Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) FÉVRIER 2016

Ngbâ ti sara na Jéhovah na ngia

Ngbâ ti sara na Jéhovah na ngia

GBU LI na ndo ti lango so lani tere ti mo anzere ahon atanga ni kue. A yeke lani na lango ti mariage ti mo? Wala a yeke lani na ngoi so mo dü kozo molenge ti mo? Wala a yeke lani na lango ti batême ti mo? Kite ayeke dä ape so lango ti batême ti mo ayeke lani mbeni kota lango na yâ ti fini ti mo nga tere ti mo anzere lani mingi. Tere ti amba ti mo aChrétien anzere nga mingi na ngoi so mo fa na lê ti azo kue so mo ye Nzapa na bê ti mo kue, na âme ti mo kue, na bibe ti mo kue nga na ngangu ti mo kue.—Marc 12:30.

Ngbene ye na peko ti so mo wara batême, kite ayeke dä ape so mo wara ngia mingi na yâ ti kua ti Jéhovah. Ye oko, ambeni wafango tënë ti Royaume ayeke na ngia mingi tongana ti so ala yeke na ni lani so ape. Ngbanga ti nyen? Araison wa la e yeke na ni ti ngbâ ti sara na Jéhovah na ngia?

NDANI SO AMBENI ITA AYEKE NA NGIA ENCORE APE

Tënë ti Royaume asara si e yeke na ngia mingi. Ngbanga ti nyen? Ngbanga ti so Jéhovah amû zendo so Royaume ti lo aga nduru ti futi sioni dunia so awe nga ayeke sara si e lï na yâ ti fini dunia ti Nzapa. Na ndo ni, Sophonie 1:14 adë bê ti e atene: “Kota lâ ti [Jéhovah] aga nduru, na a yeke ga fade fade.” Biani, ti ngbâ ti ku lango ni aninga ahon ti so e pensé fade na ni, a lingbi ti sara si e yeke na ngia tongana ti kozo ape nga a lingbi ti sara si e kiri na peko na yâ ti kua ti Nzapa.—aProv. 13:12.

Tongana e yeke duti na tere ti aita ti e, ala yeke kpengba e ti ngbâ ti sara na Jéhovah na ngia. Biani, nzoni sarango ye ti awakua ti Jéhovah la peut-être agboto e ti ga ti voro Nzapa nga amû lani maboko na e ti komanse ti sara na lo na ngia (1 Pi. 2:12). Me nyen la alingbi ti si tongana a suku na mbeni mba ti e Chrétien ndali ti so lo sara ye alingbi na acommandement ti Nzapa ape? Na yâ ti mara ti aye tongaso, bê ti ambeni zo so aga na yâ ti tâ tënë ndali ti nzoni sarango ye ti awakua ti Jéhovah alingbi ti nze nga ala yeke na ngia encore ape.

Ti gi ti wara aye ti sese so alingbi nga ti sara si e yeke na ngia encore ape. Ngbanga ti nyen? Satan ayeke sara kua na dunia so ti sara si e bâ so e yeke na bezoin ti vo aye so ti tâ tënë ni e yeke nga na bezoin ni ape. Ye oko, a yeke nzoni e dabe ti e na wango ti Jésus so: “Mbeni zo alingbi ti duti ngbâa ti azo use pëpe. Teti fade lo ke mbeni oko na lo ndoye mbeni. Wala lo yeke ngbâ na mbeni oko na lo ke mbeni. Ala lingbi ti duti ngbâa ti Nzapa nga na ti  Mosoro pëpe.” (Mat. 6:24). E lingbi pëpe ti sara na Jéhovah na ngia nga na oko ngoi ni e gi ti wara aye kue ti dunia so.

