Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Novembre 2017

Zia pëpe si mbeni ye anzi futa ti mo

Zia pëpe si mbeni ye anzi futa ti mo

“Ala zia si mbeni zo anzi futa ti ala pëpe.”​—ACOL. 2:18.

ABIA: 32, 134

1, 2. (a) Futa wa la awakua ti Nzapa ayeke ku kungo ti wara ni? (b) Nyen la ayeke mû maboko na e ti ngbâ ti zia lê ti e gï na ndö ti futa ni? (Bâ foto so ayeke na tongo nda ti article so.)

LEGEOKO tongana bazengele Paul, aChrétien so laso a soro ala ti gue na yayu ayeke na pendere beku ti wara futa ti “iringo ndo so Nzapa airi” ala (aPhil. 3:14). Ala yeke ku kungo ti sara kua legeoko na Jésus Christ na yâ ti Royaume ti lo ti yayu nga ti sara si azo aga mbilimbili-kue (Apoc. 20:6). So ayeke tâ mbeni pendere beku mingi! Ti ambeni taba, beku ti ala ayeke ti lo nde. Ala yeke ku kungo ti wara futa ti fini ti lakue lakue na ndö ti sese, na beku so amû ngia na ala mingi.​—2 Pi. 3:13.

2 Paul aye ti mû maboko na amba ti lo so a soro ala ti gue na yayu ti ngbâ be-ta-zo na ti wara futa ni, ni la lo tene na ala, lo tene: “Ala zia li ti ala angbâ gï na ndö ti aye so ayeke na yayu.” (aCol. 3:2). A yeke nzoni ala zia li ti ala gï na ndö ti pendere beku so ala yeke na ni ti gue na yayu (aCol. 1:4, 5). Ti gbu li na ndö ti aye ti nzoni so Jéhovah aye ti mû na azo ti lo ayeke mû maboko na ala kue ti ngbâ ti zia lê ti ala gï na ndö ti futa ni, atâa beku ti ala ayeke  ti wara fini na yayu wala na ndö ti sese.​—1 aCor. 9:24.

3. Paul amû wango na amba ti lo Chrétien na ndö ti akpale wa?

3 Paul amû nga lani wango na amba ti lo aChrétien na ndö ti akpale so alingbi ti nzi futa ti ala. Na tapande, lo sû lani mbeti na congrégation ti Colosses na ndö ti aChrétien ti wataka so ayeke gi ti bata Ndia ti nzere na lê ti Nzapa ahon ti mä na bê na Christ (aCol. 2:16-18). Paul asara nga tënë na ndö ti akpale so alingbi ti nzi futa ti e laso. Na tapande, lo fa tongana nyen la e lingbi ti dö sese na asioni nzara ti bê ti e, tongana nyen ti leke akpale na popo ti e na amba ti e Chrétien nga tongana nyen ti hon ndö ti akpale ti sewa. Wango so lo mû na ndö ti akpale so alingbi ti mû maboko na e laso. Tongaso, zia e bâ ambeni wango so Paul amû na ndoye so ayeke na yâ ti mbeti so lo tokua na aChrétien ti Colosses.

SARA SI ASIONI NZARA TI BÊ TI MO AKUI

4. Ngbanga ti nyen la asioni nzara ti bê ti e alingbi ti nzi futa ti e?

4 Na peko ti so Paul adabe ti aita ti lo na pendere beku ti ala, lo tene: “Tongaso ala sara si amembre ti terê ti ala so ayeke na sese so akui tongana a ndu lango-sioni, sioni ye, nzara ti terê so a kanga ni pëpe, sioni nzara ti bê na sarango bê ti ye.” (aCol. 3:5). Asioni nzara ti bê ti e alingbi ti duti ngangu mingi na alingbi ti sara si e girisa songo ti e na Jéhovah nga na beku ti e ti kekereke. Mbeni ita-koli so asara lango-sioni na so ague yongoro na congrégation na so akiri na bungbi atene so sioni nzara ti bê ti lo aga tâ ngangu mingi si lo “zia lege ni ape juska ngoi ti tene lo zia lege ni ayeke dä lani ape.”

