Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) MARS 2016

Gi ti hinga bezoin ti aita ti mo nga ye so mo lingbi ti sara ti mû maboko na ala, ti dë bê ti ala nga ti kpengba ala na awango ti Bible

Mo lingbi ti mû maboko na yâ ti congrégation ti mo?

Mo lingbi ti mû maboko na yâ ti congrégation ti mo?

KOZO si Jésus amonté na yayu, lo tene na adisciple ti lo: “Ala yeke duti atémoin ti mbi . . . na ambage ti sese so ayeke tâ yongoro.” (Kus. 1:8). Tongana nyen la ala lingbi ti sara kota kua so?

Martin Goodman wafango mbeti na dasendagi ti Oxford atene so “kua so a mû na aChrétien asara si ala yeke nde na tanga ti abungbi ti vorongo Nzapa même ti aJuif, na kodoro-togbia ti Rome.” Jésus atambela lani na ando nde nde ti fa tënë. A lingbi atâ Chrétien amû tapande ti lo ti fa “nzoni tënë ti royaume” na ndo kue. A lingbi ala gi azo so aye ti hinga tâ tënë (Luc 4:43). A yeke mbeni raison so ndali ni, na yâ ti congrégation ti akozo Chrétien “abazengele” ayeke lani dä. Nda ti tënë abazengele aye ti tene azo so a tokua ala ti sara mbeni ye (Marc 3:14). Jésus amû yanga lani na adisciple ti lo, lo tene: “Ala gue, ala sara si azo na popo ti amara kue aga adisciple.”—Mat. 28:18-20.

Laso e yeke na mbeni oko ti abazengele 12 ti Jésus na popo ti e na sese ge ape, me awakua ti Jéhovah mingi ayeke na bibe ti missionnaire. Na ngoi so a iri ala ti gue ti fa tënë na ndo so kota bezoin ayeke dä, ala tene: “Mbi la! Tokua mbi.” (És. 6:8, FD). Ambeni, na tapande aita saki mingi so awara diplôme ti Ekole ti Galaad, ague na akodoro so ayo mingi. Ambeni ague na akodoro so ayeke yongoro na ndo so a dü ala dä. Ambeni mingi amanda lani mbeni fini yanga ti kodoro ti mû maboko na mbeni congrégation wala na mbeni groupe. A yeke lakue kete ye ape, me aita so ayeke lani nduru ti sara asacrifice ti fa so ala ye Jéhovah nga na amba ti ala. Tongaso, ala leke lani tere ti ala nzoni nga ala mû ngoi ti ala, ngangu ti ala nga na nginza ti ala ti mû maboko na fango tënë na ndo so bezoin ti awafango tënë ayeke dä mingi (Luc 14:28-30). Ye so aita so ayeke sara so ayeke biani kota ye mingi.

 Ye oko, dutingo ti e ayeke nde nde. A-Témoin kue alingbi pëpe ti gue na ndo so bezoin ti awafango tënë ayeke dä mingi wala ti manda mbeni fini yanga ti kodoro. Me e kue e lingbi ti sara kua tongana amissionnaire na yâ ti congrégation ti e wani.

SARA KUA TONGANA MISSIONAIRE NA YA TI CONGRÉGATION TI MO

Sara kua nzoni na dutingo ti mo ti fadeso . . . 

Akozo Chrétien ayeke lani biani na bibe ti missionnaire, me kite ayeke dä ape so mingi ti ala angbâ lani na yâ ti kodoro ti ala wani. Me, wango so Paul amû lani na Timothée abâ akozo Chrétien nga na awakua ti Nzapa laso. Lo tene: “Sara kusala ti wafango nzoni tënë, sara kusala ti mo ni kue.” (2 Tim. 4:5). Commandement so Jésus amû ti tene a fa tënë ti Royaume nga a sara si azo aga adisciple abâ aChrétien kue atâa ndo so ala yeke dä. Na ndo ni, e lingbi ti sara ye tongana amissionnaire na alege mingi na yâ ti congrégation ti e.

