Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Mai 2017

 SANGO NA NDÖ TI MBAÏ TI BUNGBI TI E

“E yapu mingi nga e yeke na ndoye mingi ahon ti kozo”

“E yapu mingi nga e yeke na ndoye mingi ahon ti kozo”

NA NDAPRE ti mbeni vendredi na septembre ti ngu 1922, ndo akomanse ti chauffé, na azo 8000 aga na yâ ti mbeni da so a sara kota bungbi dä. Président ti kota bungbi ni atene so na ngoi ti kota kapa so, zo kue alingbi ti sigi tongana ti so bê ti lo aye, me lo yeke lï encore ape.

Ti zi yanga ti kota bungbi ni, a mû mbeni ngoi ti he abia, na pekoni, Ita Joseph Rutherford ague aluti na ndö ti estrade. Mingi ti azo so aga aduti ayeke ku ti mä tënë so lo yeke tene. Ndali ti ndowa, ambeni zo ahon kâ ahon ge. Ita Rutherford awa ala ti duti ti mä tënë. Kozo na kota bungbi ni, a kanga mbeni kota bongo so a roulé ni na nduzu. Na ngoi so lo komanse diskur ti lo, eskê lê ti mbeni zo atï na ndö ti kota bongo so a kanga ni so?

Ita Rutherford amû diskur so li ni ayeke “Royaume ti yayu aga nduru awe.” Na ngoi so lo yeke fa tongana nyen la aprophète ti ândö afa tënë ti gango ti Royaume ni na mbeto pëpe, go ti lo atoto ngangu na yâ ti kota da ni teti ngbonga oko na ndambo. Tongana lo si na kota mbage ti diskur ni, lo hunda ndo, lo tene: “Ala mä na bê so Gbia ti gloire akomanse ti komande awe?” Azo so aga na kota bungbi ni adekongo, atene: “En!”

Ita Rutherford atene na kota go, atene: “Tongaso, amolenge ti Nzapa so ayeke na nduzu na ndö ti aye kue, ala kiri na yâ ti kua ti fango tënë! Ala bâ nzoni, Gbia ni akomande! Ala yeke awatokua ti lo. Tongaso ala fa, ala fa, ala fa.”

Na ngoi ni so, a zi yâ ti bongo so a roulé ni si a kanga ni na nduzu so, na tënë so ayeke na lê ni ayeke: “Ala fa tënë ti Gbia ni na Royaume ni.”

Ray Bopp atene: “Tënë so ayengi azo kue so aga.” Anna Gardner atene: “Pikango maboko ti azo asara si aplanche ti da ni ayengi.” Fred Twarosh atene: “Azo kue so aga alondo tongana zo oko.” Evangelos Scouffas atene: “A yeke mo bâ mo tene mbeni kota ngangu ayô e na nduzu, na e londo nga yâ ti lê ti e asi na ngu ti lê.”

Azo mingi so aga ayeke fa lani nzoni tënë ti Royaume. Ye oko, ti fadeso ala bâ so a mû na ala fini ngangu. Ethel Bennecoff atene so aWamandango Bible ague, “[ala] yapu mingi nga [ala] yeke na ndoye mingi ahon ti kozo.” Odessa Tuck, so ayeke lani na ngu 18 na ngoi ni so, akiri na peko ti kota bungbi ni na lo leke na bê ti lo ti kiri tënë na hundango ndo so: “Zo wa la ayeke gue?” Lo tene: “Mbi hinga lani pëpe ndo so mbi yeke gue dä wala tongana nyen la mbi yeke gue wala ye so mbi yeke gue ti sara. Oko ye so mbi hinga ni lani ayeke so mbi ye ti sara ye tongana Ésaïe, so atene: ‘Mbi la! Tokua mbi!’” (És. 6:8). Ralph Leffler atene: “Lango ni so, so ayeke kota lango mingi, ayeke lani biani tongo nda ti fango tënë ti Royaume so laso amû ndö ti sese kue.”

A dö bê ti ape so kota bungbi so a sara lani na ngu 1922 na Cedar Point, na Ohio ayeke kota mingi na yâ ti mbaï ti bungbi ti Jéhovah. George Gangas atene:  “Kota bungbi so asara si mbi ye ti manke mbeni kota bungbi oko ape.” Lo dabe ti lo so lo manke mbeni kota bungbi lâ oko ape. Julia Wilcox atene: “Mbi lingbi pëpe ti fa ngia so mbi yeke wara lakue tongana mbi diko na yâ ti ambeti ti e tënë ti kota bungbi so a sara na Cedar Point na ngu 1922. Lakue mbi yeke tene: ‘Merci Jéhovah so mo mû lege na mbi ti duti dä.’”

Legeoko nga laso, mingi ti e e yeke dabe ti e na ngoi ti mbeni kota bungbi so anzere na e mingi nga so asara si e yapu nga e ye kota Nzapa ti e nga na Gbia ti lo mingi. Tongana e yeke gbu li ti e na ndö ti angoi tongaso, a yeke pusu e nga kue ti tene: “Merci Jéhovah so mo mû lege na mbi ti duti dä.”