Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Mai 2017

Zia pëpe si ndoye ti mo adë

Zia pëpe si ndoye ti mo adë

“So kpengo ndia pëpe ayeke wu mingi, ndoye ti mingi ti azo ni ayeke dë dengo.”—MAT. 24:12.

ABIA: 60, 135

1, 2. (a) Atënë ti Jésus so ayeke na Matthieu 24:12 andu kozoni kue azo wa? (b) Tongana nyen la mbeti ti Kusala afa so mingi ti akozo Chrétien angbâ lani ti fa so ala yeke na ndoye? (Bâ foto so ayeke na tongo nda ti article so.)

MBENI mbage ti fä so Jésus afa na ndö ti “ngoi so aye ti ngoi so ayeke gue ti hunzi” ayeke so: “Ndoye ti mingi ti azo ni ayeke dë dengo.” (Mat. 24:3, 12). Na ngoi ti akozo Chrétien, aJuif, so atene ala yeke azo ti Nzapa, azia si ndoye ti ala na mbage ti Nzapa adë.

2 Me na ngoi ni so, mingi ti aChrétien abi terê ti ala mingi na yâ ti kua ti ‘fango nzoni tënë na ndö ti Christ’ nga ala fa so ala ye Nzapa, ala ye amba ti ala Chrétien nga na azo so amä na bê pëpe (Kus. 2:44-47; 5:42). Ye oko, ambeni zo so amû peko ti Jésus azia lani si ndoye ti ala adë.

3. Peut-être nyen la asara lani si ndoye ti ambeni Chrétien adë?

3 Jésus Christ, so a zingo lo na kuâ, atene na akozo Chrétien so ayeke na Éphèse, atene: “Ye so mbi ke na mo ayeke so: ndoye so mo yeke na ni kozo, mo zia ni awe.” (Apoc. 2:4). Mbeni raison ni alingbi ti duti so wa? Peut-être bibe ti azo ti dunia, so aye gï aye so anzere na ala, la asara ngangu na ndö ti aChrétien so  (aÉph. 2:2, 3). Legeoko tongana ti agbata mingi laso, gbata ti Éphèse ti ngoi ti akozo Chrétien asi singo lani na sarango sioni. Mosoro ayeke lani dä mingi, na mingi ni azo aye gï aye ti nginza, ti duti na ngoi ti sara aye ti bê ti ala nga ti duti nzoni. Sarango aye so anzere na ala akanga lege na ala ti fa so ala ye Nzapa nga na amba ti ala mingi. Nga, sarango sioni ye na kamene pëpe nga na lango-sioni amû ndo lani na Éphèse.

4. (a) Na alege wa ndoye ti azo adë dengo na ngoi ti e? (b) Nyen la e yeke bâ fadeso?

4 Prophétie ti Jésus so asara tënë ti ndoye ti azo so adë dengo andu ngoi ti e laso nga. Laso, ndoye ti azo na mbage ti Nzapa ayeke dë gï dengo. Azo kutu mingi atourné peko ti ala na Nzapa, na ala yeke bâ ndo na mbage ti abungbi so azo asigi na ni ti leke akpale ti azo. Tongaso, na popo ti azo so ayeke voro Jéhovah Nzapa ape, ndoye ti ala angbâ ti dë gï dengo. Me tongana ti so aye so asi na yâ ti congrégation ti akozo Chrétien na Éphèse afa, laso atâ Chrétien alingbi ti ga azo so asara gï sanka ti aye nga ala lingbi ti zia si ndoye ti ala adë. E yeke bâ fadeso aye so alingbi ti sara si (1) ndoye ti e na mbage ti Jéhovah adë, (2) ndoye so e yeke na ni ndali ti atâ tënë ti Bible adë nga (3) ndoye ti e na mbage ti aita ti e adë.

