lo: “Mo gue, mo kamata mbeni wali ti pitan [na] amolenge ti pitan.” (Os. 1:2). Tara ti bâ kete, a yeke sara mo tongana nyen tongana mo la mo ye ti sara mariage, me Nzapa atene na mo so wali ti mo ni ayeke duti mbeni wali-ndumba. Osée asara ye so a hunda lani na lo ti sara. Lo mû Gomer, na Gomer adü mbeni molenge ti koli. Na pekoni, lo dü mbeni molenge ti wali nga lo kiri lo dü mbeni molenge ti koli. Na bango ni, amolenge use so lo dü na peko ayeke amolenge so lo dü na lege ti lango-sioni so lo sara. Jéhovah atene na Osée so wali ti lo ni ayeke “tambela na peko ti andeko ti lo”. Bâ so a tene ndeko ape me “andeko”. Na pekoni lo yeke gi ti kiri na Osée. Fadeso, tongana mo la mo yeke prophète ni lani, mo yeke kiri ti mû wali ti mo ni? Tâ gi ye so Jéhovah atene na Osée lani ti sara la. Prophète ni akiri avo lo même na nginza so wungo ni ayeke mingi.—Os. 2:7; 3:1-5.

Peut-être Osée ahunda tere ti lo lani na ndo ti ye ti nzoni so ayeke ga tongana lo sara ye so a hunda na lo ti sara. Me so Osée asara tâ gi ye so a hunda na lo, lo mû maboko na e ti hinga vundu so Nzapa ti ngangu ahon kue awara ndali ti aye so azo ti Israël asara. Na ye so asara si ambeni zo ti Israël so ayeke na nzoni bê akiri lani na Nzapa.

Nzapa atene laso pëpe na mbeni zo ti “kamata mbeni wali ti pitan”. Me, eskê e lingbi ti manda ye na  lege ti sarango ye ti Osée so lo yeke lani nduru ti sara ye so a hunda na lo ti sara? Mbeni ye ni ayeke ti duti nduru ti fa nzoni tënë ti Royaume “na lê ti azo dandara nga da na da”, même tongana e bâ so a yeke ngangu na e ti sara ni (Kus. 20:20). Peut-être ambeni kode ti fango tënë ti Royaume ayeke ngangu na mo. Azo mingi so ayeke manda Bible na aTémoin ti Jéhovah atene so ala ye ti manda Bible mê ala lingbi lâ oko ape ti fa tënë da na da. Na pekoni, ala mingi akomanse ti sara ye so ala pensé atene ala peut ti sara ni ape so. So ayeke mbeni ye so e lingbi ti manda ni.

E lingbi ti manda mbeni ye nde na lege ti Osée so ayeda ti sara ngangu ye so a hunda na lo. Lo yeke lani na araison mingi ti ke ti sara ye so a hunda na lo so andu wali ti lo. Tongana fade Osée asû tënë ti ye so lo sara so na mbeti ape, zo wa la apeut ti hinga ni? E kue na yâ ti ambeni ye, lege apeut ti zi na e ti sara tënë na ndo ti Jéhovah, na mbeni zo oko apeut ti hinga ni ape. A yeke ye so asi lani na Anna mbeni élève so ayeke na mbeni lycée na États-Unis. Professeur ti lo ahunda lani na ala a-élève ni ti sara mbeni devoir na ndo ti mbeni tënë wala mbeni kpale so agbu bê ti ala nga ti sara si amba ti ala ayeda na tënë ni. Anna alingbi lani ti zia ngoi so ahon sân ti fa tënë. Ye oko, lo bâ so Nzapa la azi lege na lo so. Lo hinga ye so alingbi peut-être ti si, lo sambela Jéhovah nga lo wara nzara ti fa tënë na ngoi ni so. Lo sara devoir ti lo ni na ndo ti li ti tënë “Tâ tënë na ndo ti évolution.”

Amaseka ti e asara ye tongana ti aprophète, ala sara mbeto ape ti fa so Jéhovah la ayeke Wasarango e

Na ngoi so Anna adiko devoir ti lo ni na devant ti amba ti lo na klase, mbeni molenge-wali so ayeda na tënë ti évolution ahunda gbâ ti atënë na Anna ti fa so tënë ti lo ni ayeke mvene. Anna akiri tënë na lo na lege ni. Bê ti professeur ti lo apika nga lo mû cadeau na Anna ndali ti so devoir ti lo ni apika bê ti amba ti lo mingi. Ngbene ye na ngoi ni so Anna asara lisoro mingi na ndo ti création na molenge-wali so ahunda gbâ ti atënë na lo so. So Anna ayeda ti sara “ye” so Jéhovah ahunda na lo, ye ti pekoni ayeke so, lo tene: “Fadeso mbi yeke fa nzoni tënë na bê ti mbi kue sân mbeto.”

Atâa so e yeke aprophète ape, tongana e gi ti sara ye tongana aprophète so asara asacrifice tongana Ézéchiel, Jérémie nga na Osée, e nga e lingbi ti sara ye so bê ti Jéhovah aye laso. Na ngoi ti vorongo Nzapa na yâ ti sewa wala na ngoi ti mandango ye mo wani, mo lingbi ti diko ye na ndo ti ambeni prophète ti ândö nde nga ti gbu li ti mo ti bâ tongana nyen la mo lingbi ti mû tapande ti ala.