Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) SEPTEMBRE 2016

“Tënë ti Nzapa ayeke na fini”

Atënë so azo ahunda

Atënë so azo ahunda

“Tënë ti Nzapa” so aHébreu 4:12 atene “ayeke na fini na ayeke na ngangu ti sara ye,” a yeke nyen?

Atënë so angoro versê so afa so bazengele Paul ayeke sara lani tënë na ndo ti tënë ti Nzapa so andu ye so lo leke ti sara, so ayeke na yâ ti Bible.

Na yâ ti ambeti ti e, e yeke fa ka aHébreu 4:12 ti fa so Bible ayeke na ngangu ti changé fini ti azo na a yeke na lege ni ti tene tongaso. Me a yeke nzoni ti hinga ye so Paul ayeke sara lani tënë na ndo ni na ngoi so lo sû atënë so ayeke na aHébreu 4:12. Lo yeke wa lani aChrétien so ayeke aHébreu ti sara ye ague oko na aye so Nzapa aleke ti sara. Mingi ti aye so Nzapa aleke ti sara ayeke lani na yâ ti ambeti so ayeke nzoni-kue. Paul asara kua na tapande ti amolenge ti Israël so Nzapa azi ala lani na Égypte. Ala yeke lani na beku ti lï na “sese so dulait na ngu-lavu ayeke sua dä,” so Nzapa amû zendo ni, ndo so ala lingbi ti wu tere ti ala dä nzoni.—Ex. 3:8; Deut. 12:9, 10.

Ye so Nzapa aleke lani ti sara la. Me amolenge ti Israël ake lani fango lege ti Jéhovah nga ala mä na bê ape, tongaso mingi ti ala alï pëpe na ndo ti wungo tere so (Nom. 14:30; Jos. 14:6-10). Me, Paul atene so “mbeni zendo ti lingo na yâ ti wungo tere ti [Nzapa] angbâ”. (aHéb. 3:16-19; 4:1). A yeke polele so “zendo” so ayeke mbage ti ye so Nzapa aleke ti sara. Legeoko tongana aChrétien so ayeke aHébreu, e lingbi ti manda ye na ndo ti ye so Nzapa aleke ti sara nga ti sara ye alingbi na ni. Ti fa so zendo so alondo na yâ ti Mbeti ti Nzapa, Paul afa mbage ti tënë so ayeke na Genèse 2:2 nga na Psaume 95:11.

Biani, a ndu bê ti e mingi so “mbeni zendo ti lingo na yâ ti wungo tere ti [Nzapa] angbâ”. E yeke na confiance so tënë ti lingo na yâ ti wungo tere ti Nzapa, so Bible asara tënë ni, ayeke ga biani tâ tënë nga e komanse ti sara ambeni ye so ayeke mû lege na e ti lï na yâ ni. E yeke sara aye ni so pëpe gi na mungo peko ti Ndia ti Moïse wala na sarango anzoni ye gi ti nzere na Jéhovah. Me so e yeke na mabe na Nzapa, e yeke na ngia ti sara ye ague oko na ye so lo leke ti sara nga e yeke ngbâ ti sara ni. Na ndo ni, tongana ti so a fa na nduzu ge, azo saki mingi na ndo ti sese ato nda ti manda Bible nga ti manda ye na ndo ti ye so Nzapa aleke ti sara. Ye so apusu mingi ti ala ti changé aye na yâ ti fini ti ala, ti mä na bê na Nzapa nga ti wara batême. Fason so ala changé aye na yâ ti fini ti ala afa biani so “tënë ti Nzapa ayeke na fini na ayeke na ngangu ti sara ye”. Ye so Nzapa aleke ti sara so lo fa na yâ ti Bible asara ye mingi na yâ ti fini ti e awe, na a yeke ngbâ ti sara ngangu na yâ ti fini ti e.