Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) OCTOBRE 2016

Ngbâ ti kpengba songo ti mo na Jéhovah na ngoi so mo yeke sara kua ti lo na kodoro-wande

Ngbâ ti kpengba songo ti mo na Jéhovah na ngoi so mo yeke sara kua ti lo na kodoro-wande

“Mbi bata tënë ti Mo na bê ti mbi.”PS. 119:11.

ABIA: 142, 92

1-3. (a) Nyen la a lingbi e zia ni lakue na kozo ndo? (b) Ambeni mbilimbili kpale wa la ala so ayeke manda mbeni yanga ti kodoro nde atingbi na ni? Akpale so asara si ahundango ndo wa alondo? (Bâ foto so ayeke na tongo nda ti article ni.)

LASO, aTémoin ti Jéhovah saki na saki ayeke mû mbage ti ala ti sara si prophétie ti fango tënë na “amara kue, akete mara kue, azo ti ayanga ti kodoro kue” aga tâ tënë (Apoc. 14:6). Mo yeke na popo ti azo so ayeke manda mbeni yanga ti kodoro nde? Mo yeke sara peut-être kua ti missionnaire wala mo yeke fa tënë na mbeni ndo so bezoin ayeke dä mingi na mbeni kodoro nde? Wala mo komanse ti gue na abungbi na yâ ti mbeni congrégation ti mbeni yanga ti kodoro nde na yâ ti kodoro ti mo?

2 A lingbi e awakua ti Jéhovah kue e zia na kozo ndo songo ti e na lo nga songo ti azo ti sewa ti e na lo (Mat. 5:3). Ye oko, na ambeni ngoi, e lingbi ti bâ so a yeke ngangu na e ti manda ye nzoni ndali so akua ti e ayeke mingi. Me aita so ayeke sara kua na kodoro-wande ayeke tingbi na ambeni kpale nde.

 3 Aita so ayeke sara kua na yâ ti mbeni congrégation ti mbeni yanga ti kodoro nde abezoin ti manda mbeni fini yanga ti kodoro, me ala bezoin nga ti sara kue ti manda aye ti Nzapa so ndani alï mingi (1 aCor. 2:10). Tongana nyen la ala lingbi ti sara ni tongana ala mä pëpe yâ ti aye kue so a yeke tene na yâ ti congrégation ni? Ngbanga ti nyen la a lingbi ababâ na amama asara kue ti tene tâ tënë andu bê ti amolenge ti ala?

MBENI KPALE NDALI TI SONGO TI E NA JÉHOVAH

4. Nyen la alingbi ti duti mbeni kpale ndali ti songo ti e na Jéhovah? Fa mbeni tapande ni.

4 Tongana e lingbi pëpe ti mä yâ ti afango ye ti Bible na mbeni yanga ti kodoro nde, a lingbi ti duti mbeni kota kpale ndali ti songo ti e na Jéhovah. Na ngoi so Néhémie akiri na Jérusalem, lo bâ so ambeni molenge so ayeke kâ ahinga lani ti tene Hébreu pëpe. (Diko Néhémie 13:23, 24.) Songo ti amolenge so na Jéhovah awoko ndali ti so ala lingbi pëpe ti mä yâ ti Mbeti ti Nzapa kue.—Néh. 8:2, 8.

5, 6. Nyen la ababâ na amama so ayeke sara na Jéhovah na yâ ti congrégation ti yanga ti kodoro nde abâ? Ngbanga ti nyen?

5 Ambeni babâ na mama so ayeke aChrétien, so ayeke sara kua ti Jéhovah na mbeni congrégation ti mbeni yanga ti kodoro nde, abâ so songo ti amolenge ti ala na Jéhovah awoko. Ndali ti so amolenge ni alingbi pëpe ti mä yâ ti aye kue so a yeke tene na abungbi, aye so a yeke fa na Da ti Royaume andu bê ti ala nzoni ape. Pedro, [1] so lo na sewa ti lo alondo lani na Amerika ti Mbongo ague na Australie, atene: “Tongana e sara lisoro na ndo ti aye ti yingo, a lingbi a ndu tënë ti bê nga na ti bibe.”—Luc 24:32.

