Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Mars 2017

Ne azo so alingbi ti tene a ne ala

Ne azo so alingbi ti tene a ne ala

“Zia a iri tënë nzoni na ndö ti Lo so aduti na ndö ti trône ni nga na ndö ti Molenge ti taba ni, nga zia a mû nengo, gloire na ngangu na ala lakue lakue nga kpu na kpu.”APOC. 5:13.

ABIA: 9, 108

1. Ngbanga ti nyen la ambeni zo alingbi ti tene a ne ala? Nyen la e yeke sara tënë na ndö ni fadeso?

TI NE mbeni zo aye ti tene ti duti na mbeni bango ndo so ayeke nde na ndö ti zo ni. Mingi ni, e yeke ku ti tene zo so alingbi na mara ti bango ndo tongaso asara mbeni ye ti lingbi ti tene a ne lo wala lo sara mbeni kua so ayeke kota mingi. Tongaso, e lingbi ti hunda terê ti e, zo wa la a lingbi e ne lo? Ngbanga ti nyen la lo lingbi ti tene e ne lo?

2, 3. (a) Ngbanga ti nyen la Jéhovah alingbi biani ti tene a ne lo? (Bâ foto so ayeke na tongo nda ti article so.) (b) Na Apocalypse 5:13, Molenge ti taba ni ayeke zo wa? Ngbanga ti nyen la lo lingbi ti tene a ne lo?

2 Tongana ti so Apocalypse 5:13 afa, “Lo so aduti na ndö ti trône ni nga na . . . Molenge ti taba ni” alingbi biani ti tene a ne ala. Na Apocalypse chapitre 4 a fa mbeni raison so Jéhovah alingbi ti tene a ne lo ndali ni. Acréature ti yingo adekongo ti gonda Jéhovah, “Lo so lo yeke na fini lakue lakue nga kpu na kpu”. Ala tene: “Jéhovah, mo so mo yeke Nzapa ti e, mo lingbi biani ti wara gloire, nengo nga na ngangu ngbanga ti so mo la mo sara  aye kue, nga a yeke ndali ti ye so bê ti mo aye si aye ni ayeke dä na a sara ala.”Apoc. 4:9-11.

3 Molenge ti taba ni ayeke Jésus Christ, ‘Kete taba ti Nzapa so azi siokpari ti dunia so’. (Jean 1:29). Bible atene so lo yeke kota mingi ahon azo kue so ayeke agbia wala so ayeke lani agbia. Bible atene: “Lo so ayeke Gbia ti ala so akomande tongana agbia nga Seigneur ti ala so akomande tongana aseigneur, lo so gï lo oko ayeke na fini so alingbi ti hinga kuâ pëpe, lo so aduti na yâ ti lumière so zo alingbi ti si dä pëpe, lo so mbeni zo abâ lo pëpe wala alingbi ti bâ lo pëpe.” (1 Tim. 6:14-16). Gbia wa la ayeda na bê ti lo wani ti kui ndali ti asiokpari ti e? Peut-être atënë ti bê ti mo ayeke tongana ti acréature ti yingo saki na saki so ahe bia, atene: “Molenge ti taba so a fâ lo ândö so alingbi biani ti tene a mû na lo komandema, mosoro, ndara, ngangu, nengo, gloire nga na tënë nzoni.”Apoc. 5:12.

4. Ngbanga ti nyen la zo ayeke soro sorongo ape ti ne Jéhovah na Christ?

4 Tënë ti nengo Jéhovah na Christ ayeke mbeni ye so zo ayeke soro ni sorongo pëpe. Ti wara fini ti lakue lakue a lingbi e ne ala. Atënë so Jésus atene na Jean 5:22, 23 amû maboko na e ti bâ ni polele. Lo tene: “Babâ ni afâ ngbanga na li ti zo oko pëpe, me lo zia fango ngbanga ni kue na maboko ti Molenge ni, si azo kue alingbi ti ne Molenge ni tongana ti so ala ne Babâ ni. Zo so ane Molenge ni pëpe, lo ne nga Babâ ni so atokua lo so pëpe.”Diko Psaume 2:11, 12.

