Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Mars 2017

Duti tâ kamarade tongana songo ti kamarade ni ayeke na yâ ti kpale

Duti tâ kamarade tongana songo ti kamarade ni ayeke na yâ ti kpale

Gianni na Maurizio ayeke akamarade a sara ngu 50 tongaso. Ye oko, na mbeni ngoi songo ti ala ayeke lani na yâ ti kpale. Maurizio atene: “Na mbeni ngoi ti kpale, mbi sara ambeni kota faute so asara si e kangbi.” Gianni atene: “Maurizio la amanda Bible na mbi na ngoi so mbi komanse ti manda Bible. Lo yeke lani zo so ayeke mû na mbi wango. Mbi pensé so lo lingbi fade ti sara ye so lo sara so pëpe. A son mbi ngangu ndali ti so mbi hinga lani so e lingbi ti ngbâ kamarade encore ape. Mbi bâ lani so mbi yeke gï mbi oko.”

ANZONI kamarade ayeke kota ye mingi nga songo ti kamarade so aninga aga gï tongaso pëpe. Tongana songo ti akamarade ayeke na yâ ti kpale nyen la alingbi ti mû maboko na ala ti leke ni? E lingbi ti manda ye mingi na mbage ti azo so ayeke lani atâ kamarade so Bible asara tënë ti ala me so na mbeni ngoi songo ti ala ayeke lani na yâ ti kpale.

TONGANA KAMARADE TI MO ASARA MBENI FAUTE

David, so ayeke lani berger nga gbia, ayeke lani na anzoni kamarade. Mbeni oko ti akamarade ti lo so alingbi ti ga na li ti e ayeke Jonathan (1 Sam. 18:1). Me David ayeke lani na ambeni kamarade nde, na tapande prophète Nathan. Bible afa pëpe ngoi so songo ti ala ni akomanse lani. Ye oko, na mbeni ngoi na yâ ti fini ti David, lo tene asecret ti lo na Nathan tongana ti so mo yeke tene asecret ti mo na mbeni kamarade ti mo. David aye lani ti leke mbeni da na Jéhovah. So Nathan ayeke kamarade ti gbia ni nga lo yeke zo so yingo ti Nzapa ayeke na ndö ti lo, lo doit lani ti bâ bango ndo ti lo na nene ni mingi.2 Sam. 7:2, 3.

Ye oko, mbeni ye asi so aye ti buba yâ ti songo ti ala ni. Gbia David asara lango-sioni na  Bath-Shéba nga na pekoni lo sara si a fâ Urie, koli ti Bath-Shéba (2 Sam. 11:2-21). David angbâ be-ta-zo na Jéhovah teti angu mingi nga lo fâ ngbanga mbilimbili. Me na pekoni lo sara akota siokpari so. Nyen la asi na nzoni gbia so? Lo lingbi lani ti hinga pëpe so asarango ye ti lo so ayeke sioni mingi? Lo pensé lani so lo lingbi ti honde ni na Nzapa?

Nyen la Nathan ayeke sara? Lo yeke zia si mbeni zo nde asara tënë ni na gbia ni? Ambeni zo ahinga lani tongana nyen la David aleke si a fâ Urie. Tongaso, ngbanga ti nyen la Nathan ayeke yôro terê ti lo na yâ ti tënë ni nga ti buba yâ ti songo ti ala so aninga mingi so? Tongana Nathan asara tënë ni alingbi même ti zia fini ti lo na yâ ti kpale, ndali ti so David asara si a fâ Urie so asara ye oko pëpe.

Me Nathan ayeke lani watokua ti Nzapa. Prophète ni ahinga lani so tongana lo zi yanga ape, songo ti ala ayeke ngbâ tongana ti kozo ape nga conscience ti lo ayeke duti nzoni ape. Kamarade ti lo David amû lani mbeni lege so anzere na Jéhovah ape. Gbia ni ayeke lani na bezoin ti tene a mû maboko na lo ti leke songo ti lo na Jéhovah. Biani, David abezoin lani mbeni tâ kamarade. Nathan ayeke lani kamarade ni so. Lo soro ti sara tënë ni na lege ti mbeni tapande so alingbi ti ndu bê ti ngbene berger so. Nathan atene tokua so Nzapa atokua lo ti tene me na mbeni lege so amû maboko na David ti hinga so faute ti lo ni ayeke kota mingi nga apusu lo ti sara ye.2 Sam. 12:1-14.