6 Tongana e diko ye na mbeni yanga ti kodoro nde, peut-être a yeke ndu bê ti e tongana ti yanga ti kodoro ti e wani ape. Nga, ndali ti so a yeke ngangu na e ti sara lisoro nzoni na azo na mbeni yanga ti kodoro nde, a lingbi ti sara si e nze na songo ti e na Jéhovah alingbi ti woko. Tongaso, na ngoi so e ngbâ ti bata nzara so e yeke na ni ti sara na Jéhovah na yâ ti mbeni congrégation ti yanga ti kodoro nde, a lingbi e gi ti bata songo ti e na Jéhovah.—Mat. 4:4.

ALA BATA LANI SONGO TI ALA NA JÉHOVAH

7. Tongana nyen la azo ti Babylone agi ti pusu Daniel ti yeda na ngobo ti ala nga na bungbi ti nzapa ti ala?

7 Na ngoi so a gue na Daniel na amba ti lo na Babylone, azo ti Babylone aye gi lani ti tene Daniel na amba ti lo ayeda ti sara ye alingbi na ngobo ti ala na lege so ala fa na ala “yanga ti azo ti Chaldée”. Na ndo ni, kota zo ti yangbo so ayeke fa ye na ala amû na ala iri ti azo ti Babylone (Dan. 1:3-7). Iri so a mû na Daniel aye ti sara tënë ti Bel, kozo nzapa ti Babylone. Peut-être Gbia Nébucadnezzar aye ti sara tongaso ti pusu Daniel ti mä na bê so nzapa ti Babylone ayeke na ngangu ahon Jéhovah, Nzapa ti lo.—Dan. 4:8.

8. Nyen la amû maboko na Daniel ti ngbâ ti kpengba songo ti lo na Jéhovah na ngoi so lo yeke na kodoro-wande?

8 Na Babylone, a mû na Daniel apendere kobe ti gbia. Me lo ‘kanga bê ti lo’ tongaso si lo sara ye ague nde pëpe na ndia ti Nzapa (Dan. 1:8). Ndali ti so lo ngbâ ti manda “mbeti,” so ti tene ambeti ti Nzapa, na yanga ti kodoro ti lo, lo ngbâ ti kpengba songo ti lo na Jéhovah na ngoi so lo yeke na kodoro-wande (Dan. 9:2). Ni la, ngu 70 tongaso na peko ti so lo si na Babylone, a ngbâ ti hinga lo na iri ti lo ti Hébreu.—Dan. 5:13.

9. Tongana ti so a fa na Psaume 119, nyen la tënë ti Nzapa asara na ndo ti mbeni wasungo psaume?

9 A lingbi wasungo Psaume 119 agbu ngangu na ngoi so azo ti yangbo ti gbia asara sioni tënë na ndo ti lo. Me lo wara ngangu na lege ti Mbeti ti Nzapa na amû maboko na lo ti duti nde na ala (Ps. 119:23, 61). Lo zia si  atënë ti Nzapa andu bê ti lo ngangu.Diko Psaume 119:11, 46.

NGBÂ TI KPENGBA SONGO TI MO NA JÉHOVAH

10, 11. (a) Na ngoi so e yeke manda Bible, nyen la a lingbi e gi ni kozo? (b) Tongana nyen la e lingbi ti si na ye so e yeke gi? Fa mbeni tapande ni.

10 Atâa e yeke na aye mingi ti sara na yâ ti kua ti Jéhovah nga na place ti kua ti e, e kue e bezoin ti mû ngoi ti manda ye e wani nga ti voro Nzapa na yâ ti sewa (aÉph. 5:15, 16). Kozo ye so e yeke gi ayeke pëpe ti diko gi gbâ ti alembeti wala gi ti leke acommentaire ti kiri tënë na abungbi. E ye ti sara kue ti tene tënë ti Nzapa andu bê ti e nga akpengba mabe ti e.

11 Ti si na ye so, a lingbi e pensé gi pëpe na ndo ti bezoin ti ambeni zo na ngoi so e yeke manda ye me e pensé nga na ndo ti abezoin ti e wani (aPhil. 1:9, 10). A lingbi e hinga so na ngoi so e yeke leke tere ti e ndali ti fango tënë, ndali ti bungbi wala ndali ti mbeni diskur, mingi ni aye so e diko ni ayeke lakue pëpe ye so e yeke na bezoin ni. Zia e mû mbeni tapande: Atâa so mbeni zo ti tongo ye ayeke tara kobe so lo tö kozo si lo mû na azo, lo lingbi pëpe ti ngbâ na fini gi na kobe so lo tara so. Tongana lo ye ti ngbâ na nzoni seni, a lingbi lo tö nzoni kobe ndali ti lo wani. Legeoko nga, tongana e ye ti kpengba songo ti e na Jéhovah, a lingbi e manda Bible lakue. Nzoni mandango ye tongaso ayeke kaï abezoin ti e.