5. Ngbanga ti nyen la a lingbi e ne azo kue?

5 Nzapa asara azo “na image ti lo”. (Gen. 1:27). Tongaso, mingi ti azo alingbi ti sara ye tongana ti Nzapa. Ala ye azo, ala sara ye na nzoni bê nga ala bâ mawa ti zo. A sara azo na conscience, ye so amû lege na ala ti hinga ye so ayeke nzoni na ye so ayeke sioni nga ti hinga ye so ayeke na lege ni nga ye so ayeke na lege ni pëpe (aRom 2:14, 15). Mingi ti azo aye aye so ayeke propre nga ayeke pendere. Na mingi ni, ala ye ti duti na siriri na amba ti ala. Atâa ala hinga wala ala hinga ape, ala yeke fa gloire ti Nzapa na mbeni fason, ndali ti raison so, ala lingbi ti tene a ne ala.Ps. 8:5.

NE ZO NA LEGE NI

6, 7. Na ndö ti tënë ti nengo azo, tongana nyen la aTémoin ti Jéhovah ayeke nde na tanga ti azo?

6 E hinga so a lingbi e ne amba ti e azo, me peut-être a yeke ngangu ti hinga nengo wa la e yeke mû na ala. Yingo ti dunia ti Satan asara ngangu mingi na ndö ti mingi ti azo so siokpari ayeke na terê ti ala. Ndani la azo ayeke na bibe ti voro ambeni koli wala ambeni wali ahon ti tene ala mû na ala nengo so ayeke na lege ni. Ala ye ahon ndö ni akota zo ti nzapa, ti poroso, azo ti sarango ngia ti awanguru, azo so ayeke na yâ ti afilm wala azo ti hengo abia nga na ambeni zo so iri ti ala awu mingi, mingi ni ala bâ ala tongana anzapa. Ala bâ ala tongana azo so ala lingbi ti mû tapande ti ala, peut-être ala yeke sara tënë, ala yeke yü bongo wala ala yeke sara ye tongana ala.

7 Atâ Chrétien ahinga so a yeke na lege ni pëpe ti ne azo na mara ti fason so. Christ ayeke gï oko zo so ahon tanga ti azo kue so e lingbi ti mû tapande ti lo (1 Pi. 2:21). A yeke nzere na Nzapa pëpe tongana e ne azo ahon ti so ala lingbi na ni. A lingbi e bata na li ti e kpengba tâ tënë so: “Azo kue asara siokpari awe na ala si nduru na gloire ti Nzapa pëpe.” (aRom. 3:23). Zo oko alingbi ti tene e voro lo pëpe.

8, 9. (a) A-Témoin ti Jéhovah abâ akota zo ti gouvernement tongana nyen? (b) Na ngoi wa la a lingbi e mä yanga ti akota zo ti gouvernement ape?

8 Ambeni zo ayeke dä so alingbi ti tene e  ne ala ndali ti kua ti ala. Kua ti azo ti gouvernement ayeke ti sara si a sara ye alingbi na ndia na ti sara si aye atambela na lege ni nga ti mû na azo ti kodro ti ala aye so ala bezoin ni. Sarango tongaso ayeke ga na aye ti nzoni na azo kue. Ni la, bazengele Paul awa aChrétien ti bâ akota zo ti gouvernement so tongana “akota zo ti komande” so a lingbi ala woko terê na gbe ti ala. Lo tene na ala, lo tene: “Ala mû na azo kue ye so ayeke ti ala. Na zo so ahunda impôt, ala futa na lo impôt; . . . na zo so aye ti tene a kpe mbeto ti lo, ala kpe mbeto ti lo.”aRom. 13:1, 7.