‘E YEKE NA NGIA NA YÂ TI NZAPA TI SALUT TI E’

Ti azo so aye Jéhovah, ti sara kua ti lo ayeke mbeni nengo kungba ape (1 Jean 5:3). Girisa ape so Jésus atene: “Ala ga na mbi, ala kue so asara ngangu kua na kungba ane ala, na fade mbi dë bê ti ala. Ala yô joug ti mbi na ala manda ye na tere ti mbi, teti mbi yeke sara ye na ngangu pëpe na mbi yeke na tâ be-ti-molenge, na fade ala wara dengo bê ngbanga ti âme ti ala. Teti a yeke ngangu pëpe ti yô joug ti mbi na kungba ti mbi ayapu.” (Mat. 11:28-30). Ti duti tâ Chrétien ayeke dë bê ti e nga a yeke sara si e duti na ngia. E yeke biani na raison ti sara na Jéhovah na ngia. Zia e bâ fadeso akpengba raison ota so asara si e yeke ‘na ngia na yâ ti Nzapa ti salut ti e’.—Hab. 3:18.

E sara na Nzapa so ayeke na ngia, lo so amû na e fini (Kus. 17:28; 1 Tim. 1:11). E hinga so e yeke na fini grâce na Nzapa. Tongaso, e yeke ngbâ ti sara na lo na ngia atâa e wara batême asara ngu oke.

Héctor angbâ ti sara na Jéhovah na ngia na lege so lo dabe ti lo na beku ti Royaume nga lo ngbâ ti fa tënë lakue

Bâ tapande ti Héctor, so asara ngu 40 na yâ ti kua ti surveillant ti circonscription. Lo ngbâ ti sara na Jéhovah na ngia même “na lâ ti mbakoro” ti lo (Ps. 92:13-15). Songo tere ti wali ti Héctor asara si lo sara kua ti Jéhovah tongana ti kozo ape, me ye so abuba ngia ti lo ape. Lo tene: “Atâa so vundu asara mbi ndali ti so kobela ti wali ti mbi ayeke gue gi na li ni nga ayeke ngangu na mbi ti bâ lege ti lo, mbi zia pëpe si a buba ngia so mbi yeke na ni ti sara na tâ Nzapa. So mbi hinga so mbi yeke na fini ndali ti Jéhovah, so aleke zo ti sara mbeni ye, ayeke raison so asara si mbi ye lo mingi nga mbi sara na lo na bê ti mbi kue. Mbi sara kue ti ngbâ lakue ti fa tënë nga mbi gi ti bata na li ti mbi beku ti Royaume tongaso si mbi ngbâ ti duti na ngia.”

Jéhovah aleke si a futa ngere ti zi na azo, a sara si e lingbi ti duti na ngia na yâ ti fini ti e. Ti tâ tënë ni, “Nzapa andoye tâ azo ti dunia so mingi si lo mû gi oko Molenge ti lo ndali ti ala, si zo kue so amä na bê na lo, a lingbi ti futi lo pëpe, me lo wara fini ti lakue lakue.” (Jean 3:16). Biani, tongana e mä na bê na sandaga ti Jésus so Nzapa amû na ndoye, a yeke pardonné siokpari ti e nga e yeke wara fini ti lakue lakue. So ayeke nzoni raison ti tene e duti na ngia la ape? Tongana e bâ ngere so a futa ti zi na azo na nene ni, a yeke pusu e ti sara na Jéhovah na ngia.

Jesús aduti na aye mingi na yâ ti fini ti lo ape nga lo sara na Jéhovah na ngia na yâ ti angu mingi

Ita Jesús, so ayeke na Mexique, atene: “Mbi yeke lani ngbâa ti kua ti mbi, na ambeni ngoi, mbi yeke sara kua oku na peko ti tere na mbeni ndokua, atâa so a forcé mbi ti sara ni ape. Mbi sara ni lani gi ti wara na gbâ ti nginza. Na pekoni, mbi manda ye na ndo ti Jéhovah nga mbi manda tongana nyen la lo mû Molenge ti lo so lo ye lo mingi ndali ti azo. Mbi  ye lani mingi ti sara na lo. Tongaso, mbi mû fini ti mbi na Jéhovah, nga na peko ti so mbi sara lani kua na ndokua so ngu 28, mbi zia kua ni na mbi mû kua ti ngoi kue.” A yeke ge la lo wara ngia na yâ ti angu so lo komanse ti sara na Jéhovah.

