Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Novembre 2016

 SANGO NA NDO TI MBAÏ TI BUNGBI TI E

“Awafango tënë ti Grande-Bretagne, ala zingo!”

“Awafango tënë ti Grande-Bretagne, ala zingo!”

A WA lani aita mingi, a tene: “Awafango tënë ti Grande-Bretagne, ala zingo!” (Informateur, * ti décembre, ngu 1937 so a sara ni teti Londres.) Mbeni kete li ti tënë ni atene: “A sara ngu bale-oko awe mbeni nzoni guengo na li ni ayeke dä pëpe.” Kozo lembeti ti tondo ti kusala ti ngu bale-oko ti londo na ngu 1928 ti si na ngu 1937 afa so tënë so ayeke tâ tënë.

APIONNIER AHON NDO NI?

Nyen la asara si fango tënë akiri lani na peko na Grande-Bretagne? Na bango ni, acongrégation ayeke sara lani gi a-oko ye so a yeke sara ni a sara angu mingi awe. Na ndo ni, filiale amû desizion so gi apionnier 200 tongaso la alingbi ti fa tënë na yâ ti kodoro ni. Apionnier ni ayeke fa tënë lani na ando so acongrégation ayeke dä pëpe. Ni la, filiale atene na azo so aye ti mû kua ti pionnier so mbeni ndo ti tene ala fa tënë dä na yâ ti territoire ti filiale ni ayeke dä pëpe, na a wa ala ti gue ti sara ni na yâ ti ambeni kodoro ti Europe. Gbâ ti apionnier azia Grande-Bretagne ala gue na akodoro tongana France atâa so ala hinga yanga ti kodoro ni gi kete wala pëpe.

‘A TENE NA E TI SARA MBENI YE’

Mbeni article na yâ ti Informateur ti ngu 1937 afa mbeni ye so a zia na gbele awafango tënë ti gi ti sara ni na ngu 1938: Ala gi ti wara l’heure kutu oko. A yeke ngangu pëpe ti tene ala wara ni tongana nze oko oko wafango tënë oko oko afa tënë l’heure 15 nga apionnier afa tënë l’heure 110. A wa lani azo ti leke ti fa tënë na groupe ngbonga oku na yâ ti lango oko nga a gboto lê mingi na ndo ti sarango afini vizite, mbilimbili na milieu ti yenga na lakui.

Apionnier so asara kua ti ala lani na bê kue azia lê ti ala gi na ndo ti fango tënë

So a kiri a gboto lê mingi na ndo ti fango tënë a nzere lani na azo mingi. Hilda Padgett * atene: “Kota ndokua ti e atene na e ti sara mbeni ye so mingi ti e aku kungo ti sara ni, na a ninga pëpe, apendere ye aga na pekoni.” Ita-wali Wallis atene: “So a wa e ti fa tënë l’heure oku na yâ ti lango oko ayeke lani pendere mingi. Ti sara kua ti Seigneur na yâ ti lango ni kue aga na ngia mingi. . . .  Na kiringo ti e, e fatigué me e yeke na ngia.” Stephen Miller so ayeke mbeni maseka abâ so a yeke nzoni a sara ye hio, na lo yeda na iringo ndo ni. Lo ye lani ti sara ni na ngoi so lege azi na lo. Lo dabe ti lo na agroupe ti aita so ayeke fa tënë na vélo nga na alakui na ngoi ti ndowa so ala yeke mä adiskur so a-enregistré ni. Ala yapu ti tambela na apancarte ti fa tënë nga ala yeke fa tënë na apériodique na ndo ti lege.