NDOYE TI E NA MBAGE TI JÉHOVAH

5. Ngbanga ti nyen la a lingbi e ndoye Nzapa?

5 Gï na oko lango so Jésus amû wango na ndö ti ndoye ti azo so adë gï dengo, lo sara tënë kozo mingi na ndö ti ndoye so ayeke kota ahon atanga ni kue. Lo tene: “‘Mo ndoye Jéhovah Nzapa ti mo na bê ti mo kue, na âme ti mo kue nga na bibe ti mo kue.’ So ayeke commandement so ayeke kota ahon atanga ni kue na a yeke kozoni la.” (Mat. 22:37, 38). Ti tâ tënë ni, tongana e ndoye Nzapa mingi, a yeke mû maboko na e ti sara ye alingbi na acommandement ti Jéhovah, ti gbu ngangu nga ti ke sioni ye. (Diko Psaume 97:10.) Ye oko, Satan na dunia ti lo ayeke sara kue ti tene e ye Nzapa ape.

6. So azo andoye Nzapa ape, ye ti peko ni ayeke so wa?

6 Bango ndo ti azo ti dunia na ndö ti ndoye ayeke na lege ni ape. Azo andoye Zo so acréé ala pëpe, me ala ‘ndoye gï terê ti ala wani’. (2 Tim. 3:2). Dunia so Satan ayeke na komandema na ndö ni ayeke maï na yâ ti azo “nzara ti mitele, nzara ti lê na sarango baba ti akungba so zo ayeke na ni”. (1 Jean 2:16). Bazengele Paul amû wango na amba ti lo aChrétien na ndö ti sarango ye alingbi na nzara ti mitele, lo tene: “Bingo bê na ndö ti mitele aye ti tene kuâ, . . . ngbanga ti so bingo bê na ndö ti mitele aye ti tene dutingo wato ti Nzapa.” (aRom. 8:6, 7). Biani, azo so amû fini ti ala kue ti gi aye ti sese wala ti sara lango-sioni, vundu asara ala nga bê ti ala ason mingi na pekoni.—1 aCor. 6:18; 1 Tim. 6:9, 10.

7. Mbeni kpale wa la azo so amû peko ti Christ ayeke tingbi na ni laso?

7 Na yâ ti ambeni kodro, azo so atene Nzapa ayeke dä ape, azo so ahinga mbilimbili ape wala Nzapa ayeke dä wala lo yeke dä ape nga na azo so amä na bê na évolution ayeke gi ti sara si azo aye Nzapa ape wala ala mä na bê na lo ape. Ala sara si azo mingi apensé so zo so amä na bê so Zo so acréé aye ayeke dä, lê ti lo ahan ape nga lo hinga ndo ape. Nga, azo ayeke gonda mingi awandara, na ye so asara si azo ayeke bi bê pëpe na ndö ti Zo so acréé aye (aRom. 1:25). Tongana e dengi mê na mara ti afango ye so, e lingbi ti gue yongoro na Jéhovah, nga ndoye ti e alingbi ti dë.—aHéb. 3:12.

8. (a) Awakua ti Jéhovah mingi atingbi na akpale wa so asara si bê ti ala anze? (b) Atënë ti dengo bê wa la e wara na Psaume 136?

8 Tongana bê ti e anze, a lingbi nga ti sara si mabe ti e awoko nga ti sara si ndoye ti e  na mbage ti Nzapa adë. Na yâ ti sioni dunia so Satan ayeke na komandema na ndö ni, ngoi na ngoi e kue e yeke tingbi na aye so asara si bê ti e anze (1 Jean 5:19). Peut-être laso e tingbi na akpale so gango mbakoro aga na ni, kpale ti seni wala kpale ti nginza. Wala vundu alingbi ti sara e ndali ti so e lingbi pëpe ti sara nzoni aye so e ye ti sara wala ndali ti so ambeni ye so e ku lani ti tene asi asi ape. Atâa akpale wa la e tingbi na ni, a lingbi e pensé lâ oko ape so Jéhovah adö e azia awe. Me a yeke nzoni e gbu li ti e na ndö ti atënë so ayeke sara si e hinga so Jéhovah ayeke ngbâ lakue ti ye e. E wara mara ti atënë so na Psaume 136:23, so atene: “Lo dabe ti lo na e na ngoi so a bi kamene na lê ti e, ndali ti so tâ ndoye ti lo angbâ lakue lakue.” Biani, tâ ndoye so Jéhovah ayeke na ni na mbage ti awakua ti lo ayeke ngbâ lakue lakue. Tongaso, e yeke na kite ape so lo yeke mä ‘toto so e yeke toto na lo ti mû maboko na e’ na lo yeke kiri tënë na ni.—Ps. 116:1; 136:24-26.

