Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Septembre 2017

“Tënë ti Nzapa . . . ayeke na ngangu ti sara ye”

“Tënë ti Nzapa . . . ayeke na ngangu ti sara ye”

“Tënë ti Nzapa ayeke na fini na ayeke na ngangu ti sara ye.”​—AHÉB. 4:12.

ABIA: 114, 113

1. Nyen la asara si mo hinga biani so Mbeti ti Nzapa ayeke na ngangu ti sara ye? (Bâ foto so ayeke na tongo nda ti article so.)

E AZO ti Jéhovah e yeke na kite oko ape so Mbeti ti Nzapa, tënë so lo tene na azo, “ayeke na fini na ayeke na ngangu ti sara ye”. (aHéb. 4:12). E bâ ngangu ti Bible na yâ ti gigi ti e nga na ti ambeni zo. Ambeni ita ti e ayeke lani azo ti nzi, angbâa ti mbangi wala azo ti sarango lango-sioni. Iri ti ambeni awu lani mingi wala ala yeke lani na nginza mingi me ala bâ lani so mbeni ye amanke ala (Zo-ti. 2:3-11). Fani mingi, azo so abâ lani so ti ala ahunzi awe awara lege so ague na zo na fini ndali ti ngangu so Bible ayeke na ni ti changé zo. Kite ayeke dä ape so a nzere na mo ti diko aye so asi na yâ ti fini ti azo na yâ ti molongo ti a-article ti Tour ti Ba Ndo so li ni ayeke “Bible achangé fini ti azo.” Nga, mo wani mo bâ so même na peko ti so aChrétien awara tâ tënë, Bible amû maboko na ala ti ngbâ lakue ti kpengba songo ti ala na Jéhovah.

2. Na lege wa la Bible asara ngangu na ndö ti azo na ngoi ti akozo Chrétien?

2 Eskê li ti e adoit ti kpe tongana laso azo mingi asara akota changement na peko ti so ala manda Bible? Ên-ën. Ye so adabe  ti e na aita ti e akozo Chrétien so ayeke lani na beku ti gue na yayu. (Diko 1 aCorinthien 6:9-11.) Na peko ti so bazengele Paul afa molongo ti azo so ayeke lï ande pëpe na yâ ti Royaume ti Nzapa, lo tene: “Ambeni na popo ti ala ayeke ândö tongaso.” Me Mbeti ti Nzapa nga na yingo vulu ti lo amû lani maboko na ala ti changé. Même na peko ti so ambeni zo aga aChrétien, ala sara ambeni kota faute so abuba songo ti ala na Jéhovah. Bible asara tënë ti mbeni Chrétien so a soro lo ti gue na yayu na ngoi ti akozo Chrétien so a bi lo na gigi; ambeni ngoi na pekoni, a kiri na lo na bungbi (1 aCor. 5:1-5; 2 aCor. 2:5-8). So aita ti e asara achangement mingi grâce na ngangu ti Bible, a kpengba e mingi.

3. Nyen la e yeke bâ na yâ ti article so?

3 Bible ayeke na ngangu mingi. So Jéhovah amû ni na e, e ye ti sara kue ti sara kua na ni nzoni (2 Tim. 2:15). Na yâ ti article so, e yeke bâ tongana nyen la e lingbi ti zia si Bible asara kua mingi (1) na ya ti gigi ti e, (2) na ngoi so e yeke na fango tënë nga (3) na ngoi so e yeke fa ye na pupitre. Aye so e yeke manda so ayeke mû ande maboko na e ti fa so e kiri singila na Babâ ti e ti yayu nga ti ye lo, lo so ayeke fa ye na e ti tene e bâ nzoni dä.​—És. 48:17.

NA YÂ TI GIGI TI E

4. (a) Nyen la a lingbi e sara ti tene Bible asara ngangu na ndö ti e? (b) Tongana nyen la mo yeke wara ngoi ti diko Bible?

4 Tongana e ye ti tene Bible asara kua na ndö ti e, a lingbi e diko ni lakue, même lâ oko oko tongana lege ayeke dä (Jos. 1:8). Tâ tënë, mingi ti e ayeke na aye mingi ti sara. Me a lingbi e zia pëpe si mbeni ye, même akua so e doit ti sara, akanga lege na e ti diko Bible. (Diko aÉphésien 5:15, 16.) Peut-être e leke ti diko Bible na ndapre wala ti diko ni na yâ ti lango ni wala na lakui. Tënë ti bê ti e ague oko na ti mbeni zo ti sungo psaume so atene: “Mbi ye ndia ti mo mingi! Mbi gbu li ti mbi dä na yâ ti lango ni kue.”​—Ps. 119:97.

5, 6. (a) Ngbanga ti nyen la a yeke kota ye ti tene e gbu li ti e? (b) E yeke gbu li ti e nzoni tongana nyen? (c) Tongana nyen la mo wara anzoni ye na peko ti so mo diko Bible nga mo gbu li ti mo na ndö ni?