5. Tongana nyen la e lingbi ti bata terê ti e na yâ ti akpale?

5 A yeke nzoni e sara hange mingi tongana e yeke na yâ ti mbeni ye so alingbi ti sara si e doro ndia ti Jéhovah. Na tapande, a yeke na lege ti ndara ti tene koli na wali so aye ti komanse ti bâ terê afa polele ye so ala doit ti sara ape na ndö ti tënë ti ndungo mba, sungo yanga ti mba nga na dutingo ala use (aProv. 22:3). Ambeni kpale ni alingbi nga ti si na ngoi so mbeni Chrétien ayeke voyagé wala na ngoi so lo na mbeni koli wala wali so ayeke ti lo ape ayeke sara kua legeoko (aProv. 2:10-12, 16). Tongana mo yeke na yâ ti mara ti ye tongaso, fa na azo so mo yeke Témoin ti Jéhovah, sara ye na lege ni nga girisa ape so tongana mo yeke zia nzara ti mo na yâ ti mbeni zo alingbi ti ga na akpale. Tongana vundu ahon ndö ti e nga e woko, a lingbi ti ga na e kota kpale. Na amara ti ngoi tongaso, e lingbi ti bâ so e yeke tâ na bezoin ti tene mbeni zo aye e. Peut-être e bâ même so mbeni ye nde ti sarango ni ayeke dä ape na atâa a yeke zo wa la aye ti mû maboko na e, e yeke yeda na ni. Tongana mara ti ye tongaso asi na mo mbeni lâ, bâ ndo na mbage ti Jéhovah nga na azo ti lo ti mû maboko na mo tongaso si mo zia pëpe si mbeni zo anzi futa ti mo.​—Diko Psaume 34:18; aProverbe 13:20.

6. Tongana a ndu angia so e yeke soro, nyen la a lingbi e bata na li ti e?

6 Ti sara si asioni nzara ti bê ti e akui, a yeke nzoni e ke asioni ngia. Angia mingi laso ayeke tongana ti Sodome na Gomorrhe ti giriri (Jude 7). Azo ti sigingo na angia ayeke sigi na angia so asara si zo abâ lango-sioni tongana ye so ayeke sioni ape nga ayeke ga na kpale na zo ape. Tongaso, a lingbi lakue lê ti e akpengba. A yeke nzoni e soro angia so alingbi pëpe ti kanga lege na e ti ngbâ ti zia lê ti e gï na ndö ti futa ti fini.​—aProv. 4:23.

“ALA YÜ” NDOYE NGA NA SARANGO NZONI NA ZO

7. Akpale wa la e lingbi ti wara na yâ ti congrégation?

7 E kue e hinga so ti duti amembre ti congrégation ti aChrétien ayeke mbeni pendere  ye. So e yeke manda Bible na ngoi ti abungbi ti e nga so e yeke mû maboko na mba na nzoni bê nga na ndoye amû maboko na e ti zia si lê ti e angbâ gï na ndö ti futa ni. Ye oko, na ambeni ngoi, mango terê pëpe alingbi ti ga na kpale na popo ti amembre ti congrégation. Tongana e leke mara ti akpale tongaso ape, a lingbi ti sara si e bata tënë na bê ti e.​—Diko 1 Pierre 3:8, 9.

8, 9. (a) Asarango ye wa la ayeke mû maboko na e ti wara futa ni? (b) Nyen la ayeke mû maboko na e ti bata siriri na popo ti e na mbeni ita so ason bê ti e?

8 Tongana nyen la e lingbi ti kanga lege si batango tënë na bê anzi futa ti e ape? Paul awa aChrétien ti Colosses, lo tene: “So ala yeke tongana azo so Nzapa asoro ala awe, azo ti be-vulu na so a ndoye ala, ala yü tâ bango mawa ti zo, sarango nzoni na zo, sarango terê kete, sarango ye na ngangu pëpe; ala yü nga kangango bê ti ku. Ala ngbâ ti kanga bê na amba ti ala na popo ti ala, na ti pardonné mba na bê ti ala kue, même tongana mbeni zo ayeke na tënë ti dema na terê ti mba ti lo. Gï tongana ti so Jéhovah apardonné ala na bê ti lo kue, ala nga ala sara tongaso. Me, na ndö ti aye so kue, ala yü ndoye, ndali ti so ndoye ayeke kamba so abungbi ye mbilimbili.”​—aCol. 3:12-14.

9 Ndoye nga na sarango nzoni na zo alingbi ti mû maboko na e ti pardonné amba ti e. Na tapande, tongana bê ti e ason ndali ti atënë so mbeni mba ti e atene wala ndali ti mbeni ye so lo sara, e lingbi ti gi ti dabe ti e na ambeni ngoi so e sara mbeni tënë wala e sara mbeni ye na nzoni bê ape. Tongana aita andoye e nga ala sara nzoni na e na lege so ala pardonné afaute ti e, a nzere na e ape? (Diko Zo-ti-fa-tene 7:21, 22.) E kiri singila mingi ndali ti nzoni bê so Christ asara ti bungbi atâ wavorongo Nzapa (aCol. 3:15). E kue e ye oko Nzapa, e yeke fa oko tënë nga mingi ti akpale so e yeke wara ayeke oko. Tongana e sara nzoni na amba ti e nga e ye ala na lege so e pardonné ala, congrégation ayeke duti beoko nga e yeke zia lê ti e gï na ndö ti futa ti fini.

