Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Septembre 2016

Fason ti yungo bongo ti mo amû gloire na Nzapa?

Fason ti yungo bongo ti mo amû gloire na Nzapa?

“Ala sara ye kue teti gloire ti Nzapa.”—1 ACOR. 10:31.

ABIA: 34, 61

1, 2. Ngbanga ti nyen la aTémoin ti Jéhovah ayeke na nzoni fason ti yungo bongo? (Bâ foto so ayeke na tongo nda ti article ni.)

MBENI mbeti-sango na Pays-Bas asara tënë so na ndo ti mbeni bungbi so akota zo ti eglize asara, atene: “Mo yeke bâ so gbâ ti azo ayü bongo kirikiri, mbilimbili tongana ndo achauffé. Me ye ni ayeke ti lo tongaso na ngoi ti kota bungbi ti aTémoin ti Jéhovah ape. . . . Akoli na amolenge-koli ayeke yü veste na cravate, awali na amolenge-wali ayeke yü jupe so ayo nzoni . . . ason bê ti zo ape nga alingbi na ngoi ti e.” Biani, a yeke gonda ka aTémoin ti Jéhovah ndali ti so ala sara pendere “ti ala na yungo bongo so ayeke nzoni, na sarango ye ahon ndo ni pëpe nga na hange . . . na mbeni lege so alingbi na [azo] so atene ala yeke voro Nzapa”. (1 Tim. 2:9, 10). Bazengele Paul ayeke sara lani tënë ti awali, me wango ti lo so abâ nga aita-koli.

2 Ti yü bongo na lege ni ayeke kota ye mingi na lê ti e awakua ti Jéhovah nga na Nzapa so e yeke voro (Gen. 3:21). Ye so Bible atene na ndo ti yungo bongo nga na lekengo tere pendere afa na e biani so Kota Gbia ti dunia ayeke na mbeni fason so lo ye ti tene atâ wakua ti lo ayü bongo alingbi na ni. Tongaso, a lingbi fason ti yungo bongo ti e nga lekengo tere ti e pendere aduti pëpe ye so anzere gi na e wani. A lingbi e pensé nga na ye so alingbi ti nzere na Jéhovah Kota Gbia ti dunia kue.

3. Nyen la e lingbi ti hinga na ndo ti yungo bongo na lege ti Ndia so Nzapa amû na azo ti Israël?

 3 Na tapande na yâ ti Ndia so Nzapa amû na azo ti Israël a yeke wara andia so abata ala ndali ti sioni sarango ye ti amara so angoro ala. Ndia ni afa lani so Jéhovah ake yungo bongo so asara si a yeke ngangu ti sara kangbi polele na popo ti koli na wali. (Diko Deutéronome 22:5.) Na lege ti Ndia so Nzapa amû na ndo ti yungo bongo, e bâ polele so afason ti yungo bongo so asara si akoli akpa awali wala awali akpa akoli wala so asara si ayeke ngangu ti sara kangbi na popo ti akoli na awali anzere na Nzapa pëpe.

4. Nyen la alingbi ti mû maboko na e ti mû anzoni desizion na ndo ti yungo bongo?

4 Na yâ ti Bible e yeke na amama-ndia so alingbi ti mû maboko na e ti mû anzoni desizion na ndo ti yungo bongo. E yeke sara ye alingbi na ni atâa ndo wa la e yeke dä, ngobo ti kodoro ti e ayeke so wa wala na ngoi ti ndowa wala ngoi ti dê. E yeke pëpe na bezoin ti tene a mû na e molongo ti anzene nzene ye na ndo ti afason ti yungo bongo so ayeke na lege ni nga na ati so ayeke na lege ni ape. Ye oko, amama-ndia ti Bible ayeke mû maboko na e ti soro abongo so e ye ti yü ni. Zia e bâ ambeni mama-ndia ti Bible so alingbi ti mû maboko na e ti hinga “ye so bê ti Nzapa aye, so ayeke nzoni, so anzere nga so alingbi kue” na ngoi so e yeke soro abongo ti yungo ni.—aRom. 12:1, 2.

“E WANI E SARA NZONI TËNË TI E TONGANA AWAKUA TI NZAPA”

5, 6. A lingbi yungo bongo ti e asara nyen na azo?