9 So e yeke aTémoin ti Jéhovah, e yeke sara kue ti fa na azo ti gouvernement so e ne ala. Biani, kodro oko oko ayeke na angobo ti lo. Tongaso, ye so akota zo ti kodro ayeke hunda na e alingbi ti duti nde na ti mbeni kodro. Me tongana ala yeke sara akua ti ala e yeke sara kua maboko na maboko na ala. Ye oko, tongana ala hunda na e mbeni ye so alingbi ti sara si e ke yanga ti Jéhovah, e yeke sara ni pëpe. Na yâ ti aye tongaso, e yeke mä yanga ti Jéhovah nga e yeke ne lo ahon ti ne azo.Diko 1 Pierre 2:13-17.

10. Tongana nyen la awakua ti Jéhovah ti ândö azia na e nzoni tapande?

10 Awakua ti Jéhovah ti ândö azia na e tapande na lege so ala ne agouvernement na akota zo ni. Na ngoi so Togbia ti Rome ahunda na azo ti zia iri ti ala na mbeti, Joseph na Marie asara ye alingbi na ni. Ala gue na Bethléhem atâa so Marie ayeke lani nduru ti dü kozo molenge ti lo (Luc 2:1-5). Ambeni ngoi na pekoni, na ngoi so a bi tënë na li ti Paul a tene lo sara mbeni sioni ye, lo sara tënë na nengo zo nga lo fa so lo ne Gbia Hérode Agrippa nga na Festus gouverneur ti Judée, kete kodro ti Rome.Kus. 25:1-12; 26:1-3.

11, 12. (a) Ngbanga ti nyen la e zia kangbi na popo ti akota zo ti kodro nga na akota zo ti nzapa? (b) Ye ti nzoni wa la mbeni Témoin ti Autriche awara na ngoi so lo ne mbeni zo ti poroso?

11 Ye oko, aTémoin ti Jéhovah ayeke mû pëpe na akota zo ti nzapa mbeni nengo so ayeke nde, même tongana ala ku ti tene a sara na ala tongaso. Abungbi ti nzapa ti wataka afa tâ tënë na ndö ti Nzapa ape nga ala ba yâ ti afango ye ti Mbeti ti Nzapa. Tongaso, e yeke bâ akota zo ti nzapa tongana tanga ti azo kue, me e yeke mû na ala pëpe mbeni nengo so ayeke nde. E hinga so Jésus asigi lani na nda ti mara ti azo tongaso na ngoi ti lo, lo tene ala yeke azo ti handango lê ti azo nga ala yeke awaziba so ayeke fa lege na azo (Mat. 23:23, 24). Me, tongana e mû na akota zo ti gouvernement nengo so ala lingbi na ni na ambeni ngoi alingbi ti ga na ye ti nzoni, même aye so e ku terê ti e na ni pëpe.

12 Leopold Engleitner ayeke lani mbeni Témoin ti Autriche so ayapu so aNazi agbu lo na atokua lo na train na camp ti sarango pasi na azo na Buchenwald. Pakara Heinrich Gleissner ayeke lani mbeni zo ti kanga so lo na lo ayeke na yâ ti train oko. Lo yeke lani mbeni zo ti poroso ti Autriche. Ye oko, aNazi abâ lani lo na nzoni lê pëpe. Na ngoi so ala yeke voyagé ti gue na camp ni, Ita Engleitner afa ye so lo mä na bê na ni na Gleissner na nengo zo na lo dengi me lo mä lo nzoni. Na peko ti use bira so amû sese kue, fani mingi Gleissner asara kua na ngangu so lo yeke na ni ti mû maboko na aTémoin na Autriche. Peut-être mo dabe ti mo na tapande ti ambeni ye ti nzoni so aTémoin awara na ngoi so ala ne na lege ni akota zo ti kodro na mungo na ala nengo so Bible atene a lingbi aChrétien amû na ala.