10, 11. (a) Ngbanga ti nyen la kota bê ayeke sioni mingi? (b) Tongana nyen la e lingbi ti kanga lege si kota bê anzi futa ti e ape?

10 Atapande ti gbotongo mê so ayeke na yâ ti Bible afa na e so kota bê alingbi ti nzi futa ti e. Na tapande, kota bê asara Caïn na terê ti ita ti lo Abel na lo fâ lo. Kota bê asara lani Koré, Dathan na Abiram na terê ti Moïse na ala sara kpengbango-li na terê ti lo. Kota bê asara Saül na terê ti David na lo gi lani ti fâ lo. A dö bê ti e ape so Bible atene: “Ndo so kota bê nga na papa ayeke dä, wusuwusu nga na aye ti sioni kue ayeke dä.”​—Jacq. 3:16.

11 Tongana e maï ndoye nga na sarango nzoni na zo na yâ ti bê ti e, a yeke duti ngangu ti tene e sara kota bê. Bible atene: “Ndoye ahinga ti kanga bê ti ku nga lo sara nzoni na zo. Ndoye asara kota bê pëpe.” (1 aCor. 13:4). Ti kanga lege si kota bê anzi futa ti e ape, a lingbi e sara ngangu ti bâ aye tongana ti so Nzapa ayeke bâ na ni, e bâ aita ti e tongana amembre ti terê oko. Ye so ayeke mû maboko na e ti ye amba ti e ti gue oko na wango so: “Tongana a mû gloire na mbeni membre oko, atanga ti membre ni kue asara ngia legeoko na lo.” (1 aCor. 12:16-18, 26). Tongaso, tongana amba ti e awara anzoni ye, e yeke duti na ngia me e yeke sara kota bê na terê ti ala ape. Gbu li ti mo na ndö ti tapande ti Jonathan molenge ti Gbia Saül. Kota bê asara lo lani ape na ngoi so a soro David ti duti gbia. Me lo kpengba lani David (1 Sam. 23:16-18). E lingbi ti sara ye na nzoni bê nga na ndoye tongana Jonathan?

ZIA MO NA SEWA TI MO KUE AWARA FUTA NI

12. Sarango ye alingbi na wango wa ti Bible ayeke mû maboko na azo ti sewa ti wara futa legeoko?

12 Tongana azo ti sewa asara ye alingbi na amama-ndia ti Bible, a lingbi ti sara si ala duti  na siriri nga na ngia nga a yeke mû maboko na ala ti wara futa ni. Wango wa la Paul amû na azo ti sewa na yâ ti mbeti so lo tokua na aChrétien ti Colosses? Lo tene: “Awali, ala woko terê na gbe ti akoli ti ala tongana ti so alingbi na azo ti Seigneur. Akoli, ala ngbâ lakue ti ye awali ti ala na ala sara ngonzo mingi na terê ti awali ti ala pëpe. Amolenge, ala mä yanga ti ababâ na amama ti ala na yâ ti aye kue, ndali ti so sarango tongaso anzere na bê ti Seigneur. Ababâ, ala son bê ti amolenge ti ala pëpe, si bê ti amolenge ni awoko pëpe.” (aCol. 3:18-21). Kite ayeke dä ape so mo yeda so, tongana akoli ti awali, awali ti akoli nga na amolenge asara ye alingbi na wango ti Paul so ayeke mû maboko na ala.

13. Tongana nyen la mbeni ita-wali alingbi ti ga na koli ti lo ti mä na bê?

13 Ka tongana mo yeke wali ti koli na mo bâ so koli ti mo so ayeke Témoin ape sara ye na mo na lege ni ape? Mo yeke sara si ye ni aga nzoni tongana mo papa na lo na ndö ti asarango ye ti lo? Même tongana mo sara si lo sara ye so mo ye, eskê mo yeke ga ande na lo na yâ ti tâ tënë? A yeke duti ngangu. Me tongana mo ne komandema ti koli ti mo, mo yeke sara si siriri aduti na yâ ti sewa ti mo, mo yeke mû gonda na Jéhovah, na mo  lingbi même ti ga na koli ti mo na yâ ti tâ vorongo; tongaso mo na lo kue alingbi ti wara futa ni.​—Diko 1 Pierre 3:1, 2.