5 Tongana e yeke diko Bible, a yeke kota ye ti gbu li ti e na ndö ti ye so e diko (Ps. 1:1-3). E yeke sara ye alingbi na awango ti ndara ti Bible nzoni na yâ ti fini ti e gï tongana e gbu li ti e na ndö ti ye so e diko si. Atâa e diko Bible so a imprimé ni wala e diko ni na ndö ti aye tongana tablette wala téléphone, ye so e ye ayeke ti tene ye so e diko andu bê ti e.

6 E yeke gbu li ti e nzoni tongana nyen? Azo mingi abâ so a yeke nzoni ti luti kete na peko ti so ala diko ambeni versê na ti  hunda terê ti ala na ahundango ndo so: ‘Ye so mbi diko so afa na mbi nyen na ndö ti Jéhovah? Tongana nyen la mbi sara ye alingbi na mama-ndia so ayeke na yâ ti aversê so? Aye wa la a lingbi mbi changé ni?’ Tongana e gbu li ti e na ndö ti Bible nga e sambela na ndö ti aversê so e diko, e yeke duti na nzara ti sara ye alingbi na ni. Tongana e sara tongaso, e yeke zia si Bible asara kua mingi na yâ ti gigi ti e.​—2 aCor. 10:4, 5.

NA NGOI SO E YEKE NA FANGO TËNË

7. E lingbi ti sara kua nzoni na Bible na fango tënë tongana nyen?

7 Nyen la alingbi ti mû maboko na e ti sara kua nzoni na Bible na fango tënë? Kozo ye ni ayeke ti sara kua na ni mingi na ngoi so e yeke fa tënë nga e yeke fa ye. Mbeni ita-koli atene: “Tongana mo na Jéhovah ayeke fa tënë da na da, gï mo la mo yeke sara tënë wala mo yeke zia lege na lo ti sara tënë?” Tënë so ita so aye ti tene ayeke so: Tongana e diko aversê na azo na ngoi so e yeke fa tënë, e yeke zia lege na Jéhovah ti sara tënë na azo ni. Mbeni versê so e soro ni nzoni ayeke na ngangu mingi ahon atënë kue so e lingbi ti tene (1 aThes. 2:13). Hunda terê ti mo: ‘Mbi yeke gi alege kue ti diko mbeni versê na azo so mbi yeke fa nzoni tënë na ala?’

8. Ngbanga ti nyen la a lingbi e sara aye mingi ahon gï ti diko aversê na ngoi so e yeke fa tënë?

8 Me gï ti diko aversê na azo so e yeke fa tënë na ala alingbi ape. Ngbanga ti nyen? Ngbanga ti so azo mingi amä yâ ti aversê nzoni ape wala ala mä yâ ni oko ape. A yeke lani tongaso na ngoi ti akozo Chrétien, na ngoi ti e nga kue a yeke tongaso (aRom. 10:2). Tongaso, a lingbi e tene ape so gï so e diko mbeni versê na zo, lo yeke mä yâ ni. A lingbi e mû ngoi ti sigi na akota tënë ti versê ni, peut-être e kiri e diko akota tënë ni nga e fa ndani. Tongana e  sara tongaso, tënë ti Bible ayeke ndu bê ti azo so ayeke mä e.​—Diko Luc 24:32.

9. Tongana nyen la e lingbi ti yôro aversê na yâ ti tënë ti e na mbeni lege so asara si azo ane Bible? Mû mbeni tapande.

9 A yeke nzoni e yôro aversê na yâ ti tënë ti e na mbeni lege so asara si azo ane Bible. Na tapande, e lingbi ti tene: “Zia e mä tënë so Lo so asara e atene na ndö ti tënë so.” Tongana e yeke fa tënë na mbeni zo so amä na bê na Christ ape, e lingbi ti tene: “Mä tënë so Mbeti so ayeke nzoni-kue atene na e.” Tongana e tingbi na mbeni zo so tënë ti bungbi ti vorongo agbu bê ti lo ape, e lingbi ti hunda lo: “Mo mä tënë so, so azo ayeke tene ni ngbene ye giriri so awe?” Tongana e hinga so ye so zo oko oko amä na bê na ni ayeke nde nde, e yeke sara ye kue so e lingbi ti sara ti yôro aversê na yâ ti atënë ti e na mbeni lege so anzere na zo.​—1 aCor. 9:22, 23.

10. (a) Fa ye so asi na mbeni ita-koli. (b) Tongana nyen la mo bâ ngangu ti Bible na yâ ti fango tënë ti mo?

10 Azo mingi abâ so ti sara kua na Bible na fango tënë alingbi ti sara ye mingi na ndö ti azo so ala yeke fa tënë na ala. Bâ tapande so. Mbeni ita-koli ague ti sara vizite na mbeni mbakoro-koli so ayeke diko ka apériodique ti e a sara angu mingi awe. Ahon ti tene lo mû gï na lo fini Tour ti Ba Ndo ni, ita-koli ni adiko na lo mbeni versê so ayeke na yâ ni. Lo diko 2 aCorinthien 1:3, 4, so atene: “Babâ so ayeke sara nzoni bê mingi na zo nga Nzapa ti dengo bê kue . . . adë bê ti e na yâ ti atara kue so e wara.” Atënë so andu bê ti koli ni mingi, tongaso lo hunda ti tene ita-koli ni akiri adiko ni. Koli ni afa so lo na wali ti lo ayeke tâ na bezoin ti dengo bê, na fadeso lo ye ti hinga ye mingi na ndö ti Bible. Mo yeda so Bible ayeke na ngangu ti sara ye na fango tënë, ni la ape?​—Kus. 19:20.