5 Yingo ti Nzapa apusu lani bazengele Paul ti luti ngangu na ndo ti kpengba mama-ndia so ayeke na 2 aCorinthien 6:4. (Diko ni.) Pendere ti e wani ayeke fa ye mingi na ndo ti e. Azo mingi ayeke fa abango ndo ti ala na ndo ti e na lege ti ye so ‘lê ti zo abâ’. (1 Sam. 16:7). Tongaso, e so e yeke awakua ti Nzapa e hinga so yungo bongo ayeke pëpe gi yungo mbeni pendere ye so e ye ni. A lingbi amama-ndia ti Bible so e manda ni yeke yeke si e hinga apusu e ti yü pëpe abongo so agbu zo ngangu, so a yeke bâ zo na yâ ni wala so ayeke zia nzara ti koli wala wali na yâ ti zo. So aye ti tene so e yeke yü pëpe abongo so ayeke fa na gigi ambage ti tere ti e so zo adoit ti bâ ni kirikiri ape. A yeke na lege ni pëpe ti tene yungo bongo ti e ason bê ti azo so abâ e wala apusu ala ti bi lê ti ala na ngonda.

6 Tongana e yü bongo so ayeke na lege ni, ayeke propre nga e leke tere ti e pendere, azo alingbi ti ne e mingi ndali ti so e yeke awakua ti Jéhovah so ayeke Kota Gbia ti dunia kue. Nga, a lingbi ti gboto ala na mbage ti Nzapa so e yeke voro lo. Na ndo ni, nzoni yungo bongo ti e ayeke sara si azo ayeke duti na nzoni bango ndo na ndo ti bungbi ti e. Ye so a yeke sara si azo alingbi ti mä tënë so e yeke fa na ala ti sö fini ti ala.

7, 8. Na ambilimbili ngoi wa la a lingbi e yü bongo nzoni?

7 A lingbi yungo bongo ti e amû nengo na tënë so e yeke fa nga amû gloire na Jéhovah ndali ti so e ye pëpe ti son bê ti Nzapa ti e so ayeke nzoni-kue, aita ti e nga na azo ti territoire ti e (aRom. 13:8-10). A yeke kota ye ti sara tongaso mbilimbili na ngoi so e yeke gue na abungbi wala na fango tënë. A lingbi e yü bongo “na mbeni lege so alingbi na [azo] so atene ala yeke voro Nzapa”. (1 Tim. 2:10). Biani, ambeni bongo so ayeke nzoni ti yü na mbeni ndo alingbi ti duti nzoni pëpe na mbeni ndo nde. Tongaso, na yâ ti dunia kue, awakua ti Jéhovah ayeke sara ye alingbi na angobo ti ndo so ala yeke dä si ala son bê ti azo pëpe.

Yungo bongo ti mo ayeke sara si azo ane Nzapa so mo yeke sara kua na lo? (Bâ paragraphe 7, 8)

8 Diko 1 aCorinthien 10:31. Na ngoi so e yeke gue na akota bungbi, a lingbi e yü bongo  nzoni nga e sara ye ahon ndo ni ape. A lingbi e haka pëpe peko ti yungo bongo ti kirikiri so amû ndo na yâ ti dunia so. Même na ngoi so e yeke gue ti mû mbeni ndo ti lango na hôtel wala na ngoi so e yeke zia hôtel ni ti hon wala na ngoi so e yeke sara mbeni ye kozo na kapa ti kota bungbi wala na peko ni, a lingbi e yü bongo kirikiri wala gi tongaso ape. Tongana e sara tongaso e yeke duti na ngia ti fa na azo so e yeke aTémoin ti Jéhovah nga ye oko ayeke kanga lege na e ape ti fa tënë na ngoi kue.

9, 10. Ngbanga ti nyen aPhilippien 2:4 andu yungo bongo ti e?

9 Diko aPhilippien 2:4. Ngbanga ti nyen a lingbi e gbu li ti e na ndo ti aye so yungo bongo ti e ayeke sara na aita ti e? Mbeni raison ni ayeke so awakua ti Jéhovah ayeke sara kue ti sara ye alingbi na wango ti Bible so atene: “Ala sara si amembre ti tere ti ala so ayeke na sese so akui tongana a ndu lango-sioni, sioni ye, nzara ti tere.” (aCol. 3:2, 5). E ye pëpe ti sara si aduti ngangu na aita ti e ti sara ye alingbi na wango so. Aita so asara lango-sioni kozo si azia lege ni angbâ peut-être ti tiri na asioni nzara ti bê ti ala (1 aCor. 6:9, 10). Eskê e ye ti sara si a duti ngangu na ala mingi ti ngbâ ti tiri na anzara ti bê ti ala?

10 Na ngoi so e yeke na tere ti aita ti e, a lingbi yungo bongo ti e asara si congrégation aduti mbeni ndo so zo abata tere ti lo dä ndali ti lango-sioni. A yeke tongaso atâa na ngoi ti bungbi wala na mbeni ngoi nde. E yeke na liberté ti soro bongo so e ye ti yü. Me, a yeke ti e kue ti yü abongo so asara si a yeke ngangu pëpe na aita ti ngbâ nzoni-kue nga ti sara si apensé ti amba ti e, atënë  ti yanga ti ala nga na asarango ye ti ala aduti nzoni na lê ti Nzapa (1 Pi. 1:15, 16). Tâ ndoye ‘asara ye ti songo bê ti zo pëpe, lo gi gi aye so anzere na lo pëpe’.—1 aCor. 13:4, 5.