9. Nyen la amû ngangu na Paul ti ngbâ ti ndoye Nzapa?

9 Tongana ti mbeni zo ti sungo psaume, Paul awara ngangu na ngoi so lo gbu li na ndö ti maboko so Jéhovah amû na lo lakue. Paul atene: “Jéhovah ayeke zo ti mungo maboko na mbi; mbeto ayeke sara ande mbi pëpe. Nyen la zo apeut ti sara na mbi nyen?” (aHéb. 13:6). So Paul ahinga na bê ti lo kue so Jéhovah ayeke bâ lege ti lo na ndoye, ye so amû maboko na lo ti hon ndö ti akpale so lo wara. Lo zia pëpe si akpale so lo wara asara si bê ti lo anze. Même na ngoi so Paul ayeke na kanga, lo sû ambeti mingi so akpengba aita (aÉph. 4:1; aPhil. 1:7; Phm. 1). Même na ngoi so ambeni ye atara Paul ngangu, lo ngbâ ti ndoye Nzapa. Nyen la amû na lo ngangu ti sara tongaso? Lo ngbâ ti zia bê ti lo na “Nzapa ti dengo bê kue, lo so adë bê ti e na yâ ti atara kue so e wara”. (2 aCor. 1:3, 4). Tongana nyen la e lingbi ti sara ye tongana Paul na ti ngbâ ti ndoye Jéhovah mingi?

Fa ndoye ti mo ndali ti Jéhovah (Bâ paragraphe 10)

10. Tongana nyen la e lingbi ti ngbâ ti ndoye Jéhovah mingi?

10 Paul lo wani afa mbeni kpengba ye so e lingbi ti sara ti tene e ngbâ ti ndoye Jéhovah mingi. Lo tene: “Ala ngbâ ti sambela lakue.” Na pekoni, lo tene: “Ala ngbâ lakue ti sambela.” (1 aThes. 5:17; aRom. 12:12). Sarango tënë na Nzapa na lege ti sambela ayeke sara si e duti na kpengba songo na lo (Ps. 86:3). Tongana e mû ngoi mingi ti fa na Jéhovah atënë ti gbe ti bê ti e, e yeke ga nduru mingi na Babâ ti e ti yayu, ‘Lo so lo yeke mä sambela’. (Ps. 65:2). Na ndö ni, tongana e hinga so Jéhovah akiri tënë na asambela ti e, e yeke ndoye lo mingi ahon ti kozo. E yeke hinga na bê ti e kue so “Jéhovah ayeke nduru na azo kue so ayeke iri lo”. (Ps. 145:18). So e yeke na confiance so Jéhovah ayeke mû maboko na e na ndoye ayeke mû maboko na e ti hon ndö ti aye kue so atara mabe ti e.

NDOYE SO E YEKE NA NI NDALI TI ATÂ TËNË TI BIBLE

11, 12. Tongana nyen la e lingbi ti ndoye atâ tënë ti Bible mingi ahon ti kozo?