Aye so e wara na pekoni ayeke pëpe aye ti vundu, me kota ngia. Fini ti mo ayeke lani tongana nyen kozo ti tene mo hinga Jéhovah. Mo dabe ti mo na ni? Bazengele Paul adabe ti aChrétien ti Rome so “ala yeke lani angbâa ti siokpari” me ala ga “angbâa ti mbilimbili.” Ala yeke wara lengo ni “na lege ti dutingo so ayeke nzoni-kue,” so ayeke sara si na nda ni ala wara fini ti lakue lakue (aRom. 6:17-22). E nga kue e mû peko ti afango ye ti Jéhovah, tongaso e lingbi pëpe ti wara vundu so zo ayeke wara na peko ti sioni sarango ye ti lo wala sarango ye ti ngangu na zo. A yeke ndani la e yeke na ngia.

“Na yâ ti angu so mbi sara na Jéhovah la mbi wara ngia mingi na yâ ti gigi ti mbi.”—Jaime

Bâ tapande ti Jaime, so amä na bê lani na Nzapa ape, so ayeda na tënë ti évolution nga so ayeke zo ti kpongo gobo. Jaime akomanse lani ti gue na abungbi nga bê ti lo apika ti bâ ndoye so aita ayeke na ni lani kâ. Ti tene Jaime achangé angbene sarango ye ti lo, a lingbi lani lo hunda na Jéhovah ti mû maboko na lo ti mä na bê na lo. Jaime atene: “Yeke yeke, mbi ga ti hinga so mbeni Babâ ti ndoye nga Nzapa so asara ye na nzoni bê ayeke dä. Ti sara ye lakue alingbi na andia ti Nzapa so ayeke mbilimbili abata mbi. Tongana mbi changé lani ape ka a fâ mbi awe, tongana ti so a fâ lani angbene kamarade ti mbi ti kpongo gobo so. Na yâ ti angu so mbi sara na Jéhovah la mbi wara ngia mingi na yâ ti gigi ti mbi.” A yeke na tongo nda ti angu so la lo komanse lani ti sara na Jéhovah na ngia.

NGBÂ TI SARA NA JÉHOVAH

Mo pensé so a lingbi e sara ye tongana nyen na ngoi so e yeke ku ngoi so a yeke futi sioni dunia so? Dabe ti mo so e yeke “lu ye ndali ti yingo” na fade e yeke “ko fini ti lakue lakue”. Tongaso, “zia e dö lege ti sarango ye ti nzoni e zia pëpe, ngbanga ti so tongana ngoi ni alingbi, fade e yeke ko lengo ni tongana e woko pëpe.” (aGal. 6:8, 9). Na lege ti mungo maboko ti Jéhovah zia e gbu ngangu, nga e sara kue ti duti na sarango ye so ayeke mû maboko na e ti sö kuâ na yâ ti “kota ye ti vundu”, nga e ngbâ ti sara na Jéhovah même na ngoi so e tingbi na atara.—Apoc. 7:9, 13, 14; Jacq. 1:2-4.

E hinga biani so Jéhovah ayeke futa e ndali ti gbungo ngangu ti e, ndali ti so lo hinga kua so e sara nga ndoye so e yeke na ni ndali ti lo nga ndali ti iri ti lo. Tongana e ngbâ ti sara na Jéhovah na ngia, e yeke tene oko tënë so David atene: “Mbi bâ [Jéhovah] na gbele mbi lakue; teti Lo yeke na koti ti mbi, ye alingbi yengi mbi pëpe. Teti so si bê ti mbi ayeke na ngia, na gloire ti mbi aduti na ngia, na mitele ti mbi aduti na siriri nga.”—Ps. 16:8, 9.