Na tapande, mbeni missionnaire so ague na kodoro-wande ayeke sara ye alingbi na fini ndo so lo yeke dä. Aye mingi ayeke tâ nde na ti ndo so lo yeke dä kozo. Ka tongana e lingbi pëpe ti gue na mbeni ndo so bezoin ti awafango tënë ayeke dä mingi? E lingbi ti tene so e fa tënë na yâ ti territoire ti congrégation ti e kue awe? Wala e yeke nduru ti tara ambeni fini kode ti fango tënë so ade e tara ni kozo ape? Na tapande, na ngu 1940, a wa aita ti leke ti fa tënë lango oko na yâ ti yenga oko oko na ndo ti lege. Mo kue mo lingbi ti sara tongaso? Mo tara awe ti fa tënë na table wala poussette? Kota tënë ni ayeke so: Eskê mo wani mo gbu li ti mo na ndo ti akode ti fango nzoni tënë so, so ayeke peut-être mbeni fini ye na mo?

ti wa amba ti mo ti “sara kusala ti wafango nzoni tënë”

Tongana e yeke na nzoni bango ndo ayeke mû maboko na e ti yapu na fango tënë nga ti sara ni na ngia. Fani mingi, aita so ague na ando so bezoin ti awafango tënë ayeke dä mingi wala so asara kua na yâ ti territoire so azo ni ayeke tene mbeni yanga ti kodoro nde ayeke anzoni wafango tënë. Tongaso, ala mû maboko na aita mingi, na tapande ala yeke mû li ni na kua ti fango tënë. Nga, mingi ni amissionnaire ayeke mû li ni na yâ ti congrégation juska ti tene aita ti ndo ni alingbi ti sara ni. Tongana mo yeke mbeni ita-koli so mo wara batême awe, mo yeke ‘gi kusala’, so ti tene mo yeke nduru ti mû maboko na aita ti congrégation ti mo?—1 Tim. 3:1.

 DUTI MBENI ‘WAMUNGO MABOKO SO AKPENGBA’ ZO

ti sara mbeni ye ti mû maboko na amba ti mo

E lingbi nga ti mû maboko na congrégation na ambeni lege nde. E kue, atâa e yeke maseka wala mbakoro, koli wala wali, e lingbi ti duti “awamungo maboko so akpengba” amba ti e so ayeke na bezoin ni.—aCol. 4:11.

Tongana e ye ti mû maboko na amba ti e, a lingbi e hinga ala nzoni. Bible awa e ti “bi lê na ndo ti mba” na ngoi so e na ala e wara tere (aHéb. 10:24). Tënë so aye ti tene so atâa so e yeke gi ti hinga aita ti e nga na aye so ala yeke na bezoin ni, e yeke yôro yanga ti e ape na yâ ti aye so abâ gi ala. E lingbi ti mû maboko na ala na lege so e yeke dë bê ti ala, wala e yeke kpengba ala na lege ti awango ti Bible. Ti mû maboko na amba ti e ayeke pëpe gi kua ti a-ancien nga na awakua ti mungo maboko. Tâ tënë, ambeni ngoi ayeke dä so a yeke nzoni ti tene gi aita so la amû maboko na ala (aGal. 6:1). Ye oko, e kue e lingbi ti mû maboko na aita so ayeke mbakoro, wala na asewa, so ayeke na akpale.

ti dë bê ti azo so gingo bê ahon ndo ti ala

Na tapande, na ngoi so Salvatore awara kpale ti nginza so asara si lo kä aye ti buze ti lo, da ti lo nga na mingi ti aye ti sewa ti lo, lo yeke gi lani bê ti lo mingi na ndo ti sewa ti lo. Mbeni sewa so ayeke na yâ ti congrégation ti lo abâ so sewa ti ita ni abezoin mungo maboko. Ala mû nginza na ita Salvatore, ala mû maboko na lo nga na wali ti lo ti wara kua nga na alakui ala yeke mû ngoi ti dengi mê ti mä fami ni kue nga ala yeke kpengba ala. Ala ga anzoni kamarade. Fadeso, asewa so use kue ayeke na ngia tongana ala dabe ti ala na ngoi so lani ala yeke place oko na ngoi ti ngangu kpale so.

Atâ Chrétien ayeke na kamene pëpe ti fa na azo aye so ala mä na bê na ni. A lingbi e sara ye tongana Jésus, e fa na azo kue apendere zendo so Nzapa amû. Atâa e lingbi ti gue na ndo so bezoin ti awafango tënë ayeke dä mingi wala e lingbi pëpe, e lingbi ti sara kue ti sara ye ti nzoni na azo kue. E lingbi biani ti sara ni na yâ ti congrégation ti e wani (aGal. 6:10). Tongana e sara tongaso, e yeke wara ngia so zo ayeke wara na mungo ye na zo nga e yeke “ngbâ ande ti lë lengo na yâ ti nzoni kusala kue”.—aCol. 1:10; Kus. 20:35.