Na yâ ti Informateur, a kiri a tisa azo, atene: “E bezoin apionnier 1000.” A sigigi na mbeni fini kode na yâ ti territoire ti tene apionnier asara kua nde na acongrégation mbeni pëpe me ala sara kua maboko na maboko na acongrégation, ala mû maboko na ala nga ala kpengba ala. Joyce Ellis (iri ti dungo lo ayeke Barber) atene: “Aita mingi abâ lani so a lingbi ala mû kua ti pionnier.” Lo tene: “Atâa so mbi yeke lani gi na ngu 13 na ngoi ni so, ye so mbi ye ti sara la, mbi  ye lani ti mû kua ti pionnier.” Lo sara ye so lo leke ti sara na juillet ngu 1940 na ngoi so lo yeke na ngu 15. Peter, so na pekoni aga lani koli ti Joyce, amä iringo ndo “ala zingo”, na a pusu lo ti “komanse ti gbu li ti lo na ndo ti kua ti pionnier.” Na juin, ngu 1940, na ngoi so lo yeke na ngu 17, lo sara kilomètre 105 na vélo ti gue na Scarborough, fini ndo so lo yeke sara kua ti pionnier ti lo dä.

Cyril na Kitty Johnson asara ye tongana aita so asara asacrifice ti komanse kua ti pionnier. Ala mû desizion ti kä da ti ala nga na aye ti ala ti wara nginza ti mû maboko na ala ti sara kua ti ngoi kue. Cyril azia kua ti nginza ti lo, nze oko na pekoni ala komanse kua ti pionnier. Lo tene: “E gi bê ti e lani pëpe. E sara lani kua ti e na bê ti e kue nga na ngia.”

ADA TI APIONNIER

Tongana wungo ti apionnier ague na li ni mingi, aita so ayeke mû li ni agbu li ti ala na ndo ti ye so a lingbi a sara ti mû maboko na gbâ ti apionnier so. Jim Carr, so ayeke lani wakua ti zone (so a iri ni fadeso surveillant ti circonscription) na ngu 1938, amû peko ti wango so a hunda ti zi afini da ti apionnier na yâ ti agbata. A wa agroupe ti apionnier ti lango ndo oko nga ti sara kua maboko na maboko tongaso si ala buba nginza ti ala mingi pëpe. Ala loué mbeni kota da na Sheffield na a zia mbeni ita-koli ti bâ ndo na ndo ni. Congrégation ti ndo ni amû na ala nginza nga na aye ti yâ ti da. Jim atene: “Zo kue asara si kua ni atambela nzoni.” Apionnier bale-oko so asara kua mingi alango kâ, na ala yeke na nzoni kapa ti ala ti sara na akua ti Jéhovah. “Lakue na ndapre, ala yeke diko versê [ti lâ na lâ] na ngoi ti tengo ye, nga ala yeke fa tënë lâ na lâ na yâ ti aterritoire nde nde so ayeke na yâ ti gbata ni.”

Gbâ ti afini pionnier asara kua na yâ ti territoire ti Grande-Bretagne

Awafango tënë nga na apionnier ayeda na tisango ndo so a hunda ti wara l’heure kutu oko na ngu 1938. Biani, atondo afa so aye kue so a sara na fango tënë ague na li ni. Na yâ ti ngu oku, wungo ti awafango tënë ti Grande-Bretagne ague na li ni fani ota. So a kiri a gboto lê mingi na ndo ti kua ti Royaume akpengba azo ti Jéhovah ti gbu ngangu na yâ ti angoi ti kpale ti bira so ayeke ga.

Laso, wungo ti apionnier ti Grande-Bretagne akiri ague na li ni, na ngoi so bira ti Nzapa so a iri ni Harmaguédon aga nduru. Na yâ ti ngu bale-oko so ahon, a wara wungo ti apionnier so ade a wara mara ni kozo pëpe. Na octobre, ngu 2015, wungo ti apionnier asi 13224. Apionnier so ahinga so sarango kua ti ngoi kue ayeke mbeni nzoni kua so zo alingbi ti sara na yâ ti gigi ti lo.

^ par. 3 Na pekoni, a iri ni Kusala ti Royaume.

^ par. 8 Mbaï ti fini ti Ita-wali Padgett ayeke na yâ ti Tour ti Ba Ndo ti lango 1 ti octobre, ngu 1995, l. 19-24.