YÜ BONGO NZONI ALINGBI NA NGOI NGA NA NDO SO MO YEKE DÄ

11, 12. Nyen la a yeke nzoni e hinga na ngoi so e yeke gbu li ti e na ndo ti bongo so e ye ti yü?

11 Na ngoi so awakua ti Jéhovah ayeke mû desizion na ndo ti bongo so ala ye ti yü, ala hinga so “ngoi ayeke dä ndali ti kua oko oko kue nga na ye kue so a sara.” (Zo-ti. 3:1, 17, FD). A yeke na lege ni so e yeke yü bongo alingbi na ngoi ti dê wala ngoi ti ndo wâ. Tongaso, ando so e yeke dä ayeke nde nde. Me, andia ti Jéhovah achangé ti lo ape.—Mal. 3:6.

12 Na ngoi so ndowa ayeke mingi, a lingbi ti duti ngangu na e mingi ti sara kue ti yü bongo so ane zo nga so ayeke na lege ni. Tongaso, a yeke nzere na aita ti e mingi tongana e yü pëpe abongo so agbu zo ngangu wala so akono mingi si a yeke bâ zo na yâ ni (Job 31:1). Nga, na ngoi so e yeke na yanga ti bale ti sara ngia wala e gue ti tï ngu na yâ ti piscine, a yeke nzoni e yü bongo so ayeke na lege ni (aProv. 11:2, 20). Même tongana gbâ ti azo na yâ ti dunia ayü abongo ti tingo na ngu so a lingbi ti bâ ala na yâ ni, a lingbi e sara kue si bongo so e yü amû gloire na Jéhovah, Nzapa ti e so ayeke nzoni-kue.

13. Ngbanga ti nyen a lingbi wango so ayeke na 1 aCorinthien 10:32, 33 amû maboko na e na ndo ti desizion ti yungo bongo?

13 Mbeni kpengba mama-ndia nde ayeke dä so alingbi ti mû maboko na e ti soro anzoni bongo. A yeke nzoni e bi bê na conscience ti ambeni zo: atâa a yeke amba ti e aChrétien wala pëpe. (Diko 1 aCorinthien 10:32, 33.) A yeke ti e ti yü pëpe abongo so alingbi ti son bê ti amba ti e. Paul atene: “Zia zo oko oko na popo ti e agi ti nzere na mba ti lo na yâ ti ye so ayeke nzoni ti kpengba mba ti lo ni.” Lo fa raison ni lo tene: “Teti même Christ agi ti nzere na lo wani pëpe.” (aRom. 15:2, 3). Biani, ti mû maboko na azo ayeke lani ye so Jésus azia ni kozo na aye so agbu bê ti lo wani: ti mû maboko na azo ayeke lani kota ye so lo sara ti sara ye so bê ti Nzapa aye. Tongaso, e yeke gi pëpe ti yü abongo so e wani e ye me so ayeke kanga lege na azo ti mä tënë so e yeke fa.

14. Tongana nyen la ababâ na amama alingbi ti fa na amolenge ti ala ti mû gloire na Nzapa na lege ti yungo bongo ti ala?

14 A lingbi ababâ na amama afa na amolenge ti ala ti sara ye alingbi na amama-ndia ti Bible. Ye so ahunda ti tene ala sara kue ti zia ngia na bê ti Nzapa na lege so ala yü bongo nzoni nga ala leke tere ti ala pendere (aProv. 22:6; 27:11). Ala lingbi ti yôro na yâ ti bê ti amolenge ti ala ti ne Nzapa so ayeke nzoni-kue, so ala yeke voro lo, na lege so ala zia na amolenge ni nzoni tapande nga na ndoye ala fa na ala ye so a lingbi ala sara. Tongana ababâ na amama afa na amolenge ti ala tongana nyen la ala lingbi ti hinga anzoni bongo nga ala fa na ala ndo so ala lingbi ti wara ni dä ayeke duti pendere mingi. A lingbi amolenge amû desizion ti yü abongo pëpe gi ngbanga ti so anzere na ala, me a lingbi ala mû desizion ti yü bongo so amû gloire na Nzapa so ala yeke sara kua na iri ti lo.

SARA KUA NZONI NA LIBERTÉ TI MO

15. Nyen la alingbi ti mû maboko na e ti mû nzoni desizion na ndo ti yungo bongo?

15 Bible amû na e anzoni wango so alingbi ti mû maboko na e ti soro nzoni aye so ayeke zia ngia na bê ti Nzapa. Me, e yeke yü bongo so e ye. Ye so e oko oko e ye ayeke nde nde, ambeni zo ayeke na nginza mingi  ambeni ayeke na ni mingi ape. Me a lingbi abongo ti e aduti lakue na lege ni, propre, alingbi na ye so e yeke sara nga na kodoro so e yeke dä.