 AMBENI ZO SO ALINGBI TI TENE E NE ALA

13. Azo wa la mbilimbili alingbi ti tene e ne ala? Ngbanga ti nyen?

13 Aita ti e alingbi ti tene e ne ala. Na mingi ni a lingbi e ne a-ancien so ayeke mû li ni na yâ ti congrégation. (Diko 1 Timothée 5:17.) E yeke ne aita so atâa kodro ti ala, hingango mbeti ti ala, dutingo ti ala, wala ala yeke wayere wala zo ti mosoro. Bible asara tënë ti ala tongana ‘akoli so a mû ala tongana amatabisi’ nga ala yeke na kota kua ti sara na yâ ti ye so Nzapa aleke ti bâ lege ti abezoin ti azo ti lo (aÉph. 4:8). Gbu li ti mo na ndö ti a-ancien ti congrégation, asurveillant ti circonscription, amembre ti Komité ti filiale nga na amembre ti Bebungbi. Aita ti e ti ândö abâ lani na nene ni mingi aita so a soro ala ti mû li ni, e nga e yeke sara tongaso laso. E yeke voro pëpe aita so a hinga ala mingi so ayeke sara kua na yâ ti bungbi wala tongana ala yeke na terê ti e e yeke sara ye pëpe mo bâ mo tene ala yeke a-ange. Me e yeke ne aita so ndali ti angangu kua so ala yeke sara nga ndali ti so ala sara terê ti ala kete.Diko 2 aCorinthien 1:24; Apocalypse 19:10.

14, 15. Kangbi wa la ayeke na popo ti atâ Chrétien so ayeke aberger na akota zo ti nzapa mingi?

14 A-ancien so ayeke tongana aberger so asara terê ti ala kete. Ye so afa so ala sara terê ti ala kete ayeke so ala ye pëpe ti tene a yâa iri ti ala. Sarango tongaso asara si ala yeke nde na akota zo ti nzapa ti laso nga na ala ti ngoi ti akozo Chrétien so na ndö ti ala Jésus atene: “Ala ye gï kozo place na ngoi ti tengo akobe ti lakui, nga ala ye gï akozo ngende na yâ ti asynagogue. Ala ye ti tene azo abara ala na yâ ti agara.”Mat. 23:6, 7.

15 Atâ Chrétien so ayeke aberger ayeke sara ye alingbi na tënë ti Jésus so atene: “Zia mbeni zo airi ala Rabbi pëpe, ndali ti so Maître ti ala ayeke gï oko. Me ala kue ayeke aita. Nga, ala iri mbeni zo na ndö ti sese so babâ ti ala pëpe, ngbanga ti so Babâ ti ala ayeke gï oko, lo so ayeke na yayu. Wala ala zia mbeni zo airi ala amokonzi pëpe, ndali ti so Mokonzi ti ala ayeke gï oko, Christ. Me zo so ayeke kota mingi na popo ti ala, a lingbi lo duti zo ti kua ti ala. Zo so ayâa iri ti lo, a yeke sara si lo ga kete, na zo so asara terê ti lo kete, a yeke yâa ande iri ti lo.” (Mat. 23:8-12). Tongana a-ancien ti acongrégation ti dunia kue asara terê ti ala kete nga ala mä yanga ti Jésus, aita ti ala ayeke ye ala nga ayeke ne ala.

Tongana a-ancien asara terê ti ala kete nga ala mä yanga ti Jésus, aita ti ala ayeke ye ala nga ayeke ne ala (Bâ paragraphe 13-15)

16. Ngbanga ti nyen la a lingbi e ngbâ ti sara ngangu ti mä yâ ti tënë so Bible atene na e na ndö ti nengo zo nga ti sara ye alingbi na ni?

 16 Biani, a hunda ngoi ti hinga tongana nyen ti ne azo. Ti akozo Chrétien ayeke nga lani tongaso (Kus. 10:22-26; 3 Jean 9, 10). Me a hunda biani ti tene e sara ngangu ti sara ye alingbi na wango so Bible amû na ndö ti nengo zo. Ti ne zo na lege ni ayeke ga na aye ti nzoni mingi.