11 So e yeke aChrétien, e ndoye tâ tënë mingi. Na yâ ti Bible la e yeke wara tâ tënë. Na yâ ti sambela so Jésus asara na Babâ ti lo, lo tene: “Tënë ti mo ayeke tâ tënë.” (Jean 17:17). Tongaso, e yeke komanse ti ndoye tâ tënë tongana e gi ti wara tâ hingango ye so ayeke na yâ ti Bible (aCol. 1:10). Ye oko, a hunda ti sara ambeni ye mingi ahon gï ti wara tâ hingango ye. Bâ tongana nyen la zo ti sungo Psaume 119 amû maboko na e ti hinga ambeni ye so e bezoin ti sara ti ye Bible mingi. (Diko Psaume 119:97-100.) Tongana e diko mbeni versê na yâ ti Bible, eskê e yeke mû ngoi ti gbu li ti e na yâ ti lango ni mingi na ndö ti ye so e diko? Tongana e gbu  li ti e na ndö ti lege so e lingbi ti sara ye alingbi na tâ tënë ti Bible na yâ ti fini ti e, e yeke ndoye ni mingi ahon ti kozo.

12 Zo ti sungo psaume ni atene nga, atene: “Atënë ti mo anzere na yanga ti mbi mingi, a nzere na yanga ti mbi ahon mafuta ti otoro.” (Ps. 119:103). Ambeti so bungbi ti Jéhovah asigi na ni so atënë ti yâ ni alondo na yâ ti Bible, a leke ni tongana pendere kobe. Tongana e yeke te mbeni kobe so e ye ni mingi, peut-être e yeke mû ngoi mingi ti te ni. Legeoko nga, e ye ti mû ngoi mingi ti manda ye. Tongana e sara tongaso, e yeke ye ande mingi atâ ‘tënë so anzere’, na a yeke duti ngangu na e ape ti dabe ti e na aye so e diko nga e yeke sara kua na ni ti mû maboko na ambeni zo.—Zo-ti. 12:10.

13. Nyen la amû maboko na Jérémie ti ye atâ tënë ti Mbeti ti Nzapa mingi? A sara nyen na lo?

13 Prophète Jérémie aye lani atâ tënë ti Mbeti ti Nzapa mingi. Lo tene: “Mbi wara atënë ti mo, na mbi te ni awe, tënë ti mo aga ye so asara si mbi yeke na ngia, ye so asara si bê ti mbi anzere. Ndali ti so iri ti mo, Jéhovah ti aturugu, ayeke na ndö ti mbi.” (Jér. 15:16). Jérémie agbu li ti lo mingi na ndö ti atënë ti Nzapa so ayeke nzoni mingi nga lo ye ni mingi. A nzere na lo ti sara kua na iri ti Jéhovah nga ti fa tënë ti lo. Tongana e ye atâ tënë ti Bible mingi, e yeke hinga so ti duti Témoin ti Jéhovah nga ti fa tënë ti Royaume ayeke mbeni kota pasa na lâ ti nda ni so.

Fa ndoye ti mo ndali ti atâ tënë ti Bible (Bâ paragraphe 14)

14. Ambeni ye wa la e lingbi ti sara ti kiri ti ye atâ tënë ti Bible mingi?

14 Ambeni ye wa la e lingbi ti sara ti kiri ti ye atâ tënë ti Bible mingi? Tongana e gue lakue na abungbi, e lingbi ti kiri ti ye atâ tënë ti Bible mingi. Mandango Bible yenga oko oko na lege ti Tour ti Ba Ndo ayeke kota ye so na lege ni a yeke fa ye na e. Tongana e ye ti mä yâ ti tënë so e yeke manda ni nzoni, a lingbi e leke a-article ni oko oko nzoni kozoni. Na tapande, e lingbi ti gi na yâ ti Bible aversê so a fa atënë ti yâ ni pëpe. Laso, azo mingi alingbi ti gue na ndö ti site jw.org ti téléchargé Tour ti Ba Ndo wala ti bâ ni na ndö ti application ti JW Library na ayanga ti kodro mingi. Tongana e sara kua na ambeni téléphone wala tablette, a yeke mû lege na e ti  bâ hio atënë ti aversê ti article oko oko kue so e yeke manda ni. Me atâa kode wa la e sara kua na ni, ti diko aversê ni nzoni nga ti gbu li na ndö ni ayeke sara si e kiri e ye atâ tënë ti Bible mingi.—Diko Psaume 1:2.