12, 13. Ngbanga ti nyen aita mingi abâ so a yeke nzoni mingi ti manda Bible na yanga ti kodoro ti ala?

12 Mingi ti ala so ayeke sara na Jéhovah na yâ ti congrégation ti mbeni yanga ti kodoro nde abâ so a yeke nzoni mingi ti manda Bible lakue na ‘yanga ti kodoro so a dü ala dä.’ (Kus. 2:8). Même amissionnaire ahinga so ala lingbi ti ngbâ gi pëpe na ndo ti aye so ala yeke mä na bungbi ti ngbâ ti kpengba na yâ ti  kua so ala yeke sara na Jéhovah na yâ ti congrégation ti mbeni yanga ti kodoro nde.

13 Alain, so amanda yanga ti azo ti Perse teti ngu miombe tongaso, atene: “Tongana mbi leke abungbi na yanga ti kodoro ti azo ti Perse, mbi yeke luti mingi gi na ndo ti yanga ti kodoro ni. Ndali ti so li ti mbi ayeke gi na ndo ti hingango yanga ti kodoro ni, aye ti yingo so mbi diko andu bê ti mbi nzoni ape. A yeke ndali ni la mbi zia mbeni ngoi lakue lakue ti manda Bible nga na ambeni mbeti na yanga ti kodoro ti mbi.”

NDU BÊ TI AMOLENGE TI MO

14. Nyen la a lingbi ababâ na amama asara kue ndali ti amolenge ti ala? Ngbanga ti nyen?

14 Ababâ na amama so ayeke aChrétien ayeke na bezoin ti sara kue ti tene tâ tënë andu bibe nga na bê ti amolenge ti ala. Serge na wali ti lo, Muriel, asara kua na yâ ti mbeni congrégation so ayeke tene yanga ti kodoro nde ahon ngu ota. Na pekoni ala komanse ti bâ so molenge ti ala ti koli so ayeke na ngu 17 ayeke na nzara ti fango tënë nga na abungbi ape. Muriel atene: “Fango tënë na mbeni yanga ti kodoro nde ason bê ti lo songo, atâa so kozo lo ye lani mingi ti fa tënë na yanga ti kodoro ti lo Français.” Serge atene: “Na ngoi so e hinga so ye so akanga lege na guengo na li ni ti lo na lege ti yingo, e mû desizion ti kiri na ngbene congrégation ti e.”

Sara kue ti tene tâ tënë andu bê ti amolenge ti mo (Bâ paragraphe 14, 15)

15. (a) Aye wa la alingbi ti mû maboko na ababâ na amama ti bâ wala a lingbi ala kiri na congrégation so amolenge ti ala amä yanga ti kodoro ni nzoni? (b) Wango wa la Deutéronome 6:5-7 amû na ababâ na amama?

15 Aye wa la alingbi ti mû maboko na ababâ na amama ti mû desizion ti kiri na yâ ti congrégation so ayeke tene yanga ti kodoro so amolenge ti ala amä ni nzoni? Kozo ni, a lingbi ala bâ wala ala yeke na ngoi nga na ngangu ti fa na amolenge ti ala ti ndoye Jéhovah nga na oko ngoi ni ti fa na ala yanga ti mbeni kodoro nde. Use ni, peut-être ala bâ so amolenge ti ala aye pëpe ti fa tënë, ti gue na abungbi, wala même ti sara kua ti Jéhovah na yâ ti mbeni congrégation ti yanga ti kodoro nde. Na yâ ti aye tongaso, ababâ na amama alingbi ti mû desizion ti kiri na congrégation ti yanga ti kodoro so amolenge ti ala amä yâ ni nzoni juska ti tene amolenge ni aduti na kpengba songo na Jéhovah.—Diko Deutéronome 6:5-7.

16, 17. Tongana nyen la ambeni babâ na mama afa ye nzoni na amolenge ti ala na ndo ti Jéhovah na yâ ti mbeni congrégation ti yanga ti kodoro nde?