16. Ngbanga ti nyen la a yeke kota ye ti sara effort ti yü bongo nzoni?

16 A lingbi e hinga so a yeke lakue kete ye ape ti bâ anzene nzene ye kue na ndo ti mbeni ye so e ye ti sara na ti mû nzoni desizion. Na yâ ti amagazin mingi a yeke wara mingi ni gi abongo so azo ti dunia so aye ni, tongaso, ti wara ajupe, arobe, anduzu bongo, aveste nga na apantalon so agbu zo ngangu ape alingbi ti mû ngoi mingi nga ahunda effort. Me tongana na bê ti e kue e sara effort ti yü bongo so ayeke nzoni nga so ayeke na lege ni, aita ti e ayeke bâ ni nga ayeke nzere na ala mingi. Nga, tongana e mû gloire na Babâ ti e ti yayu so andoye e mingi, e yeke wara ngia mingi na ngia so ahon angangu kue so e sara ti yü bongo so amû gloire na Nzapa.

17. Ambeni ye wa la alingbi ti mû maboko na mbeni ita-koli ti bata kuä ti yanga ti lo wala pëpe?

17 A yeke na lege ni ti tene zo abata kuä ti yanga ti lo? Ndia ti Moïse ahunda lani ti tene akoli abata kuä ti yanga ti ala. Me, aChrétien ayeke na gbe ti Ndia ti Moïse ape wala a hunda na ala pëpe ti bata Ndia ti Moïse (Lév. 19:27; 21:5; aGal. 3:24, 25). Na ambeni ndo, tongana zo abata kuä ti yanga ti lo si lo leke ni nzoni peut-être ayeke sioni ape na azo ayeke ne lo nga peut-être ayeke kanga lege na azo ape ti mä tënë ti Royaume. Biani, ambeni ita-koli so ayeke mû li ni na yâ ti congrégation ayeke bata kuä ti yanga ti ala. Atâa so kue, ambeni ita alingbi ti mû desizion ti bata pëpe kuä ti yanga ti ala (1 aCor. 8:9, 13; 10:32). Na yâ ti ambeni ngobo wala na ambeni ndo, azo ayeke bata kuä ti yanga ti ala ape nga aChrétien abâ so ayeke na lege ni ape ti bata kuä ti yanga ti ala. Ti bata kuä ti yanga alingbi peut-être ti kanga lege na mbeni ita-koli ti mû gloire na Nzapa nga alingbi peut-être ti sara si tënë ayeke na li ti lo.—aRom. 15:1-3; 1 Tim. 3:2, 7.

18, 19. Michée 6:8 ayeke mû maboko na e tongana nyen na ngoi so e yeke sara ngangu ti tene yungo bongo ti e anzere na Nzapa?

18 E kiri singila mingi na Jéhovah so amû na e pëpe gbâ ti molongo ti anzene nzene ndia na ndo ti yungo bongo nga na lekengo tere pendere. Me lo mû lege na e ti sara kua na liberté ti e ti zia si amama-ndia ti Bible la afa lege na e ti mû adesizion e wani. Tongaso, même na yâ ti yungo bongo ti e nga na lekengo tere ti e pendere, e lingbi ti fa so e ye ti ‘tambela na Nzapa ti e na sarango tere ti e kete.’—Mi. 6:8.

19 E yeke sara tere ti e kete ti hinga so Jéhovah ayeke nzoni-kue nga andia ti lo ayeke anzoni ye so ayeke fa lege na e. Tongana e ye ti sara tere ti e kete, e yeke sara ye alingbi na andia ti lo na yâ ti gigi ti e. Ti sara tere ti e kete ayeke mû nga maboko na e ti ne abango ndo ti amba ti e nga na atënë ti bê ti ala.

20. A yeke nzoni yungo bongo ti e nga na lekengo tere ti e pendere asara nyen na amba ti e?

20 A lingbi yungo bongo ti e afa polele so e yeke awakua ti Jéhovah. A yeke nzoni aita ti e nga na azo kue abâ so e lingbi biani ti sara kua na iri ti Nzapa ti e so ayeke mbilimbili. Lo mû na e andia nga e yeke na ngia ti sara kue ti sara ye alingbi na ni. E gonda aita so yungo bongo ti ala nga na nzoni tambela ti ala amû gloire na Jéhovah nga azia ngia na bê ti lo. Ye so asara si azo ti nzoni bê ayeda na tënë so e yeke fa na ala ti sö fini ti ala. Ti mû anzoni desizion na ndo ti bongo so e ye ti yü ayeke mû gloire lakue na Lo so ayü na tere ti lo “yango-iri na gloire.”—Ps. 104:1, 2.