NDOYE SO E YEKE NA NI NDALI TI AITA

15, 16. (a) Ti gue oko na Jean 13:34, 35, a lingbi e sara nyen? (b) Tongana nyen la ndoye so e yeke na ni ndali ti aita ti e ague oko na ndoye so e yeke na ni ndali ti Nzapa nga na Bible?

15 Na ndangba bï ti Jésus na ndö ti sese, lo tene na adisciple ti lo: “Mbi yeke mû na ala mbeni fini commandement: Ala ndoye terê na popo ti ala. Legeoko tongana ti so mbi ndoye ala, zia ala nga ala ndoye terê na popo ti ala. A yeke na lege ti ye so si azo kue ayeke hinga ande so ala yeke adisciple ti mbi: tongana ala yeke na ndoye na popo ti ala.”—Jean 13:34, 35.

16 Ndoye so e yeke na ni ndali ti aita ti e ti bungbi ague oko na ndoye so e yeke na ni ndali ti Jéhovah. Tongana e ndoye Nzapa pëpe, e lingbi pëpe ti ndoye aita ti e. Bazengele Jean atene: “Zo so andoye ita ti lo pëpe, ita ti lo so lo bâ lo, lo lingbi pëpe ti ndoye Nzapa so lo bâ lo pëpe.” (1 Jean 4:20). Ndoye ti e ndali ti Jéhovah nga ndali ti aita ti e ague oko na yengo so e ye na Bible. Ngbanga ti nyen? Ngbanga ti so tongana e ye mingi atâ tënë ti Bible, a yeke pusu e ti ye na bê ti e kue ti sara ye ague oko na acommandement ti Bible so atene na e ti ndoye Nzapa nga na aita ti e.—1 Pi. 1:22; 1 Jean 4:21.

Fa ndoye ti mo ndali ti aita (Bâ paragraphe 17)

17. Ambeni ye wa la e lingbi ti sara ti fa ndoye ti e?

17 Diko 1 aThessalonicien 4:9, 10. Ambeni ye wa la e lingbi ti sara ti fa na aita ti congrégation ti e so e ndoye ala? Peut-être mbeni ita so aga mbakoro awe abezoin ti tene a mû maboko na lo ti gue na abungbi. Peut-être mbeni wali-mua abezoin ti tene a mû maboko na lo ti leke ambeni ye na terê ti da ti lo (Jacq. 1:27). Aita ti e so bê ti ala anze, vundu ahon ndö ti ala wala ala yeke na yâ ti akpale abezoin ti tene e mû maboko na ala, e kpengba ala nga e dë bê ti ala (aProv. 12:25; aCol. 4:11). E yeke fa so e ndoye “ala so ayeke aita ti e na yâ ti mabe” na lege ti atënë ti yanga ti e nga na asarango ye ti e.—aGal. 6:10.

18. Nyen la ayeke mû maboko na e ti hon ndö ti akete kpale ti mango terê na aita ti e?

18 Bible atene lani so “na lâ ti nda ni” ti aye ti ngoi so, so ayeke sioni, azo mingi ayeke duti azo ti kion nga ala yeke sara bê ti ye (2 Tim. 3:1, 2). E so e yeke aChrétien, a lingbi e sara ngangu ti ngbâ ti ndoye Nzapa, atâ tënë ti Bible nga na amba ti e aChrétien mingi. Tâ tënë, ngoi na ngoi ambeni kete kete ye alingbi ti sara si e mä terê nzoni ape na aita ti e. Ye oko, tongana ndoye apusu e ti leke akpale kue na nzoni bê, a yeke ga na anzoni ye mingi na aita kue ti yâ ti congrégation (aÉph. 4:32; aCol. 3:14). Tongaso, zia e zia lâ oko ape si ndoye ti e adë. Me zia e ngbâ ti ndoye Jéhovah, Bible nga na aita ti e mingi.