Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Septembre 2016

Bâ nzoni na lege ti afango lege ti Jéhovah laso

Bâ nzoni na lege ti afango lege ti Jéhovah laso

NZONI DESIZION SO MBENI ITA AMÛ NA POLOGNE

“NA NGOI so mbi wara batême mbi yeke lani na ngu 15, nze omene na pekoni, mbi to nda ti sara kua ti pionnier auxiliaire. Ngu oko na pekoni, mbi hunda ti sara kua ti pionnier permanent. Na ngoi so mbi hunzi mandango mbeti na lycée, mbi hunda ti gue ti fa tënë na ndo so bezoin ti awafango tënë ayeke dä mingi. Mbi ye lani ti gue ayo na ndo so a dü mbi dä nga ayo na âta ti mbi ti wali so mbi na lo e lango ndo oko me so ayeke Témoin ti Jéhovah ape. Vundu asara lani mbi mingi na ngoi so surveillant ti circonscription atene na mbi so territoire so mbi yeke fa tënë dä ayeke tâ gi na yâ ti gbata so a dü mbi dä. Mbi ye ti tene lo hinga vundu ti mbi ni ape. Mbi ba li ti mbi na sese, mbi hon ayo ti gbu li ti mbi na ndo ti tënë so lo tene. Mbi tene na mba ti mbi pionnier so mbi na lo e yeke fa tënë, mbi tene: ‘Mbi bâ so mbi yeke sara ye tongana Jonas la. Me na nda ni Jonas ague lani na Ninive. Tongaso, mbi kue mbi yeke gue na ndo so a fa na mbi ti sara kua dä.’

“Mbi sara kua ti pionnier asara fadeso ngu osio awe na kodoro ti mbi, mbi bâ so ti sara ye alingbi na ye so a fa ayeke nzoni mingi. Kota kpale ni lani ayeke sioni bango ndo so mbi yeke na ni. Fadeso mbi yeke na ngia mingi. Na yâ ti nze oko, mbi yeke manda Bible na azo 24. Merci na Jéhovah, mbi komanse ti manda Bible même na âta ti mbi so ayeke kanga lani lege na mbi.”

MBENI NZONI YE SO ASI NA KODORO TI FIDJI

Mbeni wamandango Bible na Fidji adoit lani ti mû desizion ti gue na mbeni kota bungbi wala ti tene lo na koli ti lo ague na mbeni matanga ti anniversaire ti mbeni fami. Koli ti lo ayeda so lo lingbi ti gue na kota bungbi ni. Lo tene na koli ti lo so na peko ti kota bungbi ni lo yeke gue ti wara lo na ndo ti matanga ni. Na ngoi so lo kiri na yanga-da na peko ti kota bungbi ni, lo bâ so, a yeke nzoni lo kpe ti yôro tere ti lo na yâ ti mbeni ye so alingbi ti buba songo ti lo na Jéhovah, tongaso lo gue lani na peko ti koli ti lo ni ape.

Na ngoi so koli ti lo ni atene na afami ni so ni tene na wali ti ni ti ga na ti wara ni na peko ti “bungbi” ti lo “ti aTémoin” ni, ala tene: “Lo yeke ga ande ape, aTémoin ti Jéhovah ayeke sara ka matanga ti dungo zo ape.” *

Tere ti koli ni anzere mingi so wali ti lo asara ye alingbi na atënë ti mabe ti lo nga na conscience ti lo. So lo yeke be-ta-zo azi lege na lo ti fa tënë na koli ti lo nga na ambeni zo. Ye ti peko ni ayeke nyen? Koli ni ayeda ti manda Bible na lo komanse ti ga na abungbi legeoko na wali ti lo.

^ par. 7 Bâ “Atënë so azo ahunda” so ayeke na yâ ti Tour ti Ba Ndo ti lango 15 ti décembre, ngu 2001.