NA NGOI SO MO YEKE FA YE NA PUPITRE

11. A lingbi aita-koli so ayeke fa ye na pupitre asara kue ti sara nyen?

11 A nzere na e mingi ti gue na abungbi nga na akota bungbi. E yeke gue na abungbi kozoni kue ti voro Jéhovah. E yeke wara nga anzoni ye mingi na lege ti afango ye so e yeke wara na ngoi ti abungbi. Aita-koli ayeke na kota pasa ti fa ye na pupitre na ngoi ti abungbi. Na oko ngoi ni, a yeke nzoni ala hinga so ala yeke na kota kua ti sara (Jacq. 3:1). A lingbi ala sara kue si ye so ala fa alondo na Bible. Tongana a hunda na mo ti fa ye na pupitre, tongana nyen la mo lingbi ti zia si Bible asara kua mingi na yâ ti ye so mo yeke fa?

12. Tongana nyen la mbeni wamungo diskur alingbi ti sara kue si aversê aduti kota mbage ti diskur ti lo?

12 Sara kue si aversê aduti kota mbage ti diskur ti mo (Jean 7:16). Tënë so aye ti tene nyen? Kozoni kue, sara hange si aye so asi so mo yeke fa peko ni, atapande so mo yeke mû wala fason ti sarango diskur ti mo ni asara pëpe si azo agirisa na ndö ti aversê so mo diko. Girisa nga ape so, gï ti diko gbâ ti aversê la ayeke fango ye so alondo na Bible ape. Biani, tongana mo diko aversê mingi, azo so ayeke mä mo ayeke bata ni na li ti ala ape. Tongaso, soro nzoni aversê so mo ye ti diko, na pekoni mû ngoi ti diko ni na ti fa ndani, mû mbeni tapande ti fa nda ti aversê ni nga fa na azo tongana nyen ti sara ye alingbi na ni (Néh. 8:8). Tongana a mû na mo mbeni schéma ti diskur, gbu li ti mo nzoni na ndö ti schéma ni nga na aversê so ayeke na yâ ni. Gi ti hinga kamba so ayeke na popo ti atënë ni nga na aversê so a fa. Na pekoni, sara kua na aversê so mo soro ti fa nda ti atënë so ayeke na yâ ti schéma ni. (Mo lingbi ti wara anzoni wango na yâ ti aye ti manda  21 ti si na 23 ti buku Wara nzoni na lege ti Ekole ti Kusala ti aChrétien.) Kota ye ni ayeke ti sambela Jéhovah ti mû maboko na mo ti fa apendere pensé so ayeke na yâ ti Bible.​—Diko Esdras 7:10; aProverbe 3:13, 14.

13. (a) Tongana nyen la mbeni versê so a diko ni na ngoi ti bungbi andu bê ti mbeni ita-wali mingi? (b) Tongana nyen la mo wara aye ti nzoni na lege ti aye so a fa na ngoi ti abungbi?

13 Mbeni versê so a diko ni na ngoi ti bungbi andu bê ti mbeni ita-wali na Australie mingi. Atâa so aye ti vundu mingi asi na lo lani na ngoi so lo yeke kono, ambeni ngoi na pekoni lo yeda na ye so lo manda na yâ ti Bible na lo mû terê ti lo na Jéhovah. Atâa so kue, a yeke lani ngangu na lo mingi ti yeda so Jéhovah aye lo. Ye oko, a si na mbeni ngoi, lo ga ti hinga so Nzapa aye lo. Nyen la amû lani maboko na lo ti hinga ni? Mbeni kota changement asi na ngoi so lo gbu li ti lo na ndö ti mbeni versê so a diko ni na ngoi ti mbeni bungbi. Na pekoni, lo sara recherche na lo wara ambeni versê so ague oko na ni. * Mo nga kue, eskê mbeni versê so a diko na bungbi wala na kota bungbi andu bê ti mo mingi tongaso?​—Néh. 8:12.

14. Tongana nyen la e lingbi ti fa so e bâ tënë ti Jéhovah na nene ni?

14 Biani, e kiri singila mingi na Jéhovah so amû na e Mbeti ti lo, Bible. Lo mû gï na azo Bible ape me lo mû nga zendo so a yeke ngbâ ande lakue (1 Pi. 1:24, 25). A yeke nzoni e diko Bible lakue, e sara ye alingbi na ni nga e sara kua na ni na ngoi so e yeke mû maboko na azo. Tongana e sara tongaso, e yeke fa so e ye ni nga e kiri singila ndali ni, me ye so ayeke kota mingi ayeke so e yeke fa so e ye Jéhovah nga e kiri singila na lo.

^ par. 13 Bâ encadré “ Mbeni kota changement.”