14. Nyen la a lingbi mbeni koli ti wali so wali ti lo ayeke Témoin ape asara ti tene wali ti lo ane lo?

14 Ka tongana mo yeke koli ti wali na mo bâ so wali ti mo so ayeke Témoin ape ane mo ape? Mo yeke sara si lo ne mo mingi tongana mo yeke dekongo na li ti lo ti fa na lo so mo la mo yeke patron? Oko ape. Nzapa aye ti tene mo mû tapande ti Jésus ti sara ye na komandema ti mo na ndoye (aÉph. 5:23). Jésus akomande na ndö ti congrégation na ndoye nga na kangango bê ti ku (Luc 9:46-48). Tongana mbeni koli ti wali amû tapande ti Jésus, lo yeke ga na wali ti lo na yâ ti tâ vorongo.

15. Tongana nyen la mbeni koli so ayeke Chrétien alingbi ti fa so lo ye wali ti lo?

15 Jéhovah atene na akoli ti awali, lo tene: “Ala ngbâ lakue ti ye awali ti ala na ala sara ngonzo mingi na terê ti awali ti ala pëpe.” (aCol. 3:19). Mbeni koli ti wali ayeke ne wali ti lo na lege so lo yeke mä wali ni na ngoi so lo yeke fa apensé ti lo nga lo yeke dë bê ti wali ni so lo bâ na nene ni atënë so lo tene (1 Pi. 3:7). Atâa so koli ni ayeke sara lakue pëpe ye so wali ti lo aye, mingi ni lo yeke mû anzoni desizion tongana lo hunda bango ndo ti wali ti lo (aProv. 15:22). Mbeni koli ti wali so ayeke sara ye na ndoye ayeke gi ti tene wali ti lo ane lo me lo yeke hunda hundango na wali ti lo ti ne lo ape. Tongana mbeni koli aye wali ti lo na amolenge ti lo, a yeke duti ngangu na ala ape ti sara na Jéhovah na ngia nga ti wara futa ni.

Tongana nyen la e lingbi ti kanga lege si akpale ti yâ ti sewa anzi futa ti e ape? (Bâ paragraphe 13-15)

AMASEKA: ALA ZIA PËPE SI MBENI YE ANZI FUTA TI ALA

16, 17. So mo yeke maseka, tongana nyen la mo lingbi ti kpe ti tene bê ti mo ason mingi na terê ti babâ na mama ti mo?

16 Ka tongana mo yeke maseka na mo bâ so babâ na mama ti mo acomprendre mo ape nga ala kanga lege na mo ti sara ambeni ye? Tongana bê ti mo ason, a lingbi ti sara si mo yeke na kite so sarango na Jéhovah ayeke nzoni ye so zo alingbi ti sara na yâ ti gigi ti lo. Me tongana mo zia si bê ti mo so ason asara si mo zia ti sara na Jéhovah, hio mo yeke bâ ande so ambeni zo nde ti bâ lege ti mo nzoni tongana ti babâ na mama ti mo so akpe mbeto ti Nzapa nga na aita ti congrégation ayeke dä ape.

17 Gbu li ti mo kete: Tongana babâ na mama ti mo akiri na mo na nzoni lege lâ oko ape, mo yeke hinga tongana nyen so ala yeke pensé na mo? (aHéb. 12:8). Peut-être fason so babâ na mama ti mo ayeke kiri na mo na nzoni lege la si ason bê ti mo. Me zia si bê ti mo ason ape, gi ti hinga raison so ndali ni ala kiri na mo na nzoni lege. Tongaso, duti kpô, sara ngangu ti kanga bê tongana ala kasa mo. Bible atene: “Zo so ayeke na hingango ye adiko tënë mingi pëpe, nga zo so abâ yâ ti aye nzoni aduti kpô.” (aProv. 17:27). Leke na bê ti mo ti ga mbeni biazo so alingbi ti duti kpô ti mä wango, sara ye alingbi na ni sân ti gi bê ti mo ahon ndö ni na ndö ti fason so a mû na wango ni (aProv. 1:8). A yeke mbeni ye ti nzoni mingi ti duti na babâ na mama so aye biani Jéhovah. Ala ye biani ti mû maboko na mo ti wara futa ti fini.

18. Ngbanga ti nyen la mo leke na bê ti mo ti ngbâ ti zia lê ti mo na ndö ti futa ni?

18 Atâa beku ti e ayeke ti wara fini na yayu wala na yâ ti paradis na sese, a yeke mbeni pendere ye ti gbu li na ndö ni. Beku ni ayeke tâ ye, Lo so acréé aye kue la amû zendo ni na e. Nzapa atene na ndö ti Paradis na sese, lo tene: “Hingango ye na ndö ti Jéhovah ayeke mû ndö ti sese kue.” (És. 11:9). Nzapa ayeke fa ande ye na azo kue so ayeke na ndö ti sese. A yeke mbeni futa so ayeke kota ye ti sara ngangu ti wara ni. Tongaso, zia li ti mo gï na ndö ti ye so Jéhovah amû zendo ni na zia pëpe si mbeni ye anzi futa ti mo.