16 Ambeni babâ na mama awara lege ti fa ye na amolenge ti ala na yanga ti kodoro ti ala na ngoi so ala yeke gue na abungbi na yâ ti mbeni congrégation wala na yâ ti mbeni groupe ti mbeni yanga ti kodoro nde. Charles, so ayeke babâ ti amolenge-wali ota so ngu ti ala ayeke na popo ti ngu 9 ti si na ngu 13, ayeke gue na yâ ti mbeni groupe so ayeke tene yanga ti Lingala. Lo tene: “E mû desizion ti manda ye na amolenge ni nga ti voro Nzapa na yâ ti sewa na yanga ti kodoro ti e. Me e yeke manda nga aye so ayeke mû acommentaire dä na ngoi ti bungbi nga na ajeu na Lingala tongaso si ala lingbi ti manda ni na yâ ti ngia.”

Sara ngangu ti manda yanga ti kodoro ti ndo so mo yeke dä nga ti mû acommentaire na abungbi (Bâ paragraphe 16, 17)

17 Kevin ayeke babâ ti amolenge-wali use so ayeke na ngu oku nga na ngu miombe. Lo sara ngangu ti fa na amolenge ti lo tâ tënë ndali ti so amolenge ni amä nzoni ape yâ ti aye so a yeke fa na yâ ti congrégation so ala yeke gue dä, ndali ti so a yeke na yanga ti kodoro nde. Lo tene: “Mbi na wali ti mbi e yeke manda Bible na ala oko oko kue na Français, na yanga ti kodoro ti ala. E leke ti tene fani oko na yâ ti nze oko e gue na mbeni bungbi so a sara na Français, nga na ngoi ti avacance ti e, e yeke gue na mbeni kota bungbi ti lango ota na yanga ti kodoro ti e.”

18. (a) Mama-ndia wa la ayeke na aRomain 15:1, 2 so alingbi ti mû maboko na mo ti hinga ye so ayeke nzoni mingi ndali ti amolenge ti mo? (b) Awango wa ambeni babâ na mama amû? (Bâ kete tënë.)

18 Biani, a yeke na sewa oko oko ti bâ ye wa la ayeke nzoni mingi ndali ti amolenge ti ala  nga ndali ti songo ti amolenge ni na Jéhovah [2] (aGal. 6:5). Muriel, so e sara tënë ti lo fade, atene so lo na koli ti lo azia aye so agbu bê ti ala ndali ti songo ti molenge ti ala ti koli na Jéhovah. (Diko aRomain 15:1, 2.) Laso, Serge abâ so ala mû lani nzoni desizion. Lo tene: “Ngbene ye so e kiri na congrégation ti yanga ti Français, molenge ti e akomanse ti gue na li ni na lege ti yingo na lo wara batême. Lo yeke fadeso pionnier permanent. Lo ye même ti kiri na mbeni groupe ti mbeni yanga ti kodoro nde.”

ZIA SI TËNË TI NZAPA ANDU BÊ TI MO

19, 20. Tongana nyen la e lingbi ti fa so e ye Mbeti ti Nzapa?

19 Na ndoye, Jéhovah asara si a sara Mbeti ti lo, Bible, na ayanga ti kodoro ngbangbo mingi tongaso si ‘mara ti azo nde nde kue alingbi ti si na tâ hingango ye na ndo ti tâ tënë.’ (1 Tim. 2:4). Lo hinga so songo ti e na lo ayeke kpengba tongana e diko Bible na yanga ti kodoro so e mä yâ ni nzoni mingi.

20 Atâa dutingo ti e ayeke tongana nyen, a lingbi e leke na bê ti e ti ngbâ ti kpengba songo ti e na Jéhovah. Tongana e yeke manda Bible lakue na yanga ti kodoro so e mä yâ ni nzoni mingi, e yeke ngbâ ti kpengba songo ti e na Jéhovah nga na ti sewa ti e na lo na e yeke fa biani so e ye Mbeti ti Nzapa mingi.—Ps. 119:11.

^ [1] (paragraphe 5) A changé airi ni.

^ [2] (paragraphe 18) Ti wara amama-ndia ti Bible so alingbi ti mû maboko na sewa ti mo, bâ article “Batango amolenge na kodoro wande akpale nga na anzoni ye ti pekoni” na yâ ti Tour ti Ba Ndo ti lango 15 ti nze ti octobre, ngu 2002.