Nyen la mo yeke sara tongana mbeni kamarade ti mo asara mbeni kota faute wala lo sara mbeni kota siokpari? Peut-être mo lingbi ti tene so tongana mo sigi na sioni ti lo ni ayeke buba yâ ti songo ti mo na lo. Wala mo lingbi ti bâ so tongana mo fa siokpari ti lo na a-ancien, so alingbi ti mû maboko na lo ti leke songo ti lo na Nzapa, andâ mo kä kamarade ti mo ni la. Nyen la mo yeke sara?

Gianni, so e sara tënë ti lo fade, atene: “Mbi bâ lani so mbeni ye achangé. Maurizio ayeke sara tënë na mbi tongana ti kozo ape. Mbi mû desizion ti sara tënë na lo, atâa so a yeke lani ngangu mingi na mbi ti sara ni. Mbi hunda terê ti mbi: ‘Tënë ti nyen la mbi yeke tene na lo? Lo hinga ye so lo doit ti sara awe. Lo lingbi ti sara ye kirikiri.’ Me tongana mbi dabe ti mbi na aye kue so e manda, mbi wara ngangu ti sara tënë na lo. Maurizio ayeke sara lani na mbi tongaso tongana mbi bezoin mungo maboko. Mbi ye lani ti tene yâ ti songo ti mbi na lo abuba ape, me mbi ye ti mû maboko na lo ndali ti so mbi bi bê na lo.”

Maurizio atene: “Gianni atene atënë so alondo na bê ti lo na lo yeke lani na raison. Mbi hinga lani so aye ti peko ti sioni desizion so mbi mû a yeke faute ti lo ape nga a yeke faute ti Jéhovah ape. Mbi yeda na sengo ndo ni na a si na mbeni ngoi songo ti mbi na Jéhovah akiri aga nzoni.”

TONGANA KAMARADE TI MO AYEKE NA YÂ TI KPALE

David ayeke nga lani na ambeni kamarade so angbâ be-ta-zo na lo na angoi ti ngangu. Mbeni oko ti ala ayeke lani Hushaï, Bible atene so lo yeke “kamarade ti David.” (2 Sam. 16:16; 1 Chron. 27:33). Lo yeke peut-être lani mbeni zo ti yangbo ti gbia so ayeke kamarade ti gbia, lo so gbia ayeke hunda na lo ti sara aye so gbia aye ti tene azo ahinga ni ape.

Na ngoi so Absalom aye ti mû mbata ti gbia lani, azo ti Israël mingi amû peko ti Absalom, me Hushaï ape. Na ngoi so David ayeke kpe lani, Hushaï amû peko ti lo. Bê ti David ason lani mingi ndali ti so molenge ti lo wani nga na zo so lo yeke na confiance na lo akä lo. Ye oko, Hushaï angbâ lani be-ta-zo, na bê ti lo wani lo zia fini ti lo na lê ti kuâ nga lo sara ye so a fa na lo ti buba yâ ti ye so ala ye ti sara. Hushaï asara ni lani pëpe ndali ti so ayeke kua ti lo ti kota zo ti yangbo ti gbia la. Lo fa so lo yeke mbeni kamarade so ayeke be-ta-zo.2 Sam. 15:13-17, 32-37; 16:15–17:16.

A ndu bê ti e mingi ti bâ tongana nyen la aita ayeke be-oko na ayeke gï pëpe ndali ti akuâ so ala yeke sara na yâ ti congrégation.  Asarango ye ti ala ayeke mo bâ mo tene ala yeke tene: “Mbi yeke kamarade ti mo, pëpe ndali ti so mbi doit ti duti ni, me ndali ti so mo yeke kota mingi na lê ti mbi.”

A yeke ye so asi na mbeni ita-koli so iri ti lo ayeke Federico la. Na lege ti mungo maboko ti kamarade ti lo Antonio so lo ye lo mingi, lo gbu ngangu na yâ ti mbeni ngoi ti kpale. Federico atene: “Na ngoi so Antonio asi na congrégation ti e, hio e ga akamarade. E use kue e yeke lani awakua ti mungo maboko, na a nzere na e ti sara kua maboko na maboko. Kete na pekoni, lo ga ancien. Na ndö ti so lo yeke kamarade ti mbi lo yeke lani mbeni tapande ndali ti mbi na lege ti yingo.” Na pekoni, Federico amû mbeni sioni lege. Hio lo gi mungo maboko na lege ti yingo, me lo lingbi ti ngbâ pionnier wala wakua ti mungo maboko mbeni ape. Antonio asara lani ye tongana nyen?