AYE TI NZONI SO AYEKE GA NA PEKO NI

17. Ambeni ye ti nzoni wa la ayeke ga na peko ti nengo azo so ayeke na komandema?

17 Tongana e ne akota zo ti kodro, ala yeke gbu koko ti droit ti e ti fango tënë sân ti kanga lege na e. Mingi ni, ye ti peko ni ayeke so azo ayeke duti na nzoni bango ndo na ndö ti kua ti e. A sara angu mingi awe, Birgit, mbeni pionnier na Allemagne, ague na ekole ti molenge ti lo ti wali na ngoi so a yeke mû diplôme na molenge ni. Awafango mbeti na molenge ni atene na lo so a nzere na ala mingi ti sara kua na amolenge ti aTémoin teti angu mingi. Ala tene so tongana amolenge ti aTémoin ayeke na yâ ti ekole ni ape, ekole ni ayeke duti nzoni ape. Birgit atene na ala, atene: “A fa na amolenge ti e ti sara ye alingbi na andia so Nzapa afa na ndö ti nzoni sarango ye, so na popo ni a yeke wara nengo awafango mbeti.” Mbeni wafango mbeti ni atene: “Tongana amolenge kue ayeke tongana amolenge ti ala, ka fango mbeti ayeke duti tongana paradis.” Ambeni yenga na pekoni, mbeni wafango mbeti ni ague na mbeni kota bungbi na Leipzig.

18, 19. Nyen la a lingbi e girisa ape tongana e yeke ne a-ancien?

18 Amama-ndia so ayeke na yâ ti Bible alingbi ti mû maboko na e ti hinga tongana nyen ti ne a-ancien ti congrégation. (Diko aHébreu 13:7, 17.) E lingbi ti gonda ala ndali ti ngangu kua ti ala na a lingbi e sara ni. Me a ye ti tene ape so e yeke gi ti sara ye tâ gï tongana mbeni ancien so a hinga lo mingi, ti yü bongo tongana lo, ti mû fason ti fango ye ti lo wala fason ti sarango tënë ti lo. Tongana e sara tongaso a yeke mo bâ mo tene e yeke mû peko ti zo ahon ti mû peko ti Christ. A lingbi e girisa ape so a-ancien ayeke na siokpari na terê ti ala tongana e.

19 Tongana e ne a-ancien nga e bâ ala pëpe tongana azo so iri ti ala awu mingi, e yeke mû maboko na ala la. E yeke sara si a duti ngangu na ala ape ti sara terê ti ala kete, ala yeke pensé ape so ala yeke nzoni mingi ahon tanga ti aita wala ala yeke tene ape so aye so ala yeke sara ayeke lakue na lege ni.

20. Tongana e ne azo, nzoni ye wa la e yeke wara?

20 Ti ne amba ti e ayeke mû maboko na e ti bâ gï nzoni ti e pëpe nga ayeke mû maboko na e ti ngbâ ti sara terê ti e kete tongana azo ane e mingi. A yeke bata e ndali ti so a yeke mû maboko na e ti tï pëpe tongana mbeni zo so e ne lo asara mbeni ye so azia vundu na bê ti e. Mbeni ye ti nzoni ni nga ayeke so a yeke sara si e ngbâ beoko na bungbi ti Jéhovah. Bungbi ti Jéhovah ayeke ne mbeni zo ahon ndö ni pëpe atâa zo ni ayeke Témoin wala lo yeke Témoin pëpe.

21. Kota nzoni ye ti peko ti nengo azo so alingbi ti tene a ne ala na lege ni ayeke so wa?

21 Tongana e ne azo so alingbi e ne ala na lege ni, kota nzoni ye ti peko ni ayeke so e yeke zia ngia na bê ti Nzapa. E yeke sara ye so lo hunda na e nga e yeke ngbâ be-ta-zo na lo. A yeke mû lege na lo ti kiri tënë na zo so agi yanga ti lo (aProv. 27:11). Mingi ti azo ti dunia so ahinga pëpe ti ne amba ti ala na lege ni. E kiri singila mingi so e hinga tongana nyen ti ne azo na lege so Jéhovah aye.