Na ngoi so Federico atingbi na kpale, kamarade ti lo Antonio amä lo nga lo wa lo

Federico atene: “Mbi bâ so Antonio ahinga vundu ti mbi. Lo sara kue ti mû maboko na mbi. Lo pensé lani mingi na ndö ti songo ti mbi na Nzapa na lo zia mbi lâ oko pëpe. Lo wa mbi ti kiri ti kpengba songo ti mbi na Nzapa na ti zia lege ni pëpe.” Antonio atene: “Mbi mû ngoi mingi ti duti na Federico. Mbi ye lani ti tene lo sara mbeto ape ti sara tënë na mbi na ndö ti aye kue, même na ndö ti vundu ti lo.” Ye ti nzoni ni ayeke so, tongana ngoi ahon lo kiri lo kpengba songo ti lo na Nzapa nga lo kiri lo ga pionnier nga wakua ti mungo maboko. Na nda ni Antonio atene: “Atâa so e yeke fadeso na yâ ti congrégation so ayeke nde nde e ngbâ nduru na mba ahon ti kozo.”

MO BÂ SO A KÄ MO?

Tongana mbeni kamarade ti mo so mo ye lo mingi atourné peko na mo na ngoi so mo yeke na bezoin ti lo mingi ayeke sara mo tongana nyen? A lingbi ti son mo mingi. Mo lingbi ti pardonné lo? Songo ti mo na lo alingbi ti kpengba ahon ti kozo?

Gbu li ti mo na ndö ti ye so asi lani na Jésus na yâ ti atanga ti lango ti lo na sese. Lo mû lani ngoi mingi ti duti na terê ti abazengele ti lo so ayeke be-ta-zo, ye so asara si ala yeke lani be-oko nga ala yeke na mbeni kpengba songo so ayeke tâ nde mingi. Jésus airi  lani ala akamarade ti lo na a yeke na lege ni (Jean 15:15). Ye oko, nyen la apassé lani na ngoi so a gbu lo? Abazengele akpe. Pierre atene lani polele so lo yeke zia Maître ti lo lâ oko ape, me tâ na bï ni so Pierre abere atene ni hinga Jésus ape.Mat. 26:31-33, 56, 69-75.

Jésus ahinga lani so lo yeke luti na lê ti ndangba tara gï lo oko. Me lo yeke lani na raison ti tene vundu asara lo, même ti tene bê ti lo ason. Me na yâ ti lisoro so lo na adisciple ti lo asara alango kete na peko ti so a zingo lo na kuâ afa pëpe so vundu asara lo, bê ti lo ason, wala lo regretté. Jésus abâ lani so lo yeke na bezoin pëpe ti fa awokongo ti adisciple ti lo, même ye so ala sara na bï so a gbu lo.

Me Jésus adë bê ti Pierre nga na tanga ti abazengele ni. Lo kiri lo fa so lo yeke na confiance na ala na lege so lo fa na ala aye na ndö ti kota kua ti fango ye na azo so ahon tanga ni kue na yâ ti mbaï ti azo. Ti Jésus, abazengele angbâ lani akamarade ti lo. Ndoye so lo yeke na ni na mbage ti ala ayeke mbeni ye so ala lingbi ti girisa ni ape. Ala yeke sara kue ti kiri ti zia Maître ti ala lâ oko pëpe. Biani, ala sara lani kua so lo mû na adisciple ti lo ti sara.Kus. 1:8; aCol. 1:23.

Mbeni ita-wali, so iri ti lo ayeke Elvira, adabe ti lo na mbeni ngoi so lo na kamarade ti lo Giuliana awara tënë, lo tene: “Na ngoi so lo tene na mbi so ye so mbi sara ason bê ti lo, a sara mbi nzoni ape. Lo yeke na raison ti sara ngonzo. Me ye so apika bê ti mbi ayeke so, lo gi bê ti lo mingi ndali ti mbi nga na ye so alingbi ti si na peko ti asarango ye ti mbi. Mbi yeke girisa lâ oko ape so lo zia lani lê ti lo na ndö ti sioni so mbi sara na lo ape, me na ndö ti sioni so mbi yeke sara na terê ti mbi wani. Mbi kiri singila mingi na Jéhovah ndali ti so mbi yeke lani na mbeni kamarade so azia nzoni ti mbi kozo na atënë ti bê ti lo.”

Mbeni nzoni kamarade ayeke sara ye tongana nyen na ngoi so songo ti ala ayeke na yâ ti kpale? Lo yeke duti nduru ti sara tënë na nzoni bê me polele na ngoi so bezoin ni ayeke dä. Kamarade tongaso ayeke duti tongana Nathan nga na Hushaï, so ala ngbâ lani be-ta-zo même na ngoi so ayeke sioni nga tongana Jésus, so ayeke lani nduru ti pardonné. Mo yeke mara ti kamarade so?